Auðmenn beygðir undir lög

Í krafti auðs og valda komust útrásarmenn upp með að svína á lögin og fara sínu fram þrátt fyrir að hér ætti að heita réttarríki. Stjórnvöld voru liðleskjur og buktuðu sig fyrir djörfum kaupahéðnum. Gestur Jónsson lögmaður Jóns Ásgeirs bar fram þau rök þegar réttað var í Baugsmálum að ekki mætti sakfella Jón Ásgeir vegna þess að dómur myndi hindra viðskipti hans.

Fréttir gefa til kynna að lögin nái til auðmanna sem og almennings. Gangi kyrrsetning á eigum auðmanna fram verður fróðlegt að fylgjast með bankamönnum sem enn hafa tröllatrú á viðskiptakunnáttu Jóns Ásgeirs. Arion banki leyfir Jóni Ásgeiri að stjórna Högum sem dælir peningum í Fréttablaðið en helsti lánadrottinn Baugsútgáfunnar er Landsbankinn.

Þegar það rennur upp fyrir Finni fávísa í Arion að Jón Ásgeir gengur ekki lengur á vatni er kannski kominn tími til að endurskoða framhaldslífið sem Arion veitti Jóni Ásgeiri til að stunda fákeppni á matvörumarkaði?

Eignir Jóns Ásgeir og Hannesar kyrrsettar

Ofurtrú á mönnum eins og Hannesi

Í Kastljósviðtali segir fyrrverandi forstjóri FL Group að oftrú hafi verið á mönnum eins og Hannesi Smárasyni stjórnarformanni FL Group. Sigmar spyrill gekk á Ragnhildi Geirsdóttur og þráspurði hvort hún hefði ekki átt að básúna að Hannes væri maður sem ekki ætti að treysta. Það er spurning.

Ragnhildur sagði af sér 2005 og mátti öllum vera ljós að það væri vegna starfandi stjórnarformanns, Hannesar Smárasonar. Stjórn FL Group sagði af sér af sömu ástæðu. Samt sem áður var ofurtrúin á Hannesi slík að lífeyrissjóðir leyfðu honum að valsa með peningana sjóðsfélaga, bankar veittu honum fyrirgreiðslu og stjórnvöld töldu hann góðan pappír.

Auðmaðurinn Hannes og félagar hans voru taldir óskeikulir. Og hvernig gat það gerst?

Staðfestir millifærslu frá FL

Eftirspurn eftir aukatriðum

Í þjóðfélaginu er eftirspurn eftir smámálum sem geta dregið athyglina frá brýnum viðfangsefnum er lúta að uppgjöri við hrunið. Orð forsetans um mögulegt Kötlugos eru óvarkár og óheppileg. Viðbrögðin eru á hinn bóginn ekki í samræmi við tilefnið.

Um helgina og í byrjun viku var reynt að búa til stemningu fyrir andófi gegn meintri múgsefjun í samfélaginu. Dramadrottingar í fjölmiðlastétt tóku höndum saman við góðkunningja hrunverja og reyna að færa tilfinningarök fyrir því að mótmæli gegn útrásinni hafi gengið út í öfgar. 

Það tókst ekki að búa til grátkór fyrir hrunverja. Aftur tókst Ólafi Ragnari að beina athygli margra frá hruni og náttúruhamförum. Forsetinn er gangandi stórslys á milli þess sem hann bjargar þjóðinni frá efnahagslegri glötun.

Óþarft að skapa óróa og hræðslu

Baugsafneitun Samfylkingar

Samfylkingin var í bandalagi með Baugi frá 2003 þegar Jón Ásgeir Baugsstjóri ákvað að Davíð Oddsson  forsætisráðherra væri Þrándur í Götu útþenslu Baugsveldisins. Jón Ásgeir og Samfylkingin sameinuðust um að grafa undan forsætisráðherra með öllum tiltækum ráðum. Í leiðinni var stjórnvaldið veikt þannig að ekkert hamlaði stjórnlausu auðmannaræði sem á endanum leiddi til hrunsins.

Ætla mætti að Samfylkingin, sem þáði málafylgju Baugsmiðla og fjármuni, sem raunar var dreift á nokkrar kennitölur til að fela slóðina, skyldi eftir hrun viðurkenna vanheilagt bandalag sitt við Baugsveldið. Össur Skarphéðinsson utanríkisráðherra og fyrrum formaður Samfylkingarinnar gaf til kynna að fyrrum hefði verið maðkur í baugsmysu flokksins en útskýrði ekki nánar.

Karl Th. Birgisson fyrrum framkvæmdastjóri Samfylkingar, ræðuskrifari Björgvins G. Sigurðssonar viðskiptaráðherra fylgir óljósri játningu Össurar eftir með einarðri afneitun. Hann segir ,,rugl" að Baugsmiðlar hafi gengið erinda eigenda sinna.

Tilefni orða Karls Th. er að Óli Björn Kárason átti fjölmiðla og segist ekki hafa ritstýrt þeim sem eigandi. Ályktunin sem Karl Th. dregur er að sömu rök gildi um Jón Ásgeir og Baugsmiðla.

Humm. Hér er önnur karl-thísk rökhenda

Pokasjóður Baugs styrkti skógrækt

Baugur styrkti Steinunni Valdísi þingkonu Samfylkingar

Ályktun: Steinunn Valdís er skógrækt

 

Ingibjörg Sólrún, Davíð og Samfylkingin

Næst á eftir Ingibjörgu Sólrúnu Gísladóttur var Davíð Oddsson var áhrifamesti stjórnmálamaðurinn í Samfylkingunni frá stofnun. Forysta flokksins og þinglið kenndi formanni Sjálfstæðisflokksins um ófarirnar í fyrstu þingkosningum Samfylkingarinnar árið 1999, þegar breiðfylking vinstrimanna náði aðeins 26,8 prósentum atkvæða.

Sameining Alþýðubandalags, Alþýðuflokks og Kvennalista átti að leiða til mikilla breytinga í íslenskum stjórnmálum, sambærilegum þeim sem urðu við sigur R-listans í höfuðborginni 1994. Vonbrigðin með niðurstöðuna nístu inn að beini. Miklu hafði verið kostað til, flokkar með langa og merka sögu voru komnir á öskuhaugana, forystumenn féllu útbyrðis og klofningsdraugur vinstrimanna gekk aftur með stofnun Vinstri grænna.

Undir þessum kringumstæðum var hætta á borgarastyrjöld innan Samfylkingarinnar ef flokkurinn hefði tekið sjálfan sig til endurmats að loknum kosningum sumarið 1999. Traust á milli manna risti grunnt.

Einfaldara og sársaukaminna var að kenna Davíð Oddssyni forsætisráðherra og formanni Sjálfstæðisflokksins um kosningaósigurinn. Í samfylkingarkreðsum var sögunum um ofríki Davíðs haldið á lofti og völd hans ýkt úr hófi til að ríma við kenninguna um að hann bæri höfuðábyrgð á niðurlægingu Samfylkingarinnar. Rauður þráður í samsæriskenningunni var að Davíð hefði hamast á Samfylkingunni í kosningabaráttunni en látið vel að Vinstri grænum.

Minnst af umræðunni kom upp á yfirborðið í blaðagreinum eða umræðum á opnum fundum. Orðræðan um tapið í kosningunum var sjálfhverft hópefli og grýlan sem hélt flokknum saman var formaður Sjálfstæðisflokksins. Skortur á sjálfsgagnrýni og stöðumati að loknum kosningum leiddi flokkinn úr einu klúðrinu í annað.

Þegar kom að kosningum vorið 2003 fór Samfylkingin ekki í framboð til að fá umboð frá kjósendum til að fara með landsstjórnina heldur fór hún í framboð gegn Davíð Oddssyni.

Borgarnesræða Ingibjargar Sólrúnar Gísladóttur 9. febrúar skilgreindi kosningabaráttuna. Ingibjörg Sólrún var forsætisráðherraefni Samfylkingarinnar, eftir að framsóknarmenn og vinstri grænir boluðu henni úr stól borgarstjóra þegar hún ákvað með skömmum fyrirvara að taka sæti á lista Samfylkingarinnar.

Í Borgarnesræðunni líkti Ingibjörg Sólrún stöðu Samfylkingarinnar við Kvennalistann 1983 og Reykjavíkurlistann 1994. ,,Og núna liggur eitthvað í loftinu og það er okkar verkefni í Samfylkingunni að breyta því úr óræðum væntingum í orð og athafnir,“ sagði hún en tókst ekki að fylgja eftir ætlun sinni um að túlka nýja framtíðarsýn félagshyggjufólks. Flokkshugsunin var henni of töm, minningin um tapið 1999 of sár.

Þjóðfélagsgreiningin sem forsætisráðherraefni Samfylkingarinnar lagði upp var endurómur af þráhyggju flokksins gagnvart Davíð Oddssyni. ,,Finnst [fólki] nóg komið af afskiptum stjórnarráðsins af fyrirtækjum og fjármálastofnunum landsmanna?“ spurði oddviti breiðfylkingar vinstrimanna, líkt og það væri brýnt viðfangsefni félagshyggjuflokks að bera blak af kaupsýslumönnum og bönkum.

