Hagfræðiprófessorinn og lögmæti nýauðvaldsins

Á rómuðum borgarafundi í Háskólabíói í gær var Þorvaldur Gylfason hagfræðiprófessor aðalræðumaður og hjó á báðar hendur. Þorvaldur gerði ekki grein fyrir sínum þætti í atburðarásinni sem leiddi til bankahrunsins og yfirvofandi þjóðargjaldþrots. Hagfræðiprófessorinn hefur í starfi og skrifum ljáð nýauðvaldinu lögmæti sem var forsenda þess að það varð að þjóðfélagsafli sem engin bönd héldu. Menn eins og Þorvaldur voru meðvirkir nýauðvaldinu. Eftir hrunið verða þeir meðvirku óðara að mótmælendum. 

 

Þorvaldur brýndi fyrir fundargestum að stjórnmál og viðskipti færu illa saman og gagnrýndi stjórnvöld fyrir að einkavæða banka í hendur manna sem kunna ekki að reka banka. Áður en bankarnir féllu brugðust fjölmiðlar.

Hagfræðiprófessorinn hefur um árabil skrifað greinar Fréttablaðið, flaggskip Baugsútgáfunnar. Það er engum blöðum um það að fletta að Baugur kann ekki að gefa út blöð. Fréttablaðið þverbrýtur skráðar og óskráðar siðareglur blaðamanna og hefur orðið bert að því að ljúga blákalt að lesendum.

Sem reglulegur pistlahöfundur í Fréttablaðinu gefur Þorvaldur blaðinu faglegt lögmæti. Raunar hefur hann gengið skrefinu lengra og tekið undir með Baugsliðinu að lögreglurannsóknin sem hófst síðsumars 2002 hafi verið skipulögð af forsætisráðherra. Þorvaldur skrifaði pistil í Fréttablaðið þar sem hann sagðist hafa fengið upplýsingar frá ónafngreindum heimildamanni, sem hann hitti í flugvél, að fyrirfram væri búið að ákveða hverja ætti að ákæra í Baugsmálinu. Málsvörn Baugsmanna greip fleiprið fegins hendi og Baugsmiðlar mjólkuðu hvert orð Þorvaldar í áróðursstríðinu. Hagfræðiprófessorinn var kallaður til yfirheyrslu hjá lögreglunni og bar fyrir sig að vera blaðamaður sem mætti ekki greina frá heimild sinni.

Þorvaldur er nátengdur Samfylkingunni, gott ef ekki Seðlabankastjóraefni flokksins. Samfylkingin hefur allt frá Borgarnesræðu Ingibjargar Sólrúnar Gísladóttur 9. febrúar 2003 veitt Baugi og nýauðvaldinu pólitískt skjól. Með því að bera blak af Baugi, berjast blóðugri baráttu gegn fjölmiðlafrumvarpinu og hafa þar sigur með fulltingi forseta lýðveldisins var markvisst grafið undan þeim sem vildu reisa nýauðvaldinu skorður.

Hrunadans útrásarinnar var stiginn við undirleik manna eins og Þorvaldar Gylfasonar.