Sigríður er hlutdræg í máli Helga Magnúsar

Sigríður Friðjónsdóttir ríkissaksóknari segir sér til málsbóta í Helga máli Magnússonar vararíkissaksóknara að hún starfi eftir ,,einkunnarorðum ákæruvaldsins um óhlutdrægni, sjálfstæði og heilindi."

Nei, í máli Helga Magnúsar er Sigríður hlutdræg og er staðin að óheilindum. Enn síður er hún sjálfstæð heldur fangi orðræðu sem í eðli sínu er pólitískur aktívismi. Lítum nánar á málsatvik.

Helga mál Magnúsar byrjar með kæru Semu Erlu sem rekur einkafélagið Sólaris. Sjálf er Sema Erla til rannsóknar vegna mútugjafa. Kjarni kæru Semu Erlu Sólaris til ríkissaksóknara er eftirfarandi:

Sam­tök­in [Sólaris] telja að um­mæl­in feli meðal ann­ars í sér róg­b­urð og smán­un vegna þjóðern­is­upp­runa eða þjóðlegs upp­runa, litar­hátt­ar, kynþátt­ar eða trú­ar­bragða sem og ærumeiðing­ar sam­kvæmt al­menn­um hegn­ing­ar­lög­um.

Sema Erla er aðgerðasinni, ekki hlutlaus eða óhlutdrægur aðili. Hún er til rannsóknar vegna mútugjafa á erlendri grund. Múturnar voru greiddar embættismönnum í Egyptalandi til að veita frjálsa för Palestínuaraba sem Sema Erla og Sólaris fluttu til Íslands án þess að hafa til þess nokkra heimild. Múhameð Kourani, ofbeldismaður sem Helgi Magnús gagnrýndi að héldi landvist eftir afbrotasögu, er skjólstæðingur Semu Erlu.

Hvað gerir Sigríður ríkissaksóknari? Jú, hún tekur kæru Semu Erlu góða og gilda og sendir ósk til dómsmálaráðherra um að Helgi Magnús verði leystur frá störfum. Engin rannsókn, enginn rökstuðningur. Túlkun aðgerðasinna á orðum Helga Magnúsar er tekin góð og gild. Fáheyrð er handvömm æðsta handhafa ákæruvaldsins.

Ekki þarf djúpa lögskyggni til að átta sig á hvers vegna Sigríður leggur ekki fram neinar lögskýringar í málinu. Ekki heldur tefla opinberir málsverjendur Sigríðar fram lagarökum um meint afbrot Helga Magnúsar, t.d. Róbert Spanó. Sigríður, Spanó og líkt þenkjandi láta sér nægja að hneykslast að hætti aktívistatepru. Móðgunarréttlæti er af sama stofni og múgsefjun.

Kæra Semu Erlu vísar ekki í tiltekna lagagrein. Orðalagið, sjá hér að ofan, er þó bein vísun í afar umdeilda lagagrein sem ýmsir sérviskuhópar og lífsskoðunarfélög, t.d. Samtökin 78, vilja breyta til að auðveldara sé að svipta menn æru og atvinnu sem gagnrýna pólitískan rétttrúnað, öðru nafni vók.

Umrædd lagagrein er nr. 233 a. í almennum hegningarlögum: 

Hver sem opinberlega hæðist að, rógber, smánar eða ógnar manni eða hópi manna með ummælum eða annars konar tjáningu, svo sem með myndum eða táknum, vegna þjóðernisuppruna eða þjóðlegs uppruna, litarháttar, kynþáttar, trúarbragða, fötlunar, kyneinkenna, kynhneigðar eða kynvitundar, eða breiðir slíkt út, skal sæta sektum eða fangelsi allt að 2 árum.

Sigríður ríkissaksóknari hefur gert tilraunir með þessa lagagrein, sem stundum er kennd við hatursorðræðu, en yfirleitt farið bónleið til búðar í réttarsal. Hér er um að ræða lagalegt jarðsprengjusvæði. Lagagreinin er hlaðin huglægum viðmiðum. Hæðni, rógur og smánun eins er réttmæt gagnrýni annars. Andspænis lagagreininni stendur skýlaus réttur borgaranna, varinn í stjórnarskrá, að tjá hug sinn um menn og málefni.

Lagagreinin er skilgetið afkvæmi gamalla laga um guðlast, sem felld voru úr gildi 2015 eftir að hafa verið marklaus í áravís. Pólitíski rétttrúnaðurinn, sem byggir í besta falli á sérvisku en oftast fávisku, reynir að fá lagavernd líkt og steingeld trúarbrögð. Málefni sem ekki þola gagnrýna umræðu eru einatt ruslahrúga hindurvitna, andlegur afturúrkreistingur.

