Sendinefnd Samfylkingar til Írlands

Söfnun er hafin til að öngla saman nægu fé fyrir Samfylkinguna svo að hún geti sent nefnd til Írlands að skoða ástandið í hamingjuríki Evrópusambandsins. Meðal þess sem sendinefndin ætlar að meta er

a) 14 prósent atvinnuleysi

b) ríkisgjaldþrot

c) evra sem kæfir samkeppnihæfni Íra

d) landflótti, einkum ungs fólks

Þegar sendinefnd Samfylkingar kemur heim mun flokkurinn sækja um IPA styrki frá Evrópusambandinu til að aðlaga Ísland að írskri tilveru í Evrópusambandinu.

Írar í viðræðum við ESB um fjárhagsaðstoð

Snúningar Jóns Ásgeirs og meðhlaupararnir

Jón Ásgeir Jóhannesson og viðskiptafélagar hans tóku marga snúninga á íslenskum fyrirtækjum. Snúningarnir voru þannig skipulagðir að Jón Ásgeir og félagar græddu mest, aðrir smávegis en flestir töpuðu. Til að framkvæma þessa snúninga þurfti aðstoð frá fjölda meðhlaupara úr fjármálakerfi, lífeyrisjóðum og endurskoðendum.

Meðhlaupararnir eru enn að störfum og það þarf að ná í skottið á þeim.  Verði þeim ekki verð viðeigandi skil munu þeir bíða færis til að endurtaka útrásarleikinn.

Ákvað verð og keypti mest

ESB, Samfylking og Össur; takk fyrir

Þegar Össur Skarphéðinsson atti kappi við Ingibjörgu Sólrúnu um formennsku í Samfylkingunni fylktu andstæðingar flokksins sér á bakið framboð Össurar. Óopinbert leyndarmál íslenskra stjórnmála er að Össur sé ótrúverðugasti stjórnmálamaður lýðveldissögunnar.

Fyrir andstæðinga aðildar Íslands að Evrópusambandinu er hvalreki að Samfylkingin almennt og Össur sérstaklega beri fram kröfuna um að Ísland gangi í sambandið.

Tímasetningin á umsókn Íslands er jafnframt bónus fyrir fullveldissinna. Taugaveiklunarumsókn strax eftir hrun gat aldrei orðið trúverðug. Umsóknin er lögð fram á sama tíma og Evrópa engist í evrukvalræði og efasemdir eru um framtíð myntsvæðisins.

Evrópusambandið, Samfylkingin og Össur eru þríein von heilbrigðrar skynsemi á Íslandi að koma megi fyrir kattarnef þrem þursum í einu lagi. 

Ögmundur, tyrkneski biðsalurinn og Samfólýðræði

Ögmundur Jónasson dómsmálaráðherra skrifar í Morgunblaðið í dag og spyr hvers vegna viðræðum við Evrópusambandið sé ekki hespað af og þjóðaratkvæði skeri úr um hvort við viljum inn eða ekki. Embættismenn, sem fá borgað til að hagræða sannleikanum, segja Ögmundi að fyrst þurfi rýnivinnu í rúmt ár áður en hægt er að hefja samningaviðræður.

Timo Summa sendiherra Evrópusambandsins á Íslandi hefur ítrekað sagt að tæknilega sé hægt að afgreiða samningana við Ísland á fáum mánuðum. Það sé hins vegar alfarið undir íslenskum stjórnvöldum komið hver hraðinn verði á ferlinu.

Evrópusambandið endurskoðaði ferlið við upptöku nýrra ríkja um aldamótin. Aðlögun nýrra ríkja að lögum og reglum Evrópusambandsins er skráð meginregla, eins og margoft hefur komið fram. Ferlið sem hleypir nýjum ríkjum inn í sambandið er líka með kannselísku svartholi sem kallast tyrkneski biðsalurinn og þar er Ísland í dag.

Tyrkland hefur í hálfa öld reynt að komast inn í Evrópusambandið. Í krafti mannfjölda yrði Tyrkland stærsta ríki ESB og réði fyrir málum ásamt Frökkum og Þjóðverjum. Ráðandi öfl í ESB vilja ekki Tyrki inn í sambandið og því var tyrkneski biðsalurinn hannaður inn í ferlið um aldamótin.

Ögmundur segir frá því í Morgunblaðsgreininni að Vinstri grænir hafi í stjórnarmyndunarviðræðum vorið 2009 boðið Samfylkingunni tvöfalda þjóðaratkvæðagreiðslu um Evrópumál. Fyrst yrði kosið um það hvort Ísland ætti að sækja um aðild. Samfylkingin hafnaði enda öllum ljóst að vilji Íslendinga stendur ekki til aðildar.

Lýðræðishugmyndir Samfylkingar eru valdatæknilegar. Forysta flokksins margnauðgaði lýðræðinu þegar ESB-stefnunni var troðið ofan í flokksmenn haustið 2002. Spurningin sem var lögð fyrir flokksmenn er út af fyrir sig stúdía í undirferli.

Á það að vera stefna Samfylkingarinnar að Íslendingar skilgreini samningsmarkmið sín, fari fram á viðræður um aðild að Evrópusambandinu og að hugsanlegur samningur verði síðan lagður fyrir þjóðina til samþykktar eða synjunar?

Framkvæmdastjórn flokksins hafnaði óskum um að spurningin yrði orðuð ótvírætt, t.d. ,,Á það að vera stefna Samfylkingarinnar að Ísland sæki um aðild að Evrópusambandinu?"  Forysta flokksins var búin að ákveða niðurstöðuna og við það sat.

Samfólýðræðið mun felast í því að kippa Íslandi úr tyrkneska biðsalnum þegar mestar líkur eru á að aðild Íslands verði samþykkt í þjóðaratkvæðagreiðslu. Samfylkingin og Evrópusambandið munu bera fé á einstaklinga, stofnanir og félagasamtök og freista þess að kaupa fylgi við aðild.

Samfylkingin er komin í verktöku hjá Evrópusambandinu að innlima Ísland í Brusselvaldið.