Stórkarlapólitík

Útrásin var efnahagsleg stórkarlapólitík þar sem auðmenn og áhangendur þeirra í stjórnmálum og fjölmiðlum töldu fólki trú um að loftbólugróði væri varanlegur ávinningur. Innganga í Evrópusambandið er stórkarlapólitík þar sem ein altæk lausn er á flestum vanda.

Samfylkingin er gegnsýrð stórkarlapólitík. Björgvin G. Sigurðsson, fyrrum viðskiptaráðherra, mærði útrásina djúpri röddu sem verður ekkert skræk þegar talið berst að Brussel. Til að ljúga sannfærandi að öðrum verður maður að trúa sjálfur.

Framgangur Samfylkingar í skoðanakönnunum er skýr vísbending um að þjóðin átti sig ekki enn á samhengi hrunsins og stórkarlastjórnmála.

Jóhanna Sigurðardóttir formaður Samfylkingar veðjar á að þjóðin fatti ekki í tíma. Þegar erfið mál voru nefnd í sjónvarpsumræðum í gær var lausn Jóhönnu að við ættum að sækja um inngöngu.

Heimili í rúst, heimili í lagi

Tískuspurningin, hvað ætlar þú að gera fyrir heimilin í landinu?, felur þá staðreynd að lítill minnihluti heimila í landinu þarf á sértækum bjargráðum ríkisvaldsins að halda. Flest heimili eru í prýðilegu lagi, takk fyrir.

Sjö af hverjum tíu heimilum skuldar minna en 20 milljónir króna í húsnæði og átta af hverjum tíu greiða undir 150 þús. kr. á mánuði í afborganir. Aðeins þrjú prósent heimila er eingöngu með erlend húsnæðislán.

Til að aðstoða þau heimili sem verða fyrir tekjumissi og eiga í erfiðleikum með að láta enda ná saman er hægt að beita greiðsluaðlögun sem kostar ekki mikið.

Spyrlar í sjónvarpsþáttum og stjórnmálamenn almennt ættu ekki að tala niður til almennings sem er vel bjargálna.

Það eru hins vegar til heimili, 5,6 prósent samkvæmt skýrslu starfshóps Seðlabankans, sem skulda meira en 40 milljónir króna. Það eru ekki heimili í rúst heldur búa heimilismenn of stórt.

 

Útrásina verður að keyra í þrot

Ólafur Ólafsson keypti Búnaðarbankann með vafasömum hætti á sínum tíma og reyndi kortéri fyrir hrun að telja alþjóð trú um að arabískur sjeik hafi keypt í Kaupþingi þar sem Ólafur var aðaleigandi. Fréttir í dag segja Ólaf leita nauðasamninga fyrir eignarhaldsfélag sitt, meðal annars til að bjarga öðru félagi.

Skilanefndir gömlu bankanna og nýju ríkisbankarnir eiga að segja þvert nei við málaleitan Ólafs og annarra útrásarauðmanna. Það er þjóðarnauðsyn að útrásin verði keyrð í þrot. Enginn friður verður í landinu ef fjárglæfragengið fær minnstu aðstoð til að halda sér á floti.

Leiknum er lokið og við eigum að byrja með hreint borð. 

Skattlagning til hagsældar

Íslenskri atvinnurekendur þola illa hagnað af starfsemi sinni. Hagnaðinn nota þeir sjaldnast af skynsemi, til að byggja upp til framtíðar eða geyma til mögru áranna. Íslenskur hagnaður fer jöfnum höndum í einkaneyslubruðl og í að byggja skýjaborgir. Íslenski atvinnurekandinn er hliðstæða mannsins sem er veikur fyrir áfengi - einhver annar en hann sjálfur verður að stjórna drykkjunni.

Við eigum að skattleggja atvinnurekstur þannig að hann verði ekki sjálfum sér og öðrum að fjörtjóni. Einhver kann að halda að þá nenni menn ekki í atvinnurekstur en það er misskilningur. Alltaf er nóg af mönnum sem vilja reyna sig í rekstri. Hagnaðarvonin er aðeins einn þáttur af mörgum sem hvetur menn að búa sér til fyrirtæki.

Meginmarkmið nýrrar skattastefnu er að fyrirbyggja óæskilegan hagnað.

 

 

Stjórnlagaþing er rugl

Almenningur heldur uppi 63 þingmönnum til að setja lög og fara þeim höndum um stjórnarskrá er hæfa þykir hverju sinni. Ef þessir þingmenn geta ekki, kunna ekki eða þora ekki að leggja til nýmæli eða breyta gildandi lögum eiga þeir að segja af sér þingmennsku og taka sér annað fyrir hendur.

Það tekur ekki tali að þingheimur afsali völdum Alþingis í hendur samkundu sem hvorki hvílir á hefðum né lögmætum grunni. Málatilbúnaður meirihlutans er lýðskrum af verstu sort og mun ekki leiða til annars en niðurgreiddra trúðsláta.

Kominn er tími til að stemma stigu við októberhruninu. Víst fór margt úrskeiðis og langan tíma tekur að vinda ofan af vitleysunni sem látin var viðgangast um árabil. En það er að fara úr öskunni í eldinn að boða til samkundu af því tagi sem frumvarpið mælir fyrir.

Frumvarpið ekki afgreitt út úr sérnefnd