Ríkissaksóknari á að segja af sér

Ríkissaksóknari gerði embættið að pólitísku verkfæri vinstrimanna með því að taka þátt í atlögunni að Hönnu Birnu Kristjánsdóttur innanríkisráðherra í tilbúningi sem kallast ,,lekamálið".

Eins og dómsmálaráðherra, Sigmundur Davíð Gunnlaugsson, bendir á hlýtur Sigríður Friðjónsdóttir ríkissaksóknari að láta jafnt yfir alla ganga og stökkva nú til að rannsaka leka úr Samkeppniseftirlitinu til Kastljóss á ríkisútvarpi vinstrimanna.

Ef ríkissaksóknari bregst ekki við áskoruninni viðurkennir embættið að leki sé aðeins rannsakaður þegar vinstriflokkunum liggur á að koma höggi á pólitíska andstæðinga. Og ef ríkissaksóknari rannsakar Samkeppniseftirlitið þá grefur eitt embætti almennings undan öðru embætti almennings aðeins til að þóknast sértækum hagsmunum þeirra sem svindla  almenningi í skjóli fákeppni.

Hvort heldur sem er þá vinnur embætti ríkissaksóknara undir forystu Sigríðar Friðjónsdóttur gegn almannahagsmunum.

Til að spara okkur frekari leiðindi ætti Sigríður Friðjónsdóttir að viðurkenna það sem liggur í hlutarins eðli; að hún ræður ekki við embættið sem henni var falið.

Ríkissaksóknari: Vísbendingar um brot

Ójöfnuður og fátækt; íslenska samhengið

Ójöfnuður samfélags vísar til þess hve breitt bil er á milli þeirra ríkustu og efnaminnstu. Á hinn bóginn er fátækt æ oftar skilgreind þannig að þann flokk fylla þeir sem eru með lægstu tekjurnar.

Alveg sama hve ríkt þjóðfélag félag er þá eru alltaf tíu prósent með lökust kjörin. Fátæklingar í einu landi geta verið með tekjur og lífskjör millistéttar í öðru landi.

Á Íslandi höfum við lagt áherslu á jöfnuð, t.d. með því að leggja ofurkapp á að bæja frá atvinnuleysi. Ólíkt Evrópu búum við ekki við stéttskiptingu og andstætt Bandaríkjunum er tekjudreifingin jafnari hér á landi.

Ísland er fyrirmyndarsamfélag m.t.t. efnahagslegs jafnaðar. Það sorglega er að þeir sem kenna stjórnmálaskoðanir sínar við jafnaðarmennsku neita að viðurkenna þessa staðreynd. Svokallaðir jafnaðarmenn á Íslandi reyna ítrekað að koma okkur í Evrópusambandið sem elur á fátækt og ójöfnuði í gegnum atvinnuleysi.

Ójöfnuðurinn sá mesti í öld

Samfylking í 20 ára gömlum leiðindum

EES-samningurinn tók gildi 1994 og fullseint fyrir Samfylkinguna að efast um hvort samningurinn standist stjórnarskrána 20 árum seinna.

EES-samningurinn þótti skásti kosturinn í viðskiptasambandi Íslands og Evrópusambandsins á þeim tíma. Ef samningnum verður sagt upp þá taka gildi fyrri samningar um fríverslun Íslands og ESB.

Með því að rótast í EES-samningnum reynir Samfylkingin að bæta sér upp gjörtapaða vígstöðu í Evrópumálum. Meiri reisn væri yfir Samfylkingunni að viðurkenna mistök sín og styðja afturköllun umboðslausu ESB-umsóknarinnar frá 16. júlí 2009.

En reisn og Samfylking eiga ekki samleið núna frekar en fyrri daginn.

Telja EES-samninginn ekki standast stjórnarskrána

Hjarðhegðun, hagfræði og fjármál

Hagfræði er að hluta gisk á hvaða hjarðhegðun sé líklegust á hlutabréfamörkuðum í það og það skiptið. Síðustu daga eru engir þeir stóratburðir á ferðinni sem einir og sér geta útskýrt fall hlutabréfa.

