Trump át Leyen sem gleypti Þorgerði Katrínu

Tollastríði Bandaríkjanna og Evrópusambandsins lauk með niðurlægjandi ósigri Brussel. Trump át von der Leyen, segir Viktor Orban forsætisráðherra Ungverjalands. Von der Leyen, forseti framkvæmdastjórnar ESB, gerði stutta heimsókn til Íslands áður en hún gafst upp fyrir Trump. Á Íslandi gleypti sú þýska Þorgerði Katrínu utanríkis með húð og hári - í pólitískum skilningi.

Ísland er í þeirri stöðu að stórveldi á brauðfótum, ESB, ætlar sér landið og miðin. ESB er aftur á hnjánum gagnvart Bandaríkjunum, sem nýlega lýstu yfir þeim ásetningi að eignast næsta nágranna Íslands í vestri, Grænland. Ísland er miðlægt fyrir bandaríska öryggis- og varnarhagsmuni.

Lítum fyrst á tap ESB í tollastríðinu. Trump hótaði 30 prósent tollum á ESB og jafnvel hærri. Die Welt tók saman helstu atriði samningsins sem von der Leyen skrifaði undir. Evrópskir bílar munu bera 15% toll, ál og stál 50%. ESB lofar að kaupa jarðgas frá Bandaríkjunum og fjárfesta þar vestra. ESB fær ekkert í staðinn, bandarískir bílar bera ekki toll í Evrópu, svo dæmi sé tekið.

Í viðtengdri frétt segir að Friedrich Merz kansl­ari Þýska­lands sé ,,bjartsýnn" eftir samkomulagið. Die Welt hefur aftur eftir kanslaranum að ,,verulegt tjón" verði á þýskum efnhag.

Tollastríð Bandaríkjanna og ESB er stórpólitískt og mun hafa langtímaafleiðingar. Evrópusambandi, veikt fyrir, hrekkur niður um deild í alþjóðastjórnmálum. Fyrirsjáanlegur sigur Rússlands í Úkraínustríðinu mun auka enn á vandræði Evrópusambandsins. Óvígur rússneskur her á austurlandamærum ESB kallar á stóraukin útgjöld til varnar- og öryggismála. Bandaríkin, í gegnum Nató, hafa hingað til séð um varnir ESB-ríkja. Ekki lengur. Bandaríkin draga úr viðbúnaði sínum í Evrópu. ESB er risi á brauðfótum.

Viðbrögð ESB við þverrandi veraldargengi í samanburði við Bandaríkin og Rússland er að sækja fram á norðurslóðum. Tilfallandi sagði frá norðursókn ESB sem kynnt var alþjóð í vor:

Í byrjun maí í vor flutti Ursula von der Leyen forseti framkvæmdastjórnar ESB ræðu í Aachen í Þýskalandi er hún veitti viðtöku heiðursverðlaunum kenndum við Karlamagnús keisara.

Í ræðunni boðar von der Leyen ,,sjálfstæða Evrópu" í hörðum heimi valdastjórnmála. Þá bætti hún við:

Og þegar ég segi Evrópa, á ég vitanlega við Evrópusambandið. En ég er þeirrar skoðunar að vegferðin verði farin með vinum og samstarfsaðilum. Frá vesturhluta Balkanskaga til Úkraínu og Moldavíu. Frá Grænlandi til Bretlands og víðar. Skylda okkar er að tryggja stöðugleika á meginlandinu með sýn á sameiginlega framtíð.

Í beinu framhaldi talar forseti framkvæmdastjórnar ESB um að sambandið þurfi að hrista af sér hlekki fortíðar og grípa til aðgerða hratt og örugglega. Líkt og stórveldi gera þegar hagsmunum þeirra er ógnað.

Grænland fór inn í Evrópusambandið með Danmörku snemma á áttunda áratug síðustu aldar. Heimastjórn fékk Grænland 1979 og sagði sig úr Evrópusambandinu sex árum síðar, í byrjun árs 1985.

Enginn vafi leikur á stöðutaka ESB gagnvart Grænlandi er andsvar við yfirlýsingu Bandaríkjanna um að Grænland skuli verða bandarískt. Varnar- og öryggishagsmunir Bandaríkjanna eru að Grænland lúti bandarísku forræði - en ekki dönsku. Von der Leyen skorar Bandaríkin á hólm með yfirlýsingu um að Grænland verði ESB-ríki.

Evrópsk hugveita, Heinrich Böll Stiftung, með um 300 manns í vinnu og rekstarfé frá ESB, gaf í byrjun júlí út skýrslu um norðursókn Evrópusambandsins. Skýrslan er í senn greining og stefnumótun - og fullkomlega í takti við ræðu von der Leyen.

Heiti skýrslunnar er Stækkun ESB í norður í sjónmáli? Frumkvæði á óvissutímum. Í skýrslunni er dregin upp áætlun um að fá Grænland, Ísland og Noreg inn í Evrópusambandið. Úkraínustríðið annars vegar og hins vegar forsetatíð Trump knýja á um að ESB nýti sóknarfæriá norðurslóðum, segir í skýrslunni. Landvinningar valdefli sambandið og gefi endurnýjaðan tilgang.

