Elliði, froskurinn, forsetinn og orkupakkinn

EES-samningurinn er eins og að sjóða frosk og byrja á volgu vatni, skrifar Elliði Vignisson, þar sem fullveldi Íslands er í hlutverki frosksins. Orkupakkinn þýðir í raun að Evrópusambandið hækkar hitastigið eilítið. 

Aðeins þeir sem eru næmir á fullveldið átta sig á hvað er að gerast. Elliði, Miðflokkurinn, Davíð Oddsson, Styrmir Gunnarsson, Sturla Böðvarsson, Frosti Sigurjónsson, Tómas Ingi Olrich og nokkrir fleiri eru aðalhöfundar að vitundarvakningu almennings um að EES-samningurinn tekur jafnt og þétt frá okkur fullveldið.

Í þessum fríða hópi eru bjartsýnismenn, eins og Ólafur Ísleifsson þingmaður Miðflokksins, sem gerir sér vonir um að forseti Íslands, laumu ESB-sinninn Guðni Th., muni vísa orkupakkanum í þjóðaratkvæðagreiðslu. Það mun Guðni Th. ekki gera nema undir verulegum þrýstingi, nálægt suðumarki.


mbl.is Orkupakkanum verði vísað til þjóðarinnar
Tilkynna um óviðeigandi tengingu við frétt

Markaðurinn trúir ekki á nýtt WOW - og ekki ég

Hlutabréf í Icelandair féllu í morgun, þegar meintur kaupandi að þrotabúi WOW gaf sig fram í viðtali. En þegar búið var að melta orð Michele Ball­ar­in hækkuðu hlutabréfin og við lokun markaða voru bréf Icelandair 1,12% verðmætari í dag en í gær.

Hvað veldur? Mögulega þessi orð Ball­ar­in: ,,Íslend­ing­ar og ís­lensk stjórn­völd þurfa val­kost í flugi."

Skúli Mogensen gæti verið að tala í gegnum Ballarin með þessum orðum. Hvers vegna ætti bandarísk kona með engin tengsl við Ísland allt í einu að vilja kaupa þrotabú flugfélags?

Ef þessi geðþekka bandaríska kona er ekki leppur Skúla er sjálfsagt að bjóða hana velkomna og fínt að hún sjái sem flest viðskiptatækifæri hér á landi. 

En allt viðtalið við konuna er ofhannað og ótrúverðugt eftir því.

Morgunljóst er að hvorki almenningur á Íslandi né stjórnvöld þurfa fleiri valkosti en nú eru fyrir hendi. Ein 14-16 félög fljúga hingað.

Sú geðþekka bandaríska segir þessi orð í markaðslegum tilgangi. Hér er fiskur undir steini. 

 


mbl.is Notar eigið fé við uppbyggingu WOW
Tilkynna um óviðeigandi tengingu við frétt

Bankar sameinaðir til að selja fákeppni

Sameining Arion og Íslandsbanka myndi aðeins þjóna hagsmunum fjárfesta sem fengju fákeppnisstöðu í kaupbæti. Almenningur og fyrirtæki bæru kostnaðinn. 

Bankar á Íslandi þurfa a.m.k. að vera þrír og betra er að þeir séu litlir en stórir. Þannig þjóna þeir best almenningi og öllum þorra fyrirtækja. Ef stórfyrirtæki þurfa fjármálaþjónustu sem íslensku bankarnir ráða ekki við ættu þau að leita til útlanda.

Við prófuðum að hafa íslensku bankana stóra á alþjóðavísu. Það endaði með glæpamennsku og hruni. Til þess eru vítin að varast þau.


mbl.is Horfur íslensku bankanna hjá S&P neikvæðar
Tilkynna um óviðeigandi tengingu við frétt

Brexit þarf Boris, fórnaði May

Brexit er stærsti atburður í breskri sögu frá lokum seinna stríðs. Stórir atburðir kalla á sérstaka stjórnmálamenn. Boris Johnson er, bæði til góðs og ills, sérstakur stjórnmálamaður. Fráfarandi forsætisráðherra, Theresa May, var hefðbundinn stjórnmálamaður.

Breska þjóðarsálin er að veði í Brexit. Meginland Evrópu, þar sem ESB ræður ríkjum, vill sýna fram á að ekkert líf fái þrifist í álfunni án atbeina sambandsins. Margir Bretar trúa áróðrinum frá Brussel og vilja ómerkja Brexit-þjóðaratkvæðagreiðsluna þar sem meirihluti bresku þjóðarinnar kaus að ganga úr Evrópusambandinu.

May munstraði ekki bresku þjóðarsálina í baráttunni við Brussel. Hún reyndi að fara bil beggja. En það er ekki hægt að vera bæði niðurnjörvaður í ESB og standa utan sambandsins. Ekki frekar en það er hægt að búa til hringlaga þríhyrning.