Allt þetta veit Sigríður ríkissaksóknari enda á fagsviði hennar, gott ef ekki persónulegt áhugamál. Þess vegna rökstuddi hún ekki ósk sína til ráðherra um að víkja Helga Magnúsi úr embætti. Í staðinn gerði Sigríður orð Semu Erlu að sínum. Sema Erla er sjálfskipaður réttlætisriddari með fullan munn af staðleysu. Áfall er fyrir almenning í landinu að ákæruvaldið sé í höndum einstaklings sem kann ekki skil á froðu og haldbærum rökum, kastar sér dómgreindarlaust út í nornapott aktívista.

Ríkissaksóknari stendur ekki undir einkunnarorðum embættisins um óhlutdrægni, sjálfstæði og heilindi. 

 

 

Spanó grefur undan íslenskum yfirvöldum

Róbert Spanó lögmaður og fyrrum forseti Mannréttindadómstóls Evrópu sérhæfir sig í að grafa undan íslenskum yfirvöldum. Hann gerði það í máli Sigríðar Andersen þáverandi dómsmálaráðherra. Æskuvinur Spanó, Vilhjálmur H. Vilhjálmsson, lögmaður stefndi dómsmálaráðherra og íslenska ríkinu til Mannréttindadómstólsins fyrir að standa ekki rétt að skipun dómara í landsrétt.

Spanó og fjórir félagar hans við dómstólinn dæmdu Sigríði og íslenska ríkinu í óhag. Tveir dómarar í minnihluta sögðu Spanó og fylgjendur taka þátt í ,,pólitískum uppþotum" á Íslandi.

Spanó leiðist ekki uppþotin, einkum þegar um er að ræða dómsmálaráðherra úr röðum Sjálfstæðisflokksins. Í tilefni af úrskurði Guðrúnar dómsmálaráðherra í máli vararíkissaksóknara, Helga Magnúsar, skrifara Spanó grein í Vísi undir fyrirsögninni Grafið undan trúverðugleika ákæruvaldsins. Síðasta setning greinarinnar geymir niðurstöðu lögmannsins:

Niðurstaða dómsmálaráðherra er engu að síður áfall fyrir ákæruvaldið í landinu og þar með almenning allan sem á það treystir.

Jú, það má taka undir með Spanó, að niðurstaðan er áfall fyrir æðsta handhafa ákæruvaldsins, Sigríði Friðjónsdóttur ríkissaksóknara. Sigríður taldi Helga Magnús ekki nógu vók og vildi hann feigan í starfi. Guðrún ráðherra sló á fingur ríkissaksóknara sem þarf að ígrunda stöðu sína í kjölfarið.

En þegar Spanó segir niðurstöðu Guðrúnar ráðherra áfall fyrir íslenskan almenning snýr hann hlutunum á hvolf. Þvert á móti, úrskurður ráðherra er sigur almennings, sigur tjáningarfrelsis og sigur samfélagsfriðar.

Meintur þolandi í málinu, Múhameð Kourani, er ekki íslenskur almenningur heldur sýrlenskur hælisleitandi sem kom hingað til lands á fölskum forsendum. Múhameð vann ekki handtak þau ár sem hann var frjáls maður á Fróni. Gestrisnina þakkaði Múhameð fyrir með ofbeldisverkum og líflátshótunum, m.a. gegn Helga Magnúsi og fjölskyldu hans. Helgi Magnús vann þjóðþrifaverk er hann varaði við Múhameð og hans líkum.

Spanó til vorkunnar er hann með á ferilsskránni, auk áhuga á pólitískum uppþotum, að gera sér dælt við múslímska réttarheimspeki. Spanó var gistivinur Erdogan Tyrklandsforseta og þáði sæmd af mannréttindaböðlinum. Þetta gerði Spanó í hlutverki forseta Mannréttindadómstólsins. Þolendur mannréttindaböðulsins kröfðust afsagnar Spanó.

Spanó er eintak af alþjóðlegu fyrirbæri, vókisti með múslímablæti. Slíkur maður getur aldrei talað fyrir hönd íslensks almennings. Markmið manna eins og Spanó er að grafa undan íslenskum yfirvöldum og tiltrú almennings á réttarkerfinu. Eins og dæmin sanna.

Ósigur í Kúrsk

Rússar eru við að umkringja úkraínska herflokka í vesturhluta Kúrsk. Í austurhluta héraðsins er Úkraínuher á undanhaldi. Stríðsbloggarinn Military Summary greinir frá. Vestrænir meginstraumsmiðlar staðfesta.