Ísland er talið lykilríki til að fá Grænland og Noreg inn í sambandið. Vísað er til þess að sitjandi ríkisstjórn Íslands sé áhugasöm um ESB-aðild. Lagt er til að ESB geri Íslandi tilboð í sjávarútvegsmálum ,,sem ekki er hægt að hafna." Orðalagið er beint upp úr mafíubókmenntum - þýðir að dauðasök sé að neita tilboði guðföðurins. ESB hefur ýmsar leiðir til að herja á íslenska hagsmuni, ekki síst í gegnum EES-samninginn.

Heimsókn von der Leyen til Íslands í síðustu viku sýnir að Evrópusambandinu er dauðans alvara að hrinda í framkvæmd áætluninni um innlimun tveggja örþjóða, Grænlendinga og Íslendinga. Í framhaldi er á matseðlinum smáríkið Noregur. Þar með kemst ESB til áhrifa á Norður-Atlantshafi, verður þar stórveldi.

Eftir að tilfallandi skrifaði ofanritað gerist það að ESB setur refsitolla á íslenska framleiðslu, fyrst kísiljárn. Hver verður verðmiðinn á afnám tolla? Jú, að Ísland taki hraðlestina til Brussel. Þorgerður Katrín utanríkis og ESB-agent spinnur söguþráð sem gengur út á að eina von Íslands í hörðum heimi alþjóðastjórnmála sé að gefa frá okkur fullveldið og forræði eigin mála. Von der Leyen, sem Trump át í morgunverð, sé bjargvættur Íslands, verður mantra Kúlu-Tobbu og félaga.

Bandaríkin grípa til ráðstafana þegar stöðutaka ESB á norðurslóðum setur í uppnám bandarísk varnar- og öryggismál. Evrópusambandið er óburðugt að fylgja ásælnipólitík eftir með hervaldi. Styr milli Bandaríkjanna og ESB í norðri fær sömu niðurstöðu og tollastríðið. Ísland ætti að halda sig til hlés en ekki vera fíflið sem att er á foraðið.

Þorgerður Katrín og fermingarbarnið í forsætisráðuneytinu komast að því fullkeyptu haldi fram sem horfir með undirlægjuhátt gagnvart Evrópusambandinu. Kvenkyns Knoll og Tott í stjórnarráðinu er ekki heppilegasta áhöfnin þegar gefur á bátinn.

 

„Donald Trump át von der Leyen í morgunmat“

Ósannindi Þorgerðar Katrínar gagnvart þingi og þjóð

Þorgerður Katrín utanríkisráðherra laug að þingnefnd, um refsitolla ESB á íslenskan iðnað, og ber á borð fyrir þjóðina ósannindi um pólitískar ástæður ESB. Þorgerður Katrín fékk vitneskju um refsitolla ESB þegar 10. júlí, sex dögum fyrir heimsókn von der Leyen forseta framkvæmdastjórnar ESB.

Í viðtali á Vísi viðurkennir Þorgerður Katrín að hafa fengið vitneskju um refsitolla ESB 10. júlí. Sex dögum síðar hefst heimsókn von der Leyen. Hvorki í aðdraganda heimsóknarinnar né á meðan henni stóð var minnst á refsitolla í yfirlýsingum Þorgerðar Katrínar og Kristrúnar forsætis sem funduðu með þeirri þýsku. Í minnisblaði Þorgerðar Katrínar til utanríkismálanefndar alþingis 21. júlí er ekki minnst einu orði á refsitolla og heldur ekki munnlega á fundinum sjálfum.

Refsitollar ESB á íslenskan iðnað eru stórmál. EES-samningurinn virkar ekki. Ráðherrar vita það en leggja á flótta frá blaðamönnum. Í frétt Morgunblaðsins á laugardag segir um ráðherra sem eru á launum almennings að gæta íslenskra hagsmuna:

Ekki hef­ur náðst í Kristrúnu Frosta­dótt­ur for­sæt­is­ráðherra, Þor­gerði Katrínu Gunn­ars­dótt­ur ut­an­rík­is­ráðherra, Hönnu Katrínu Friðriks­son at­vinnu­vegaráðherra eða Daða Má Kristó­fers­son fjár­mála- og efna­hags­ráðherra vegna máls­ins.

Ósannindi og flótti einkennir viðbrögð ráðherra ríkistjórnar Kristrúnar Frost sem nokkrum dögum áður unnu í yfirtíð að útmála kosti þess að Ísland gangi í Evrópusambandið.

Hvað breyttist?

Jú, refsitollarnir upplýsa tvennt, eina almenna lexíu og aðra sértækari. Í fyrsta lagi þegar stórveldahagsmunir ESB eru í húfi er smáríkjum fórnað miskunnarlaust. Í öðru lagi er EES-samningurinn einskins virði. Þorgerður Katrín reynir að þegja í hel báðar lexíurnar. Þegar hún vonum seinna gaf færi á viðtali vellur úr munni hennar froða:

Þessi staða kemur upp því það eru ýmis Asíuríki eins og Kína, Kasakstan og Indland sem eru með offramleiðslu og eru að undirbjóða þessar vörur inn á markað ESB. Við höldum uppi skýrt þessum sjónarmiðum að við teljum þetta ekki eiga við íslenskar eða norskar afurðir.

