Fólk er sektað fyrir heimsku, ekki fíkn

Ef maður keyrir yfir hámarkshraða fær maður sekt, komist upp um athæfið. Ef maður sækir í ólögleg fíkniefni fær maður sekt. Í báðum tilvikum fær maður sekt vegna eigin heimsku, en ekki vegna hraðafíknar eða vímuefnafíknar.

Ef ekki væri fyrir viðurlög, sekta eða fangelsisdóma, myndi heimskulegt athæfi stóraukast í samfélaginu og bitna á saklausu fólki.

Heimska verður aldrei læknuð, aðeins haldið í skefjum.

„Hvernig sekt­ar maður fólk út úr fíkn?“

Viðreisn óttast Óla Björn

Viðreisn óttast að Óli Björn Kárason verði þingmannsefni Sjálfstæðisflokksins í Suðvesturkjördæmi. Viðreisn rekur málgagnið Hringbraut sem gerir atlögu að Óla Birni með samsærisvaðli í anda Þjóðviljans sáluga.

Viðreisn óskar sér liðléttinga í átökum við Þorgerði Katrínu, sem mun leiða lista flokksins í Suðvesturkjördæmi.

Óli Björn uppfyllir ekki skilyrði Viðreisnar að vera pólitísk pissudúkka og þess vegna heggur Hringbraut í hann.

 

Nefnd um endalok RÚV

Markaðurinn virðist einfær um að skilja hafrana frá sauðunum, samanber að fjölmiðlaveldi Jóns Ásgeirs, 365-miðlar, eru að liðast í sundur.

RÚV á hinn bóginn starfar undir verndarvæng ríkisins og er ónæmt fyrir samfélagsbreytingum. RÚV er í grunnin sama stofnun í dag og fyrir 70 árum.

Við þurfum nefnd sem útfærir endalok RÚV. Þegar 365-miðlar og RÚV hverfa af vettvangi geta aðrir fjölmiðlar sótt fram og skapað sér stöðu í takt við samfélagið sem við búum við í dag. RÚV og 365-miðlar eru risaeðlur liðins tíma. 

Starfshópur skoði stöðu fjölmiðla

Brexit, Evrópuher og vestræn samvinna Íslands

Brexit felur í sér að Bretland mun leggja aukið kapp á samvinnu við fyrrum nýlendur sínar í vestri, Kanada og Bandaríkin, og þar er Ísland í þjóðbraut.

Evrópusambandið íhugar stofnun Evrópuhers í kjölfar úrsagnar Bretlands úr sambandinu.

Vestræn samvinna Íslands er sögulega tvíhliða varnarsamningur við Bandaríkin annars vegar og hins vegar aðild að Nató. Bandaríkin eru áhugasöm að auka viðveru sína hér á landi, eins og fram hefur komið í fréttum.

Niðurstaða: ESB-sinnar hér á landi ganga þvert gegn vestrænni samvinnu með því að berjast fyrir aðild Íslands að Evrópusambandinu.

 

Brexit viðræður hefjist eins fljótt og hægt er

ESB-flokkar með fylgi í kjallaranum

Viðreisn og Samfylking hírast í kjallara stjórnmálanna, með 6,7 og 7,5 prósent fylgi. Báðir flokkarnir vilja Ísland í Evrópusambandið en þangað vill þjóðin ekki.

Sjálfstæðisflokkurinn má vel við una, með rúm 28 prósent fylgi í könnun Fréttablaðsins, og í ágætum færum að fara yfir þrjátíu prósent. Framsóknarflokkurinn er að hjarna við, kominn í tveggja stafa tölu eftir að Sigmundur Davíð kom á ný á vettvang stjórnmálanna. Vinstri grænir nálgast kjörfylgi sitt, um tíu prósent, og Björt framtíð er að hverfa.

Píratar halda áfram stanslausri sigurgöngu í könnunum og eru með 30 prósent fylgi. Þeir sem segjast ætla að kjósa Pírata sýna venjulegum stjórnmálum fingurinn. Reynslan sýnir að þeir kjósendur nenna síst á kjörstað þegar kemur að kosningum.

Píratar með mest fylgi

Viðreisn er Saga class Sjálfstæðisflokksins

Efnafólk er allsráðandi í Viðreisn og það auðveldar Sjálfstæðisflokknum að verða aftur flokkur allra stétta. Kjósendahópur Viðreisnar er stjórnendur og sérfræðingar sem ala með sér draum um ESB-aðild Íslands.

Þessi hópur var hlynntur Samfylkingunni í kosningunum 2009 og Bjartri framtíð í síðustu kosningum. Á meðan Viðreisn hirðir upp humar- og hvítvínsfólkið getur Sjálfstæðisflokkurinn einbeitt sér að breiðum kjósendahópi sem ferðast á almennu farrými og geldur varhug við sérgæsku efnafólksins.

