Ísland nær Ameríku en Evrópu

Ísland situr á tveim jarðskorpuflekum, Norður-Ameríkuflekanum og Evrasíuflekanum. Jarðfræðilega færumst við nær Ameríku en fjarlægjumst Evrópu. Líkt og Norður-Ameríka er Ísland landnemasamfélag í upphafi. Flóttamenn frá Noregi og norrænum byggðum á skosku eyjunum og Írlandi settust að hér á landi. Þorri landnema í Bandaríkjunum og Kanada kom frá Evrópu.

Stjórnskipulag sem íslenskir landnámsmenn völdu sér, ýmist kallað þjóðveldið eða kennt við goða og talað um goðaveldi, var á skjön við þróun mála í Evrópu á hámiðöldum, sem var öll í átt til konungsvalds. Bandaríkin höfðu sama háttinn á er þeir losuðu sig undan bresku konungsvaldi á 18. öld og stofnuðu til lýðveldis. Meginþáttur í goðaveldinu og bandarísku stjórnskipuninni er valddreifing. Í stjórnmálamenningu Íslands og Bandaríkjanna er ríkur fyrirvari við miðstýrt yfirvald og vex fyrirvarinn eftir því sem yfirvaldið er fjarlægara.

Í landapólitík samtímans, heitir geó-pólitík á útlensku, færumst við nær Bandaríkjunum en fjarlægjumst að sama skapi ESB-Evrópu. Áhugi, að ekki sé sagður ásetningur, Bandaríkjanna á Grænlandi færir okkur heim sanninn um það.

Fyrir 16 árum þegar misheppnuð vinstristjórn Jóhönnu Sig. sóttist eftir aðild Íslands að ESB-Evrópu var ekki raunhæft að setja fram sem valkost nánari samvinnu við Bandaríkin. Í dag er það raunhæfur kostur.

Íslendingar eiga í grunninn tvo valkosti í utanríkismálum í fyrirsjáanlegri framtíð. Í fyrsta lagi að sameinast um að halda fullveldi okkar og sjálfstæði. Í öðru lagi að efna til óvinafagnaðar og gera upp á milli Bandaríkjanna og ESB-Evrópu. Seinni kostinum fylgir innanlandsófriður, það er jafnvíst og degi fylgir nótt.

Haldi sitjandi ríkisstjórn áfram feigðarflani til ESB-Evrópu verður stofnuð hér landsmálahreyfing sem boðar nánari samskipti við Bandaríkin sem valkost við innlimun í ESB-Evrópu. Vinum er að fagna í vestri. Bandaríska tilboðið verður ávallt betra en það evrópska. Brussel er síðra yfirvald en Washington.

Skynsamlegast fyrir land og þjóð er að gefa hvorki Bandaríkjunum né ESB-Evrópu færi á okkur. Vitkist valkyrjur í tíma getur orðið sæmilegur friður um utanríkismál þjóðarinnar. Ef ekki þarf að beita öllum tiltækum löglegum ráðum að vísa valkyrjum á dyr stjórnarráðsins.

 

Ísland tilheyrir ekki Ameríku

Málfrelsið krossfest, Miðflokkurinn til bjargar

Ákæruvaldið á Íslandi er í herferð gegn tjáninarfrelsinu. Þrír borgarar eru til meðferðar hjá ákæruvaldinu fyrir að andmæla transvóki, þeirri hugmyndafræði að karlar geti orðið konur með hugdettunni einni saman, að hægt sé að fæðast í röngum líkama, að karlar geti brjóstfætt ungabörn.

Tilfallandi hefur verið ákærður og verður réttað í máli hans í lok maí. Helga Dögg Sverrisdóttir kennari er til meðferðar hjá ákæruvaldinu sem og Eldur Smári Kristinsson formaður Samtakanna 22. Ekki hafa verið gefnar út ákærur á hendur Helgu Dögg og Eldi Smára, en nokkuð harkalega gegnið fram af hálfu lögreglu, eins og tilfallandi drap á.

Ákæruvaldið hóf sína vegferð gegn tilfallandi, Helgu Dögg og Eldi Smára eftir að lífsskoðunarfélagið Samtökin 78 kærðu okkur þrjú. Ákæruvaldinu bar engin skylda til að taka mark á kærum Samtakanna 78. Án efa fara margar sambærilegar kærur beint í ruslið hjá ákæruvaldinu. En nú skyldi látið til skarar skríða gegn þeim sem andæfa transvókinu. Ákvörðun um að hefja aðgerðir gegn okkur þrem er tekin af ríkissaksóknara. Þrjú lögregluembætti koma við sögu: lögreglan í Reykjavík, á Akureyri og á Suðurnesjum.

Tilfallandi, Helga Dögg og Eldur Smári eru sökuð um að brjóta 233.gr.a. almennra hegningarlaga:

Hver sem opinberlega hæðist að, rógber, smánar eða ógnar manni eða hópi manna með ummælum eða annars konar tjáningu, svo sem með myndum eða táknum, vegna þjóðernisuppruna eða þjóðlegs uppruna, litarháttar, kynþáttar, trúarbragða, fötlunar, kyneinkenna, kynhneigðar eða kynvitundar, eða breiðir slíkt út, skal sæta sektum eða fangelsi allt að 2 árum.

