Hrunfræði Háskóla Íslands

Viðskipta- og hagfræðideild Háskóla Íslands hleypti af stokkunum haustið 2006 rannsóknaverkefninu Útrás íslenskra fyrirtækja 1998-2007.

Margt bendir til þess að árangur íslensku útrásarfyrirtækjanna sé einstakur og til eru ýmsar kenningar um hvað hefur gert þennan árangur mögulegan. En er hægt að staðfesta að svo sé og draga lærdóm af íslensku útrásinni sem er gagnlegur fyrir stjórnendur, ráðgjafa, fræðimenn og aðra? Viðskiptafræðistofnun hefur nú sett af stað metnaðarfullt rannsóknarverkefni til að finna svör við þessari spurningu og ýmsum öðrum.

 

Ofanritað er fengið úr fréttatilkynningu 18. október 2006 þar sem verkefnið er kynnt. Sannfæringin fyrir útrásinni svífur yfir vötnum og ætlunin er útmála snilli íslensku kaupsýslumannanna.

Hrunfræði Háskóla Íslands er væntanlega næsta verkefni og yrði það um glópsku fræðimanna, einkum þeirra sem kenna í viðskipta- og hagfræðideild.

Símtöl Hreins við Bjarna Ben og Hannes Hólmstein

Stóra símamálið, Hreinn Loftsson Baugsmaður gegn Hannes Hólmsteini Davíðsmanni, fær nánari útlistun hjá Hannesi Hólmsteini í grein í dag.

Hreinn þjarkaði fyrir skemmstu við annan sjálfstæðismann, Bjarna Benediktsson, þar sem Hreinn sagði Bjarna símadóna.

Hvorttveggja eru þetta athyglisverð símtöl, en jafnframt vísbending um hvernig fer þegar gamlir samherjar verða óvinir. 

Áminning um að val á vinum er vandaverk.

Auðmannaafætur

Útrásarauðmenn eru afætur samfélagsins. Auður þeirra var fenginn með lygi og blekkingum. Þeir stálu sparifé fólks, sólunduðu fé lífeyrissjóða, gjaldfelldu orðspor þjóðarinnar og skiluðu engum varanlegum verðmætum. Auðmennirnir brutu lög og grófu undan almennu siðferði. 

Þrátt fyrir fjármálahryðjuverk auðmanna ganga þeir lausir og eru taldir góðir pappírar. Einkum og sérílagi er Arion banka umhugað að halda lífinu í mestu útrásarsubbunum.

Frjálshyggjufélagið kemur með ályktun sem biður auðmönnum vægðar án þess að færa rök fyrir tilgangi illa gerðu íslensku auðmannanna. Fundur frjálshyggjumanna var haldinn á krá. Hversu drukknir voru menn orðnir þegar ályktunin var skrifuð og samþykkt?