Svandís bítur agn Benedikts - lýðræðið aukaatriði

Svandís Svavarsdóttir þingflokksformaður Vinstri grænna bítur á agn Benedikts Jóhannessonar formanns Viðreisnar sem í gær slakaði út samsærisbeitu um að Sjálfstæðisflokkurinn og Vinstri grænir stefndu að ríkisstjórn.

Benedikt smurði þykkt á beituna með ásökunum um spillingu frænda síns, Bjarna Ben., og óvandaða stjórnsýslu Steingríms J. í vinstristjórninni sálugu. Svandísi er nokkur vorkunn að gína við agninu - ráðherraferill Steingríms J. er viðkvæmt mál. 

Með afstöðu sinni stóreykur Svandís líkurnar á vinstristjórn undir forsæti Pírata, þar sem Vinstri grænir og Viðreisn fá fagráðuneyti. Og sálfræðistéttin kætist.

Betur færi að Svandís styddi lýðræðið og leyfði kjósendum að segja sitt álit áður en hún myndaði - eða afmyndaði - ríkisstjórn. En kannski er lýðræðið aukaatriði hjá öllum vinstrimönnum.

Valkostirnir hafa kristallast

Vinstristjórn mynduð viku fyrir kosningar

Píratar eru með öll ráð vinstriflokkanna í hendi sér þar sem þeir mælast stærstir og gera kröfu um að fá stjórnarmyndurnarumboð frá forseta Íslands. Píratar ætla ekki að bíða eftir niðurstöðu kosninga heldur mynda meirihluta á alþingi áður en þjóðin fær að segja sitt álit.

Smáflokkarnir Samfylking, Björt framtíð og Viðreisn munu gera hosur sínar grænar fyrir Pírötum og leggja drög að nýrri ríkisstjórn um helgina. Vinstri grænu hosurnar, sem eru með álíka fylgi og Píratar, gætu gert tilkall til að vera meðforystusauðir Pírata.

Valdataka vinstrimanna viku fyrir kosningar lýsir virðingu þeirra fyrir lýðræðinu.

Funda um helgina um samstarf

Össur: Samfylking í faðm Pírata, Birgitta svarar

Össur Skarphéðinsson, leiðangursstjóri vinstrimanna til Brussel, sér helsta bjargræði Samfylkingar að líma sig fasta við Pírata. Í framlagi á Eyjunni boðar Össur framhaldslíf Samfylkingar í bandalagi við Pírata.

Birgitta Jónsdóttir svaraði ákalli Össurar í umræðuþætti á RÚV, auðvitað, þar sem hún sagði að plan A Pírata væri að gera Ísland að ESB-rík.

Bandalag Pírata og Samfylkingar er með yfir 25 prósent fylgi, samkvæmt síðustu mælingu.

Áfram sveiflast fylgið

RÚV-Pírata Ísland, sálfræðingar gleðjast

Fjölmiðlapólitískt bandalag RÚV og Pírata stækkar þriggja manna þingflokk, sem þarf sálfræðing til að tala saman, upp í 15 þingmenn. Í kjölfar stórsigurs RÚV-Pírata fá að minnsta kosti fimm sálfræðingar vinnu á alþingi - auk allra þeirra sem komast i uppgrip út í þjóðfélaginu við að laga taugahrúgur sem verða til undir oki RÚV-Pírata.

Síðustu viku fór RÚV hamförum við að lýsa Íslandi sem óalandi og óferjandi spillingarbæli er Píratar einir gætu lagfært. RÚV færði kosningabaráttuna til ársins 2009 þegar þjóðin var á barmi taugaáfalls. Til að fá útlenskan stimpil á ónýta Ísland var Eva Joly flutt inn til lands af Pírötum og fékk hún drottningarviðtal á RÚV - auðvitað.

RÚV gerði stórt númer úr blaðamannafundi Pírata, þar sem þeir mynduðu ríkisstjórn fyrir kosningar, en lét þess ógetið að enginn, nema Samfylking, auðvitað, vildi starfa með þeim. Myndin sem RÚV dró upp var að Píratar væru þegar komnir í stjórnarráðið.

RÚV-Pírata Ísland verður tragikómískur brandari sem í samanburði gerir Jón Gnarr og Besta flokkinn að stjórnspekingum.

 

Píratar mælast stærstir

Benedikt og árásirnar á Bjarna Ben.

Benedikt Jóhannesson formaður Viðreisnar er í góðum tengslum við slúðurveitu Eiríks Jónssonar, sem mærði Benedikt líkt og launaður almannatengill með færslu 18. október. Degi síðar birtist á slúðurveitunni færsla um fjölskyldutengsl Bjarna Ben við starfsmann Seðlabankans sem er sekur um trúnaðarbrot.