Lykilorðin eru háð, rógur, smánun og ógnun annars vegar og hins vegar aðskiljanlegir hópar í samfélaginu er njóta sérréttinda. Ýmsir hópar njóta ekki sérkjara hjá löggjafanum, t.d. kristnir. Þeir kristnu verða reglulega fyrir hæðni, rógi og smánun - en vonandi ekki oft hótunum - hér á landi. Ákæruvaldið eltir ekki uppi einstaklinga sem gera gys að meyfæðingunni, afneita tilvist guðs og segja jólin heiðna hátíð. Allt má þetta túlka sem háð, róg og smánun í garð kristni. En, sem sagt, þeir kristnu njóta ekki sérmeðferðar í lögum. Þótt talað sé um trúarbrögð í lagatextanum er kristni tekin út fyrir sviga. Sama gildir um Íslendinga almennt. Íslenskt þjóðerni og íslenskur þjóðlegur uppruni nýtur ekki lagaverndarinnar sem hinir útvöldu fá. Útlendingur hér á landi, sem hæðist að Íslendingum, rógber þá, smánar og ógnar, er í sterkari lagalegri stöðu en Íslendingur sem svarar í sömu mynt, geldur útlendingnum rauðan belg fyrir gráan.

Ákæruvaldið beitir sárasjaldan 233.gr.a. almennra hegningarlaga og það af skiljanlegum ástæðum. Lagagreinin er til þess fallin að hefta málfrelsi borgaranna. Án málfrelsis er illa komið fyrir öðrum mannréttindum.

Ákæruvaldið hefur ekki gert grein fyrir því hvers vegna þrír almennir borgarar séu nú teknir sérstaklega í karphúsið fyrir að andmæla transvókinu og skulu sæta sektum og allt að tveggja ára fangelsi fyrir. Almennt skyldi ætla að það sé ekki hlutverk ákæruvaldsins að krossfesta tjáningarfrelsið.

Góðu fréttirnar í hörmungartíð tjáningarfrelsisins á Íslandi eru að þingmenn Miðflokksins hafa lagt fram frumvarp, með ítarlegum skýringum, um að breyta 233.gr.a. almennra hegningarlaga. Tillaga Miðflokksins er að bæta við fyrirvara við núverandi lagagrein. Í heild sinni myndi greinin hljóma svona, verði frumvarp Miðflokksþingmanna samþykkt. Viðbótin er feitletruð:

Hver sem opinberlega hæðist að, rógber, smánar eða ógnar manni eða hópi manna með ummælum eða annars konar tjáningu, svo sem með myndum eða táknum, vegna þjóðernisuppruna eða þjóðlegs uppruna, litarháttar, kynþáttar, trúarbragða, fötlunar, kyneinkenna, kynhneigðar eða kynvitundar, eða breiðir slíkt út, skal sæta sektum eða fangelsi allt að 2 árum enda sé háttsemin til þess fallin að hvetja til eða kynda undir hatri, ofbeldi eða mismunun.

Frumvarp Miðflokksmanna er til bóta. Í lagagreinina er settur áskilaður að til að hún verði virkjuð þarf að vera hvatning til haturs, ofbeldis eða mismununar. Eins og greinin er núna er nóg að einhver móðgist til að ákæruvaldið stökkvi af stað og dragi mann og annan fyrir dóm og ákæri fyrir að stíga óvarlega á tilfinningatær fólks út í bæ sem njóta sérverndar að lögum.

Ekki liggur fyrir hvort Helga Dögg og Eldur Smári verða ákærð, mál þeirra eru enn til meðferðar hjá ákæruvaldinu. Tilfallandi er aftur ákærður maður. Ákæruvaldið fann í tilfallandi bloggi frá 13. september 2023 tvær efnisgreinar sem réttlæta fangelsun höfundar í allt að tvö ár. Þær eru eftirfarandi:

1. Samtökin 78 eru regnhlífarsamtök og lífsskoðunarfélag fullorðinna sem áhugasamir eru um klám, kynlíf, kynjaveröld og tælingu barna.

2. Kennsluefnið er tæling dulbúin sem upplýsingar. Meðfædd blygðunarsemi barna er skipulega brotin niður. Börn eru gerð móttækileg fyrir þátttöku í kynlífi og það jafnvel ofbeldiskynlífi - BDSM. Börn eru gerð efins um eigin sjálfsmynd og talin trú um að þau séu mögulega fædd í röngu kyni. Ringluð börn og óörugg eru síður í stakk búin að veita viðnám fullorðnum með eitthvað misjafnt í huga. Út á það gengur tælingin.

Eins og lesa má í blogginu eru tilfærð dæmi um óviðeigandi kennsluefni sem matreitt er ofan í börn. Þannig að ekki er um að ræða róg. Hæðni er ekki stílbragð í blogginu. Smánun kemur ekki fyrir enda reka Samtökin 78 BDSM-deild í einn stað og í annan stað er boðskapur lífsskoðunarfélagsins að börn geti fæðst í röngum líkama. Trauðla er það smánun að vekja athygli á starfsemi lífsskoðunarfélagsins. Hvergi í blogginu er hótun eða hvatning til ofbeldis. Bloggið, aftur, andmælir að Samtökunum 78 sé hleypt í leik- og grunnskóla með boðskap sem ekki er við hæfi barna. Síðast þegar tilfallandi gáði mátti hafa skoðun á kennsluefni skóla og telja sumt ágætt en annað ósæmilegt.