Sérstakt faðmlag frá Ingibjörgu Sólrúnu fengu þrjú fyrirtæki: Kaupþing, Norðurljós, sem þá var í eigu Jóns Ólafssonar, og Baugur. Ástæðan fyrir dálætinu var að Davíð hafði gagnrýnt þessi fyrirtæki. Norðurljós og Baugur sættu á þessum tíma opinberri rannsókn og Ingibjörg Sólrún dró í efa að málefnalegar ástæður lægju að baki. Bæði þá og síðar fer Ingibjörg Sólrún býsna nálægt því að segja embættismenn lögreglu- og skattayfirvalda spillta, þeir vinni ekki rannsóknir faglega og með rökstuddan grun að leiðarljósi heldur láti Davíð Oddsson segja sér fyrir verkum.

 

Davíð Oddsson er hættur í stjórnmálum og getur ekki lengur þjónað því hlutverki að vera grýlan sem Samfylkingin sameinast gegn. Þá reynir á hvaða pólitík flokkurinn getur sammælst um.
Í eldhúsdagsumræðum á Alþingi í haust gætti sjónarmiða hjá formanni Samfylkingarinnar sem eru í takt við sígilda vinstristefnu jafnaðar og réttlætis. Hún kvað vaxandi efnahagslegan ójöfnuð vega að íslensku samfélagi. Eftir það sem á undan er gengið á Ingibjörg Sólrún nokkur dagsverk fyrir höndum að sannfæra almenning um að Samfylkingin sé í raun jafnaðarmannaflokkur.

(Stytt tímaritsgrein frá 2006, greinina má lesa í heild hér.)

Gjaldþrot Grikkja yrði Lehmanhrun evrulanda

Fjármálaráðherra Þýskalands segir að verði Grikkland gjaldþrota er hætt við að viðlíka áhrif verið af því fyrir evrulöndin 15 og gjaldþrot Lehman fjárfestingabankans fyrir aðrar fjármálastofnanir. Wolfgang Schäuble fjármálaráðherra segir í viðtali við Spiegel að Þjóðverjum sé nauðugur kostur að bjarga Grikkjum.

 Þjóðverjar eru andvígir að setja þýska fjármuni í björgun óreiðulanda í Suður-Evrópu. 

Í viðtalinu þjarma blaðamenn Spiegel að fjármálaráðherranum og vísa til ítrekaðra loforða þýskra stjórnvalda að frá því væri gengið  þegar stofnað var til evrusamstarfsins að Þýskaland myndi ekki sitja uppi með reikning fyrir fjármálaóreiðu annarra þjóða.

Það er aðeins spurning hvenær og hvernig evrusamstarfi lýkur.

Ísland gefist upp fyrir ESB

Uppgjafarrökin fyrir inngöngu í Evrópusambandið birtast reglulega. Kjarni þeirra er að Íslendingar geti ekki búið Ísland vegna þess að þeir hafi ekki viti á rekstri samfélags. Andri Geir Arinbjarnarson setur röksemdina fram með þessu hætti.

Aðeins innganga inn í EB getur hjálpað okkur að endurreisa innviði samfélagsins hratt og tímanlega.  Án EB hjálpar mun þetta verk taka um tvær kynslóðir og alls óvíst er um árangurinn. Verkefnið er tvíþætt, endurnýja þarf stjórnarskrá og stofnanir lýðveldisins ásamt uppbygging á trausti og trúverðugleika innanlands og erlendis.   Ísland á vel hæft fólk til að ganga í þetta verkefni en vandamálið er að það er ekki að finna innan íslenskra stjórnmálaflokka eða stjórnsýslu.  Íslensk hagsmunagæsla eins og hún er í dag mun sjá til þess að þetta hæfa fólk fær aldrei að koma að þessu mikilvæga verkefni.

Ef það væri svo að Íslendingar byggju við sult og seyru væri hægt að taka mark á röksemdinni. Við vitum á hinn bóginn að þá fyrst tókst að gera Ísland að velmegunarlandi þegar við tóku forræði okkar mála fyrir réttum hundrað árum. 

Við höfum reynt á eigin skinni að hafa stjórnsýsluna á meginlandi Evrópu og það gafst ekki vel.

