ESB-hörmungin og Ísland

,,Ísra­el er það land sem stend­ur fremst hvað bólu­setn­ingu gegn Covid-19 varðar. Sam­einuðu ar­ab­ísku fursta­dæm­in standa einnig mjög vel í þeim efn­um sem og Chile, Bret­land og Banda­rík­in," segir í viðtengdri frétt.

Öll þessi ríki eru utan Evrópusambandsins. Að nafninu til stendur Ísland einnig utan ESB.

En aðeins að nafninu til. Sakir EES-samningsins og fádæma undirlægjuháttar stjórnsýslunnar er Ísland fast í kviksyndi ESB-hörmungarinnar.


mbl.is Helmingur ísraelsku þjóðarinnar fullbólusettur
Tilkynna um óviðeigandi tengingu við frétt

EES gerir Ísland ósjálfbjarga

Evrópusambandið hikar ekki við að brjóta EES-samninginn þegar Brussel-valdinu býður svo við að horfa. Núna er Ísland sett á bannlista vegna þess að ESB er í hallæri með bóluefni. Fyrir ári braut sambandið á okkur og EES-samningnum með því að banna útflutning til Íslands á búnaði í upphafi Kínaveirunnar s.s. hlífðarfatnaði.

Verst af öllu er þó að EES-samningurinn gerir íslensku stjórnsýsluna ósjálfbjarga. Í ráðuneytunum starfa meira og minna gallharðir ESB-sinnar sem sjá Evrópulausn á sérhverju vandamáli sem upp kemur.

Vitanlega átti Ísland að sækja sér bóluefni beint til framleiðenda en ekki stökkva á ESB-vagninn. Það voru skelfileg mistök sem má rekja til ósjálfbjarga stjórnsýslu. Í Brussel er ekki vinum að mæta. Það vita allir nema íslenskir embættismenn sem þegar eru gengnir ESB á hönd.


mbl.is Gengur í berhögg við EES-samninginn
Tilkynna um óviðeigandi tengingu við frétt

Skörp viðbrögð

Í morgun var beðið um að tekið yrði í bremsurnar.

Klukka þrjú eftir hádegi er tilkynnt að skellt verði í lás frá og með miðnætti. Tilefnið var þó annað en rætt var um í morgun.

Lærdómur: orð bera ábyrgð. 


mbl.is Tíu manna fjöldatakmörkun frá miðnætti
Tilkynna um óviðeigandi tengingu við frétt

2,5% hagvöxtur er góður, 4,8% er illkynja

,,Gert er ráð fyr­ir að hag­vöxt­ur í ár verði aðeins 2,5%," segir í viðtengdri frétt. Aðeins?

Ef hagkerfi vex um 2,5 prósent árlega er það prýðileg frammistaða, hóflegur vöxtur.

Hótað er 4,8% vexti á næsta ári. Það heitir þensla, er illkynja hagvöxtur sem skapar meiri eymd en velsæld.

Það á að stíga á bremsurnar, hækka vexti og kæla hagkerfið. Annað er óábyrgt og veldur aðeins leiðindum.


mbl.is Skuldasöfnun heldur áfram til ársloka 2025
Tilkynna um óviðeigandi tengingu við frétt

Hvítur miðaldra morðingi reyndist 21 árs arabi

Fjölmiðlar kenndu hvítum miðaldra karlmanni um fjöldamorð í Colorado í fyrstu fréttum af glæpnum. Mbl.is beit á agnið og birti frétt fyrr í morgun þar sem sagði:

lög­regl­an fer með miðaldra hvít­an karl, skyrtu­laus­an og blóðugan út úr versl­un­inni. Að sögn Yamaguchi er maður­inn sá eini sem er al­var­lega særður eft­ir skotárás­ina í versl­un­inni án þess að staðfesta að viðkom­andi sé morðing­inn. (undirstrikun pv)

Rétttrúnaðarliðinu á fjölmiðlum liggur á að beina grun að hvítum miðaldra körlum þegar voðaverk eru annars vegar. Þeir liggja svo vel við höggi.

Morðinginn er 21 árs sýrlenskur arabi, Ahmad Al Aliwi Alissa, sem fékk landvist í Bandaríkjunum og þurfti að þakka fyrir sig að hætti margra trúbræðra sinna á vesturlöndum í seinni tíð.

Breivikarnir eru fáir en múslímar margir.


mbl.is Ákærður fyrir fjöldamorð í Colorado
Tilkynna um óviðeigandi tengingu við frétt

Ríkið rís á ný, mannréttindi afturkölluð

Englendingur sem hyggst nýta sér ferðafrelsið og fara til útlanda gæti átt von á sekt upp á tæplega milljón íslenskra króna, segir í frétt Viðskiptablaðsins. Frá miðöldum með Magna Charta er England í fararbroddi mannaréttinda.

Í Þýskalandi og Frakklandi er lok, lok og læs á atvinnu-, funda- og ferðafrelsi. Víða í Evrópu sætir fólk stofufangelsi, sem kallað er útgöngubann.

Mannréttindi sem vestrænar þjóðir um árabil gengið að vísum eru fokin út í veður og vind á örfáum misserum. Nánast mótþróalaust.

Stórmerkileg þróun og öll í nafni sóttvarna.

Ríkisvaldið var afskrifað fyrir fáeinum árum. Alþjóðastofnanir og alþjóðleg fyrirtæki áttu að sjá um að reka heimsþorpið í algleymi mannréttinda. Það bjó til greiða leið fyrir efnahagslega flóttamenn að valhoppa í vestræna velmegun úr fátækt, eymd og mannréttindaleysi heimahaganna.

