Nálgunarbann á samráðsstarfsmenn Bónus og Krónu

Blekkingar eru hafðar í frammi gagnvart þeim sem stunda verðkannanir í matvöruverslunum. Verð er lækkað þegar kannanir standa yfir og dregnar eru fram vörur sem liggja á botni frystikistu eða djúpt í hillum sem eru kallaðar „verðkönnunarvörur" og ekki ætlaðar til annars en að blekkja. Þá leggja verslanakeðjur sig í líma að bjóða pakkningar og vörur sem ekki eru samanburðahæfar.

Fréttir Útvarps í gær afhjúpuðu blekkinguna og varla mun verðlagseftirlit ASÍ láta sér til hugar koma að hafa framvegis samráð við verslunina um verðlagskannanir.

Í umfjöllun Útvarps komu einnig fram upplýsingar sem benda til samráðs verslanakeðja um verð en sú háttsemi varðar við lög.

Verslanakeðjurnar bera af sér sakir og segjast vera í samkeppni, væntanlega samskonar og olíufélögin stunduðu öll lýðveldisárin.

Það er erfitt að sanna samráð en þegar könnun eftir könnun leiðir í ljós að einnar krónu munur er á fjölda vörutegunda á milli verslana er nærtækt að álykta að ef ekki sé um beint samráð að ræða þá sé að minnsta kosti samráðsskilningur í gildi sem báðar keðjurnar virða.

Bónus og Krónan gera út mannskap til að fylgjast með verðlagi í verslun samkeppnisaðilans. Upplýsingarnar sem þannig er aflað eru grundvöllurinn fyrir samræmdu verði.

Löggjafinn getur skrifað í lög bann við því að verslanir með tiltekna markaðshlutdeild reki verðlagseftirlit sem beinist að samkeppnisaðila. Til að hnykkja á almannahagsmunum mætti setja almennt nálgunarbann á þá starfsmenn verslana sem starfa við verðlagningu þannig að þeim er ekki heimilt að fara í samkeppnisverslunina.

Samkeppni er í hávegum hjá báðum ríkisstjórnarflokkunum og núna er tækifæri fyrir Bjögga ráðherra að sýna lit.