Rúmlega mánuður er síðan Úkraínuher gerði óvænta innrás yfir landamærin og náðin fótfestu í Kúrsk-héraði. Um 15 þúsund manna herlið sótti hratt fram í fyrstu en þraut örendið eftir nokkra daga. Rússar voru ekki með mannskap til að hrekja tilbaka innrásarliðið. Fyrr en núna.

Litið var á Kúrsk-aðgerðina sem útspil Selenskí forseta til að ná frumkvæðinu, bæði á vígvellinum en ekki síður í fjölmiðlaumræðunni. Árangur í Kúrsk drægi athyglina frá velgengni Rússa í Donbass í austurhluta Úkraínu. 

Álitsgjafi á þýska meginstraumsmiðlinum ARD segir að fari illa í Kúrsk og framsókn Rússa í Donbass haldi áfram stefni í uppgjöf Úkraínu. Ekki umræða sem er Selenskí forseta þóknanleg; hann vill ræða siguráætlun Úkraínu. Sem er í stuttu máli að úkraínskir hermenn fjármagnaðir og vopnaðir af Bandaríkjunum efni til sóknar næsta vor. Austurrískur ofursti, vel hlynntur málstað Úkraínu, segir atburðarásina ekki lengur í höndum Selenskí og Kænugarðsstjórnar.

Vestræn pólitík er ekki hagfelld Úkraínu um þessar mundir. Í Þýskalandi unnu nýverið stórsigur í héraðskosningum flokkar yst til vinstri og hægri sem báðir eru sammála um að ljúka Úkraínustríðinu á rússneskum forsendum. Í Bandaríkjunum veigra menn sér við stórar ákvarðanir í aðdraganda forsetakosninganna í nóvember. 

Í viðtengdri frétt segir að Selenskí velti fyrir að bjóða Rússum á friðarráðstefnu næstu mánuði. Rússum var ekki boðið á slíka ráðstefnu júní í Sviss. Það hljómar vel að efna til friðarstefnu. En þegar gagnaðila er ekki boðin aðild er augljóst að uppákoman er sýndarveruleiki án innihalds.

Rússar segjast bíða eftir friðartillögum frá Bandaríkjunum. Þær koma ekki fyrr en í eftir forsetakosningarnar og kannski ekki fyrr en eftir embættistöku nýs forseta í janúar.

Von Selenski er að halda sjó til áramóta, þreyja síðan þorra og góu og blása til vorsóknar með meiri vestrænum stuðningi en hingað til. Veik er sú von.

 

Sigur Úkraínu veltur á Bandaríkjamönnum

Churchill verri en Hitler og Stalín...ha?

Winston Churchill forsætisráðherra Bretlands bjargaði Evrópu, ef ekki heiminum, frá villimennsku fasisma í búningi stormsveita Hitlers, voru til skamms tíma viðtekin söguleg sannindi. Með ,,viðtekin" er átt við að þorri manna hafði fyrir satt að Churchill gerði gæfumuninn vorið 1940 þegar breskir ráðamenn veltu fyrir sér að semja við Hitler, eftir fall Frakklands, og gefa honum lausan tauminn í austurvíking.

Eldfimt viðtal Tucker Carlson við sagnfræðinginn Darryl Cooper er nýsaga, endurskoðun á viðteknum sannindum. Cooper segir Churchill mesta þorparann í seinna stríði, verri en Hitler og Stalín. Ekki það að sá breski hafi tekið þeim þýska og sovéska fram í manndrápum heldur átti Churchill að semja við Hitler og leyfa honum leggja undir sig Austur-Evrópu og Sovétríkin. Segir sem sagt Cooper hjá Carlson.

(Áður er lengra er haldið. Cooper og Carlson eru til hægri í pólitík. Nokkur hefð er fyrir gagnrýni vinstrimanna á Churchill, sem er ekki til umræðu hér).

Björn Bjarnason tók saman sjónarmið gagnrýnenda Cooper/Carlson. Á youtube má t.d. finna Konstantin Kisin og Pires Morgan taka í gegn Cooper/Carlson.

Sagnfræði er í grunninn tvennt, sögulegar staðreyndir og ályktanir af þeim. Cooper er gagnrýndur fyrir að fara rangt með sögulegar staðreyndir annars vegar og hins vegar rangar ályktanir. Af sjálfu leiðir að ályktanir af röngum staðreyndum eru á sandi byggðar. Rangar ályktanir af réttum sögulegum staðreyndum eru aftur meira álitamál. Cooper, eða einhver sem starfar í hans anda, gætu leiðrétt staðreyndavillurnar en samt komist að sömu niðurstöðu; að Bretar hefðu átt að semja við Hitler eftir fall Frakklands vorið 1940. Enginn veit hvað hefði gerst í framhaldi. Saga í viðtengingarhætti, stundum kölluð staðleysusaga, eru frjálslegar hvað ef pælingar.

Telegraph bendir á að Churchill-níð Cooper/Carlson fái hljómgrunn hjá sumum hægrimönnum sem harma vinstribeygju veraldarsögunnar eftir sigur bandamanna á Hitlers-Þýskalandi. Vinstribeygjan er staðreynd. Churchill tapaði fyrstu þingkosningunum eftir stríð. Verkamannaflokkurinn hóf sósíalíska þjóðnýtingu sem var ekki brotin á bak aftur fyrr en Thatcher kom til sögunnar 1979. Vestur-Evrópa var undirlögð kratisma og austurhlutinn kommúnisma allt kalda stríðið.

Eftir fall Berlínarmúrsins tók vinstrið hamskiptum. Gleymt var kjörorðið öreigar allra landa sameinist. Í staðinn komu gervivísindi(manngert veður, trans) og að einlægni standi ofar sannindum.

Bandaríkin urðu ekki jafn vinstrisinnuð og Evrópa eftir seinna stríð. Á seinni árum má þó ekki á milli sjá hvort vinstrið sé vitlausara, það bandaríska eða evrópska. Víst er að mesta ruglið, manngert veður og trans, er bandarískrar ættar og flutt út til Evrópu. Það er í þessu samhengi sem hægrimenn, einkum bandarískir, spyrja hvort ekki hefði verið betra að Dolli liðþjálfi hefði gúffað í sig meginland Evrópu og Sovétríkin í leiðinni. 

Svarið er nei, það hefði ekki verið betra. Kratismi, vók og kynjavinstrið er alltaf skárri kostur en nasismi. Afdrif Scholl-systkina ættu að minna okkur á það. Besti kosturinn er þjóðleg íhaldssemi sem temur sér raunsæi í alþjóðasamskiptum.

 

Sigríður ríkissaksóknari braut á tjáningarfrelsi Helga Magnúsar

Sigríður Friðjónsdóttir ríkissaksóknari braut á tjáningarfrelsi Helga Magnúsar Gunnarssonar vararíkissaksóknara með því að óska eftir að ráðherra beitti Helga Magnús viðurlögum. Sök Helga Magnúsar var sú ein að tjá sig um málefni sem hann var þaulkunnugur, bæði faglega og persónulega, - ofbeldishótunum óæskilegra hælisleitenda.

Helsti innflytjandi hælisleitenda, Sema Sólaris, kærði Helga Magnús til Sigríðar ríkissaksóknara sem óðara bað ráðherra að leysa vararíkissaksóknara frá störfum.

Eftir sex vikna ígrundun og tvö lögfræðiálit segir Guðrún ráðherra dómsmála nei, Helgi Magnús verður kyrr í sínu embætti. Þá ætlar ráðherra að gera ráðstafanir til að embættismenn fái frið fyrir skjólstæðingum Semu Sólaris. Með því tekur Guðrún ráðherra undir með vararíkissaksóknara, óæskilegir hælisleitendur ofbeldishneigðir eru lýti á samfélaginu.

Úrskurður ráðherra staðfestir að Sigríður ríkissaksóknari braut á mannréttindum Helga Magnússonar. Ríkissaksóknari sem virðir ekki grundvallarmannréttindi getur ekki látið eins og ekkert hafi í skorist.

 

Guðrún hafnar beiðninni: Helgi heldur starfinu

Ný útgáfa sakborninga væntanleg

Sakborningarnir í byrlunar- og símastuldsmálinu kynna að líkindum nýja útgáfu af sakleysi sínu næstu daga. Þeir hittust á framhaldsaðalfundi Blaðamannafélags Íslands í síðustu viku að bera saman bækur sínar. Það veit á tíðindi úr þeirra herbúðum. Frá í sumar, þegar Þórður Snær birti færslu um að hann væri leiður, hefur ekkert heyrst frá sakborningum.

Nú er tekið að hausta og má búast við sprikli. Sakborningar eru fimm, svo vitað sé: Þórður Snær Júlíusson fyrrum ritstjóri Kjarnans/Heimildar; Þóra Arnórsdóttir á RÚV, nú Landsvirkjun; Aðalsteinn Kjartansson, var á RÚV en hóf störf á Stundinni þrem dögum fyrir byrlun Páls skipstjóra, nú á Heimildinni; Arnar Þór Ingólfsson, Kjarninn/Heimildin og Ingi Freyr Vilhjálmsson Stundin/Heimildin, nú á RÚV. Sjötti blaðamaðurinn, Helgi Seljan, er viðriðinn málið en ókunnugt er um réttarstöðu hans.

