Svikráð ríkisstjórnarinnar

Ríkisstjórnin ætlar að keyra Icesave-frumvarpið í gegn fyrir áramót, segja ráðherrarnir Steingrímur J. og Gylfi Magnússon. Samkomulagið sem gert var milli stjórnar og stjórnarandstöðu í gær fól í sér að þingið myndi hleypa frumvarpinu úr 2. umræðu til nefndar. Ef stjórnarandstaðan hleypir málinu úr 2. umræðu er hún búin að afsala sér sínu sterkasta vopni, að ræða málið í tætlur.

Ríkisstjórnin lofar að gera athugun á frumvarpinu í nefnd fyrir þriðju umræðu. Það loforð er haldlaust þegar tveir ráðherrar segjast ætla að fá frumvarpið samþykkt fyrir áramót.

Icesave-frumvarpið á auðvitað að fara aftur í nefnd til frekari vinnslu og fresta á 2. umræðu fram á vor.

Eymd handa hverju heimili

Ríkisstjórn Jóhönnu og Steingríms J. færir sérhverju íslensku heimili eymd með hærri sköttum og niðurskurði. Víst þarf ríkisstjórnin að mæta hruninu með tekjuafgangi og óhjákvæmilegt er að álögur á almenning hækki.

Tiltrú ríkisstjórnarinnar skiptir máli þegar þjóðin metur hvort hún beri eymdarkjörin án þess að mögla. Ríkisstjórnin fær ekki stuðning almennings þegar hún ætlar að henda að minnsta kosti 800 milljörðum króna í Icesave-hítina. Ekki heldur vekur það traust að einum og hálfum milljarði króna verði brennt á altari umsóknar Samfylkingarinnar um aðild að Evrópusambandinu.

Heildarmyndin sem blasir við er að ríkisstjórn Jóhönnu Sigurðardóttur er ekki starfi sínu vaxin.

Rætt um skattamál á Alþingi

Icesave-plottið er á mörgum hæðum

Frestun Icesave-frumvarpsins gæti framlengt líf ríkisstjórnarinnar þar sem óvíst er um stuðning þingmanna Vinstri grænna. Frestunin gæti líka verið krókur stjórnar á móti bragði andstöðunnar. Eftir að frumvarpið fer úr annarri umræðu eru vopn slegin úr höndum minnihlutans. Í þriðju umræðu er ræðutími takmarkaður.

Verkefni stjórnarandstöðunnar er að ganga svo frá samkomulagi við stjórnarflokkana að viðspyrna sé gegn gerræði sem ríkisstjórnin er líkleg til að beita.

Markmiðið er að ná bærilegum samningum við Breta og Hollendinga. Ef það kostar líf ríkisstjórnarinnar verður svo að vera.

Þingfundur hafinn á Alþingi