 

Kvengervill er ekki kona

Karl sem segist kona er kvengervill en ekki kona. Annað orð er karlkona, það þriðja transkona. Úrskurður hæstaréttar Bretlands staðfestir sjálfsögð og augljós sannindi, að karl er eitt, kona annað. Undarlegt er að í menningu okkar urðu áhöld um grundvallarsannindi mannlífsins frá örófi. Formaður breska íhaldsflokksins, Kemi Badenoch, segir þörf á endurmenntun vókliða sem útbreiddu fals um lífsins staðreynd.

Hlutverkaleikur er liður í þroska barna og tómstundagaman sumra fullorðinna. Í nafni mannréttinda varð hlutverkaleikur örhóps í samfélaginu, þeirra sem kenna sig við trans, að viðteknum sannindum um hríð. Kynjahopp fékk sömu stöðu og rétturinn til lífs, sjálfræðis og hamingjuleitar. Jafnhliða greri um sig djúpheimska, að kynin væru ekki tvö heldur þrjú, fimm eða seytján.

Allur þorri kvenna lét sér vel líka að karlar stunduðu stórfellt menningarrán á konum. Nóg var að karl segðist kona innra með sér og honum stóðu allar dyr opnar. Kvennaklefar sundlauga og íþróttahúsa, kvennafangelsi, kvennasalerni og mæðradeildir sjúkrahúsa. Karl lélegur í íþróttum kynjahoppaði sig í kvennaíþrótt og hirti gull ætlað konu. Konur stóðu álengdar og klöppuð upp transið. Vinstriflokkarnir í sitjandi ríkisstjórn, Samfylking og Viðreisn, eru í senn með konur á helstu póstum og löðrandi í transi.

Menningarrán karla á konum, með stuðningi þorra kvenna, vekur grun um að ekki sé allt með felldu í sjálfsmati kvenþjóðarinnar. Femínismi sem fagnar innrás karlkvenna í kvennarými starfar tæplega í þágu kvennaheilla. Nema að hugsunin sé sú að vonlausir karlar séu eftirlæti kvenna.

Eins og galdratrú á 17. öld er transið innflutt fyrirbæri. Á málsvæði engilsaxa er til orðið ,,gender" sem vísar í málfræðilegt kyn. Við aðstæður, sem verða skýrðar hér á eftir, komst sérviskuhópur í akademíunni (les: kynjafræði) upp með að markaðssetja ,,gender", málfræðikyn, sem valkost við ,,sex" eða líffræðilegt kyn. Ruglið var selt sem einstaklingsfrelsi. Karl gat orðið málfræðileg kona og við það fengið sömu stöðu og líffræðileg kona. Slagorðið var ,,transkonur eru konur". Hæstiréttur Bretlands úrskurðaði að málfræði og líffræði eru ekki sami hluturinn. Líffræði, ekki málfræði, ræður hvort einstaklingur sé kona eða karl. 

Tvær ritgerðir, gefnar út í bókarformi, eftir Harry G. Frankfurt, útskýra menningarlegar rætur trans. Sú fyrri er Um kjaftæði/On bullshit (nei, þetta er ekki handbók fréttastofu RúV) en þar er útskýrt hvernig kjaftavaðli óx fiskur um hrygg seinni hluta 20. aldar. Kjaftavaðall er verri en ósannindi, segir Frankfurt, að því leyti að ósannindi er hægt bera undir mæliker sanninda. Kjaftæði hrærir öllu saman, lætur sig engu skipta hvað sé satt og hvað logið. Seinni ritgerðin Um sannindi/On truth birtist 2006. Þar vekur Frankfurt athygli á þeirri lensku að taka einlægni fram yfir sannindi. Segi einhver í einlægni að hann hafi fæðst í röngum líkama sé það tekið gott og gilt sem sannleikur. Til að það sé satt, að hægt sé að fæðast í röngum líkama, þarf aðgreiningu meðvitundar og líkama, sem er ómöguleiki. Lifandi fæddur nýburi fæðist með meðvitund og er annað tveggja sveinbarn eða meybarn. Einlægni breytir ekki ómöguleika í sannindi. Ranghugmynd verður ekki rétt með einlægni.

Ranghugmyndir eru ekki bannaðar. Hver og einn má hafa þá sjálfsmynd sem hann kýs sér. Leiðinlegur má telja sig hrók alls fagnaðar; grjótheimskur að hann sé ljóngáfaður; pervisinn að hann sé vaxtarræktartröll. Af frjálsræði einstaklingsins og umburðalyndu samfélagi leiðir að karl má gerast kvengervill, temja sér siði og háttu kvenna í fasi og framkomu. Samfélagið umber sérvisku. Ef transið hefði látið þar við sitja, að karlar mættu þykjast konur, hefði trauðla orðið siðrof. Transið kunni sér ekki hóf, krafðist viðurkenningar að karlar væru í raun og sann konur; að hægt sé að fæðast í röngum líkama og kenna skuli leik- og grunnskólabörnum þau ósannindi. Transöfgarnar eru bæði ósannar og ólögmætar, segir í  úrskurði hæstaréttar Bretlands.

Orðið kona vísi til líffræðilegs kyns

Navalni, Eldur Smári og fréttamat Mbl., Vísis og RÚV

Stóru fjölmiðlarnir hér á Íslandi fjalla um fangelsun rússneskra blaðamanna sem skrifuðu um látinn andstæðing Rússlandsforseta, Alexei Navalni. Mogginn í viðtengdri frétt, einnig Vísir og RÚV gera frétt um stöðu tjáningarfrelsis í Rússlandi. Í gær var á Íslandi efnt til lögregluaðgerðar gegn tjáningarfrelsi sem enginn stóru fjölmiðlanna hér á landi greindu frá.

