Selenskí játar veikleika

Í tísti segir forseti Úkraínu að óvissa sé veikleiki og vill fá tryggingu fyrir inngöngu landsins í Nató. Tryggð innganga jafngildir aðild sem nánast sjálfkrafa fæli í sér stríð Nató gegn Rússlandi. Ekki er vilji til þess hjá Nató-ríkjum.

Fyrir nokkrum vikum átti leiðtogafundur Nató í Vilníus að setja Rússum afarkosti. Hugmyndin var að sókn Úkraínu í Saparosía væri um það bil að kljúfa i tvennt hernámssvæði Rússa og ógnaði Krímskaga er Rússar hernumdu 2014. 

Sumarsókn Úkraínuhers hófst 4. júlí en skilar ekki árangri. Síðustu fréttir af vígvellinu í Saparosíja og Donbass sýna rússneskan ávinning en ekki úkraínskan. Annar mælikvarði á framgang Úkraínu er fáar fréttir. Þeir eru margar þegar Úkraína sækir fram.

Tíst Selenskí, sjá hlekk í fyrstu málsgrein hér að ofan, nefnir samningaviðræður við Rússa. Samningar og afarkostir eru ólíkir hlutir.

Tal Selenskí forseta um samninga við núverandi kringumstæður er meiri veikleiki en óvissan um inngöngu Úkraínu í Nató. Ekki fyrir löngu sögðust ráðamenn í Kænugarði fyrst semja við Pútín er úkraínskar hersveitir stæðu við borgarhlið Moskvu. Í dag er talað um samninga á meðan Rússar stjórna þriðjungi Úkraínu.

Úkraínustríðinu lýkur með samningum, vonandi fyrr en seinna. Líkur standa til að þeir samningar verði á rússneskum forsendum fremur en úkraínskum.

 

 

Liðka fyrir aðild Úkraínu að NATO

Mesta eldgos frá upphafi mælinga

Nýhafið eldgos við Litla-Hrút er það mesta á Reykjanesi frá upphafi mælinga.

Og?

Er það merkilegt?

Nei, svona álíka og viðtengd frétt um að ,,fyrsta vikan í júlí var sú heitasta síðan mælingar hófust."

Náttúruferlar, hvort heldur jarðhræringar eða veðurfar, eru aðeins eldri en mælitæki manna. Það munar sirka 4,5 milljörðum ára.

Ef eitthvað er mest í náttúrunni hlýtur að vera til minnst. Á milli mest og minnst ætti að vera kjörstaða.

Hver er þá kjörhiti jarðar?

Kjörhiti jarðar er ekki til. Ekki frekar en kjörfjöldi eldgosa.

Fréttin um ,,heitustu viku frá upphafi mælinga" er merkingarlaus. Alveg eins og fyrirsögnin á þessu bloggi.

 

Heitasta vikan frá upphafi mælinga

Kvika í vandræðum, lánshæfi lækkað

Moody‘s lækkar lánshæfismat Kviku, ólíkt staðhæfingu í fyrirsögn viðtengdrar fréttar. Í meginmáli kemur fram að Moody‘s hafi í þann veginn verið að hækka lánshæfismat Kviku fjárfestingabanka, í tilefni af samrunaferli við Íslandsbanka, en afturkallað hækkun á lánshæfismati er ekkert varð úr samruna.

Íslandsbankamálið, misheppnuð sala á hlut ríkisins, stöðvaði samrunaferlið sem var langt komið. Komið var að því að ákveða skiptihlutföll í nýju hlutafélagi.

Kvika fjárfestingabanki er yfirtöku- og samrunafélag. Frá stofnun árið 2015 sameinast eða yfirtekur Kvika eitt félag á ári og rúmlega það. Samruninn við Íslandsbanka átti að verða tíunda stækkunin. Stækkun, ekki rekstur, er sérgrein Kviku.

Stöðug stækkun færir hluthöfum Kviku ríkulegan ábata, eins og Kristrún Frostadóttir formaður Samfylkingar getur vitnað um. Á síðustu fimm árum hafa hlutabréf Kviku hækkað um tæp 130 prósent. Meðaltalshækkun tíu stærstu fyrirtækjanna á íslenskum hlutabréfamarkaði er 46 prósent á sama tímabili.

Fjárfestingabanki sem jafn hraðan vöxt og Kvika tileinka sér væntingar um meira af svo góðu. Þær væntingar taka ekki mið af raunhagkerfinu heldur Excel-skjölum með skáldskap um framtíðina. 

