Mánudagur, 17. desember 2018
Einfalda spurningin um þriðja orkupakkann
Ísland fær sjálfkrafa undanþágu frá reglum EES-samningsins sem ekki eiga við hér á landi, t.d. um skipaskurði og járnbrautalestir. Þriðji orkupakki ESB miðar að samhæfingu raforkumarkaðar Evrópu. Ísland er ekki hluti af evrópskum raforkumarkaði.
Einfalda spurningin um þriðja orkupakkann er þessi: hverjir standa gegn því að Ísland fái undanþágu?
Aðeins þrír aðilar koma til greina:
a. Evrópusambandið. Ef það er raunin staðfestir það grun um að ESB renni hýru auga til íslenskra fallvatna og sæstrengs.
b. Norsk stjórnvöld. Andstaða er við nánari tengingu Noregs við raforkukerfi ESB og norsk stjórnvöld eru í vörn. Norskur ráðherra var sendur í vinnuheimsókn til Íslands að tala um fyrir íslenskum yfirvöldum.
c. Íslenski orkugeirinn og mögulega fjárfestar. Milljarðaviðskipi komast á koppinn ef sæstrengur verður lagður til Evrópu. Íslensk náttúra og almenningur munu bera kostnaðinn.
Talsmenn þriðja orkupakkans hér á landi vilja ekki svara spurningunni hverjir það eru sem standa í vegi fyrir undanþágu Íslands. Hverju barni er augljóst að hér er maðkur í mysunni.
Alþingi ætti ekki undir nokkrum kringumstæðum að falla frá fyrirvörum Íslands gagnvart þriðja orkupakkanum. Við erum ekki hluti af raforkukerfi Evrópu. Vitanlega eigum við ekki að taka þátt í raforkustefnu ESB - hún er einfaldlega ekki okkar mál.
Alþingi setur áfram lögin | |
Tilkynna um óviðeigandi tengingu við frétt |
Dægurmál | Slóð | Facebook | Athugasemdir (3)
Mánudagur, 17. desember 2018
Bára og fatlaða barnið
Bára Halldórsdóttir er boðuð í skýrslutöku fyrir héraðsdómi vegna þess að hún hljóðritaði einkasamtöl þingmanna sem voru tímabundið fatlaðir vegna áfengis og höfðu í frammi ósiðlegt orðfæri. Báru finnst gott að finna samhuginn með lögbrotinu.
Víkur þá sögunni að snjómokstursmanni sem segir sínar farir ekki sléttar í samskiptum við hversdagsfólk sem sumt hvað keppist nú við að sýna samhug með Báru. Rúnar Ingi Árdal segir: ,,Snjómokstur er vanþakklátasta starf sem ég hef unnið, þarna kynnist maður því hvað fólk getur látið út úr sér við aðra einstaklinga, orð sem ég vona að litla stelpan mín eigi aldrei eftir að læra."
Mergjaðasti hluti frásagnar Rúnars Inga er eftirfarandi:
Einn var svo ósvífinn að segja vinnufélaga mínum að það þyrfti að hreinsa vel hjá sínu húsi, hann ætti fatlað barn. Þetta gerðum við samviskusamlega í mörg ár, í hvert skipti sem gatan var mokuð en komumst svo að því að þessi maður átti ekki og hafði aldrei átt fatlað barn.
Tilbúna fatlaða barnið var samkvæmt frásögn Rúnars Inga aðferð til að vekja samúð og fá ókeypis þjónustu.
Vinstrimennirnir sem lyfta ólöglegum hlerunum Báru á stall vilja líka ókeypis þjónustu - sem er að rægja pólitíska andstæðinga sína.
Bára ánægð með samhuginn | |
Tilkynna um óviðeigandi tengingu við frétt |
Dægurmál | Slóð | Facebook | Athugasemdir (1)
Mánudagur, 17. desember 2018
Vísindi, réttlæti og loftslag
Loftslag breytist óháð athöfnum mannsins. Þetta er vísindaleg staðreynd. Við vitum um miðaldahlýskeiðið frá um 900 til 1300 og viðurkennt er að tímabilið sem kom eftir, litla ísöld, stóð yfir frá um 1300 til 1850. Á hvorugu tímabilinu skipti nokkru máli hvað menn gerðu, veðurfar breyttist vegna náttúrulegra ferla.
Síðustu áratugi hafa sumir vísindamenn í bandalagi við alþjóðastofnanir og aðgerðasinna reynt að telja okkur trú um að athafnir mannsins valdi hlýnun jarðar síðustu hundrað árin eða svo.
Aðrir vísindamenn á sviði loftslagsmála, t.d. Richard Lindzen, Judith Curry og Roy Spencer eru þeirrar skoðunar að vísindalegar sannanir skortir fyrir staðhæfingum um hlýnun af mannavöldum.
Á loftslagsráðstefnu Sameinuðu þjóðanna í Katowice í Póllandi sem lauk í gær voru sjónarmið þeirra sannfærðu ráðandi. Íslendingur, sem starfað hefur í þjónustu þeirra sem trúa á hlýnun af mannavöldum, boðar nýja umræðu um réttlæti í loftslagsmálum.
Nú liggur í augum uppi að raunvísindi hafa nákvæmlega ekkert með réttlæti að gera. Raunvísindi fjalla um staðreyndir. Pólitík er aftur útblásin af hugmyndum um réttlæti og sýnist þar sitt hverjum, eins og gengur.
Einn af snjallari álitsgjöfum um samtímamálefni, Jordan Peterson, fékk nýlega þá spurningu hvort mannkynið gæti ekki sameinast í trú á manngerða loftslagsvá. Á sex mínútum sallaði Peterson niður loftslagsævintýrið um nýju fötin keisarans.
Það er ekki spurning hvort heldur hvenær almenningur sér í gegnum bábiljufræðin um að maðurinn stjórni loftslaginu. Þegar hákirkjan fellur tekur hún með sér trúverðugleika raunvísinda. Það er heldur leitt. Raunvísindi eru gagnleg - en pólitísk raunvísindi baneitruð.
Þarna er mikilvægum áfanga náð | |
Tilkynna um óviðeigandi tengingu við frétt |
Dægurmál | Breytt s.d. kl. 08:22 | Slóð | Facebook | Athugasemdir (1)