Ríkisvaldið er heldur betur mætt til leiks á ný. Hvorki alþjóðastofnanir né yfirþjóðleg samtök, ESB skýrasta dæmið, réðu við Kínaveiruna. Ríkið stökk inn í valdatómið til að verja lýðheilsu þegnanna.

Mannréttindi eru, þegar öllu eru á botninn hvolft, einskins virði nema þau séu vernduð af ríkisvaldi. Það sem ríkið gefur getur ríkið tekið.

Íslendingar ættu allir sem einn að fyllast væntumþykju til ríkisins sem þeir tilheyra. Við búum við milt og hófstillt ríkisvald.

 


mbl.is Þýskalandi skellt í lás yfir páskana
Tilkynna um óviðeigandi tengingu við frétt

RÚV sviðsetti mútugreiðslu

Ólíkt hafast þeir að í Þýskalandi og Efstaleiti. Þeir þýsku biðjast afsökunar að sviðsetja atburði en RÚV hreykir sér af slíkum fölsunum.

Á alræmdum Kveiksþætti um rekstur Samherja í Namibíu var atriði þar sem rauð íþróttataska sneisafull af peningum skipti um hendur mútugjafa og þiggjanda.

Raðframleiðsla RÚV á fölsuðum fréttum um Samherja, síðast um skattarannsókn í Færeyjum, sýnir innræti sem seint verður kennt við fagmennsku og virðingu fyrir sannleikanum.

Hjá RÚV helgar tilgangurinn meðalið.


mbl.is Sviðsetti heimildamynd um vændi
Tilkynna um óviðeigandi tengingu við frétt

Aðeins 4% þjóðarinnar bólusett

Um 96 prósent þjóðarinnar er hráefni í nýja bylgju farsóttarinnar sem kennd er við Kína. Ástæðan er að aðeins um 4 prósent þjóðarinnar er bólusett.

Vonir stóðu til að um páska væri faraldurinn yfirstaðinn og allt í lukkunnar standi á alþjóðadegi verkalýðsins 1. maí. Þær vonir eru brostnar.

Bjartsýnn Frakki, starfsmaður Evrópusambandsins, segir hjarðónæmi náð í ESB í júli. Miðað við hvernig á málum er haldið í Brussel má bæta sex mánuðum við þá spá.

Ferðasumarið verður íslenskt.


mbl.is Heill árgangur í sóttkví
Tilkynna um óviðeigandi tengingu við frétt

Efnahagsmál aðalatriðið...eða ekki

Enginn stjórnar hvert verður aðalmál kosninganna í haust. Margir vilja dagskrárvaldið, bæði stjórnmálamenn, hagsmunasamtök og miðlar, bæði kenndir við fjöl og samfélag. En oft er það ófyrirséð atburðarás sem kemur til sögunnar og framkallar mál málanna hverju sinni.

Að því gefnu að jarðhræringar á Reykjanesi stilli sig um senuþjófnað í sumar verður kófið og eftirmál þess í forgrunni. Einhverjir virðast telja að efnahagsþáttur kófsins verði mest áberandi. En það er ólíklegt. Efnahagslega komum við vel undan faraldrinum.

Félagslegir þættir og lýðheilsa kófsins verða að líkum veigameiri en krónur og aurar. Þar virðist ríkisstjórnin ætla að leggja á tæpasta vað, opna landið ferðamönnum og slaka á sóttvörnum.

Búið er að stimpla inn í þjóðina að komi upp nýsmit Kínaveirunnar verði að rekja smitið og setja í sóttkví alla sem mögulega gætu hafa smitast. Að öðrum kosti rís faraldur, kenndur við bylgjur. Fyrir hálfum mánuði setti einn smitberi 100 manns í sóttkví. Það þarf ekki mikið til.

Ef það fer svo að ótímabær opnun landsins leiðir til samfélagslokana fyrir kosningar verður ríkisstjórnarflokkunum hugsuð þegjandi þörfin í kjörklefanum. Betri er krókur en kelda, segir máltækið.


mbl.is Fyrst og fremst kosið um efnahagsmál
Tilkynna um óviðeigandi tengingu við frétt

Vinstri grænir kolefnisjafni Geldingadalsgosið

Í ógrynni frétta af gosinu við Fagradalsfjall er ekki minnst á koltvísýringinn, CO2, sem ryðst úr iðrum íslenskrar jarðar. Ekki er það svo að fjölmiðlar sé orðnir afhuga loftslagsmálum. Ó, nei, í nótt var RÚV með böggum hildar yfir því að kanadískir íhaldsmenn ,,afneita loftslagsbreytingum."

Við Fagradalsfjall, beint fyrir framan nefnið á RÚV, er í augnablikinu stærsta einstaka koltvísýringsútgufun jarðarinnar. En það er ekki einu sinni á dagskrá að segja loftslagsfréttir af gosinu.

Mun Katrín forsætis ekki vappa á Fagradalsfjall með loftslagshjörðinni og gráta gos líkt og gert var við Ok?

Rýkur Umhverfisstofnun ekki upp til handa og fóta og reiknar út CO2-búskap Íslands eða heldur hún áfram að gera tún að votmýri?

Gera Vinstri grænir ekki kröfu um að ríkisstjórnin kolefnisjafni Geldingadalsgosið?

Þær eru margar spurningarnar en fátt er um svör.

 

 


mbl.is Fá betri mynd á kvikusöfnun
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband