ESB og ríkisstjórnin fá útreið

Þjóðin hefur litla trú á ríkisstjórninni og er með óbeit á Evrópusambandinu. Ríkisstjórnin gerði bandalag við ESB-þjóðirnar Bretland og Holland í Icesave-málinu og fórnaði hagsmunum íslenskrar alþýðu.

Skoðanakönnunin staðfestir orðspor ríkisstjórnar Jóhönnu Sigurðardóttur.

46% telja að stjórnin lifi ekki

Grenjað samkvæmt gjaldskrá

Sigurður G. Guðjónsson lögmaður grét þegar Baugsfeðgar misstu Glitni og sakaði stjórnvöld um þjófnað. Baugsfeðgar eiga á hættu að missa Haga og enn er Sigurður G. mættur til að ásaka stjórnvöld um vonsku við fróman Jón Ásgeir og frómari Jóhannes.

Rökin fyrir samsæriskenningu Sigurðar G. eru þau að forstjóri Haga hafi í Kastljósviðtali atast í Gylfa Magnússyni viðskiptaráðherra. Sú saga gangi ,,fjöllunum hærra" að ráðherra hafi hringt í bankastjóra og gefið skipun um aðför að Baugsfeðgum.

Baugsliðið kann að hanna atburðarrás af þessu tagi. Fréttablaðið mun í framhaldi búa til frétt um það hvernig hið opinbera níðist á vanmáttugum Baugsfeðgum. Dálkahöfundur með heimilisfestu í Háskóla Íslands hittir ónafngreindan mann í flugvél sem sem segir honum að samsæri gegn feðgunum hafi verið skipulagt í skúmaskotum stjórnarráðsins. Sköllóttur og skögultenntur rithöfundur skrifar um draumfarir sínar og hvernig hann vaknar upp í martraðarkenndu Gylfalandi þar sem illmenni sitja yfir hlut frómra feðga.

Við bíðum spennt. 

 

Samfylkingararmur Sjálfstæðisflokksins

Varkár íhaldssemi og áhættusækið frjálslyndi verða pólar í íslenskum stjórnmálum næstu árin. Í flokkakerfinu verður spurt hvort samfylkingararmur Sjálfstæðisflokksins láti af trú sinni eða gangi til liðs við andleg skyldmenni sín.

Varkár íhaldssemi  höfðar til stærri hluta sjálfstæðismanna, flestra vinstri grænna og þorra framsóknarmanna. Örlítill minnihluti samfylkingarfólks gæti fundið samkennd með þessum hópi. Varkár íhaldssemi byggir á gildum trúmennsku, ábyrgðar og hófstillingar. Samfélagssýnin er fjölskyldumiðuð, efnahagsviðhorfið er að hafa borð fyrir báru og krefst ráðdeildar en hafnar skuldasöfnun. Utanríkisstefnan byggir á fullvalda Íslandi.

Áhættusækið frjálslyndi er nýjungagjarnt, lætur vaða og skeika að sköpuðu. Frjálslyndið er næmt fyrir tískubylgjum og telur sig ýmist til hægri eða vinstri, eftir því hvaðan vindar blása. Samfélagsvitundin er fjölmenningarleg, efnahagssjónarmið eru afslöppuð og skuldsækin. Áhættusækna frjálslyndið vill Ísland í Evrópusambandið.

Samfylkingin nánast heil og óskipt tilheyrir áhættusækna frjálslyndinu. Finnur Ingólfsson og Björn Ingi Hrafnsson væru líklegir framsóknarmenn í sama liði. Samfylkingararmur Sjálfstæðisflokksins gæti einnig átt samleið. Þar má kalla til Þorgerði Katrínu Gunnarsdóttur, Guðlaug Þór Þórðarson, Ragnheiði Ríkharðsdóttur og Illuga Gunnarsson.

 

 

Fyrir afskriftir á skuldum Baugsfeðga...

...þarf að

- rétta af halla ríkissjóðs en feðgarnir eiga þar hlut að máli.

- tryggja samkeppni á matvörumarkaði, þar sem feðgarnir ráða einu og öllu.

- knýja feðgana til að borga skattaskuldir sínar.

- fá tilbaka heilbrigða viðskiptahætti en þar eru feðgarnir meinsemd.

-  leggja af Baugsútgáfuna sem er lygamaskína feðganna.

- gera Ísland heiðarlegra en með Baugsfeðga virka í atvinnulífinu er það ekki hægt.

Kaupþing eignast móðurfélag Haga

Stjörnulögmenn skemma mannorð

Venjulegt fólk sem að ósekju er handtekið þarf ekki á þjónustu stjörnulögmanna að halda. Stjörnulögmenn eru fyrir þá sem hafa eitthvað að fela. Þeir sem kaupa almannatengslaþjónustu hjá lögmönnum eru iðulega haldnir ranghugmyndum um að til sé fjölmiðlaréttlæti sem standi ofar öðru réttlæti.