Á hinn bóginn er vitað að peningaflæði frá bandaríska seðlabankanum hélt uppi verði hlutabréfa á alþjóðamörkuðum og bjó í leiðinni til pappírsauðæfi. Í Washington var tilkynnt fyrir nokkrum mánuðum að ódýrir dollarar yrðu ekki lengur í boði.

Um tíma var haldið að evrópski seðlabankinn hlypi í skarið fyrir þann bandaríska og byði upp á peninga eins og hver vildi á núllvöxtum. Það reyndist óskhyggja.

Pappírsauðæfin hverfa þess dagana án þess að nokkur gæti séð það fyrir með vissu. Það segir nokkra sögu um þau órökrétta hjarðhegðun í heimi fjármála.  

Adam var ekki lengi í Paradís

Matarskatturinn ekki prinsippmál

Það getur ekki verið prinsippmál Sjálfstæðisflokksins að hækka skatt á matvæli. Þegar fjárlagafrumvarp ríkisstjórnarinnar var lagt fram sagði formaður flokksins í fjölmiðlum að umræðan myndi slípa frumvarpið.

Nú hefur umræðan sýnt fram á að rökin fyrir hækkun matarskatts halda ekki. Það er engin eftirspurn í samfélaginu eftir ,,einfaldara skattaumhverfi" ef það felur í sér hækkun á matarverði.

Skynsamlegast er að lagfæra fjárlagafrumvarpið þannig að matur verði áfram í lægra vsk-þrepi. 

Sjálfstæðisflokkurinn er þrátt fyrir allt að stofni til íhaldsflokkur. Og íhald er að halda í það sem reynst hefur vel. Enginn kvartaði undan fyrirkomulagi matarskatts. Hvers vegna að breyta því sem virkar?

Vill Bryndísi ekki úr flokknum

Bryndís og matar-mistök Sjálfstæðisflokksins

Það voru mistök af hálfu Sjálfstæðisflokksins að berjast fyrir hækkun virðisaukaskatts á matvæli í nafni einföldunar á skattkerfi.

Í fyrsta lagi fann almenningur ekki fyrir flóknu vsk-kerfi; hér var ekki um pólitískt vandamál að ræða. Í öðru lagi misheppnaðist algjörlega, ef það var þá reynt, að færa rök fyrir nauðsyn breytinga á vsk-kerfinu.

Hækkun á matvöru er viðkvæmt mál sökum þess að enginn getur án matar verið. Sterk rök þarf til að hækka skatta á matvæli. Sjálfstæðisflokkurinn hefur ekki kynnt þau enn. 

Bryndís Loftsdóttir varaþingmaður Sjálfstæðisflokksins tók að sér að leiðrétta matar-mistök flokksins. Hún ætti að fá lof en ekki last frá félögum sínum.  

Bryndísi sárna ummæli Brynjars

Vestfirskt málfrelsi naumt skammtað

Málfrelsi á Vestfjörðum er skilgreint þrengra en á höfuðborgarsvæðinu, samkvæmt dómi yfir Jóni Guðbjartssyni. Ummæli sem hann lét falla um Helga Áss Grétarsson fólu ekki í sér ásökun um lögbrot og ættu að flokkast sem gildisdómar og refsilausir sem slíkir.

Í hæstaréttardómi nr.  673/2011,  er tekist á um mörkin  á milli gagnrýni í þágu lýðræðislegrar umræðu annars vegar og hins vegar ærumeiðinga. Dómur Hæstaréttar er að jafnvel þótt notað sé sérlega gildishlaðið orð eins og ,,landráðamaður" í umræðu, sem raunar er jafnframt ásökun um refsiverða háttsemi,  þá sé hvorki tilefni til að ómerkja slík ummæli né séu þau skaðabótaskyld. Hæstiréttur gerir kröfu til að gildisdómar eigi sér ,,einhverja stoð í staðreyndum málsins." 

Í hæstaréttardómi nr. 382/2003 er meginreglan um refsileysi gildisdóma orðuð á þennan veg: ,,Fallast ber á með stefndu að gildisdómar í opinberri umræðu um samfélagsleg málefni séu almennt ekki refsiverðir."