Tveir lögreglumenn mættu í gær á lögheimili Elds Smára Kristinssonar, formanns Samtakanna 22, á Breiðdalsvík. Ástæðan er kæra Samtakanna 78 til lögreglu um að Eldur Smári hafi talað óvarlega um hinseginfræðin, m.a. gagnrýnt að karlar hefðu ungabörn á brjósti. Ættingi Elds Smára var til svara í Breiðdalsvík og tjáði hann lögreglumönnunum tveim að formaður Samtakanna 22 væri erlendis. Lögreglumennirnir sögðu ættingjanum að Eldur Smári ætti yfir höfði sér handtökutilskipun ef hann gæfi sig ekki fram.

Fréttin er eini fjölmiðillinn sem segir frá lögregluaðgerðinni í gær á Breiðdalsvík þar sem heimilisfriði var raskað til að hafa hendur í hári manns sem hafði tjáð sig með gagnrýnum hætti um transboðskapinn að karlar gætu verið konur og gefið ungabörnum brjóst. Eldur Smári er samkynhneigður maður, hommi, sem telur að Samtökin 78, upphaflega stofnuð af samkynhneigðum, séu gengin fyrir björg í transáróðri. Fyrir það er hann kærður og fær í ofanálag heimsókn lögreglu sem hefur í hótunum.

Í umfjöllun Fréttarinnar kemur fram að lögmaður Elds Smára hafi síðustu vikur og mánuði verið í reglulegum samskiptum við lögregluna. Ekki er að sjá af þeirri umfjöllun að Eldur Smári hafi nokkru sinni neitað að mæta í skýrslutöku hjá lögreglu.

Lögregluheimsóknin í Breiðdalsvík vekur upp margar spurningar um stöðu tjáningarfrelsisins á Ísland. Stóru fjölmiðlarnir íslensku þegja, eru uppteknari af málfrelsinu í Rússlandi en í túnfætinum heima. Eru Samtökin 78 skuggastjórnandi íslenskra fjölmiðla?

Sex ára fangelsi vegna umfjöllunar um Navalní

RÚV fær ESB-fjármagn til skoðunarmyndunar

RÚV tekur við fjármagni frá Evrópusambandinu, ESB, sem veitt er til að kaupa ritstjórnarstefnu hugþekka áherslumálum ESB. Viðtaka RÚV á ESB-peningum, að ekki sé sagt mútum, vekur spurningar um tilverugrundvöll ríkisfjölmiðilsins.

Rekið er í viðtengdri frétt að ESB hefur notað fjármuni til að kaupa sér velvild ,,skoðanamyndandi aðgerðahópa". Ekki kemur á óvart að litið er á RÚV sem skoðanamyndandi aðgerðahóp. Ríkisfjölmiðillinn er miðlægur í byrlunar- og símamálinu sem er til meðferðar hjá stjórnskipunar- og eftirlitsnefnd alþingis. Þar er um að ræða byrlun Páls skipstjóra Steingrímssonar, stuld á síma hans og afritun símans á Efstaleiti, höfuðstöðvum RÚV. Með leynd var unnið með stolin gögn úr síma skipstjórans og skrifaðar tvær útgáfur af sömu frétt til birtingar í Stundinni og Kjarnanum. Tilgangurinn var að koma höggi á Samherja, og íslenska útgerð almennt.

Um árabil þróast RÚV í þá átt að verða ,,skoðanamyndandi aðgerðarhópur" þar sem fagleg sjónarmið og hlutlæg efnisumfjöllun er látin lönd og leið en jaðarmálefnum lyft á stall í krafti yfirburðastöðu RÚV. Skoðanamyndun í þágu vinstriflokka er reglan á Efstaleiti.

Viðtaka RÚV á ESB-fjármagni gerir ríkisfjölmiðilinn ótrúverðugan í öllum málum sem snúa að Evrópusambandinu. Það er sérstaklega alvarlegt í ljósi fyrirhugaðar þjóðaratkvæðagreiðslu sem ríkisstjórn Kristrúnar Frostadóttur hyggst efna til um aðildarsamninga við ESB.

 

Evrópustyrkir til RÚV athugaverðir

Úkraínu verður skipt eins og Þýskalandi

Rússland fær austurhluta Úkraínu. Breskar og franskar hersveitir munu tryggja öryggi Vestur-Úkraínu. Fyrirkomulagið yrði það sama og í Þýskalandi eftir seinna stríð - nema að Bandaríkin munu ekki senda hermenn til Úkraínu. Þetta er tillaga Keith Kellogg er­ind­reka Don­alds Trumps Banda­ríkja­for­seta í Úkraínu.

Haft er eftir sama Kellogg í viðtengdri frétt að árás Rússa í Sumy, þar sem óbreyttir borgarar eru sagðir hafa fallið, sé til óþurftar. Fréttamaður Die Welt í Úkraínu segir að skotmarkið, ráðstefnumiðstöð, hafi verið þéttsetin hermönnum. Hvort sem óbreyttir eða einkennisklæddir falla er Úkraínustríðið í heild tilgangslaust eftir að Trump fékk kjör sem forseti í nóvember á síðasta ári.

Tilgangurinn með Úkraínustríðinu af hálfu vesturveldanna, Bandaríkjanna og ESB-Evrópu, var að stækka áhrifasvæði vestursins. Langtímaáætlun var að Rússar beygðu sig undir sameiginlegt vald Bandaríkjanna og ESB-Evrópu. Trump hefur engan áhuga á samstarfi við ESB-Evrópu að gera Rússland að hjálendu. Þar með er farin pólitísk réttlæting stríðsins.