Þorgerður Katrín vill telja fólki trú um að undirboð frá Asíu á Evrópumarkaði leiði til refsitolla ESB á Ísland og Noreg. Ekkert samhengi, hvorki orsök né afleiðing, er á milli þess að kínverskir framleiðendur undirbjóði á Evrópumarkaði og að ESB leggi refsitolla á íslenska og norska framleiðslu. Ákvörðunin er pólitískt af hálfu ESB, hefur ekkert með viðskipti að gera.

Refsitollarnir eru pólitísk hótun. Evrópusambandið ætlar sér Ísland með manni og mús. Ísland er lykilríki á Norður-Atlantshafi í útþensluáætlun ESB. Á eftir Íslandi eru Grænland og Noregur á matseðlinum, samkvæmt stefnu ESB. Brussel rekur stórveldapólitík gagnvart smáþjóðum. Það er kjarni málsins.

Segir Þorgerði fara með rangfærslur

Þorgerður Katrín fagnar refsitollum ESB á Ísland

Þorgerður Katrín utanríkisráherra fagnar árás Evrópusambandsins á íslenska hagsmuni. ESB leggur refsitolla á kísiljárn frá Íslandi. Refsitollarnir eru liður í að þvinga Ísland inn í ESB.  Þegar forseti framkvæmdastjórnar ESB, Ursula von der Leyen, heimsótti Ísland fyrir tveim vikum sagðist Þorgerður Katrín spyrja

hvert við Íslend­ing­ar erum komn­ir ef við ætl­um ekki að taka á móti leiðtoga þess markaðar sem við send­um 70% af okk­ar út­flutn­ingi, hvers kon­ar skila­boð eru það? Þeir for­svars­menn fyr­ir­tækja sem ég hef talað við á síðustu dög­um eru miður sín yfir þess­ari orðræðu. Við eig­um að fagna því að sterk­ir leiðtog­ar komi hingað til lands og sýni Íslandi áhuga,“ seg­ir ut­an­rík­is­ráðherra. 

Þor­gerður seg­ir rík­is­stjórn­ina vera að vinna vinn­una sína og reyna að víkka út aðgang fyr­ir ís­lensk fyr­ir­tæki á grunni EES-samn­ings­ins. Hún seg­ir skila­boð formanna stjórn­ar­and­stöðuflokk­anna þess efn­is að leiðtogi Evr­ópu­sam­bands­ins sé ekki au­fúsu­gest­ur til Íslands vera miður.  

„Mér þykir það bara í þessu ljósi mjög mikið um­hugs­un­ar­efni hvert ís­lensk póli­tík er að stefna,“ bæt­ir Þor­gerður við.

Já, Þorgerður Katrín, hvert er íslensk pólitík komin þegar sjálf ríkisstjórn Íslands tekur fagnandi að ESB leggi refsitolla á íslenska framleiðslu? Vitanlega upplýsti von der Leyen íslenska ráðherra hvað væri á döfinni. Ráðherrar, búnir að bóka far með Brusselhraðlestinni, töldu þjóðráð að ESB sýndi vígtennurnar hér á landi. Refsitollarnar þjóna sameiginlegum hagsmunum ríkisstjórnarinnar og ESB - að þvinga Ísland inn í sambandið.

Þorgerðar Katrínar fer með öfugmælavísu þegar hún segir ,,rík­is­stjórn­ina vera að vinna vinn­una sína og reyna að víkka út aðgang fyr­ir ís­lensk fyr­ir­tæki á grunni EES-samn­ings­ins." Ekkert slíkt stendur til. Herfræði ríkisstjórnar Kristrúnar Frost er að segja við Íslendinga að annað tveggja samþykkið þið inngöngu í Evrópusambandið eða að Ísland fái ekki aðgang að ESB-markaði. Þetta er sama liðið og hótaði að Ísland yrði Kúba norðursins ef við greiddum ekki Icesave-skuldir einkabanka. Íslenskir ráðherrar stilla þjóðinni upp við vegg.

Eftir að upp komst um refsitollana, fréttin var fyrst sögð í norskum fjölmiðlum, hefur enginn ráðherra ríkisstjórnarinnar sagt múkk opinberlega. Þeir eru of uppteknir að lesa fasteignaauglýsingar staðarmiðla í Brussel. Feitur biti bíður ráðherrana sem færa Evrópusambandinu Ísland á silfurfati. 

 

 

Nauðsynlegt að beita þrýstingi

ESB sýnir Íslandi klærnar

Tollar ESB á kísiljárn og tengdar vörur frá Íslandi eru pólitísk skilaboð. Brusselvaldið ætlast til að Íslendingar gefi frá sér fullveldi og forræði eigin mála til Evrópusambandsins. Ísland er lykilríki útþensluáætlun ESB í norðri. Fyrir tveim dögum bloggaði tilfallandi um ræðu von der Leyen og norðurslóðaáætlun ESB:

Ísland er talið lykilríki til að fá Grænland og Noreg inn í sambandið. Vísað er til þess að sitjandi ríkisstjórn Íslands sé áhugasöm um ESB-aðild. Lagt er til að ESB geri Íslandi tilboð í sjávarútvegsmálum ,,sem ekki er hægt að hafna." Orðalagið er beint upp úr mafíubókmenntum - þýðir að dauðasök sé að neita tilboði guðföðurins. ESB hefur ýmsar leiðir til að herja á íslenska hagsmuni, ekki síst í gegnum EES-samninginn.

