Gunnar Smári virkjar bróður sinn

Foringi Sósíalistaflokksins Gunnar Smári Egilsson virkjar bróður sinn í þágu öreigaframboðsins. Bróðirinn, Sigurjón M. Egilsson, sme, stendur fyrir bloggútgáfunni Miðjunni.

Sósíalistaflokkurinn er í harðri baraáttu við Pírata um skringilegustu vinstrimennina, sem hvorki finna sig í Sammfó né Vg. Miðjan hans sme skaut á Pírata fyrir að vera ekki jafn óspilltir og þeir vilja vera láta.

Eftir að þáttastjórnandi RÚV þýfgaði frambjóðanda Sósíalistaflokksins um fjármálaóreiðu Gunnars Smára fór sme-Miðjan í yfirgír, kallaði spyril RÚV klámkarl og sakaði RÚV um að hylma yfir með formanni Miðflokksins. Nokkuð hraustlegt í eyrum þeirra sem eru læsir og vita að RÚV stóð fyrir samfelldum árásum á Sigmund Davíð í áravís.

Sme er gömul hönd í pólitískum skrifum og jafnan í þágu þeirra sem borga best hverju sinni, hvort heldur kaupandinn sé Jón Ásgeir eða Benni á Hringbrautarviðreisn. Líklega skrifar hann fyrir bróa og sósíalista upp á hlut í almannafé nái framboðið manni inn í borgarstjórn.

Athugasemdir

[Þorsteinn Siglaugsson, 26.5.2018 kl. 21:37]

Klámhögg og klámkarl eru nú afar ólík hugtök. Klámkarl er karl sem horfir á klám. Klámhögg er árás sem mistekst. Einnig kallað vindhögg. Tilraun Einars til að varpa rýrð á frambjóðanda Sósíalistaflokksins með dylgjum um Gunnar Smára var lágkúruleg og ómálefnaleg. Gunnar Smári er vissulega heldur vafasamur fugl en hann er ekki í framboði fyrir flokkinn og persóna hans kemur málefnalegri umræðu um borgarmálin í rauninni alls ekkert við.