Þórður Snær er hvað liprastur sakborninga að skálda frásagnir og er óopinber talsmaður hópsins. Hann kvaðst hafa verið handtekinn af sveit eyfirskra lögreglumanna og færður í járnum norður yfir heiðar. Sigríður Dögg formaður BÍ var hjálpleg með skáldskapinn. Þau fengu danska blaðamanninn Lasse Skytt til að selja frásögnina til útlendra miðla. Ekki fór það vel, raunar afar illa.

Vegferð Þórðar Snæs um lendur dómstóla, til að þagga niður í tilfallandi, endaði í síðustu viku með úrskurði hæstaréttar.

Er tilfallandi hóf frásögnina af byrlunar- og símastuldsmálinu, haustið 2021, skrifaði Þórður Snær breiðsíðu: Glæpur í höfði Páls Vilhjálmssonar. Eftir að ritstjórinn varð sakborningur, í febrúar 2022, taldi hann lögreglu vilja upplýsingar um heimildarmann blaðamanna. Lögreglan vissi í upphafi hver heimildarmaðurinn var, andlega veika konan sem byrlaði og stal. Í viðtali við Morgunblaðið í tilefni af réttarstöðunni sýnir Þórður Snær á spilin:

Að sama skapi furðar hann [Þórður Snær] sig á því að Þóra Arn­órs­dótt­ir rit­stjóri Kveiks sé einnig í hópi þeirra [sakborninga] í ljósi þess að það voru fyrst og fremst Kjarn­inn og Stund­in sem greindu frá þess­um gögn­um.

Kjarninn og Stundin birtu fyrstu fréttir með vísun í gögn úr síma skipstjórans samtímis morguninn 21. maí 2021. Einhver sá um að skipuleggja þessa ,,tilviljun". Í frétt Þórðar Snæs og Arnars Þórs í Kjarnanum segir að gögn hafi borist frá þriðja aðila. Einhver er þessi þriðji aðili.

Páli skipstjóra Steingrímssyni var byrlað 3. maí 2021 samkvæmt skipulagi. Þóra Arnórsdóttir á Kveik var búin að kaupa Samsung-síma, sem notaður var til að afrita síma skipstjórans, áður en byrlun fór fram. Skipulagið gekk út á að stela, afrita og skila tilbaka símanum á sjúkrabeð Páls.

Sakborningar fá fyrstir vitneskju er lögreglurannsóknin kemst á næsta stig. Kallaðir til skýrslutöku verða þeir er hæfir þykir að bregðist við nýjum gögnum. Boðað er til yfirheyrslu með 2 til 5 daga fyrirvara. Stundum er fyrirvarinn lengri. Næst þegar sakborningar láta í sér heyra má gera ráð fyrir að einhverjir þeirra hafi verið boðaðir. Tilfallandi lesendur geta borið saman nýjustu útgáfu sakaborninga við það sem þeir hafa áður sagt, yfirleitt með Þórð Snæ sem talsmann. 

Eina útgáfan sem sakborningar hafa ekki reynt að setja á flot er sannleikurinn um atburði vorsins 2021. Óneitanlega yrði tilbreyting að sjá og heyra blaðamenn segja satt.

 

 

Heimsskipan og hugmyndafræði

Heimsskipan, sem sögð er í hættu í viðtengdri frétt, er annað orð yfir vestrænt forræði heimsmála. Síðast þegar samið var um heimsskipan var við lok seinna stríðs. Helstu sigurvegar, Bandaríkin og Sovétríkin, skiptu með sér Evrópu, í austur og vestur. Ólík hugmyndakerfi, sósíalismi/kommúnismi annars vegar og hins vegar borgaralegt lýðræði/kapítalismi, mynduðu valdajafnvægi í skugga kjarnorkuvopna.

Eftir fall Berlínarmúrsins 1989 og endalok kommúnisma sem heimshugmyndafræði var vestrið eitt eftir í einpóla heimi. Ríkjandi sjónarmið var að heimurinn yrði vestrænn, sbr. fræga bók Francis Fukuyama, Endalok sögunnar. Valdajafnvægi var ekki lengur pólitískt hugtak sem miðlaði málum. Vestrænt forræði kom í staðinn. 

Heimurinn, utan vesturlanda, var ekki sammála. Afganistan, Írak og Sýrland eru ekki stórveldi, jafnvel þótt þau séu lögð saman. Tilraunir til að gera þau vestræn með illu, hernaði, mistókust.