Í hæstaréttardómi nr. 181/2005 staðfestir Hæstiréttur túlkun héraðsdóms Reykjavíkur á 235. grein almennra hegningarlaga um að gildisdómar byggðir á staðreyndum sem taldar eru fyrir hendi skuli refsilausir.

Vestfirðingar  eiga sama rétt og aðrir landsmenn að tjá sig. Héraðsdómur fjórðungsins í máli Jóns Guðbjartssonar hlýtur að vera endurskoðaður í Hæstarétti.

 

 

Jón dæmdur fyrir meiðyrði

948 ár frá Hastings

Á þessum degi árið 1066 sigraði afkomandi norrænna manna í Normandí, Vilhjálmur bastarður, her Englandskonungs, Haralds Guðinasonar, við Hastings. Englendingar segja innreið norrænu Frakkanna upphaf lénsskipulags þar í landi. Og einmitt vegna léna Normandímanna í Frakklandi gerðu enskir konungar á síðmiðöldum tilkall til konungdóms í Frakklandi. Hlaust af hundrað ára stríðið þar sem þjóðardýrlingurinn Jóhanna af Örk lét að sér kveða.

Haraldur Guðinason mætti vígmóður til leiks í Hastings, Helsingjaport upp á norrænu. Aðeins tæpum þrem vikum áður barðist hann við nafna sinn harðráða Noregskonung. Í sögu Haralds harðráða segir Snorri Sturluson að eftir orustuna við Staffurðabryggju hafi konungur Engla og Saxa haldið suður.

En Haraldur snerist þá með her sinn suður á England því að hann hafði þá spurt að Vilhjálmur bastarður fór sunnan á England og lagði landið undir sig. Þar voru þá með Haraldi konungi bræður hans: Sveinn, Gyrður, Valþjófur. Fundur þeirra Haralds konungs og Vilhjálms jarls varð suður á Englandi við Helsingjaport. Varð þar orusta mikil. Þar féll Haraldur konungur og Gyrður jarl bróðir hans og mikill hluti liðs þeirra. Það var nítján nóttum eftir fall Haralds konungs Sigurðarsonar.

Orustan við Helsingjaport er áminning um hlut norrænna manna í enskri sögu og evrópska meginlandsins.

(Takk til RT).

 

Ríkisfjölskylda vinstrimanna og góða fólkið

Vinstrimenn eru góða fólkið sem Elliði Vignisson gerir skil; fólkið sem allt veit um það hvernig við hin eigum að haga okkur og hvaða skoðanir við eigum að hafa.

Vitanlega veit formaður góða fólksins, afsakið, Samfylkingar, hvernig ríkisfjölskyldan á að líta út og hvað hún á að eyða í hvaða vöru og hvernig lífi hún á að lifa.

Bráðum birt Samfylkingin á heimasíðu sinni hvað ríkisfjölskyldan á að borða, hvert hún á að fara í ferðalag og hvernig hún skal eyða tómstundum sínum. Þá verða ítarlegar uppeldisleiðbeiningar á heimasíðu Samfylkingar fyrir ríkisfjölskylduna.

Síðast en ekki síst birtir Samfylkingin okkur hvaða stjórnmálaskoðanir eru samþykktar fyrir ríkisfjölskylduna.

Í ríkisfjölskyldusamfélagi Samfylkingar eru allir eins.

Neysluviðmið endurskoðuð séu forsendur rangar

Írsk ungmenni föst heima í fátækt

Atvinnuleysi meðal ungra Íra er 25 prósent. Um 42 prósent Íra á aldrinum 18 til 30 ára búa heima hjá foreldrum sínum þrátt fyrir að engin þjóð í Evrópu hafi misst til útlanda jafn stórt hlutfall í þessum aldurshópi.

Unga fólkið á Írlandi, sem fær á annað borð vinnu, er oft ýmist í ólaunuðum störfum eða atvinnubótavinnu á vegum hins opinbera. 

Írski hagfræðingurinn David McWilliams rekur rannsóknir sem sýna hve hart atvinnuleysi leikur ungt fólk: þunglyndi, alkahólismi og styttri lífaldur eru meðal afleiðinganna. 

Írar búa við evru og aðild að Evrópusambandinu.