Á stjórnarskrifstofum í stórríkjum Evrópu voru tvær heimsstyrjaldir hannaðar og þeim hrint í framkvæmd. Ísland gæti kennt Evrópu hvernig á að reka samfélag - að frátaldri fjármálaþjónustu, eins og gefur að skilja.

Evrópufrjálslyndi í breskum kosningum

Nick Clegg formaður Frjálslynda flokksins í Bretlandi er fyrrum þingmaður á Evrópuþinginu og hvað ESB-sinnaðastur breskra stjórnmálamanna. Evrópusinninn Egill Helgason mærir Clegg en tekur ekki fram að formaðurinn sé Brusselmaður, heldur telur honum til tekna að vera andskoti fjölmiðlaveldis Murdochs.

Leiðari Telegraph segir að Clegg muni setja upptök evru á dagskrá og segja Bretland frá undanþágu í samrunaferli ESB.

Sun birtir skoðanakönnun sem segir 65 prósent breskra kjósenda á móti auknu valdaframsali til Brussel og sama hlutfall er á móti því að breska pundinu verði skipti út fyrir evru. Lesendur Sun eru varaðir við Evrópulyndi frjálslyndra.

En, sem sagt, Murdoch gefur út Sun.

Uppgjör endurskírt múgsefjun

Sigurður G. Guðjónsson lögmaður segir afsögn Þorgerðar Katrínar Gunnarsdóttur varaformanns Sjálfstæðisflokksins vera dæmi um óhugnanlega múgsefjun í samfélaginu. Þorgerður Katrín gerði ekkert rangt, segir Sigurður, og allt sé í sóma þótt eiginmaðurinn hafi nýtt sér þau starfskjör sem voru í boði í Kaupþingi, - niðurfelling skulda þar á meðal.

Embætti í stjórnmálaflokki er ekki eign þess sem það situr. Tiltrú, traust og trúverðugleiki eru atriði sem stjórnmál geta ekki verið án til lengdar. Þökk sé Sigurði G. og öðrum meðhlaupurum útrásar tókst auðmönnum að blekkja bæði stjórnmálamenn og almenning um að veldisvöxtur peninganna væri það eina sem skipti máli. Margri trúðu og standa núna slyppir og snauðir og með orðsporið í göturæsinu.

Huggunarorð Sigurðar G. gæti Þorgerður Katrín alveg verið án. Sigurður G. er eftir allt fyrrum talsmaður Jón Ólafssonar í Skífunni og Jóns Ásgeirs Baugsstjóra. Sefjunin sem Sigurði G. verður tíðrætt um er ekki múgsins heldur hrunverjanna sem stunda sjálfsefjun að hætti siðblindra og finna sök hjá öllum öðrum en sjálfum sér. 

 

ESB-umsókn og uppgjör fara ekki saman

Uppgjörið við hrunið er komið á dagskrá stjórnmálaflokka vonum seinna. Afsagnir hrunfólks og beiðni um afsökun sýnir iðrun og vilja til að gera yfirbót. Í framhaldi munu stjórnmálaflokkarnir hver í sínum ranni leita skýringa á hvers vegna fór sem fór, greina þjóðfélagsástandið eins og það er í dag og móta sér framtíðarsýn.

Nema Samfylkingin, sem alltaf reynir að svindla. Áður en kom að iðrun og yfirbót vegna hrunsins var Samfylkingin stokkin á næstu stóru blekkinguna, Evrópusambandið. Umsókn um aðild að ESB var beinlínis stefnt gegn uppgjöri enda liggur í hlutarins eðli að lærdómurinn af útrásinni og hruninu getur ekki fyrirfram verið sá að við afsölum forræði okkar mála til Brussel.

Össur Skarphéðinsson utanríkisráðherra Samfylkingar sagði á ESB ráðstefnu í síðustu viku að lykill að endurreisn Íslands væri aðildarferli að Evrópusambandinu. Eins og endranær hefur Össur rangt fyrir sér. Í meginatriðum virka öll kerfi á Íslandi; fjármálakerfið, menntakerfið, heilbrigðiskerfið, dómskerfið o.s. frv. Innviðir samfélagsins eru í lagi og þurfa ekki endurreisnar við.

Aftur þarf að endurreisa traust almennings á stjórnmálum og siðuðu samfélagi. Og stjórnmál í siðuðu samfélagi eiga ekki að virka þannig að 29 prósent flokkur eins og Samfylkingin leiði okkur áleiðis inn í framandi ríkjabandalag, - jafnvel þótt Júdasareðli nokkurra forystumanna vinstri grænna leyfði framgang málsins á alþingi.

ESB-umsóknina á að draga tilbaka svo að uppgjörið geti farið fram.