Pólitískar forsendur eru ekki lengur fyrir samruna Kviku og Íslandsbanka. Dýr sátt vegna sölu á ríkishlutafé í Íslandsbanka sá til þess. 

Til er einföld leið að ná breiðri pólitískri samstöðu um að losa hlut ríkisins í Íslandsbanka. Hún er að selja árlega eitt prósentustig af eignarhlut ríkisins í bankanum. Ríkið myndi þynna út eignarhlut sinn niður i núll á rúmum 40 árum.

Kristrún Frostadóttir og aðrir slíkir áhættufjárfestar dyttu ekki í lukkupottinn ef þessi aðferð væri notuð. Sumir halda að hlutverk ríkisins sé að skapa áhættufjárfestum skyndigróða. Svo er ekki.

 

 

 

 

Moody's staðfestir lánshæfi Kviku

Jóhann kemur við Kviku Kristrúnar

Jóhann Páll Jóhannsson þingmaður Samfylkingarinnar situr í fjárlaganefnd alþingis. Hann vill að nefndin fundi um Íslandsbankamálið. Kristrún formaður flokksins er aftur ekki spennt fyrir háværri Íslandsbankaumræðu. 

Tilfallandi nefndi þögn Kristrúnar Samfylkingarformanns fimmtudagsmorguninn 29. júní, fyrir rúmri viku. Tveim klukkutímum síðar kom skýring á fámæli Kristrúnar. Hún játaði skattasniðgöngu á 100 milljóna króna hagnaði af nýlegum hlutabréfaviðskiptum.

Hagnaður Kristrúnar af hlutabréfum í Kviku fjárfestingabanka er viðkvæmt mál. Kvika var í samrunaferli með Íslandsbanka með samþykki og velvilja Kristrúnar en hún var aðalhagfræðingur Kviku, hætti þar gagngert til að verða þingmaður Samfylkingar. 

Kristrún er innvígður og munstraður talsmaður stórkapítalista sem sækja stíft í ríkiseigur. Eftir að hún náði kjöri sem formaður Samfylkingar haustið 2022 óx vegur flokksins í skoðanakönnunum. Áfram gakk í átt að hægristjórn til að liðka fyrir stórvesírum fjármálageirans. Þeir eru svo snjallir að búa til ímynduð verðmæti, sem eru froða þegar að er gáð. Kristrún kallar froðuæfinguna að detta í lukkupottinn. 

Formaður sem skaffar fylgi, þótt ekki sé nema kannanafylgi, getur skipað málum að vild innan flokks. Kristrún jaðarsetti Jóhann Pál og Helgu Völu, sem fannst fátt til nýstirnisins koma og hugnaðist ekki hægrislagsíðan. Sumum þingmönnum, ekki síst á vinstri vængnum, líður betur með mikil völd í litlum flokki en lítil í stórum. Neitunarvald er vanmetinn þáttur í pólitík, er oftar en ekki virkjað á bakvið tjöldin.

Skattasniðganga Kristrúnar gefur Jóhanni Páli og Helgu Völu tækifæri til að veikja pólitík formannsins án þess að mikið beri á. Það gera þingmennirnir með hávaða um Íslandsbankamálið sem kemur við Kvikuna á Kristrúnu.

Formaðurinn getur illa beitt sér, kysi helst rólegt pólitískt sumar til að vera ekki krafin um nánari skýringar á skattauppgjöri vegna 100 milljón króna hagnaðar af hlutabréfaviðskiptum. Samtímis getur formaður Samfylkingar ekki lagst gegn atlögu að Sjálfstæðisflokknum og fjármálaráðherra þegar skotmörkin eru í dauðafæri.

Í orði kveðnu er Samfylkingin jafnaðarmannaflokkur en ekki þriðja hjólið undir vagni fjármálaelítunnar. Kristrúnarleiktjöldin eru hönnuð til að viðhalda ímynd um að jöfnuður fáist með ójöfnuði. Kristrún er í pólitík það sem fyrrum yfirmaður hennar, Marinó Örn Tryggvason, er í fjármálum. Samkeppni, sagði forstjóri Kviku, eykst með fákeppni. Kristrúnarpólitík er að jöfnuður aukist með ójöfnuði. Hvítt er svart og svart hvítt. 