Svo er það Rússland. ,,Rússland er bensínstöð sem þykist þjóðríki," sagði bandaríski öldungadeildarþingmaðurinn John McCain fyrir tíu árum. Sama ár, 2014, sagði þáverandi Bandaríkjaforseti, Obama, að Rússland væri miðlungsríki með staðbundin áhrif.

Orð þingmannsins og forsetans féllu í upphafi Úkraínudeilunnar, sem varð ekki að fullveðja stríði fyrr en í febrúar 2022.

Í átta ár, 2014-2022, var hægt að semja um stöðu austurhéraða Úkraínu, þar sem íbúarnir eru flestir rússneskumælandi. Samningar voru gerðir, Minsk I og II, en af hálfu Úkraínu og vestrænna bakhjarla stóð aldrei til að efna þá. Til hvers að halda samninga við bensínstöð sem þykist þjóðríki?

Vestrið sigraði kalda stríðið. Fall Berlínarmúrsins var áþreifanleg staðfesting á efnahagslegu og pólitísku gjaldþroti kommúnisma. Úrvinnslan á þeim sigri fór í hundana. Orð yfirmanna leyniþjónustu Bandaríkjanna og Bretlands í viðtengdri frétt staðfesta það. Sjálf heimsskipanin er í hættu vegna Úkraínustríðsins.

Úkraínustríðið er í grunninn deila bræðraþjóða, staðbundið vandamál sem ætti ekki að valda alþjóðlegum úlfaþyt, að ekki sé talað um hættu á heimsstríði.

Í vestrinu er látið eins og Pútín forseti Rússlands hafi í frammi boðskap sem heiminum standi ógn af, líkt og fyrrum er kommúnistar réðu ferðinni í Kreml. En Pútín stundar ekki útflutning á hugmyndafræði. Pútín aðhyllist rússneska þjóðhyggju. Til skamms tíma var ekki glæpur á vesturlöndum að stjórnmálamaður léti sér annt um þjóð sína.

Vestrið situr aftur uppi með alþjóðahyggju, eitt vestrænt sniðmát fyrir heimsbyggðina. Virkaði ekki í Afganistan, Írak eða Sýrlandi. Selur heldur ekki í Rússlandi. Pútín nýtur meiri stuðnings þjóðar sinnar en dæmi eru um að vestrænir stjórnmálamenn njóti í sínum heimalöndum.

Úkraínustríðinu lýkur, líkt og öllum stríðum, með friði. Heimsskipanin breytist að því leyti að hugmyndafræðin um vestrænt forræði í heimsmálum verður endurskoðuð. Margpóla heimur leysir af hólmi einpóla heim.

 

 

 

Heimsskipan í hættu samkvæmt MI6 og CIA

Gummi ráðherra kveikir: of margir útlendingar

Of margir útlendingar hafa flust til Íslands á of skömmum tíma. Innviðir, s.s. skólakerfi, ræður ekki við fjöldann. Útkoman verður gettóvæðing þar sem stór hópur útlendinga lærir ekki íslensku.

Afleiðingin verður félagsleg mismunun. Þeir sem ekki læra tungumálið finna sig ekki heima í íslenskum siðum og menningu. Utanveltu og illa gáttaðir útlendingar eru síður til friðs.

Allt er þetta samkvæmt uppskrift Vinstri grænna, Samfylkingar, Pírata og Viðreisnar. Jaðarmenning er fóstruð af þessum flokkum, sem leynt og ljóst leggja fæð á íslenskt samfélag.

Guðmundur Ingi félagsráðherra kveikir á perunni vonum seinna. 

Ráðherra segir stöðu Íslands áhyggjuefni

Sakborningar og formaður BÍ snúa bökum saman

Þórður Snær fyrrum ritstjóri Heimildarinnar var mættur; Þóra Arnórs fyrrum ritstjóri Kveiks á RÚV einnig. Aðalsteinn Kjartansson á Heimildinni var á staðnum. Þríeyki sakborninga í byrlunar- og símastuldsmálinu mætti í fyrradag á framhaldsaðalfund BÍ til að tryggja að Sigríður Dögg héldi stöðu sinni sem formaður Blaðamannafélags Íslands. 

Sigríður Dögg er bráðnauðsynleg sakborningunum í væntanlegri málsvörn þeirra á opinberum vettvangi er kemur að næsta kafla í byrlunar- og símastuldsmálinu. Formaðurinn skaffar ályktanir stéttafélags blaðamanna eftir pöntun. Sjálf er Sigríður Dögg lifandi sönnun þess að sekir séu saklausir þrátt fyrir gögn um annað.

