Ríkisstjórnin á endastöð, ekki þjóðin

Ríkisstjórn Jóhönnu Sigurðardóttur er komin á endastöð með Icesave-málið. Jóhanna hefur viðurkennt að stjórnin komist ekki lengra með málið og þá er rétt að ríkisstjórnin segi af sér. Aðrir taka við keflinu og taka upp nýjar samningaviðræður við Breta og Hollendinga.

Í þjóðfélaginu er enginn áhugi að taka þátt í niðurlægingu í boði Samfylkingar og Vg. Það liggur fyrir að stjórnarandstaðan er á móti síðasta útspili stjórnarinnar og það þýðir að Ögmundur og félagar fá það hlutverk að fella Icesave-málið og ríkisstjórnina í leiðinni.

(Viðbót: Össur Skarphéðinsson sagði í Sjónvarpsfréttum að vegna afsagnar Ögmundar hafi betri niðurstaða fengist en ella. Af því leiðir að ef ríkisstjórnin segir af sér fáum við enn hagfelldari útkomu.)

 

 

Lengra varð ekki komist

Ögmundur kann pólitíska stafrófið

Forsenda þess að Ögmundur leggist gegn síðustu Icesave-útgáfu ríkisstjórnarinnar er að fyrir liggi að stjórnarandstaðan sé á móti. Það hefur engan pólitískan tilgang fyrir Ögmund að hafna útspili stjórnarinnar ef stjórnarandstaðan ætlar að hleypa málinu í gegn.

Sjálfstæðisflokkur, Framsóknarflokkur og þingmenn Hreyfingarinnar verða að gefa sig upp og segja hvað þeir standa fyrir. Það er útgjaldalítið fyrir stjórnarandstöðuna að lýsa yfir afstöðu sinni. Ögmundur, og þeir sem fylgja honum að málum í Vg, eru aftur á milli steins og sleggju í hverju einasta máli. 

Það er skynsamlegt af Ögmundi að doka við og sjá hverju fram vindur.

Ögmundur: Jákvæðar breytingar en of snemmt að lýsa yfir samþykki

Icesave-stjórnin er fallin

Ríkisstjórn Jóhönnu Sigurðardóttur féll um leið og Bretar og Hollendingar höfnuðu fyrirvörum Alþingis á ríkisábyrgð á Icesave-reikningum. Ríkisstjórnin ber ábyrgð á upphaflegu hörmungarsamningunum og verður að axla ábyrgðina fyrr en seinna.

Þau rök Jóhönnu og Steingríms J. að annað ríkisstjórnarmynstur sé ekki í kortunum og því verði stjórnin að sitja áfram eru helber þvættingur. Minnihlutastjórn getur auðveldlega tekið við og lóðsað fjárlagafrumvarpið í gegnum þingið og staðið vaktina fram á vor þegar efnt yrði til þingkosninga. Ef Alþingi kemur sér ekki saman um minnihlutastjórn yrði utanþingsstjórn kvödd til starfa.

Augljóst er að Ögmundur, Liljurnar og Ásmundur í Vg geta ekki fallist á afslátt af fyrirvörum Alþingis. Þau eru fólkið sem þjóðin treystir og svo heppilega vill til að staðfasti kjarninn í Vg er í oddaaðstöðu í málinu.

Rökin fyrir ríkisstjórnarsamstarfi Vg og Samfylkingar eru til muna veikari en rökin fyrir afslætti á fyrirvörum Alþingis.

Valið er einfalt. Við segjum nei.

 

Ríkisstjórnarfundur um Icesave