Þögnin í byrgi Jóhönnu

Hávært glamur búsáhalda felldi ríkisstjórn Geirs H. Haarde en það verður stíffrosin þögn Breta og Hollendinga sem kaffærir Jóhönnustjórnina. Össur, Jóhanna og Steingrímur J. auglýsa afstöðu viðsemjenda okkar í Icesave-málinu með því að boða fulltrúa stjórnarandstöðunnar á sinn fund til að njóta þagnarinnar.

Þegar stjórnmálaelíta landsins hittist til að þegja saman er það líklega vísbending um að stjórnmálin eigi ekki erindi við þjóðina.

Hér fær Jóhanna heilræði sem strákarnir í kringum hana hafa ekki döngun í sér að veita: Keyrðu út á Bessastaði á morgun og afhentu húsráðanda afsagnarbréf.

Langur en rýr fundur

Reiðistjórnun á Íslandi? Látt' ekki svona

Tímaritið Economist er ímynd breskrar yfirvegunar og býr að úrvalsliði blaðamanna. En stundum skjöplast útgáfunni. Í nýlegri færslu á vefsíðu tímaritsins er sagt að árið 2010 gæti orðið óróasamt þegar efnahagslegir erfiðleikar breytast í félagslega óöld.

Ríki þriðja heimsins eru líklegust til að verða fyrir barðinu á upplausn og innanlandsátökum. Evrópa er líka í hættunni. Nefnd eru þrjú lönd þar í álfu sem standa frammi fyrir hyldýpinu, Frakkland, Bretland, Lettland og já, Ísland.

Klykkt er út með því að reiðistjórnun gæti verið á dagskrá um víða veröld.

Ef almannatengslastofa fékk það hlutverk að mála stöðu lands og þjóðar sem dekkstum litum ætti hún að fá bónus.

 

Hér greinin í Economist.

Smáreddingar til margra

Fólk trúði að breiðvirk og róttæk lausn yrði fundin á vanda þeirra heimila sem urðu fyrir skakkaföllum í hruninu. Breiðvirknin gekk eftir, frysting lána eins og hver vildi og þeim sem ekki vildu lánaleiðréttingu þurftu beinlínis að bera sig eftir því að fá að vera í friði.

Breiðvirk lausn getur hins vegar ekki verið róttæk. Engin samstaða var í samfélaginu að slá af 20 prósent höfuðstóls lána. Raunar var vafamál hvort það dygði nema fyrir hluta af þeim fimmtungi heimila sem getur ekki staðið í skilum.

Smáreddingar til margra þýðir að skuldsettustu heimilin fara í gjaldþrot. Stjórnmálamenn vita það en vilja skiljanlega ekki segja það upphátt.

Sendi 850 nauðungarsölubeiðnir

Ríkisstjórnin er rauða dulan

Í deilu Íslendinga annars vegar og hins vegar Breta og Hollendinga er deilt um hvort og hvernig almenningur ábyrgist fjármálagjörninga einkabanka. Í síkum deilum í meginatriðum tvær aðferðir til úrlausnar, fyrir dómstólum og með stjórnmálum.

Bretar og Hollendingar vildu ekki dómstólaleiðina af tveim ástæðum. Í fyrsta lagi þótti hún seinvirk, einkum sé haft í huga að fjármálakerfi álfunnar riðaði til falls haustið 2008 og ekki mátti vafi leika á að innistæður væru tryggðar. Í öðru er verulegum vafa undirorpið að ríkissjóðir eigi að taka yfir innistæðutrygginasjóði verði þeir gjaldþrota. Evrópska regluverkið gerði ekki ráð fyrir kerfishruni eins og varð hér og úrræði því ekki fyrir hendi.

Skjótvirk stjórnmálaafgreiðsla hefði verið farsælasti kostur fyrir báða deiluaðila. En vegna hrikalegra afglapa íslensku samninganefndarinnar tókst ekki betur til en svo að Bretum og Hollendingum var talin trú um að þeir gætu fengið betri samninga en raunsætt og sanngjarnt er að þeir fái.

Meginábyrgð á Icesave-samningnum er hjá ríkisstjórninni. Á meðan hún situr telja hagsmunaaðilar í alþjóðlegum bankaheimi að stjórnin eigi að standa skil á samningnum sem hún skrifaði undir.

Ekkert gerist í Icesave-deilunni fyrr en ríkisstjórnin fer frá.

Lækkun lánshæfiseinkunnar gæti orðið afdrifarík

Líf stjórnarinnar í höndum Breta

Bretar ráða lífdögum ríkisstjórnar Jóhönnu Sigurðardóttur. Bretar hafa orð fyrir þeim og Hollendingum báðar þjóðirnar telja sig eiga inni Icesave-skuld hjá íslenskum almenningi og til staðfestu því uppáskrifaðan samning frá ríkisstjórn Íslands.