Pólitíkin í Íslandsbankamálinu er í grunninn hvort það sé áfram gakk í átt að nýrri hrunstjórn eða ekki. Neitunarvaldið er í höndum liðsfélaga Kristrúnar Frostadóttur formanns Samfylkingar. Sjálf er Kristrún löngu skattasniðgengin í 100 milljóna króna björg.

RÚV finnur vafasamar 20 milljónir, en ekki hjá Sigríði Dögg

Fréttastofa RÚV fann í Lindarhvolsskýrslu eitt dæmi um að ríkissjóður gæti hafa orðið af 20 milljónum króna er ríkiseign var seld fyrir sex árum. Þetta eina dæmi er nefnt í tveim fréttum RÚV um skýrsluna.

Fyrri fréttin

Sigurður gerir einnig athugasemd við það að söluverð á hlutabréfum í Vörukaupum hafi verið lækkað úr 151 milljón í 131 milljón

Seinni fréttin

Vafasöm 20 milljóna króna lækkun kaupverðs á grundvelli óundirritaðs minnisblaðs frá Deloitte

Ef fréttastofa RÚV ber hag ríkissjóðs fyrir brjósti og telur 20 m.kr. stórfé ætti Sigríður Dögg Auðunsdóttir formaður Blaðamannafélags Íslands að vera nærtækt viðfangsefni. Samkvæmt Fréttinni er Sigríður Dögg þekkti blaðamaðurinn sem viðurkenndi skattalagabrot upp á tugi milljóna króna fyrir tveim árum en fékk að fela brotið sjónum almennings.

Formaður Blaðamannafélags Íslands taldi ekki fram tekjur af íbúðum sem hann leigði ferðamönnum í skammtímaleiga í gegnum Airbnb. Sigríður Dögg endurgreiddi vangoldinn skatt með 25 prósent álagi í gegnum einkahlutafélag sitt. Fyrir tveim árum skilaði einkahlutafélagið sjö milljón króna hagnaði, samkvæmt Fyrirtækjaskrá. Árin þar á undan var engum ársreikningum skilað.

Formaður stéttafélags blaðamanna fékk sérmeðferð hjá skattayfirvöldum. Aðrir í sömu sporum fengu á sig opinbera málssókn frá saksóknara. Sigríði Dögg var leyft að gera upp vantaldar leigutekjur í gegnum einkahlutafélag, gagngert til að blettur félli ekki á starfsheiður formanns Blaðamannafélags Íslands.

Það ættu að vera hæg heimatökin á fréttastofu RÚV að grennslast fyrir um undanskot formanns Blaðamannafélags Íslands og torkennileg samskipti við skattayfirvöld. Ásamt formennskunni er Sigríður Dögg í fullu starfi á RÚV - sem fréttamaður. 

Lindarhvoll: hver er glæpurinn?

Skýrslan um Lindarhvol er samantekt um sölu ríkiseigna árin 2016-2018. Eigurnar fékk ríkið úr slitabúum föllnu bankanna. Einn maður, lögmaðurinn Steinar Þór Guðgeirsson, var í raun Lindarhvoll. Hann tók að sér í verktöku að selja ríkiseigurnar og gerði það frá lögmannsstofu sinni á Túngötu. Félagið Lindarhvoll ehf. var stofnað af ríkinu en hafði engan starfsmann, aðeins þriggja manna stjórn.

Steinar Þór var valinn þar sem hann þótti hafa staðið sig vel í fyrri uppgjörum hrunmála. Traustir menn óflekkaðir af subbuskap útrásar og hruns voru ekki á hverju strái.

Skýrslan gerir ýmsar athugasemdir um hvernig staðið var að skipulagi og umsýslu Lindarhvols og við fyrirkomulag sölu á einstökum ríkiseigum. Fjöldi eigna var 51, í flestum tilfellum hlutafé í starfandi fyrirtækjum. Andvirði eignanna var tæpir 400 milljarðar króna. Ekki smápeningar. 

Í skýrslunni kemur fram að upplýsingagjöf til höfundar, Sigurðar Þórðarsonar setts ríkisendurskoðanda, hafi ekki verið sem skyldi - sem gefur til kynna einhvern feluleik.

Lindarhvoli var falið að selja ríkiseigur hratt án þess að setja þær á brunaútsölu. Ekki er hægt að ráða í af lestri skýrslunnar hvers vegna áhersla var á að hraða sölunni. En með því að stjórnvöld, alþingi meðtalið, vildu losna greiðlega við eigurnar er hætt við að sumir hafi gert hagkvæm kaup á kostnað almannahags, sé til lengri tíma litið.

