Embættismaður viðurkennir aðlögun

Högni Kristjánsson skrifstofustjóri í utanríkisráðuneytinu hélt kynningu í Háskóla Íslands í vikunni á umsóknarferlinu sem Ísland er í gagnvart Evrópusambandinu. Aðspurður viðurkenndi Högni að Ísland væri í aðlögunarferli að Evrópusambandinu enda væri það eina leiðin inn í sambandið.

Högni sagði jafnframt að starfsmenn utanríkisráðuneytisins reyndu að fá undanþágu frá aðlögunarferlinu. Aðlögunarferlið var tekið upp af Evrópusambandinu áður en sambandið tók Austur-Evrópuríki í byrjun aldarinnar. Íslensku embættismennirnir vilja fá viðræður með sömu forsendum og Norðurlandaþjóðir fengu á tíunda áratug síðustu aldar. Þá var samið án þess að umsóknarríkin breyttu einu eða neinu hjá sér á viðræðustigi.

Ólíklegt er að Evrópusambandið breyti reglum um upptöku nýrra ríkja til að koma til móts við vandræðaganginn í umsókn Samfylkingarinnar um aðild fyrir Ísland. 

ESB setur skilyrðin eins og kemur fram í  bréfi framkvæmdastjórnarinnar frá í vetur um stöðu Ísland við upphaf aðlögunarferlis.

Efforts to align legislation with the acquis and to ensure its implementation and enforcement need to continue. Serious efforts will be required particularly in the areas of fisheries, agriculture and rural development, environment, free movement of capital, and financial services in order to meet the accession criteria.

Það má líka velta fyrir sér trúverðugleika umsóknar Íslands þegar beðið er um undanþágur frá aðlögunarferli til að fá undanþágur frá meginreglum sambandsins.

 

Undanþágubetlararnir frá Íslandi hljóta að kalla fram bros á vörum embættismanna í Brussel. Hláturinn sem  Össur uppskar á blaðamannafundi í sumar verður betur skiljanlegur.

 

VG ræðir um utanríkismál

Gjaldþrot Reykjanesbæjar staðfest

Ríkissósíalismi Árna Sigfússonar og félaga í Reykjanesbæ er gjaldþrota. Í góðærinu sólundaði Árni eigum bæjarfélagins og braskaði með andvirðið. Hugmyndafræði Árna og félaga var að blanda sem mest saman opinberum rekstri og einkarekstri. Aðeins kjánar trúa því að opinber rekstur komi vel út úr slíku samkrulli.

Þegar braskið með eigur bæjarfélagsins skilaði engu öðru en skuldafjalli færði Árni út kvíarnar og samdi við kanadískan raðbraskara um kaup á HS - Orku. Stofnað var skúffufyrirtæki í Svíþjóð, Magma-Energy, til að komast hjá íslenskum lögum.

Skilanefnd ætti að taka yfir rekstur Reykjanesbæjar og gefa Árna Sigfússyni frí frá opinberum störfum.

Reykjaneshöfn getur ekki greitt lán

Krónan-evran; þjóðríki eða hjálenda

Íslendingar ákváðu fyrir hundrað árum að betra væri að hafa forræði eigin mála hér heima fremur en í útlöndum. Ýmsir (les: samfylkingarfólk og líkt þenkjandi) vilja endurskoða þessa ákvörðun og gera Ísland að hjálendu með því að flytja innlendar valdheimildir til Brussel.

Hjálendufólkið er upp til hópa síngjarnt frekjulið sem myndaði félaglegt og pólitískt bakland útrásarinnar. Rökin sem helst hafa gagnast þessu liði er að krónan sé ónýtur gjaldmiðill og sé sjálfstæður hrunvaldur. Staðreyndir segja annað. Grikkland og Írland eru með evru en urðu samt fyrir hruni.

Tryggvi Þór Herbertsson þingmaður og hagfræðingur gerir ágætlega grein fyrir hagfræði gjaldmiðlaumræðunnar og sýnir skilmerkilega fram á að spurningin snúist ekki um mynt heldur hagstjórn.

Tryggvi gerir tilboð um að binda í lög eftirfarandi fjármálareglu

Fjármálareglan felst í að ríkisútgjöld vaxi ekki meira á ári en sem nemur meðalhagvexti á mann næstliðin 10 ár.
Eingöngu verði heimilt að víkja frá þessari reglu í undantekningartilfellum og þá með minnst 2/3 hlutum atkvæða á Alþingi.

Hjálendufólkið mun aldrei samþykkja þessa reglu. Hjálendufólkið vill inn í Evrópusambandið til að komast í fleiri og stærri sukksjóði.

 

Æra og auður

Baldur Guðlaugsson fyrrum ráðuneytisstjóri fjármálaráðuneytis kemur fyrir sem viðkunnanlegur hvítflibbi. Hann er sakaður um að hafa nýtt sér innherjaupplýsingar og selt bréf í Landsbankanum fyrir 200 milljónir króna rétt fyrir hrun.

Baldur græddi fé en tapaði ærunni - burtséð frá dómsniðurstöðu.

Lýsti sig saklausan

Er Arngrímur Ísberg tiltekinn héraðsdómari?

Minnisblað sem birtist á blaðsíðu tvö í Fréttatímanum í dag segir frá því að ,,tiltekinn héraðsdómari" sé í rannsókn ákæruyfirvalda þar sem grunur leikur á refsiverðri háttsemi í ,,viðamiklu sakamál." Minnisblaðið er hluti af gögnum sem lögregla hefur gert upptæk.

Arngrímur Ísberg héraðsdómari dæmdi í Baugsmálinu sem óneitanlega var viðamikið. Hann varð frægur fyrir tvennt. Í fyrsta lagi að vera fyndinn og í öðru lagi að leggja sig í líma við að úrskurða sakborningum í vil.

Líkur eru á að Arngrímur verði einnig víðkunnur fyrir að vera forspár. Í þessari frétt mbl.is frá árinu 2007 er haft eftir honum: ,,Þetta ætlar að endast okkur."  Allt þegar þrennt er.

Sjálfstæðisflokkurinn og siðferðiskjarninn

Sjálfstæðisflokkurinn er í kreppu. Á velmektarárum sínum fyrir hrun gat hann breitt út faðminn og verið nær öllum skjól; óbreytti launþeginn, kúlulánþeginn og auðmaðurinn áttu allir sína vistarveru í móðurflokki íslenskra stjórnmála. Endurskoðun á stefnu og grunngildum flokksins fer hljóðlega.

Ívar Páll Jónsson blaðamaður skrifar brýningu í Morgunblaðið að flokkurinn verði ábyrgur í efnahagsmálum og taki ekki þátt í atkvæðakaupum með því að lofa aðskiljanlegum hópum þessu og hinu á kostnað ríkisins. Kúlulánþeginn og fyrrum varaformaður Sjálfstæðisflokksins, Þorgerður Katrín Gunnarsdóttir, greip til varna fyrir stefnu atkvæðakaupa og varði einnig samfylkingarlínu sína að Ísland ætti að innlimast í Evrópusambandið.

 Munurinn á málflutningi Ívars Páls og Þorgerðar Katrínar er að sá fyrrnefndi geymir siðferðiskjarna, um ábyrgð og afleiðingar þess að láta ekki tekjur og útgjöld stemma, en varaformaðurinn fyrrverandi býður 2007-bland-í-poka þar sem afleiðingarnar af röngum ákvörðunum fást afskrifaðar á kostnað annarra.