Helgi Seljan, enn rannsóknaritstjóri Heimildarinnar, sat á fremsta bekk á fundinum. Hann er ekki sakborningur, svo vitað sé, en er viðriðinn sakamálið og var í sambandi við fyrrum eiginkonu skipstjórans, sem tók að sér að afla blaðamönnum gagna með byrlun og þjófnaði.

Til marks um hve Sigríður Dögg er miðlæg að sverta íslenskt samfélag til að bjarga sakborningum undan réttvísinni sagði formaðurinn eftirfarandi:

Það er ekki hægt að túlka þetta [rannsókn lögreglu á byrlun og símastuldi] á annan veg en sem óeðlileg afskipti lögreglu af blaðamönnum. Þar fyrir utan torvelda afskipti lögreglu að blaðmenn afhjúpi önnur mál og heftir þar með störf þeirra.

Síðar afturkallaði Sigríður Dögg þessi ummæli, eftir að þau höfðu staðið óhögguð í eitt ár.

Snemma á fundinum í fyrradag var borin upp vantrausttillaga á Sigríði Dögg. Fríða Björnsdóttir, Guðrún Guðlaugsdóttir og Agnes Bragadóttir voru tillöguhöfundar. Rökstuðningur var m.a. að formaðurinn standi fyrir atlögu að eldri félagsmönnum, vilji svipta þá atkvæðisrétti, og fjármálastjórn sé í hers höndum. Undirrótin að vantraustinu er tvíþætt. Í fyrsta lagi er Sigríður Dögg skattsvikari. Í öðru lagi meðferð Sigríðar Daggar á fyrrum formanni og framkvæmdastjóra BÍ.

Utanaðkomandi lögmaður, Oddur Ástráðsson, var keyptur fundarstjóri. Fyrir fjörtíu þúsund kall á tímann sá hann til  þess að Sigga (eins og hann kallaði formanninn) ætti hjá honum öruggt skjól. Tillaga um að taka á dagskrá vantraustið var borin upp. Einir 48 sögðu já. Þegar RSK-liðið hafði safnað rúmum 60 neium var hætt að telja. Atkvæðagreiðslan fór fram með handauppréttingu. Í aðdraganda vöppuðu Þórður Snær og Aðalsteinn um salinn, gáfu augngotur og hnykluðu brýrnar; eru vanir maður-á-mann aðferðinni. Lögmaður til leigu stýrði, sakborningar smöluðu. Taktíkin kallast frjálsleg fundarsköp í þágu Siggu. Gæti hvergi gerst í íslensku stéttafélagi. Nema, auðvitað, hjá BÍ.

Annálar Blaðamannafélagsins greina ekki frá sambærilegu vantrausti á formann. Kvöldið skánaði lítt fyrir Sigríði Dögg, þótt hún héldi stöðu sinni, launum og aðgengi að sjóðum félagsins. Tillaga hennar um að losna við blaðamenn með múður, þ.e. þá sem gagnrýna forystuna, var felld.

Formaðurinn reyndi að bera sig vel eftir átökin, sem í reynd sýndu klofið blaðamannafélag, samanber skýrslu Reynis Trausta. Vantraustið á Sigríði Dögg fer saman við lítið traust almennings á fjölmiðlum. Róm brennur en reykvískir blaðamenn spila á hörpu sem fékkst með skattsvikum, byrlun og þjófnaði.

,,Verk­efnið fram und­an er að snúa bök­um sam­an og vinna að því að efla fé­lagið, fag­lega blaðamennsku og fjöl­miðlafrelsi í land­inu, því blaðamennska hef­ur aldrei verið mik­il­væg­ari," segir Sigríður Dögg í tilkynninu.

Orðalagið er afhjúpandi. Þegar í algjört óefni er komið, vígstaðan töpuð, snúa menn bökum saman. Sigríður Dögg og sakborningarnir eru umkringd.

 

 

 

 

Umdeild tillaga felld á aðalfundi

Hæstiréttur: bloggari má gagnrýna blaðamenn

Í gær hafnaði hæstiréttur áfrýjunarbeiðni blaðamannanna Þórðar Snæs Júlíussonar og Arnars Þórs Ingólfssonar um að endurskoða sýknudóm landsréttar í máli tvímenningana gegn tilfallandi bloggara.