Árin sem salan fór fram, 2016-2018, einkenndust af tvennu. Í fyrsta lagi pólitískri upplausn, falli ríkisstjórnar Sigmundar Davíðs og skammlífri ríkisstjórn Bjarna Ben. Í öðru lagi kröftugri uppsveiflu í efnahagslífinu. Það segir sig sjálft að við þessar kringumstæður er ekki auðvelt að gæta hags ríkissjóðs, sem á öngvan vin en hrægammar, allt frá iðjulausum pírötum upp í stórkapítalista, sitja um nótt sem nýtan dag.

Af fyrsta yfirlestri skýrslunnar er ekki hægt að ráða að skipulögð brotastarfsemi hafi verið höfð í frammi við að koma ríkiseigum til valinkunnra á undirverði. Sigurður hefur vísað málinu til saksóknara sem líklega þýðir að hann telji að lögbrot hafi verið framin. Skýrslan sjálf tekur ekki af tvímæli. 

Tilfallandi niðurstaða, eftir einn lestur, vel að merkja, er að mistök hafi verið gerð en trauðla alvarleg afbrot.

 

 

Gagnrýnir verklag við umsýslu Lindarhvols

Beinagrindur í skápum fjölmiðla

Blaðamennirnir líta á það sem persónulega árás á sig ef maður skrifar um þetta mál. Tilfallandi bloggari fékk þetta svar frá gamalreyndum blaðamanni snemma í vor er byrlunar- og símastuldsmálið var rætt á tveggja manna tali.

Í byrlunar- og símastuldsmálinu eru fimm blaðamenn sakborningar í yfirstandandi lögreglurannsókn. Páli skipstjóra Steingrímssyni var byrlað og síma hans stolið. Alvarleg afbrot en fátt að frétta.

Í fyrradag sagði tilfallandi frá þekktum blaðamanni sem stakk undan skatti. Í gær var sett meira kjöt á beinin. Blaðamaðurinn fékk sérmeðferð hjá skattinum þrátt fyrir undanskot upp á tugi milljóna króna.

Allar ritstjórnir landsins vita hver blaðamaðurinn er en enginn þýfgar hann um vantöldu leigutekjurnar frá Airbnb og hvers vegna hann slapp svona billega, fékk að endurgreiða í gegnum einkahlutafélag með 25 prósent álagi. Aðrir i sömu sporum fengu á sig opinbera ákæru. Réttvísi sem hyglar fréttamanni á kostnað almannahags vekur spurningar um jafnræði fyrir lögum. En það er ekkert að frétta. 

Blaðamenn vilja ekki styggja vini og kunningja í stéttinni, síst af öllu þá sem eiga eitthvað undir sér og hafa bein og óbein völd yfir starfsframa einstaklinga í fámennri starfsstétt. Blaðamaðurinn leikur lausum hala og fer með hlut af dagskrárvaldi fjölmiðla eins og fínn pappír. Sem hann er ekki.

Illa er komið fyrir starfsstétt þar sem forræði mála er í höndum óvandaðra. Í þokkabót er þrotaforystan drekkhlaðin verðlaunum fyrir ill verk og samviskulaus.

Réttmæt spurning frá tilfallandi lesendum er hvers vegna bloggari gengur ekki fram fyrir skjöldu, birtir nafn blaðamannsins og upplýsingarnar til grundvallar umfjölluninni?

Ástæðan er eftirfarandi.

Tilfallandi fékk upplýsingar um afbrot þekkta blaðamannsins frá heimildamanni. Ef tilfallandi útskýrir hvernig hann fékk upplýsingarnar, eða varpar frekari ljósi á eðli þeirra, brýtur hann trúnað.

En má ekki afhjúpa nafn þekkta blaðamannsins?

Því er til að svara að fréttamenn RSK-miðla hafa í þrígang stefnt tilfallandi bloggara. Líkur eru töluverðar að bloggara yrði stefnt ef hann upplýsir nafn loddarans er útdeilir sekt og sýknu daginn út og inn en er sjálfur brotamaður á bakvið tjöldin. Fyrir rétti stæði tilfallandi frammi fyrir tveim slæmum kostum. Að brjóta trúnað gagnvart heimildamanni eða leggja ekki fram þau gögn sem staðfesta frásögnina og fá dóm fyrir meiðyrði.

