Réttlæti og verðmæti

Fréttir af skilanefndum bankanna eru fáar og strjálar. Þær fréttir sem berast eru ekki góðar. Milestonebræður áttu að fá upp í hendurnar reksturinn sem þeir keyrðu í þrot með loforði um bónus ef vel gengi. Með óljósum rökum um björgun verðmæta átti að afhenda fífldjörfum auðmönnum rekstur sem þeir keyrðu í þrot.

Skilanefndir bankanna eru í vinnu hjá þjóðinni sem á skuldirnar. Áður en nefndirnar hugsa um peningaleg verðmæti ættu þær að hafa tvennt annað í huga.

Í fyrsta lagi að það er ekki góð forvörn að verðlauna áhættu. Þjóðin er í núverandi vanda vegna þess að auðmenn tóku óheilbrigða áhættu í sínum rekstri. Með því að gefa þeim reksturinn á silfurfati og skilja skuldirnar eftir er hvatt til áhættu. Fjármálaleg fíflska er beinlínis verðlaunuð.

Í öðru lagi er það spurningin um réttlæti. Drápsklyfjar eru núna lagðar á almenning vegna útrásardraums auðmanna sem varð að þjóðarmartröð. Í uppgjöri við auðmennina þarf þjóðin að sjá að réttlætið nái fram að ganga. Og það er ekkert réttlæti í því að auðmenn haldi forræðinu á rekstri sem kominn er í þrot.