Þórður Snær og Arnar Þór eru sakborningar í byrlunar- og símastuldsmálinu, sem tilfallandi hefur bloggað um en fjölmiðlar sagt fáar fréttir af. Þeir stefndu bloggara fyrir tveim árum. Krafist var ómerkingar tvennra ummæla:

1. Arn­ar Þór Ing­ólfs­son og Þórður Snær Júlí­us­son, blaðamenn á Kjarn­an­um, [...] eiga aðild, beina eða óbeina, að byrlun Páls skipstjóra Steingrímssonar og stuldi á síma hans.

og

2. Saksóknari mun gefa út ákæru á hendur blaðamönnum RSK-miðla, líklega í september.

Tilgangur tvímenningana var að þagga niður í bloggara. Þeim finnst ótækt að bloggari afhjúpi aðför RSK-miðla (RÚV, Stundarinnar og Kjarnans) að Páli skipstjóra Steingrímssyni. Blaðamennirnir höfðu sigur í héraðsdómi. Tilfallandi var dæmdur til að greiða þeim málskostnað og miskabætur, samtals um þrjár milljónir króna. Dómnum var áfrýjað til landsréttar sem ómerkti dóm héraðsdóms - sýknaði bloggara af öllum kröfum blaðamannanna.

Í sýknudómi landsréttar  var athygli vakin á að Þórður Snær og Arnar Þór vissu áður en þeir hófu umfjöllun sína um Pál skipstjóra 21. maí 2021 að gögnin væru þýfi, tekin frá meðvitundarlausum manni á gjörgæslu:

Í málinu liggur einnig fyrir að stefndu [Þórður Snær og Arnar Þór] höfðu fyrir umfjöllun sína verið varaðir við því að gögnin sem þeir studdust við væru illa fengin. Þrátt fyrir það tóku þeir ákvörðun um að byggja umfjöllun sína á þessum gögnum og máttu þar af leiðandi reikna með að fréttaskýringu þeirra yrði svarað hvasst.

Landsréttur útskýrði nánar:

Áfrýjandi var með umdeildum bloggfærslum sínum þátttakandi í almennri umræðu um mikilvægt samfélagslegt málefni sem erindi átti við almenning og naut af þeim sökum rúms tjáningarfrelsis á meðan stefndu máttu sem blaðamenn og opinberar persónur gera ráð fyrir að þurfa að þola hvassa og óvægna gagnrýni í kjölfar eigin skrifa.

Hæstiréttur tekur undir þessi sjónarmið landsréttar í rökstuðningi sínum. Blaðamenn eru ekki friðhelgir fyrir gagnrýni, líkt og Þórður Snær og Arnar Þór vildu vera láta. Þá er ekki hægt að gera auknar kröfur til þeirra sem gagnrýna blaðamenn en gerðar eru til blaðamanna sjálfra. Þrír dómarar eru skráðir fyrir niðurstöðu hæstaréttar og þrír dómarar sýknuðu bloggara í landsrétti.

Dómur landsréttar og úrskurður hæstaréttar staðfesta þá meginreglu að blaðamenn, ekki síst þeir sem kenna sig við rannsóknir, verða ,,að þola óþægilega og hvassa gagnrýni og aðfinnslur við störf sín." Fjölmiðlar birta nær aldrei gagnrýni á störf blaðamanna. Viðskiptablaðið er eina undantekningin. Það kemur í hlut annarra að bregða ljósi á vafasöm vinnubrögð blaðamanna, t.d. bloggara.

Aðalsteinn Kjartansson, einn sakborningurinn enn í byrlunar- og símastuldsmálinu, stefndi einnig bloggara í sjálfstæðu dómsmáli. Héraðsdómur dæmdi Aðalsteini í vil skömmu áður en sýknudómur landsréttar féll í vor. Um eða eftir áramót mun landsréttur taka fyrir áfrýjun bloggara.

Þegar viðtengd frétt birtist á mbl.is um kl. 20 í gærkveldi voru Þórður Snær og Aðalsteinn á fundi Blaðamannafélags Íslands að verja Sigríði Dögg formann vantrausti. Um og yfir 150 blaðamenn voru á fundinum. Ætla mætti að félagar hafi verið þýfgaðir um niðurstöðu hæstaréttar og fréttir birtust um málið í fjölmiðlum í morgun. Jafnvel að þær væru ,,settar í samhengi" eins og Sigríður Dögg formaður blaðamanna státar af að félagsmenn kunni öðrum fremur. En, nei, ekkert er að frétta. Þetta er plagsiður íslenskra blaðamanna; stinga óþægilegum fréttum undir stólinn. En, auðvitað, þeir vilja allir fá ríkistryggð laun til að halda almenningi upplýstum. Bara ekki ekki afbrot og siðleysi blaðamanna sjálfra.

 

Synjað um áfrýjun meiðyrðamáls