Verndartollar ESB gegn Íslandi staðfesta tilfallandi greiningu. ESB ætlar sér landið og miðin með góðu eða illu. ESB talar um lýðræði en starfar í anda alræðis. 

Óhamingju Íslands verður allt að vopni. Brussel bruggar íslenska lýðveldinu launráð. Í Reykjavík er rauði dregillinn lagður fyrir skrifræðisherinn að taka ráðin af frjálsri þjóð.

 

Leggja tolla á kísiljárn: Stefnubreyting ESB

Trans, Brigitte og frelsi ósanninda

Kynjahopp, líka kallað trans, er þegar kona gerist karl eða karl verður að konu. Enginn getur breytt kyni sínu, það verður til í móðurkviði og kemur fullveðja í heiminn. En karl getur þóst kona og kona karl. Rétturinn til að þykjast telst til mannréttinda, fellur undir hugsanafrelsi.

Hugsun er samkvæmt skilgreiningu óefnisleg. Kyn er fyrirbæri í efnisheiminum. Meðvitundin, þar sem hugsunin býr, getur valið á milli sanninda og ósanninda. Mannréttindi, hugsanafrelsi, gera ekki upp á milli sanninda og ósanninda. Það er val einstaklingsins.

Að þessu gefnu vaknar spurning hvers vegna það skiptir máli hvort forsetafrú Frakklands, Brigitte Macron, hafi við fæðingu verið meyja eða sveinn. Hún var annað tveggja, svo mikið er víst.

Tímarnir eru frjálslyndir, fólk skilgreinir sig eins og það kýs, telst til mannréttinda. Hvað með það þótt flökkusögur séu um að Brigitte hafi fæðst strákur? Er ekki öllum sama?

Ekki frönsku forsetahjónunum, öðru nær. Fyrir fjórum árum er frétt á mbl.is um að þau hjón leiti réttar síns og aftur er frétt um stefnu þeirra í meiðyrðamáli.

Frönsku forsetahjónin telja mikilsvert að sannindi standi ofar ósannindum. Í mannheimum þekkjast í grunninn tvær gerðir sanninda. Í fyrsta lagi rökleg, t.d. að tveir plús tveir eru fjórir. Í öðru lagi raunsannindi sem eru áþreifanleg, mælanleg í prinsippinu. Í báðum tilvikum er kynjahopp - trans - ómöguleiki. Aðeins í handanheimi trúar og ímyndunar er kynjahopp mögulegt.

Málaferli forsetahjónanna í nafni sanninda eru lofsverð. Þau gætu gefið út yfirlýsingu um að trans sé ímyndun sem þjakar ekki Brigitte. Málið dautt. En það gera þau vitanlega ekki. Emanúel er þrátt fyrir allt stjórnmálamaður, situr embætti Frakklandsforseta. Stjórnmálamenn eru alltaf með annan fótinn, ef ekki báða, í handanheimi. Annars næðu þeir ekki kjöri.

Hugguleg tilhugsun, engu að síður, er að þau Brigitte og Emanúel tali máli sannleikans. Hver kýs ósannindi þegar sannleikur er í boði?

 

Kveður forsetafrúna hafa verið karlmann

Valkyrjur gera Ísland að Úkraínu norðursins

Evrópusambandið ætlar sér Grænland, Ísland og Noreg, eins og haft er eftir Der Spiegel í bloggi gærdagsins. Í byrjun maí í vor flutti Ursula von der Leyen forseti framkvæmdastjórnar ESB ræðu í Aachen í Þýskalandi er hún veitti viðtöku heiðursverðlaunum kenndum við Karlamagnús keisara.

Í ræðunni boðar von der Leyen ,,sjálfstæða Evrópu" í hörðum heimi valdastjórnmála. Þá bætti hún við:

Og þegar ég segi Evrópa, á ég vitanlega við Evrópusambandið. En ég er þeirrar skoðunar að vegferðin verði farin með vinum og samstarfsaðilum. Frá vesturhluta Balkanskaga til Úkraínu og Moldavíu. Frá Grænlandi til Bretlands og víðar. Skylda okkar er að tryggja stöðugleika á meginlandinu með sýn á sameiginlega framtíð.

Í beinu framhaldi talar forseti framkvæmdastjórnar ESB um að sambandið þurfi að hrista af sér hlekki fortíðar og grípa til aðgerða hratt og örugglega. Líkt og stórveldi gera þegar hagsmunum þeirra er ógnað.

Grænland fór inn í Evrópusambandið með Danmörku snemma á áttunda áratug síðustu aldar. Heimastjórn fékk Grænland 1979 og sagði sig úr Evrópusambandinu sex árum síðar, í byrjun árs 1985.

Enginn vafi leikur á stöðutaka ESB gagnvart Grænlandi er andsvar við yfirlýsingu Bandaríkjanna um að Grænland skuli verða bandarískt. Varnar- og öryggishagsmunir Bandaríkjanna eru að Grænland lúti bandarísku forræði - en ekki dönsku. Von der Leyen skorar Bandaríkin á hólm með yfirlýsingu um að Grænland verði ESB-ríki.

Evrópsk hugveita, Heinrich Böll Stiftung, með um 300 manns í vinnu og rekstarfé frá ESB, gaf í byrjun júlí út skýrslu um norðursókn Evrópusambandsins. Skýrslan er í senn greining og stefnumótun - og fullkomlega í takti við ræðu von der Leyen.

