Tilfallandi athugasemdir

Mánudagur, 30. desember 2013

Skúrkur ársins og svarthvíta vinstrið

Stefán Pálsson sagnfræðingur og spurningahöfundur er einn af álitsgjöfum Eyjunnar í spurningunni um ,,ekki-sigurvegari ársins". Stefán segir stjórnlagaráð ekki-sigurvegara ársins, og vísar bæði í afdrif tillagna ráðsins og þingframboða ráðsmanna.

Vegna ummælanna koma vinstrimenn úr stjórnlagaráði inn á fésbókarsíðu Stefáns og kvarta. Illugi Jökulsson, Gísli Tryggvason og Vilhjálmur Þorsteinsson bera sig allir aumlega. Vilhjálmur skrifar t.d.

Hefði búist við einhverju sniðugra og hnyttnara frá þér í svona löguðu, Stefán (sérstaklega þar sem þú berð alla jafna virðingu fyrir fólki sem er tilbúið að berjast fyrir málstað óháð stundarvinsældum), en það eru ekki alltaf jólin.

Vinstrimenn fyrr á tíð kunnu að lesa blæbrigði tilverunnar og kipptu sér ekki upp við smáatriði. Vinstrimenn samtímans eru vælukjóar í leit að tilefni til að verða sárir. Eyjan umorðaði ,,ekki-sigurvegara ársins" í ,,skúrk ársins." Stjórnlagaráðsmennirnir velta sér upp úr því að vera skúrkar og eigna saklausum Stefáni að hafa gefið þeim þá einkunn.

Á bakvið kvörtun vinstrimannanna er krafa um samstöðu með vinstrimálefnum eins og að stúta stjórnarskrá lýðveldisins. Stefán er þekktur VG-maður og á samkvæmt því að standa með þeim öflum (VG plús Samfylkingu) sem gerðu atlögu að stjórnarskránni.

Svarthvíta vinstrið fékk mælingu í þingkosningum sl. vor; Samfylkingin var með 12,9 prósent fylgi og VG með 10,9 prósent.

Svarthvíta vinstrið er vitanlega skúrkur ársins.

Flokkur: Dægurmál | Facebook