Minnisleysi í málsvörn Baugsmanna

Baugsmenn, þeir Jón Ásgeir Jóhannesson og Tryggvi Jónsson, sem nú eru fyrir héraðsdómi, kunna út í hörgul að útskýra málsatvik þegar það er þeim hagfellt en brestur minni þess á milli. Lögfræðiteymið sem vinnur að málsvörn þeirra félaga ætti að ræða það við sakborningana að minnisleysi er ekki trúverðug málsvörn.

Á hinn bóginn getur verið að Baugsmenn þurfi ekki að hafa áhyggjur af slíkum smáatriðum. Dómarinn hefur með atferli sínu og háttsemi gefið skýrt til kynna hvaða hug hann ber til málsaðila.

Tekist á í Baugsmálinu

Flatneskja í fjölmiðlaflóru

Peningar kaupa ekki gæði í blaðamennsku. Aldrei í sögu prentmiðla á Íslandi hafa jafn miklir fjármunir verið lagðir í dagblöð, vikublöð og tímarit. Ef allt væri með felldu ætti lesendum að standa til boða fjölbreytt úrval fjölmiðlaefnis sem endurspeglaði margbreytilegar áherslur í fréttavali, framsetningu, sjónarhornum, greiningu og gagnrýni.

En því er ekki að heilsa. Þrátt fyrir fjölda titla blasir flatneskjan við í prentmiðlaútgáfu. Að slepptum hverdagslegum stuttfréttum er uppistaðan heimildastýrð endurvinnsluviðtöl og álitsgjafadálkar.

Nýjasta afurðin, Krónikan, er með Hannes Smárason kaupsýslumann á forsíðu. Viðtalið við hann er maður búinn að lesa áður í Morgunblaðinu og Viðskiptablaðinu. Annað viðtal er við Gísla Örn Garðarsson leikara og leikstjóra sem hefur verið tíður gestur á síðum dagblaða og tímarita. Berglind Ásgeirsdóttir sendiherra er líka í viðtali. Tveir álitsgjafar, Sigmar Guðmundsson og Guðmundur Magnússon, skrifa sína síðuna hvor. Eina unna fréttin sem eitthvað kveður að í þessu 80 blaðsíðna vikuriti er um sjóræningjaveiðar í Barentshafi.

Prentmiðlar verða að eiga erindi við lesendur. Þeim þarf að liggja eitthvað á hjarta, annað en það að koma út.

Meira en 300 prósent munur á vöxtum íbúðarlána í Noregi og Íslandi

Íbúðarlán íslensku bankanna eru 4,95 - 5 prósent og eru verðtryggð. Norskir bankar bjóða íbúðarlán á bilinu 3,38 - 3,52 prósent og þar er engin verðtrygging. Að frádeginni verðbólgu, sem var 2,2 prósent í Noregi í fyrra, bera lánin innan við 1,5 prósent raunvexti.

Norskir bankar geta stundað viðskipti með 1,5 prósent raunvexti en íslensku bankarnir þurfa 4,95 - 5 prósent raunvexti til að sinna sömu þjónustu. Sagt með örðum orðum: Það er meira en 300 prósent munur á vöxtum á íbúðarlánum hér á landi og í Noregi.

Maður hrekkur í kút af minna tilefni.

Sjá hér umfjöllun um húsnæðislán norskra banka.

Sjá hér verðbólgutölur í Noregi.

Sjá hér...nei, ég er ekkert að gefa upp vefslóðina hjá ræningjunum, þið kunnið þær.

Sporlausir peningar...

...og dómari.

Dómari stöðvaði skýrslutöku saksóknara í Baugsmálinu

Samfélagsklám í fjölmiðlum

Hjarðmennska fjölmiðla kemur fram í því að reglulega eru tiltekin mál úr hófi vinsæl umfjöllunarefni. Umfang umfjöllunarinnar verður úr öllu samhengi við mikilvægi viðfangsefnisins vegna þessa hópsálarheilkennis fjölmiðla að apa hver eftir öðrum.

Núna eru það vistheimili í nútíð og fortið fyrir börn og fíkla sem njóta athyglinnar. Umfjöllunin gengur út á ofbeldi og kynferðislega misnotkun, gjarnan kryddað með fjárdrætti þegar við á.

Fréttaumfjöllun af þessu tagi nefnist samfélagsklám í norrænum fjölmiðlum og þykir ekki til eftirbreytni.

