Skoðanakönnun þöguð í hel

Í byrjun október stóð Gallup fyrir skoðanakönnun þar sem spurt var hvernig fólk myndi greiða atkvæði ef þjóðaratkvæðagreiðsla yrði núna um aðild að Evrópusambandinu. Þessi könnun hefur ekki birst. Tveir aðilar eru líklegastir til að hafa gert könnunina, utanríkisráðuneytið og eða sjálft Evrópusambandið.

Líklega eru niðurstöður könnunarinnar á þann veginn að aðildarsinnar vilji helst þegja um þær.

 

Smávegis ESB-ólétta ekki til

Umsókn um aðild að Evrópusambandinu er dautt mál nema öflug ríkisstjórn standi heil að baki umsóknar og hafi sterka samfélagskrafta með sér í leiðangrinum. Engu slíku er til að dreifa hér á landi. Samfylkingin með 18 prósent fylgi er einangruð með umsóknina í fanginu.

ASÍ-þing fyrir tveim vikum þagði þunnu hljóði um umsóknina; Viðskiptaráð ályktaði fyrir tíu dögum og þaðan koma ekki aukatekið orð um umsóknina.

Grunnatvinnuvegir þjóðarinnar, landbúnaður og sjávarútvegur, eru alfarið á móti umsókninni.

Við eigum að draga umsóknina tilbaka hið snarasta.

Meinum ekkert með þessu

Beðið eftir Sjálfstæðisflokknum

Á stjórnarheimilinu er ekki lengur spurt hvort heldur hvenær ríkisstjórn springur. Tvær forsendur þurfa að vera fyrir hendi samtímis. Í fyrsta lagi þarf annar hvor stjórnarflokkurinn að hafa haldgóða skýringu á því hvers vegna stjórnarsamstarfinu er slitið. Í öðru lagi verður að liggja fyrir áætlun um fyrirkomulag ríkisstjórnar fram að kosningum.

Sjálfstæðisflokkurinn er í lykilstöðu. Gefi flokkurinn það út að hann sé tilbúinn að veita minnihlutastjórn Vinstri grænna hlutleysi fram að kosningum er búið að uppfylla seinni forsenduna.

Fyrri forsendu, haldgóða skýringu á stjórnarslitum, er auðvelt að uppfylla þar sem á milli Samfylkingar og Vinstri grænna er trúnaðarbrestur. Forysta Samfylkingar hefur leitað hófanna hjá Sjálfstæðisflokknum um myndun nýrrar ríkisstjórnar samanber þessi orð

undanfarnar vikur og mánuði hafa einstakir þingmenn Samfylkingar í trúnaðarsamtölum við einstaka þingmenn Sjálfstæðisflokks leitað eftir samstarfi þeirra flokka tveggja með takmörkuðum árangri.