ESB-Evrópa óttast fátt meira en rússneskan frið í Úkraínu og bandarískt afskiptaleysi. Allt frá lokum seinna stríðs ábyrgjast Bandaríkin austurlandamæri ESB-Evrópu, sem hefur engan sameiginlegan her og mun ekki öðlast í fyrirsjáanlegri framtíð.

Bretar og Frakkar hafa tilkynnt að þeir geti munstrað samtals um 50 þús. manna herlið til Úkraínu. Í dag er víglínan yfir þúsund kílómetrar. Hvorir um sig telja herir Úkraínumanna og Rússa um milljón manns, þar af eru bardagasveitir um og yfir helmingurinn. Ef gefið er að 50 þúsund manna herlið Breta og Frakka séu allt bardagasveitir, sem vitanlega er ekki tilfellið, yrði friðargæslan 5 prósent af fjölda bardagasveita Úkraínumanna og Rússa á víglínunni. Vægt til orða tekið er ólíklegt að friðargæslan yrði til stórræðanna, væri fyrst og fremst táknræn.

Rússar aftaka með öllu að Nató-hermenn fái heimild til friðargæslu í Úkraínu. Pútín og félagar eru til viðræðu um fjölþjóðaher mannaðan Indverjum, Kínverjum og Afríkumönnum. Slíkur her er ekki til og það tæki nokkur ár að setja hann saman.

Líkleg niðurstaða í stríðinu er að það haldi áfram þangað til að Rússar komast að Dnepró-ánni, sem klýfur Úkraínu í tvennt, og láti þar við sitja. Mögulega taka þeir einnig allt Kherson-hérað í suðri og hafnarborgina Odessa í kaupbæti. Þar með yrði Vestur-Úkraína landlukt ríki og tæplega lífvænlegt.

ESB-Evrópa og Bretland munu reyna með öllum tiltækum ráðum að halda stríðinu áfram á meðan Trump er forseti og vonast eftir hagstæðari kjörum frá eftirmanni hans. Trump, aftur, er ákveðinn að ljúka stríðinu sem fyrst. Eina von Trump um skjót stríðslok er að Rússar komist sem fyrst að Dnepró-ánni. Þá væri hægt að skipta Úkraínu eins og Þýskalandi var skipt eftir seinna stríð. Munurinn er sá að Vestur-Þýskaland átti framtíð.

Fulltrúi Trumps: Rússar fóru yfir öll velsæmismörk

Réttlæti án gagna, náttúrulegur afkomubrestur og manngerður

Valkyrjustjórnin ætlar að tvöfalda veiðigjöld, úr tíu milljörðum í tuttugu, í nafni réttlætis. Stórt orð réttlæti og óhægt að meta til fjár. Sanngirni er ögn meðfærilegra hugtak en samt hált sem áll. Í viðtengdri frétt er Guðmundur Helgi Þórarinsson, formaður VM, stéttafélags vélstjóra á fiskveiðiskipum, þeirrar skoðunar sjómenn séu hlunnfarnir af útgerðinni - og kallar eftir sanngirni.

Moggafréttin byggir á pistli Guðmundar Helga, Við þurfum gögnin á borðið. Þar rekur hann aðfinnslur á núverandi fyrirkomulag í skiptingu aflaverðmæta á milli útgerðar og sjómanna. Guðmundur Helgi talar fyrir hönd sjómanna og segir þá hlunnfarna.

Sjónarmið formanns VM má bera saman við grein Péturs Hafsteins Pálssonar í Laugardags-Mogga. Pétur Hafsteinn er framkvæmdastjóri Vísis í Grindavík og má ætla að hann tali fyrir munn útgerðar og vinnslu. Pétur Hafsteinn ber lof á sjómenn og samtök þeirra ábyrga afstöðu í kjarasamningum:

Það verður að segja sjó­mönn­um það til hróss að afstaða þeirra til þess­ar­ar verðlagn­ing­ar er bæði skyn­sam­leg og virðing­ar­verð. Skyn­sam­leg af því að hlut­ur þeirra er bæði geng­is- og afurðaverðstryggður. Hann er ekki háður er­lend­um niður­greidd­um kaup­end­um og sjó­menn eru hluti af skipu­lagi veiða og vinnslu sem trygg­ir þeim heils­ár­s­vinnu og at­vinnu­ör­yggi. Hún er virðing­ar­verð af því að með þess­ari af­stöðu sinni sýna þeir í verki að þeim er annt um starfs­fólk í ís­lensk­um fiskiðnaði og ís­lensk­um tæknifyr­ir­tækj­um, sem og ís­lensk­an efna­hag.

Þar sem ég hef starfað með sjó­manna­for­yst­unni í ald­ar­fjórðung að þessu verk­efni get ég full­yrt að aldrei hef­ur verið meiri sátt um þessa verðlagn­ingu en nú. Því til staðfest­ing­ar má nefna að síðustu samn­ing­ar sem gerðir voru við sjó­menn gilda í tíu ár og er það eins­dæmi í samn­ing­um við verka­lýðsfé­lög á Íslandi, en verðlagn­ing afla hef­ur oft­ar en ekki verið ástæða verk­falla og deilna.