Fjölmiðlar gegna mikilvægu hlutverki sem eftirlitsaðilar í lýðræðisþjóðfélagi en þeir grafa undan sér með óhóflegum áherslum á gamlar og nýjar hryllingssögur sem eru einhliða matreiddar.

Það dregur út trúverðugleika fjölmiðla þegar samhengi, baksvið og blæbrigði atburða víkja fyrir upphrópunum um hörmungar.

Íslenskum fjölmiðlum verður þó að virða það til vorkunnar að þar er þéttsetinn bekkurinn unglingum sem eiga eftir að hlaupa af sér hornin. Ef þeir endast í faginu er kannski von til að efnistökin verði þroskaðri.

Kennarar eru varavinnuafl heimilanna

Á meðan grunnskólakennarar eru varavinnuafl heimilanna verður á brattan að sækja í kjarabaráttunni. Það skortir á að litið sé á grunnskólakennslu sem alvöru starf og þar af leiðir að alvöru laun eru ekki í boði.

Það stendur upp á kennara og samtök þeirra að gera landsmönnum grein fyrir mikilvægi grunnskólakennslu. Á síðustu áratugum þegar kvenkennaravæðing grunnskólans stóð yfir sömdu kennarar um frídaga í stað launahækkana. Það var rökrétt framhald af þeirri afstöðu margra kvenkennara að þeir væru varavinnuafl heimilisins sem ynni samhliða heimilisstörfum fyrir aukatekjum á meðan karlinn skaffaði aðaltekjurnar.

Eftirhreytur af gömlu samningunum eru starfsdagar þar sem skólum er lokað til að kennarar geti sinnt endurmenntun sinni. Það þekkist ekki hjá öðrum starfsstéttum þjóðfélagsins að vinnustöðum sé skipulega lokað til að starfsmenn endurmennti sig. Líkt og aðrar stéttir ættu kennarar að geta lagt stund á endurmenntun án þess að skella í lás.

Ekkert fer eins í taugarnar á foreldrum og starfsdagar grunnskólakennara. Og það vita kennarar ósköp vel og óskiljanlegt hvers vegna þeir hafa ekki samið um breytingar á þessu fyrirkomulagi.

Leið grunnskólakennarar til betri starfskjara er að gera menntun barna að baráttumáli sínu. Tillögur um betri skóla eiga að koma frá þeirri stétt sem gerst þekkir til, kennurum. Með því að gera menntun barna að alvörumáli í þjóðfélagsumræðunni verður kennslan alvörumál. Þar er kominn grundvöllur til að krefjast alvöru launa.

Bankasamsærið um auðkennislykilinn

Bankarnir og sparisjóðirnir komast upp með samsæri gegn almenningi á meðan stjórnvöld og fjölmiðlar sofa á verðinum. Samráð fjármálastofnana um að þvinga alla notendur heimabanka til að nota auðkennislykil stríðir gegn heilbrigðum viðskiptaháttum og er óskammfeilin aðför að einstaklingsfrelsi.

Auðkennislykillinn er afurð sem verður til í versta heimi af öllum hugsanlegum, þar sem Stóri bróðir og auðvaldið taka höndum saman um að hafa vit fyrir almenningi. Aukennislykilinn sem við verðum öll að bera á okkur sýnir svo ekki verður um villst að Íslendingar dagsins í dag eru sauðfé, sjórnvöld eru smalinn í þjónustu feita hreppstjórans sem slefar gulli um leið og hann telur ærnar sínar og heitir Glitnir Spron Kaupþings-Landsbankason.

Sagnfræðingar framtíðarinnar munu klóra sér í kollinum og spyrja hvernig í veröldinni tiltölulega upplýst þjóð lét drýldna bankastráka troða upp í sig rafeindalykli og kyngdi þegjandi og hljóðalaust.

Til upprifjunar, þeim sem vita ekki um veröld sem var, byggja bankaviðskipti hjá siðmenntuðum þjóðum á trausti. Í tilfelli heimabankaþjónustu treystir bankinn viðskiptavini sínum að fara vel með notendanafn og leyninúmer sem veita aðgang að viðkomandi reikningum. Eins og gengur og gerist standa ekki allir undir traustinu, og sumir eru bara kjánar, upplýsingarnar fara á flakk og óprúttnir aðilar komast í annarra manna reikninga.