Plott ríkisstjórnarinnar gengur út á að samfylkja stjórnarandstöðu til nýrra viðræðna áður en þjóðin fellir Icesave 2 í þjóðaratkvæði eftir rúman mánuð.

Ef því sem þögn Breta verður lengri mun staða Jóhönnustjórnar verða pínlegri. Stjórnarandstaðan nennir ekki á fleiri fundi með Steingrími J. og Jóhönnu enda ekkert sem bendir til að Bretar ætli að opna á viðræður.

Þjóðinni líður vel með að hægsteikja ríkisstjórn sem vinnur gegn hagsmunum Íslands og stjórnarandstaðan sér ekki ástæðu til að kvarta enda stikkfrí.

Þótt Össur Skarphéðinsson utanríkisráðherra og Björgvin G. Sigurðsson þingflokksformaður Samfylkingar gangi báðir með flokksskírteini breska Verkamannaflokksins í vasanum ætlar það ekki að duga til að milda goðin í Westminster og fá þau til að bjóða upp á fund er gæti bjargað ríkisstjórn Íslands.

Lömuð stjórn liggur lágt

Ríkisstjórnin er lömuð vegna þess að hún var gerð afturreka með stórmál, Icesave, og á enga möguleika að fá öðru meginmáli sínu framgeng - aðild Íslands að Evrópusambandinu. Ríkisstjórn Jóhönnu er í verri stöðu en ríkisstjórn Davíðs Oddssonar eftir forsetaneitun á fjölmiðlafrumvarpinu 2004.

Uppstokkun á ríkisstjórn Davíðs, Halldór Ásgríms sem forsætisráðherra, stoðaði lítið. Stjórnin lét reka á reiðanum og tækifærið 2006 til að hamla gegn bankavitleysunni gekk úr greipum vegna þess að ríkisstjórnin hafði enga tiltrú.

Góðu heilli eru engir aðrir kraftar í samfélaginu sem skora ríkisstjórnarvaldið á hólm, líkt og gerðist í auðmannaræðinu fyrir fimm árum. Stjórnarandstaðan er ekki tilbúin til að gera valdatilkall og læðist með veggjum þegar talið berst að stjórnarskiptum. Atvinnurekendur eru í rusli og verkalýðshreyfingin á bágt eftir lífeyrissjóðafyllerí á útrásartímum. 

Aðstæður eru þannig í samfélaginu að þjóðin þarf tíma til að skilja hrunið og meta aðstæður. Á þeim tíma er ekki æskilegt að hafa starfssama ríkisstjórn. Þjóðin þarf hægláta ríkisstjórn sem sér til þess að innviðir samfélagins séu í lagi en markar enga framtíðarstefnu í neinu stórmáli.

Ef Jóhanna, Össur og Steingrímur J. hefðu fattað ástandið hefðu þau ekki rambað út í ESB-vitleysuna og gert breiða samstöðu um Icesave 1 í lok sumars.

Þríeykið skildi ekki í vor og veruleikinn lamdi þau í hausinn. Ætli Jóhanna, Össur og Steingrímur J. skilji nú? 

Ekkert fundarboð komið úr Stjórnarráðinu

Flokksráð Vg klýfur Jóhönnustjórnina

Afgerandi og ótvíræð ályktun flokksráðs Vinstri grænna í gær um afstöðuna til aðildar Íslands að Evrópusambandinu er stríðsyfirlýsing gagnvart stefnu ríkisstjórnar Jóhönnu Sigurðardóttur. Í sumar samþykkti naumur meirihluti alþingis að sækja um aðild samkvæmt kröfu Samfylkingar. Flokksráð Vg hefur þetta um málið að segja

Flokksráðið ítrekar andstöðu Vinstrihreyfingarinnar - græns framboðs við hugsanlega aðild Íslands að Evrópusambandinu. Þrátt fyrir að nú hafi verið sótt um aðild að sambandinu, er það eindreginn vilji flokksráðs að Ísland haldi áfram að vera sjálfstætt ríki utan Evrópusambandsins.
Flokksráð Vinstrihreyfingarinnar – græns framboðs hvetur ráðherra, þingmenn og félagsmenn Vinstri grænna um allt land til að halda stefnu flokksins um andstöðu við aðild Íslands að ESB á lofti og berjast einarðlega fyrir henni.

Skýrara getur andstaðan ekki orðið.

Vinnan gegn aðildarumsókninni mun meðal annars fara fram í ráðuneyti sjávarútvegs og landbúnaðar, þar sem fyrir er Jón Bjarnason. Samfylkingin hefur áhuga að leggja ráðuneytið niður og sameina iðnaðarráðuneyti. Flokksráð Vg ályktaði gegn þeirri ráðstöfun.