Benedikt er hugleikið að eyðileggja trúverðugleika Bjarna Ben. Í málgagni Viðreisnar, Hringbraut, má lesa í beinu framhaldi af færslum Eiríks nafnlaus skrif sem bendla Bjarna Ben. við viðskiptapólitískt baktjaldamakk.

Nafnlaus höfundur pistilsins á Hringbraut er vel kunnugur viðskiptum og kann til verka að smíða samsæriskenningar.

Með frænda eins og Benedikt þarf Bjarni Ben. enga óvini.

Plantað fyrir kosningarnar

Píratar kaupa Evu Joly í Kastljós

Eva Joly kom í boði Pírata til landsins vegna kosningabaráttunnar. Markmiðið var að auka umræðu um spillingu í samfélaginu. Þótt Eva kunni ekki stakt orð í íslensku er hún ábyggilega ,,upplýst" af píratískum félögum sínum.

Kastljós RÚV tók að sér að magna upp spillingarumræðuna fyrir Pírata og veitti Joly drottningarviðtal.

Lára Hanna Einarsdóttir setti Kastljósviðtalið óðara á jútúb. Lára Hanna kallaði formann Viðreisnar ,,mellu" þegar hann afþakkaði að mynda ríkisstjórn með Pírötum fyrir kosningar. Þegar fjölmiðlar eru annars vegar eiga Píratar og Lára Hanna sína mellu.  

Kastljós í kosningabaráttu ársins 2009

Það ætti ekki að þurfa sérfræðing til að vita að seðlabankar eru til að bjarga bankakerfi sem riðar til falls. Þetta gildir um alla seðlabanka. Haustið 2008 stóðu allir íslensku bankarnir á bjargbrúninni.

Eftir að tveir féllu, Glitnir og Landsbanki, var reynt að bjarga þeim þriðja, Kaupþingi, með neyðarláni úr Seðlabanka Íslands. Það mistókst og Kaupþing fór í gjaldþrot.

Pólitískt uppgjör við bankahrunið fór fram í kosningunum 2009 og að nokkru marki fjórum árum síðar, í kosningunum 2013.

Kastljós RÚV vill að kosningarnar 2016 snúist líka um bankahrunið fyrir átta árum. RÚV stendur vaktina fyrir vinstriflokkana sem fyrr.

Segir valdið hafa verið hjá Seðlabanka

Oddný falbýður sig sem ráðherra

Formaður Samfylkingar, Oddný Harðardóttir, kemst ekki á þing í Suðurkjördæmi samkvæmt skoðanakönnunum. Flokkurinn hennar mælist með um sex prósent fylgi. Samt segir Oddný í viðtali að möguleiki Suðurnesjamanna að fá ráðherra felist í að kjósa hana.

Þetta er nokkuð djörf yfirlýsing af formanni flokks sem er við að þurrkast út af þingi. Að ekki sé talað um nýmælið sem í tilboðinu felst.

Eða hefur einhver heyrt um ráðherra Suðurnesjamanna í ríkisstjórn Íslands?

Vinstri grænir og Viðreisn: jöfnuður gegn elítunni

Viðreisn er elítuframboð þeirra sem fleyta rjómann í samfélaginu. Viðreisn gengur svo illa í kosningabaráttunni að frambjóðendur flokksins vilja snúa pólitík upp í tveggja manna tal. Vinstri grænir eru komnir með 20 prósent fylgi í könnunum og stefna í stórsigur.

Vinstri grænir standa á gömlum sósíalískum merg, eru arftaki Alþýðubandalagsins, þótt fyrrum félögum þeirra í Alþýðufylkingunni finnist sósíalisminn útþynntur.

Án þess að það fari hátt i umræðunni breytir vaxandi styrkur Vinstri grænna og veikleiki Viðreisnar áherslum Sjálfstæðisflokksins. Sterk velferðarstefna og jafnaðarsjónarmið eru meira ráðandi í málflutningi sjálfstæðismanna en oft áður.

Viðreisn vill frjálslynda miðjustjórn

Ónýtir flokkar kjósa ónýtan gjaldmiðil

Otmar Issing var aðalhagfræðingur Evrópska seðlabankans. Hann telur evruhagkerfið að hruni komið. Annar þekktur þýskur hagfræðingur, Hans Werner Sinn, segir evruna mistök og ráðleggur ríkjum með traust efnahagskerfi, Austurríki og Finnland, að yfirgefa gjaldmiðilinn.

Hér heima er það að frétta að ESB-smáflokkar eins og Samfylking og Viðreisn gera evru-aðild að bjargræði fyrir Ísland.

Evran var pólitísk tilraun til að sameina Evrópu í eitt hagkerfi. Tilraunin mistókst en það mun taka mörg ár, ef ekki áratugi, að vinda ofan af þeim mistökum. Á meðan dettur engum í hug að leggja lag sitt við evruna. Nema ónýtum smáflokkum á Íslandi.

„Einn daginn mun spilaborgin hrynja“