Heiti skýrslunnar er Stækkun ESB í norður í sjónmáli? Frumkvæði á óvissutímum. Í skýrslunni er dregin upp áætlun um að fá Grænland, Ísland og Noreg inn í Evrópusambandið. Úkraínustríðið annars vegar og hins vegar forsetatíð Trump knýja á um að ESB nýti sóknarfæriá norðurslóðum, segir í skýrslunni. Landvinningar valdefli sambandið og gefi endurnýjaðan tilgang.

Ísland er talið lykilríki til að fá Grænland og Noreg inn í sambandið. Vísað er til þess að sitjandi ríkisstjórn Íslands sé áhugasöm um ESB-aðild. Lagt er til að ESB geri Íslandi tilboð í sjávarútvegsmálum ,,sem ekki er hægt að hafna." Orðalagið er beint upp úr mafíubókmenntum - þýðir að dauðasök sé að neita tilboði guðföðurins. ESB hefur ýmsar leiðir til að herja á íslenska hagsmuni, ekki síst í gegnum EES-samninginn.

Heimsókn von der Leyen til Íslands í síðustu viku sýnir að Evrópusambandinu er dauðans alvara að hrinda í framkvæmd áætluninni um innlimun tveggja örþjóða, Grænlendinga og Íslendinga. Í framhaldi er á matseðlinum smáríkið Noregur. Þar með kemst ESB til áhrifa á Norður-Atlantshafi, verður þar stórveldi.

Fyrr heldur en seinna vakna Bandaríkjamenn upp við vondan draum. Evrópusambandið hyggst með leiftursókn sölsa undir sig Grænlandi og Íslandi - sem er óaðskiljanleg tvenna í varnar- og öryggismálum á Norður-Atlantshafi. Washington mun ekki líta það vinsamlegum augum að Ísland veiti Evrópusambandinu brautargengi inn á bandarískt öryggis- og varnarsvæði.

Kvenpeningurinn í stjórnarráðinu er ólæs á valdapólitík stórvelda. Hráir hagsmunir stórvelda steypa smærri þjóðum í glötun sé ekki að gáð. Hildarleikurinn, sem nú stendur yfir á gresjum Úkraínu, hófst með tilboði leiðtogafundar Nató í Búkarest vorið 2008 að Úkraína yrði Nató-ríki. Áætlun Nató hratt af stað atburðarás er fékk rökréttar afleiðingar í febrúar 2022 með innrás Rússlands í Úkraínu. Öryggis- og varnarhagsmunir stórvelda eru ekki barnaglingur smærri þjóða - hvað þá örþjóða eins og Íslendinga.

Sjálfsagt móðgast einhver yfir samlíkingunni. Bandaríkin og ESB eru ekki viðlíka andstæður og vestrið gegn Rússlandi. Þeir móðguðu ættu að lesa gaumgæfilega ræðu von der Leyen í Aachen og sóknaráætlun ESB í norðri. Til að lifa af í hörðum heimi valdastjórnmála verður Evrópusambandið að tileinka sér siði og háttu stórvelda. Innlimun Íslands í ESB er prófsteinn á getu Brusselvaldsins til að brjóta undir sig ný lönd í norðri. Bandaríkin munu ekki taka með þegjandi þögninni stöðutöku Evrópusambandsins á land- og hafsvæði sem Washington skilgreinir sem sitt öryggis- og varnarsvæði. Valdapólitík er ekki saumaklúbbsfræði.

 

Umsóknin „dregin til baka“

Spiegel: Hanna Katrín gengur erinda ESB á Íslandi

Der Spiegel, virt þýskt tímarit, segir Evrópusambandið hyggja á stækkun í norðri, með áherslu að fá Grænland, Ísland og Noreg inn í sambandið. Sjávarútvegur er í forgrunni stækkunarstefnu ESB í norðurhöfum. Viljayfirlýsing sem Hanna Katrín atvinnuráðherra skrifaði undir í síðustu viku, án samráðs við alþingi, er liður í norðursókn ESB.

Blaðamaður Spiegel í Brüssel, höfuðstöðvum ESB, Timo Lehmann, skrifar fréttina sem birtist 3.júlí síðast liðinn, bæði í net- og prentútgáfu. Þjóðverjar eru áhugasamir um Ísland frá dögum þriðja ríkisins. Enn er sá áhugi fyrir hendi, þýskir fjölmiðlar, t.d. fréttaveitan nordost24.de, endurbirta frétt Spiegel.

Sókn ESB á norðurslóðir byrjar með samstarfi í viðkvæmum málaflokkum, s.s. fiskveiðum og varnar- og öryggismálum. Hanna Katrín atvinnuráðherra gerði sitt í þágu ESB, skrifaði undir viljayfirlýsingu í síðustu viku um ,,samstarf" við ESB í sjávarútvegi. Skælbrosandi Hanna Katrín er ljósmynduð með sjávarútvegsstjóra ESB, Costas Kadis, að selja frumburðarrétt Íslendinga í hendur útlendinga. Auðvitað, enn sem komið er, heitir það ,,samráð og samvinna". Innlimun klædd í falleg orð.