Guðmundur Helgi og Pétur Hafsteinn tala um sömu atvinnugreinina en þeir leggja gagnólíkt mat á stöðu mála. Formaður VM segir sjómenn hlunnfarna en framkvæmdastjóri Vísis segir samhug ríkjandi milli útgerða og sjómanna. Hluti skýringarinnar er að áhersla þeirra er ólík. Formanni VM er tíðrætt um uppsjávarveiðar og tilfærir þar verulegan mun á tekjum íslenskra og norskra sjómanna, svo hleypur á tugum prósenta. Helsta uppsjávartegundin sem íslensk skip veiða er loðna. Í ár og i fyrra var engin loðnuvertíð. Til að það verði vertíð næst þegar loðna gengur á miðin þarf skip til að sækja aflann. Í Noregi er löng saga af ríkisstyrjum til útgerða þegar á bjátar. Loðnuskipin íslensku geta ekki gert út á slíka styrki.

Guðmundur Helgi treystir sér ekki til að styðja tillögur valkyrjustjórnarinnar að tvöfalda veiðigjöldin með eftirfarandi rökum:

Ríkisstjórnin hefur nú kynnt drög að lagabreytingum. SFS hefur svarað þessum áformum fullum hálsi. Engin leið er fyrir stéttarfélög sjómanna að taka afstöðu til fullyrðinga þessara aðila nema gögnin séu birt.

Formaður stéttafélags vélstjóra á fiskiskipum segir ekki hægt að finna réttlætið án gagna. Ætti formaðurinn að vera gjörkunnugur málavöxtu hafandi staðið í þjarki við útgerðina um kaup og kjör sjómanna.

Valkyrjurnar, Kristrún, Þorgerður Katrín og Inga, ættu kannski að leita upplýsinga, og leggja þær á borðið, áður en lengra er haldið í réttlætisvegferðinni? Skjóti þær yfir markið og skattleggi atvinnugrein þannig að afkoman hrynur í nafni réttlætis er betur heima setið en af stað farið.

Arð þarf til að atvinnurekstur sé lífvænlegur. Engin dæmi eru um að skattlagning skapi ríkidæmi. Mörg dæmi eru aftur um hið gagnstæða, að skattar geri arðbæran rekstur óarðbæran. Þær valkyrjur ættu að hafa í huga að réttlæti er eitt en afkoma annað. Útgerðir, sjómenn og landverkafólk sem urðu af loðnuverðtíð tvö ár í röð voru ekki beitt ranglæti - heldur bresti í afkomu. Náttúran spyr hvorki um réttlæti né sanngirni. Í mannheimi, á hinn bóginn, getur réttlæti orðið sanngjörn fátækt.

 

  

„Öll gögn þurfa þá að liggja á borðinu“

Vók, trans og mannréttindi

Karlakór á engin mannréttindi. Íþróttafélag ekki heldur. Saumaklúbbur getur ekki öðlast mannréttindi. Hópar, félagasamtök og trúfélög geta ekki átt mannréttindi. Ekki frekar en fyrirtæki eða stjórnmálaflokkar. Mannréttindi eru frátekin fyrir einstaklinga. Vókið er á annarri skoðun. Transútgáfa vóksins er sérstaklega gjörn á að hópgera mannréttindi.

Í vókinu er iðulega talað um mannréttindi viðkvæmra hópa. Í raun er átt við að sérkenni fárra eigi að fá stöðu mannréttinda. En það stenst ekki. Hver og einn einstaklingur á sín mannréttindi, ekki aðskiljanlegir hópar sem einstaklingar kenna sig við eða teljast hluti af. Það er ekki til neitt sem heitir hlutafélag mannréttinda.

Hávaxnir eiga hvorki meiri né minni mannréttindi en lágvaxnir. Þeir sem eru í yfirþyngd búa við sömu mannréttindi og þvengmjóir. Sama gildir um hörundslit. Sérkenni sem fólk velur sér, hvort heldur húðflúr eða trúarsannfæring, gefur engin mannréttindi.

Þingmaður Samfylkingar, Eydís Ásbjörnsdóttir, skrifar skoðanagrein og heldur fram að þeir sem kenna sem við trans eigi á fá mannréttindi sem hópur. Það er sérmeðferð og heggur að rótum mannréttinda - með því að gera þau að hópréttindum.

Trans er þegar karlar gerast konur og omvent, konur karlar. Erfðaefnið breytist ekki, konur hafa XX-litninga og karlar XY. Það er val að breyta ásýnd sinni, þannig karl líti út eins og kona og öfugt. Enginn er knúinn til þess. Nýburi fæðist af öðru hvoru kyni, er sveinbarn eða meybarn. Maðurinn deilir þessum einkennum með öðrum spendýrum.

Transfólk segjast vera af röngu kyni við fæðingu. Með læknisfræðilegum úrræðum, skurðaðgerðum og lyfjum, er komist í ,,rétt" kyn. Kyn er hvort rétt né rangt, það er líffræðileg staðreynd. Líði einhverjum það illa í eigin skinni að viðkomandi taki sér einkenni af andstæðu kyni er það ekki vandamál samfélagsins heldur einstaklingsins.

Illu heilli er ekki látið nægja að fáeinir stundi kynjahopp. Nei, það þarf telja alþjóð trú um þann ómöguleika að sumir fæðist í röngu kyni. Lifandi fæddur nýburi kemur í heiminn með meðvitund. Sú meðvitund getur ekki, frekar en líkaminn, verið af röngu kyni. Það er ekki þannig að storkurinn skili barni í mannheima með millilendingu á alþjóðlegu meðvitundarmiðstöðinni og fái stundum afhenta ranga meðvitund. Svona sögur gerast í ævintýrum, ekki raunheimum.