Bankarnir gætu sem best skilið sauðina frá höfrunum og hengt bjálfabjöllu, auðkennislykil, framan á þá sem sí og æ misferst. Engu tali tekur að krækja bjálfabjöllunni á hvern og einn.

Í kynningarriti með auðkennislyklinum er svohljóðandi málskrúðsfjóla:

Lykilinn er í takt við nýjustu tækni og ströngustu öryggiskröfur á markaðnum og eykur öryggi við innskráningu í netbanka til muna.

Jafnvel bankastrákarnir, blautir á bakvið eyrnu eins og þeir eru, hljóta að vita að nýjasta tækni í dag er úrelt á morgun. Hvað ætlar samansúrraða bankamafían að taka næst til bragðs?

Hvað segir MEST LESIÐ um okkur sem fjölmiðlaneytendur?

 Netútgáfur fjölmiðla birta gjarnan upplýsingar um hvaða fréttir eru mest lesnar og er Mbl.is ekki undantekning þar á. Lauslegur samanburður á þessum upplýsingum hjá fjórum miðlum gefur til kynna að lesendur Mbl.is séu uppteknari af fréttum af kynferðislegum toga en lesendur BBC, Guardian og New York Times.

Lesendur Guardian sækjast eftir íþróttaefni, BBC lesendur alþjóðlegum pólitískum fréttum og þeir sem glugga í New York Times eru áhugasamir um mannlífsefni og pólitík. Þess er að geta að New York Times birtir ekki mest lesið-upplýsingar heldur mest-tölvupóstsent.

Samanburðurinn er hér að neðan.

 Mest lesið Mbl.is

1. Sá brennandi bát við Ísland á mynd á Google Earth
2. Heitar deilur um setrið sem Anna Nicole bjó í
3. Fiennes og flugfreyja í háloftahneyksli
4. Réðust inn til stúlku í verbúð
5. Átta ára drengur hlaut viðurkenningu sem Skyndihjálparmaður ársins

Mest lesið  BBC

• Israeli missile test 'successful'
• Portugal will legalise abortion
• Fatal drug mix killed US R&B star
• Harvard names first female head
• US accuses Iran over Iraq bombs

 

Mest lesið  Guardian

What you've been reading: top stories on Guardian Unlimited February 8
1) How the US sent $12bn in cash to Iraq
2) Weekly YouTube sports roundup
3) Match report: England v Spain
4) Snowstorms close airports and schools
5) Richard Williams: Jury still out on Woodgate

 Mest tölvupóstsenda efni New York Times

1. Troubles Grow for a University Built on Profits
2. In Niger, Trees and Crops Turn Back the Desert
3. How Green Was My Wedding
4. Surf’s Upscale as Sport Reverses Beach Bum Image
5. Day Out: Time-Traveling in Oxford, England
6. Editorial: The Build-a-War Workshop
7. 36 Hours: Sedona, Ariz.
8.  Frank Rich: Stop Him Before He Gets More Experience
9. Op-Ed Contributor: California Split
10. Questions Couples Should Ask (Or Wish They Had) Before Marrying

Hvar er Guðni?

Framsóknarflokkurinn slítur með arfleifð Halldórs Ásgrímssonar fyrrverandi formanns og þarf að finna réttu stemmuna ef ekkki á illa að fara í vor. Úti um allt land eru framsóknarmenn í felum og vilja ekki kannast við sinn gamla flokk.

Guðni Ágústsson varformaður, sem nýlega hlaut glæsilega kosningu í prófkjöri flokksins á Suðurlandi, hefur haldið sig til hlés en verður nú að koma á vettvang og blása eldmóði í liðið sitt.

Fylgi Samfylkingar eykst á ný en fylgi Framsóknarflokks í lágmarki

Ekki nægar sannanir að mati Hreins Lofts

Lesandi sendi þættinum línu um Baugsmálin til að vekja athygli á ummælum Hreins Loftssonar stjórnarformanns Baugs í Viðskiptablaðinu. B. segir:

Merkilegt komment hjá Hreini Loftssyni í Viðskiptablaðinu á fimmtudaginn :,,Ég veit að það verður sýknað í öllum þessum liðum í þessu máli sem er að fara af stað. Þeir hafa ekki næginlegar sannanir fyrir einu né neinu."

Ekki sýknað vegna sakleysis og ekki vegna þess að þeir hafa engar sannanir, heldur bara "ekki nægar".