Ráðuneytið tilkynnti samkomulagið við ESB tveim dögum eftir að alþingi fór í sumarfrí. Hanna Katrín neitar að tjá sig um viljayfirlýsinguna, þegar Vísir innti ráðherra eftir hvað stæði fyrir dyrum. Hanna Katrín óttast fjölmiðlaumræðu um baktjaldamakkið þar sem þjóðarhagsmunum er fórnað fyrir ESB-þráhyggju.

Evrópusambandið á enga aðkomu að hafsvæðinu í kringum Ísland. Engin nágrannaþjóða okkar í austri og vestri eru ESB-ríki, þ.e. Grænland, Færeyjar og Noregur. Með einni undirskrift veitir ráðherra í ríkisstjórn Íslands framandi stórveldi ítök og afskiptarétt af íslensku hafsvæði. Samkomulagið er stórpólitísk aðgerð en Hanna Katrín spurði hvorki kóng né prest, enda gengur hún erinda ESB en ekki íslenskra hagsmuna.

ESB hugsar sér gott til glóðarinnar með ríkisstjórn Kristrúnar Frost við völd. Sendinefnd ESB á Íslandi bætir við starfsfólki, býður rúma milljón á mánuði. Það vantar liðsauka til að telja Íslendingum trú um að ógild umsókn sé í fullu gildi. Blekking er forsenda hraðferðar í sæluríkið í austri.

Samkomulagið sem Evrópusambandið fékk Hönnu Katrínu til að skrifa undir er liður í norðurslóðasókn ESB. Nánar um þá áætlun á morgun.

  

 

 

Mikilvægt að fá upplýsingar um viljayfirlýsinguna

Málfrelsi á alþingi skert í þágu ESB

Föstudaginn 11. júlí beitti stjórnarmeirihlutinn svokölluðu kjarnorkuákvæði í þingsköpum alþingis til að binda endi á umræður. Átyllan var löng umræða um tvöföldun veiðigjalda. Raunveruleg ástæða var löngu ákveðin heimsókn Úrsúlu von der Leyen forseta framkvæmdastjórnar ESB til Íslands, sem hófst þrem dögum eftir að alþingi var komið í sumarfrí.

Stjórnarmeirihlutinn vildi ekki að alþingi væri að störfum þegar heimsókn von der Leyen stæði yfir. Ríkisstjórnin ætlaði að leggja undir sig umræðuna með ESB-boðskap og vildi ekki andmæli á þingi.

Boðskapurinn var undirbúinn með fyrirvara. Daginn fyrir heimsókn von der Leyen tilkynnti Hanna Katrín samkomulag við ESB um sjávarútvegsmál. Varnar- og öryggismál voru næst á dagskrá, hjá Þorgerði Katrínu, Kristrúnu og von der Leyen. Engin andmæli á alþingi eða fyrirspurnir til ráðherra enda alþingi komið í sumarfrí.

Erna Bjarnadóttir kom auga á hvernig ríkisstjórnin beitti dagskrárþunga sínum til að umskapa orðræðuna um Evrópusambandið. Erna skrifar Heimssýnarblogg:

Heimsókn Ursulu von der Leyen, forseta framkvæmdastjórnar ESB í síðustu viku, virðist leynt og ljóst vera liður í því að færa Ísland í átt að aðildarferli að sambandinu. Þetta er þó vitaskuld hvergi sagt. Í orðum og yfirlýsingum er þess í stað sífellt vísað til "samstarfs", "viljayfirlýsinga" og talað um "sameiginlegra framtíðarsýn".

Sú spurning vaknar því hvort hér sé farið af stað einhvers konar "aðlögunarsamstarf". Þegar utanríkisráðherra bregst svo við gagnrýni með því að kalla hana heimóttarskap er hún ekki að taka á efnisatriðum heldur leitast við að setja neikvæðan merkimiða á gagnrýnendur sína. Þannig reynir hún að beina umræðunni frá kjarna málsins í dóm yfir þann sem tjáir sig.

Þetta er ekki nýtt fyrirbrigði. Í stað þess að færa rök fyrir pólitískum breytingum, er stundum farin sú leið að breyta einfaldlega orðræðunni sjálfri. Merking hugtaka er færð til en stefna og ákvarðanir haldast óbreyttar undir yfirborðinu. [...]

Fundur utanríkismálanefndar Alþingis í dag snýst því ekki aðeins um efnisatriði þessara viðræðna og samninga, heldur líka um þessa nýju pólitísku tækni, það er að færa umræðuna yfir á nýtt svið þar sem ekki má lengur segja "aðildarferli" aðeins "framtíðarsýn" og "samráð".

Hárrétt hjá Ernu. Undir fyrirslætti eins og ,,framtíðarsýn" og ,,samráð" skal Ísland gert að ESB-ríki. Ríkisstjórnin telur ekki eftir sér að hefta málfrelsi á alþingi til að ESB-boðskapurinn heyrist einn i umræðunni. Tilskipunarvaldi Evrópusambandsins er beitt á Íslandi af hálfu ríkisstjórnar Kristrúnar Frostadóttur.

Daginn fyrir beitingu kjarnorkuákvæðisins, afnám málfrelsis á alþingi, steig Kristrún í pontu á þjóðþinginu og sagði:

Ég lýsi því yfir fyr­ir hönd meiri­hlut­ans að við mun­um verja lýðveldið Ísland, við mun­um verja stjórn­skip­an lands­ins og heiður Alþing­is.