Samfélag okkar umber sérvisku. Fólk má trúa hverju það vill, líka sögunni um storkinn sem fékk ranga meðvitund í barn Jóns og Gunnu. Fólk má kynbreyta ásýnd sinni, þykjast annað kyn en það fæddist í. En við ættum ekki að skilgreina mannréttindi upp á nýtt, láta lífsskoðunarfélag vúdú-fræða komast upp með að hópgera mannréttindi. Um leið og einstaklingurinn missir grunnréttindi sín til hópsins er úti um frelsið til sjálfstæðrar hugsunar.

Tilfallandi getur trútt um talað. Hann andmælti trans í leik- og grunnskólum og fékk á sig opinbera ákæru. Í anda vóksins, í þessu tilfelli transvóksins, er það múgurinn með ríkisvaldið sér til halds og trausts sem skal eiga síðasta orðið. Réttarhaldi er ítrekað frestað og tilfallandi haldið á skilorði. Fyrst átti aðalmeðferð að fara fram í febrúar, síðan í apríl og nú í maí. Engar skýringar, en stóri bróðir hefur auga á þér. Refsingin liggur í málsmeðferðinni.

DV býður upp á nafnlaust netníð

Þróunarsálfræðingurinn og álitsgjafinn Gad Saad er á leiðinni til Íslands í sumar, heldur fyrirlestur í Hörpu. Tilfallandi þekkir lítið til Saad, hefur þó séð fáeinr youtube-ræmur þar sem Saad segir álit á mönnum og málefnum í afalegum umvöndunartón.

Ferilsskrá Saad sýnir að Saad er vel húsum hæfur. Maðurinn hefur virðingarverða prinsippafstöðu til málfrelsis, eins og sjá má í nýlegri 4. mín. ræmu. DV segir frá væntanlegri Íslandsheimsókn Saad á óviðfelldinn hátt sem fjölmiðillinn ætti að skammast sín fyrir. Teknar eru nafnlausar svívirðingar um Saad og látið eins og það sé almannarómur.

Í fyrirsögn DV er tóninn sleginn: Umdeildur fyrirlesari á leið til Íslands - ,,Einn versti zíonistinn á netinu" DV má vitanlega hafa hvaða skoðun sem er á Saad, líkt og hver annar. En DV þykist flytja fréttir, hluti fyrirsagnarinnar er innan tilvitnunarmerkja. Það sem verra er þá hefur DV netníðingana nafnlausa. Í frétt DV segir:

Koma hans hefur ekki farið fram hjá Íslendingum. Meðal annars þeim sem hafa talað fyrir hagsmunum Palestínumanna.

„Ætla rétt að vona að þetta floppi. Gad Saad er einn versti zíonistinn á netinu,“ segir ein kona á samfélagsmiðlum í umræðum um viðburðinn.

„Þetta er síonisti og hálfviti, en auk þess rasisti gagnvart svörtu fólki, innflytjendum almennt og hatar konur,“ segir upphafsmaður umræðunnar.

Hvers vegna nafnleysið? ,,Ein kona" og ,,upphafsmaður umræðunnar" eru með nöfn. Það er auðvelt að vega úr launsátri undir nafnleynd, spyrjið bara ,,þýska stálið", Þórð Snæ Júlíusson.

,,Ein kona" og ,,upphafsmaður umræðunnar" bjóða aðeins upp á órökstuddar fullyrðingar og svívirðingar. Hvað gengur DV til með svona nafnlausum trakteringum? Fjölmiðlar bera meiri ábyrgð en aðrir í opinberri umræðu. DV bregst illilega hlutverki sínu sem fjölmiðill þegar nafnlausum orðasóðum er hleypt upp á dekk.

Eða er blaðamaður DV kannski að skálda upp umræður ,,á samfélagsmiðlum"? Er það skýringin?

Helgi Seljan og Rakel funduðu með byrlara Páls skipstjóra

Páli skipstjóra Steingrímssyni var byrlað heima hjá sér á Akureyri kvöldið 3. maí 2021. Um nóttina var honum ekki hugað líf, var settur á dauðavagninn svokallaða, en fékk endurnýjun lífdaga með raflosti. Daginn eftir var flogið með skipstjórann í sjúkravél og hann lagður inn á Landspítala í Fossvogi og lá þar meðvitundarlaus í öndunarvél 4. til 6. maí.

Þáverandi eiginkona skipstjórans játar byrlunina. Hún glímir við alvarleg andleg veikindi. Eiginkonan hefur einnig játað að afhenda Þóru Arnórsdóttur ritstjóra Kveiks á RÚV síma skipstjórans, af Samsung-gerð. Afhendingin fór fram 4. maí og skyldi eiginkonan koma daginn eftir á RÚV og fá síma skipstjórans tilbaka. Á RÚV var sími skipstjórans afritaður á Samsung-síma í eigu RÚV með númerið 680 2140.

Nýjar upplýsingar í byrlunar- og símamálinu birtust í gær. Í viðtali í Brotkasti sagði Páll skipstjóri frá fundi í húsakynnum RÚV á Efstaleiti þann 5. maí þegar hún sótti síma eiginmannsins. Þann fund sátu Þóra Arnórsdóttir, Arnar Þórisson pródúsent, Helgi Seljan fréttamaður og Rakel Þorbergsdóttir fréttastjóri. Allt starfsmenn RÚV.