Hvorugur kosturinn er góður. Nafn þekkta blaðamannsins verður að sinni ekki opinberað í tilfallandi athugasemd.

Á hinn bóginn er þess að geta að í haust eru líkur á að mál blaðamannsins verði upplýst. Þangað til hringlar í þekktu beinagrindinni í skáp fjölmiðlanna, - ásamt beinagrindunum fimm í byrlunar- og símastuldsmálinu. 

Þekktur blaðamaður á flótta

Blaðamaður í fullu starfi og með trúnaðarstörf á sínum herðum að auki skilaði ársskýrslu til Fyrirtækjaskrár árið 2021 með sjö milljón króna hagnaði á einkahlutafélagi sínu. Árin á undan var engri skýrslu skilað.

Blaðamaðurinn varð uppvís að víðtækum skattsvikum í tengslum við útleigu á íbúðum í gegnum Airbnb. Um árabil leigði blaðamaður ferðamönnum húsnæði en gaf tekjurnar ekki upp til skatts. Tilfallandi athugasemd greindi frá í gær að blaðamanni var gert að greiða vangoldinn skatt með 25% álagi.

Skattrannsóknastjóri fékk upplýsingar um útleigu fasteigna Íslendinga árin 2015-2018 í gegnum vef og greiðslukerfi Airbnb. Alls var um að ræða leigutekjur upp á 25 milljarða króna.

Fréttastofa RÚV birti frétt um málið á sínum tíma. Fréttin hefur verið tekin niður, án skýringa.

Skattrannsóknastjóri vísaði stærri undanskotsmálum til héraðssaksóknara en afgreiddi minni háttar mál með endurálagninu og 25% álagi. Þau mál sem fóru til héraðssaksóknara urðu sjálfkrafa opinber.  

Skattaundanskot blaðamannsins er ekki minni háttar, nema tugum milljóna króna. Blaðamaðurinn fékk sérmeðferð hjá skattayfirvöldum. Hann fékk leyfi til að setja útleiguna í einkahlutafélag sitt sem skilaði sjö milljón króna hagnaði árið 2021. Skattaundanskotin árin á undan stundaði blaðamaðurinn á eigin kennitölu.

Af þekkta blaðamanninum er ekkert að frétta. Hann er á flótta. Svarar hvorki síma né tölvupóstum. Er hann þó í krafti trúnaðarstarfa þekktur fyrir að koma fram í fjölmiðlum og krefur aðra um svör án undanbragða.

 

Þekktur blaðamaður sveik undan skatti

Þekktur blaðamaður sveik tugi milljóna króna undan skatti með því að gefa ekki upp leigutekjur af húsnæði er auglýst var til leigu á Airbnb. Blaðamaðurinn er áberandi í faglegri umræðu um fjölmiðla og gegnir trúnaðarstöðu.

Skatturinn, áður skattrannsóknastjóri, fékk fyrir þremur árum upplýsingar frá höfuðstöðvum Airbnb um leigutekjur íslenskra leigusala. Blaðamaðurinn hafði í áravís leigt út húsnæði til ferðamanna í gegnum Airbnb án þess að telja leigutekjurnar fram til skatts. Eftir að upp komst færði blaðamaðurinn útleiguna í hlutafélag.

Fjárhæðin sem stungið var undan skatti nemur tugum milljóna króna. 

Blaðamanninum var gert að endurgreiða vangoldinn skatt með 25 prósent álagi.

Eins og tilfallandi lesendur vita segja fjölmiðlar ekki fréttir af afbrotum blaðamanna, allra síst er í hlut eiga ritstjórnir RSK-miðla.

Laupur og lyga í stað afa og ömmu

Samtökin 78 óska eftir nýyrðum yfir föður- og móðurforeldra sem fyrrum nefndust amma og afi. Ein tillaga er að amma verði lyga og afi laupur. 

Maður segði si svona ´ég ætla að skreppa í kleinur og kaffi hjá lygu´. Og ´laupur, lestu fyrir mig sögu´.

Hinsegin hugmyndafræðin boðar kynjaflæði. Maður getur verið karl að morgni en kerla að kveldi. Um miðjan daginn eitthvað þess á milli. Gera má ráð fyrir að ömmur/lygur vilji stundum vera afar/laupar og öfugt. Nýyrðin tvö gera ráð fyrir þessum möguleika. Þeim er einfaldlega slegið saman í eitt samsett orð.

Lygalaupur.

Leita að kynhlutlausu „amma og afi“