Samfylkingin í fangi Björgólfs Thors

Samfylkingin er grunnur flokkur og leitar að kjölfestu auðmanna til að fara ekki á hliðina. Jón Ásgeir og Baugsveldið fjármögnuðu Samfylkinguna og hún galt með stuðningi á þingi og í ríkisstjórn. Jón Ásgeir er blankur þessa dagana og ekki fýsilegur pólitískur kjölfestufjárfestir.

Björgólfur Thor á aftur skotsilfur og eins og fyrri daginn vill Samfylkingin gjarnan þiggja. Aðalábyrgðarmaður Icesave hefur fengið gæðastimpil frá skrifstofu forsætisráðherra með þeim orðum að sama sé hvaðan gott komi. 

Samfylkingin hefur um hríð borið víurnar í Björgólfsfeðga. Björgólfur eldri var sérstakur hátíðargestur á landsfundi Samfylkingarinnar fyrir nokkrum árum. Talsmaður feðganna var til skamms tíma þingmaður Samfylkingarinnar og viðskiptafélagar koma úr röðum trúnaðarmanna Samfylkingar.

Einn viðskiptafélaginn, Vilhjálmur Þorsteinsson, hyggst reisa gangaver á Suðurnesjum í félagi við Björgólf Thor. Vilhjálmur kom úr Alþýðuflokknum og hefur starfað í Samfylkingunni frá stofnun.

Sérstök lög verða keyrð í gegnum þingið fyrir gagnaver Vilhjálms og Björgólfs Thors. Fyrir áramót kom hik á Samfylkinguna enda var hreyft við mótmælum. Sumum þótti ekki viðurkvæmilegt að auðmaðurinn sem ber höfuðábyrgð á Icesave-klúðrinu fái fyrirgreiðslu hjá hinu opinbera.

Síðustu fréttir herma að Samfylkingin ætli að innsigla bandalag sitt við Björgólf Thor með lagasetningu.

 

 

Pólitískt líf Steingríms J. í húfi

Myllusteinninn um háls Steingríms J. heitir Icesave-samningurinn. Samkvæmt ESB-RÚV hvatti formaður Vinstri grænna flokksmenn sína í þrígang til að samþykkja Icesave 2 í væntanlegu þjóðaratkvæði. Í heimi svika og undanbragða er þrír vanheilög tala frá biflískum dögum.

Steingrímur J. er búinn að vera gangi þjóðaratkvæðið fram sem horfir. Hann ætti að leita í smiðju fjandvinar síns á Bessastöðum til að finna ráð sem bjarga opinberum frama manna.

Svo vill til að fyrir flokksráði Vg liggur fyrir tillaga sem gæti komið formanninum á beinu brautina. Tillagan um að draga umsókn Íslands um aðild að Evrópusambandinu hefur beina skírskotun til yfirgangs Breta og Hollendinga i Icesave sem og svika forystu Vg við kjósendur flokksins eftir síðustu kosningar.

Steingrímur J. býr til ný pólitísk skilyrði fyrir sig og flokkinn með því að samþykkja að ESB-umsóknin verði dregin tilbaka. Samfylkingin mun emja en láta það yfir sig ganga vegna þess að hún er einangruð með Evrópustefnu sína og sú stefna er lélegur söluvarningur á pólitískum markaðstorgum nú um stundir.

Steingrímur J. hefur engu að tapa en allt að vinna.

Vinstri grænir að ná vopnum sínum?

Drög að ályktunum flokksráðsfundar Vinstri grænna kveða á um að Ísland dragi tilbaka umsókn um aðild að Evrópusambandinu. Eftir hálfs árs setu í ríkisstjórn með Samfylkingunni rennur upp fyrir æ fleiri flokksmönnum Vg að fórnin sem var færð 16. júlí er ekki hægt að réttlæta.

Vg eiga sóknarfæri á vinstri kanti stjórnmálanna. Skoðanakannanir sýna að flokkurinn heldur sína og vel það á meðan fylgi við Samfylkinguna dalar.

Eftirhrunssamfélagið biður um orðheldni. Ef flokksráðið samþykkir ályktun um að draga umsóknina tilbaka er boðið upp á sátt við þá fjölmörgu kjósendur sem kusu Vg gagngert vegna andstöðu við inngöngu í ESB.

Fréttastofan ESB-RÚV sá ástæðu til að taka fram þegar fréttin var sögð að í stjórnarsáttmála Vg og Samfylkingar segir að sótt skuli um aðild að ESB. Fréttastofan hafði ekki fyrir því segja að hvergi í sáttmálanum er tekið fram að ekki megi draga umsóknina tilbaka.