Almannatenglaþjónusta lögmanna staðfestir skemmt mannorð.

„Lögreglan neitaði að handtaka konuna“

Tvær forsíður, tveir heimar

Tvær aðalfréttir á forsíðu Morgunblaðsins í dag voru annars vegar um fjárlagafrumvarpið og hins vegar um greiðslujöfnun heimilanna. Fréttablaðið var með forsíðuppslátt  um að Alþjóða gjaldeyrissjóðurinn teldi afrek hversu hratt tækist að endurreisa bankana. Í gær var aðalfréttin með þessari fyrirsögn: Jóhanna segir allt á uppleið.

Munurinn á Morgunblaðinu og Fréttablaðinu er sá að fyrrnefnda útgáfan stundar blaðamennsku en hin auglýsingamennsku.

Blaðamennska gerir ráð fyrir gagnrýnu viðhorfi, auglýsingamennska að barið sé í brestina í þágu þess sem borgar reikninginn.

Hver borgar reikninginn fyrir Fréttablaðið?

Aumingjavæðing þjóðar

Stefna ríkisstjórnar Jóhönnu Sigurðardóttur er að aumingjavæða þjóðina. Markmiðið er að gera frjálsa einstaklinga að bónbjargarfólki. Hönnun aumingjavæðingarinnar er í höndum Samfylkingar annars vegar og hins vegar spillta kúlulánaliðsins sem vill fela fávísa græðgishegðun sína með því að gera sjálfbjarga menn að ómögum.

Ríkisstjórnin ætlar því sem næst að þvinga almenning til að breyta gerðum samningum um afborganir af húsnæðislánum og setur skilvísa undir sama hatt og óreiðufólk.

Vitað er að innan við fimmtungur þjóðarinnar átti við fjármálavanda að etja. Þegar frá eru talin viðrini sem eru með allt niðrum sig í góðæri sem hallæri eru kannski um tíundi hluti þjóðarinnar sem þarf sérstök úrræði.

Í stað þess að mæta þörfum tíunda hluta þjóðarinnar um sérstök úrræði  er þjóðin öll aumingjavædd, gerð að vesalingum með einu pennastriki Samfylkingarinnar.

Tilgangurinn er að koma kúlulánaliðinu í skjól almennings. Eins og kom í ljós við meðferð  Alþingis á þessu samfylkingarfrumvarpi var reynt að smygla inn í það sérákvæðum um skattameðferð á afskrifum kúlulánaliðsins. Ráðherra Vinstri grænna stöðvaði þann anga ófagnaðarins en hefði auðvitað átt að bremsa allt frumvarpið.

Afgangar útrásarinnar sitja enn að völdum.

Allir fá greiðslujöfnun nema þeir biðji um annað

Siðasnauð lagatækni Hæstaréttar

Kröfur um strangari lög verða háværar eftir þennan dóm Hæstaréttar. Dómurinn virðist í saminn í anda útrásarsiðferðis sem teygði og togaði lög, reglur og venjur til að þjóna siðasnauðri lagatækni.

Hnefarétturinn verður ekki fegraður með húðflúri lagatækninnar. Dómurinn segir að stjórnir megi snuða hluthafa hlutafélaga með því að hygla ráðandi hluthöfum.

Viðskiptasiðferði er bágt á Íslandi og Hæstiréttur er smitaður.  

 

Skelfileg skilaboð frá Hæstarétti

ESB-áróður undir dulnefni

Eiríkur Bergmann Einarsson er hvað ötulastur áróðursmanna fyrir Evrópusambandsaðild Íslendinga og  tvöfaldur í roðinu samkvæmt bloggaranum Hauki Nikulássyni sem afhjúpaði að Eiríkur Bergmann skrifar undir dulnefninu Jón Gunnar Sigvaldason.

Aðildarsinnar hafa löngum ýkt rökin fyrir inngöngu Íslands í ESB. Þegar þeir skálda líka upp nöfn til að fjölga í hópi aðildarsinna er fokið í flest skjól.

Endurreisnin alltaf handan við hornið

Vextir áttu að lækka þegar Davíð fór úr Seðlabankanum, gengið átti að styrkjast með umsókninni um aðild að Evrópusambandinu. Stöðugleikasáttmálinn og Icesave-samningar, báðir, áttu að auka tiltrú á íslenska hagkerfinu og stuðla að lægri vöxtum og hærra gengi krónunnar.

Núna er það efnahagsáætlunin sem Alþjóða gjaldeyrissjóðurinn hefur blessað og aukið lánsflæði til landsins sem eiga að redda málum ríkisstjórnar Jóhönnu Sigurðardóttur.

Ætli spunaliðið í ríkisstjórninni trúi eigin blekkingum?