Fundurinn 5. maí staðfestir skipulag og ásetning. RÚV er með í höndunum klónaðan síma skipstjórans. Ákveðið er að frumeintakinu skuli skilað á sjúkrabeð skipstjórans til að hann yrði grunlaus um þjófnað og afritun. Var ákvörðunin tekin á fundi byrlara með fjórum starfsmönnum RÚV þann 5. maí? Ef síma skipstjórans hefði verið fargað gat hann dregið þá ályktun að um þjófnað væri að ræða. Planið var að skipstjórinn væri grunlaus um að sími hans hefði verið afritaður.

Fljótlega eftir að Páll skipstjóri komst til meðvitundar þóttist hann sjá að eitthvað athugavert væri við símtækið. Smáforrit, öpp, sem höfðu verið á skjáborði síman voru horfin.  

Skipstjórinn er prýðilega tæknilæs en var, eðlilega, ekki með sjálfum sér fyrst eftir byrlun og meðvitundarleysi. Þegar heim kom náði hann áttum og sá hverskyns var. Ekkert hafði komið fram í fjölmiðlum þar sem vísað var í gögn úr símanum. Það var síminn sjálfur sem var grunsamlegur. Einnig hitt að reglulega var reynt að komast inn á samfélagsmiðla og jafnvel bankareikninga skipstjórans úr öðrum síma en hans eigin. Þann 14. maí kærði skipstjórinn til lögreglu að átt hafði verið við símann á meðan hann var meðvitundarlaus. Páll skipstjóri taldi að væri grunur sinn á rökum reistur myndi hann fá símtal eða heyra af efnisatriðum úr símanum sem hlytu að komast í umferð. Einhver tilgangur hlaut að vera að baki að átt hafði verið við símann.

Skipstjórinn fær ekki eitt símtal heldur tvö þann 20. maí 2021 með 11 mínútna millibili. Hér gat ekki verið um tilviljun að ræða, samráð var um símtölin. Hvorugt símtalanna var frá RÚV. Klukkan 14:56 hringir Þórður Snær Júlíusson ritstjóri Kjarnans. Rúmlega tíu mínútum síðar, 15:07, hringir Aðalsteinn Kjartansson blaðamaður á Stundinni.

Þórður Snær og Aðalsteinn áttu sama erindið við Pál skipstjóra. Báðir sögðust hafa gögn undir höndum sem þeir ætluðu að nota til að skrifa fréttir í sínar útgáfur, Kjarnann og Stundina. Hvorki Þórður Snær né Aðalsteinn hringdu í aðra en Pál skipstjóra til að fá viðbrögð við gögnunum. Símtölin til skipstjórans staðfestu að gögnin, sem voru til umræðu, komu úr afrituðum síma skipstjórans. Bæði samtölin voru stutt, skipstjórinn vildi ekkert tjá sig. Daginn eftir birtist sama fréttin í tveim útgáfum um skæruliðadeild Samherja.

Hvernig gátu Þórður Snær annars vegar og hins vegar Aðalsteinn komist yfir sömu fréttina? Jú, vitanlega, með því að fréttin var búin til á RÚV og send þaðan til birtingar í Stundinni og Kjarnanum. RÚV frumbirti enga skæruliðafrétt. Aftur kom RÚV í humátt á eftir fréttaflutningi Kjarnans og Stundarinnar, rak hljóðnemann upp í stjórnmálamenn og áhrifavalda og spurði: er þetta ekki voðalegt með skæruliðadeild Samherja? Reiðibylgja reis í samfélaginu vorið 2021 - eins og ætlast var til.

Norðlenska útgerðin rekur heila skæruliðadeild til að ófrægja blaðamenn og fjölmiðla var viðkvæðið. Vitanlega var engin skæruliðadeild, hún er tilbúningur blaðamanna. Gögnin í síma skipstjórans sýndu vinnufélaga tala sín á milli um hve ósvífnir fjölmiðlar voru í umfjöllun um Samherja. Eini ,,glæpur" skipstjórans var að hann fékk aðstoð við greinarskrif til að verja vinnuveitanda sinn árásum fjölmiðla. 

Eftir skæruliðafréttir Stundarinnar og Kjarnans ríkti Þórðargleði á Efstaleiti. Sex dögum eftir fyrstu fréttir Stundarinnar og Kjarnans birtist á RÚV fréttaskýring undir fyrirsögninni Skæruliðadeild Samherja er ekki þáttur á Netflix. Lokorðin eru eftirfarandi:

Samherji hefur ekki tjáð sig um starfsemi skæruliðadeildarinnar en Katrín Jakobsdóttir forsætisráðherra er búin að því og segir að fyrirtækið sé komið langt út fyrir mörk sem talin eru eðlileg í samfélaginu.
Hvaða afleiðingar það hefur að fara yfir þessi mörk er enn á huldu.

Enginn hefur spurt Katrínu Jakobs fyrrverandi forsætisráðherra hvort henni finnist aðild fréttamanna og fjölmiðla að byrlun og þjófnaði eðlileg. Þegar fréttamenn RÚV þýfguðu Katrínu vorið 2021 um skæruliðadeildina gátu þeir þess ekki að norðlenskur skipstjóri galt nærri með lífi sínu fréttaöflun RSK-miðla, RÚV, Stundarinnar og Kjarnans.

Á Glæpaleiti starfar á ný Helgi Seljan og helsti aðstoðarmaður Kristrúnar forsætisráðherra er Þórður Snær Júlíusson. Þetta er Ísland í dag.