Undirförul Kristrún vinnur nótt sem nýtan dag að lokamarkmiðinu, að lýðveldið Ísland verði hjálenda Evrópusambandsins. Kristrún kennir vegferðina við ,,vörn og heiður". Öfugmælin verða ekki meiri.

„Allt sem við óttuðumst reyndist rétt“

Samfylking vill einangra Ísland frá Bandaríkjunum

Stefna Samfylkingar í utanríkismálum gengur er að flytja Ísland undir áhrifasvæði Evrópusambandsins. Lokamarkmiðið er að Ísland verði ESB-ríki. Samstarfi við Bandaríkin um öryggis- og varnarmál verður fórnað í þágu lokamarkmiðsins, ESB-Ísland.

Tveir stjórnarflokkanna, Samfylking og Viðreisn, eru samstíga í ESB-áherslum. Flokkur fólksins hefur ekki utanríkisstefnu. Opinber heimsókn Ursulu von der Leyen forseta framkvæmdastjórnar Evrópusambandsins er upphaf að leiftursókn ESB-sinna.

Guðrún Hafsteinsdóttir formaður Sjálfstæðisflokksins gagnrýndi Brussellóðarí krataflokkanna tveggja. Af hálfu Kristrúnar forsætis var látin svara Dagbjört Hákonardóttir þingmaður Samfylkingar og fulltrúi í utanríkismálanefnd alþingis.

Svar Dagbjartar birtist á Vísi undir yfirlætislegri fyrirsögn: Vill Sjálfstæðisflokkurinn láta taka sig alvarlega?

Í greininni, sem er um öryggis- og varnarmál, er ekki minnst einu orði á varnarsamninginn við Bandaríkin sem hefur verið hornsteinn í utanríkisstefnu Íslands í 75 ár. Í stað greiningar og yfirvegunar á utanríkismálum er boðið upp á orðafroðu sem ber vitni grátlegri grunnhyggni. Ein efnisgreinin byrjar svona:

Það þarf ekki að minna formann Sjálfstæðisflokksins að stríð geisar í Evrópu og eðli sem og form öryggisógna taka gífurlega hröðum breytingum. Þá gildir öllu að taka höndum saman við okkar helstu bandamenn í Evrópu sem eru og verða okkar mikilvægasti viðskiptavettvangur.

Ísland er á miðju Norður-Atlantshafi. ,,Evrópan" sem Dagbjört talar um er meginland kallað Evrasía. Þar geisar stríð sem er vandamál meginlandsins, ekki eyju á miðju Norður-Atlantshafi. Stríð á meginlandi Evrasíu, ekki síst stórstríð, hafa allt aðra pólitíska og menningarlega merkingu hér á landi en á heljarslóð austan hafs. Í fyrra stríði öðlast Ísland fullveldi og við stofnum lýðveldi þegar sá fyrir endalok seinna stríðs. Blessað stríðið, var sagt í íslenskum sveitum og sjávarplássum fyrir miðja síðustu öld.

Úkraínustríðið er notað af ESB-sinnum sem skálkaskjól. En það er ekkert skjól að fá hjá ESB í hörðum heimi alþjóðastjórnmála. Fari sem horfir, að Úkraínustríðinu ljúki með rússneskum sigri, mun Evrópusambandið skjálfa og nötra í áravís, ef ekki áratugi. Óvígur rússneskur á austurlandamærum ESB er ekki íslenskt vandamál - en yrði það ef Íslendingar álpuðust inn í ESB. Íslenskir ESB-sinnar, eins og Dagbjört staðfestir, eru úti í móa þegar kemur að skilningi á alþjóðapólitík. Þeir sjá aftur í hillingum þægilega innivinnu í Brussel.

Öryggis- og varnarmál Íslands taka ekki ,,gífurlega hröðum breytingum" líkt og Dagbjört vill vera láta. Aðalvarnir okkar frá í seinna stríði er nátengdar bandarískum öryggis- og varnarhagsmunum. Það gildir enn.

Til skamms tíma litu Bandaríkin svo á að útvörður þeirra í austri væri Vestur-Evrópa. Það er ástæðan fyrir stofnun Nató 1949. Á seinni árum líta Bandaríkin á svokallað GIUK-hlið sem útvörð í austri. GIUK stendur fyrir Grænland, Ísland og Bretland og hafsvæðin þar í kring. Áhugi Bandaríkjanna að ná Grænlandi undan dönskum áhrifum er afleiðing af breyttri stefnu í Washington.

Stefna Samfylkingar og Viðreisnar, að gera Ísland að ESB-ríki, mun leiða til ógæfu, bæði innanlands og í samskiptum við Bandaríkin. Fyrr heldur en seinna ris þjóðmálahreyfing hér á landi sem hefur nánari samband við Bandaríkin á stefnuskrá - gagngert til að losna undan fyrirsjáanlegri ESB-áþján. Þetta er ávísun á innanlandsófrið milli ESB-sinna og Bandaríkjasinna. Washington og Brussel munu ota sínum tota, þannig starfa stórveldi. Smáþjóð sem tvístígur í öryggis- og varnarmálum verður illa úti þegar stórveldi eiga í hlut.