Mjúkir vinstriflokkar, Alþýðuflokkur og Samfylking, gátu hoggið í það fylgi Sjálfstæðisflokksins sem er hlynnt traustu velferðarkerfi, einkum þegar Sjálfstæðisflokkurinn virtist um of hallur undir forstjóraveldið. Viðreisn á takmarkaða mögulega í þennan kjósendahóp enda alltof merktur sérfræðielítunni - sem fékk tvöfalt á smettið í hruni og Icesave-deilu.

Stóra mál Viðreisnar er ESB-aðild Íslands. Aðeins sérgóðir sérfræðingar með takmarkaða dómgreind trúa að Ísland geti orðið ESB-ríki í fyrirsjáanlegri framtíð. Hagfellt er að slíkt fólk sé í einum flokki enda skapar það vinnufrið hjá öðrum.

Þorgerður og Þorsteinn í Viðreisn

Kúbu-Þórólfur og staðreyndavaktin

Þórólfur Matthíasson prófessor ætlar að standa ,,staðreyndavakt" í aðdraganda þingkosninga. Þessi sami Þórólfur sagði um aðrar kosningar, kenndar við Icesave:

Samþykki Alþingi ekki ríkisábyrgð á Icesave-lánið gæti skapast stríðsástand í efnahagslífinu hérlendis, Ísland fengi hvergi fyrirgreiðslu, fyrirtæki færu unnvörpum í þrot og við yrðum sett á sama stall í samfélagi þjóðanna og Kúba og Norður-Kórea. Þetta segir Þórólfur Matthíasson hagfræðiprófessor sem segist mjög hissa á óábyrgri afstöðu sumra stjórnmálamanna til málsins.

Íslendingar höfnuðu Icesave-samningnum. Við urðum hvorki Kúba né Norður-Kórea heldur blasti við okkur blússandi góðæri.

Kúbu-Þórólfur er ekki heppilegasti maðurinn að standa pólitíska staðreyndavakt.

Staðreyndavakt í aðdraganda kosninga

Vinstrispilling í ráðhúsinu

Píratar og vinstrimenn ráða Reykjavíkurborg þar sem innviðir eins og skólar og gatnakerfi grotna niður vegna skorts á fjármagni. En ferðalög til útlanda eru ekki naumt skömmtuð þegar meirihlutinn á í hlut.

Ítrekaðar tilraunir borgarfulltrúa Sjálfstæðisflokksins til að fá upplýsingar um ferðakostnað borgarinnar eru kæfðar af meirihlutanum. Eðlilegum kröfum um gagnsæi útgjalda í þessum málaflokki er vísað frá.

Vinstriflokkarnir umbuna sínu fólki með ferðalögum til útlanda. Vinstristjórn Jóhönnu Sigurðardóttir hélt t.d. lífi út síðasta kjörtímabil, þrátt fyrir að vera í minnihluta á alþingi, með því að veita þingmönnum Hreyfingarinnar rúmar ferðaheimildir.

Tillögu um ferðakostnað vísað frá

Fjölmiðlun án risafjölmiðla - losnum við 365 og RÚV

Samfélagsmiðlar og blogg eru vettvangur frétta og umræðu um fréttir, og í þeim skilningi blómstrandi fjölmiðlar, á meðan fjölmiðlafyrirtæki eru bæði í vanda með rekstur og faglega stefnu.

Verið er að búta í sundur stærstu fjölmiðlasamteypu landsins, 365-miðla. RÚV er fjárhagsleg og fagleg ruslahrúga sem eyðir almannafé í að skapa stjórnarkreppu og þjóna pólitískri dagskrá starfsmanna sinna.

Fjölmiðlarisar eins og 365-miðlar og RÚV eru úrelt fyrirbrigði og eiga hvorki heima á markaðstorgi hugmyndanna né í viðskiptum. Þegar risarnir eru fallnir vex upp lággróðurinn sem stendur í skugganum. Fjölmiðlun sýnir aukna grósku og lýðræðið verður þróttmeira.

„Veikir fjölmiðlar eru veikt lýðræði“

Píratar stunda persónunjósnir

Andríki afhjúpar Pírata sem persónunjósnara í pistli í dag. Andríki vitnar í nafngreindar heimildir úr röðum Pírata sem viðurkenna að atkvæði greidd í prófkjöri eru rekjanleg.

Með öðrum orðum: Píratar njósna um fólk sem í góðri trú greiðir atkvæði í leynilegum kosningum.

Leynilegar kosningar eru eitt megineinkenni lýðræðislegra stjórnarhátta. Píratar kolfalla á lýðræðisprófinu.