Í viðsjám alþjóðastjórnmála eiga Íslendingar að kappkosta að gefa stórveldum ekki færi á sér. Við þekkjum af góðu einu samstarfið við Bandaríkin um öryggis- og varnarmál. Teflum ekki í tvísýnu varnarsamningnum frá 1951. Höldum okkur frá hryggðarmyndinni sem kallast Evrópusamband, meginlandsklúbbur gamalla nýlenduvelda og stríðsjálka er lifa á fornri frægð vestast í Evrasíu. 

 

Tjáning, hatur og hinseginfáni lögreglu

Bandarískur lögfræðingur undrast réttarfarið á Íslandi þar sem lögregla í verktöku fyrir Samtökin 78 ákæra mann og annan fyrir að andmæla transáróðri í leik- og grunnskólum. Sá bandaríski segir:

Ég skil ekki hvernig þetta komst á ákærustig, í alvöru. Í Ameríku yrði þessu hent út… eitt er ef Páll væri að kalla S78 nöfnum og saka þá um glæpi, en hann er ekki að gera það. Hann er að segja að þetta efni sé óviðeigandi fyrir börn og það er gott að hann segir það, vegna þess að mig grunar að svo sé. Það er fullkomlega viðeigandi að segja að það að sýna börnum á þessum aldri svona efni sé óviðeigandi af þessum ástæðum og eins og ég sagði, þú getur fengið vísindaleg gögn fyrir því…

Eina ástæðan fyrir því að þetta mál komst svona langt hlýtur að vera sú að íslenska ákæruvaldið er mannað aðgerðasinnum.

Einar S. Hálfdánarson hæstaréttarlögmaður furðar sig einnig á háttsemi lögreglu þegar kemur að kærum vegna hatursorðræðu. Einar kærði eftirfarandi ummæli sem maður búsettur hér á landi, Ibaa Ben Hosheyeh, viðhafði á opinberum vettvangi:

Drepið gyðingana hvar sem þið finnið þá, rífið þá á hol, mígið á þá [og] lík þeirra […] Ég sver að við munum dæma þá við hlið Paradísar. Bölvun hvíli á sonum Síons, sonum apa og svína.

Þeir sem kunna að lesa sjá að þarna er á ferðinni skefjalaust hatur í garð minnihlutahóps, gyðinga. Lögreglustjórinn á höfuðborgarsvæðinu, Halla Bergþóra Björnsdóttir, er ekki byrjuð að rannsaka hatursummælin sem Einar kærði. En Halla Bergþóra var fljót til þegar Samtökin 78 kærðu gagnrýni tilfallandi á transboðskap í skólum og skrifaði út ákæru. Einar skrifar grein í Morgunblaðið um helgina og ber málin tvö saman. Niðurstaða hans:

Lögreglustjórinn á höfuðborgar svæðinu tekur ekki málefnalega afstöðu til kærumála. Halla Bergþóra misbeitir valdi sínu og handvelur mál sem henni eru þóknanleg.

Misþyrming lögreglunnar á réttlætinu er ekki bundin við höfuðborgarsvæðið. Samtökin 78 kærðu Helgu Dögg Sverrisdóttur fyrir sömu sakir og tilfallandi, að gagnrýna trúboð lífsskoðunarfélagsins. Helga Dögg heldur úti Moggabloggi. Hún er ekki enn ákærð, en hefur verið kölluð til yfirheyrslu lögreglunnar á Norðurlandi eystra og er með stöðu sakbornings. Í gær birti Helga Dögg mynd af lögreglustöðinni þar sem hinsegin fáninn var dreginn að húni, einn fána. Í Facebook-færslu skrifar Helga Dögg:

Ég velti fyrir mér af hverju lögreglan flaggi fána kæranda í sakamáli.Ég er ein þeirra sem trans Samtökin 78 kærðu til lögreglu og vitna til sömu lagagreinar og í máli Páls Vilhjálmssonar. Hann var sýknaður. Enn hefur ekkert heyrst frá löggunni sem hefur tekið sér mjög rúman tíma til að skoða málið. Hins vegar finnst mér vafasamt að lögregla sem gerir svona sé hlutlaus. Óttast verulega að ég fái ekki réttláta málsmeðferð þegar lögreglan sýnir afstöðu sína á þennan hátt.

Lögregla sem ákærir trekk í trekk í þágu Samtakanna 78 og flaggar fána lífsskoðunarfélagsins er tæplega hlutlaust og málefnalegt yfirvald.

Líkt og flestar opinberar valdastöður eru æðstu embætti lögreglunnar í höndum kvenna. Ríkissaksóknari, sem leiðbeinir lögreglu um hverja skuli ákæra, er kona. Kynsystir þeirra, en líklega ekki skoðanabróðir, er Íris Erlingsdóttir. Í Þjóðólf skrifar Íris að Eitruð kvenlægni er stjórnsýsluvandamál. Íris sendir í leiðinni karlpeningi pillu:

Íslenskir karlmenn – ungir sem miðaldra, brjálaðir sem óbrjálaðir – eru hins vegar ófærir um að sýna eitraða karlmennsku eða karlmennsku yfirleitt. Til þess þarf testósterón, sem löngu er búið að berja úr þeim.

Konur fara með æðstu völd; kona brýnir kúgaða karla til uppreisnar gegn duttlungum valdakvenna og óreiðunni sem fylgir. Frjálslyndi pendúllinn slær tilbaka. Áhugaverðir tímar.