Í áratugi voru hefðbundin stjórnmál að ESB sankaði til sín völdum á kostnað aðildarríkja sem horfðu upp á að fullveldið fór í síauknum mæli til tæknikrata í Brussel á meðan kjörnir fulltrúar urðu meira í þykjustunni.

Brexit er uppreisn og Boris er uppreisnarforingi. 


mbl.is Boris Johnson næsti forsætisráðherra
Tilkynna um óviðeigandi tengingu við frétt

Píratar, Sjálfstæðisflokkur - strúktúr og frekja

Píratar eiga í vandræðum með skipulag, strúktúr, á flokksstarfi sínu. Fyrrum borgarfulltrúi þeirra segir:

Hinn svo­kallaði flati strúkt­úr verður að byggj­ast á ein­hvers kon­ar strúkt­úr, og til­gang­ur­inn með slík­um strúkt­úr á meðal ann­ars að vera að gefa fólki sem vinn­ur fyr­ir flokk­inn lág­marks vinnufrið í formi fyr­ir­sjá­an­legra ferla. Ann­ars vinna bara þeir frek­ustu hverju sinni og frekju er mætt með enn meiri frekju þar til allt sýður upp úr.

Sjálfstæðisflokkurinn er ögn eldri en Píratar og ætti ekki að vera flókið að vísa í reglur um málsmeðferð þar á bæ. Styrmir Gunnarsson vísaði í reglur um atkvæðagreiðslur flokksmanna og vildi virkja þær að uppfylltum þeim skilyrðum sem sett eru í téðum reglum.

En þá er Styrmi og andstæðingum 3. orkupakkans í Sjálfstæðisflokkum sagt: ,,Ekki er tilefni til að efna til atkvæðagreiðslu meðal flokksmanna Sjálfstæðisflokks vegna þriðja orkupakkans miðað við inntak málsins og eðli þess."

Hmmm.

Er sem sagt píratastrúktúr á Sjálfstæðisflokknum?


mbl.is Ekki tilefni til atkvæðagreiðslu
Tilkynna um óviðeigandi tengingu við frétt

Blaðamennskan í dag: aftaka á opinberum vettvangi

Þegar einhver fremur afbrot, kemst undir manna hendur og hlýtur refsingu er almennt litið svo á að viðkomandi eigi skilið annað tækifæri. Vitanlega með fyrirvörum; dæmdur barnaníðingur ætti ekki að fá vinnu á leikskóla.

En séu ekki þess brýnni ástæður til að vekja athygli á brotamönnum, sem hafa afplánað sinn dóm, ættu þeir að fá að vera í friði, fá annað tækifæri til að eiga líf réttu megin laganna.

Blaðamennska á seinni tíð er upptekin af refsigleði samfélagsmiðlanna. Blaðamenn harðneita að læra af Lúkasarmálinu og öðrum sambærilegum, t.d. pólsku drengjunum sem sakaðir voru um hópnauðgun og Hlíðarmálinu þar sem tveir ungir menn voru úthrópaðir nauðgarar.

Á miðöldum og í múslímaríkjum samtímans er opinber aftaka liður í að skemmta og kúga. Siðað fólk tekur ekki þátt í slíku. 


mbl.is „Er mönnum alvara?“
Tilkynna um óviðeigandi tengingu við frétt

Orkupakkinn og tilgangur stjórnmála

Tilgangur stjórnmála, í þeirri mynd sem þau eru rekin hér á landi, er að meginþættir samfélagsins séu skipulagðir þannig að þorri þjóðarinnar sé sáttur. Almenningur bæði fjármagnar stjórnmálakerfið og tekur þátt kosningum svo að tilgangur stjórnmálanna nái fram að ganga.

Orkumál eru augljóslega einn meginþátta samfélagsins. Af því leiðir eru völd yfir orkumálum þjóðarinnar sjálfkrafa pólitískt stórmál en ekki tæknilegt úrlausnarefni fárra útvaldra.

Mistök ríkisstjórnarinnar, og sérstaklega Sjálfstæðisflokksins, er að láta eins og þjóðinni komi ekki við hvernig orkumálum landsins skuli háttað. Ríkisstjórnin ætlaði að keyra orkupakkann í gegn undir þeim fölsku forsendum að um væri að ræða smámál. 

Orkupakkinn var ekki tekinn til umræðu fyrir þingkosningar og heldur ekki EES-samningurinn sem veldur því að orkupakkinn er á dagskrá alþingis. Á síðustu mánuðum vaknar almenningur til vitundar um að fullveldi þjóðarinnar í orkumálum er í hættu.

Viðbrögð ríkisstjórnarinnar, og sérstaklega Sjálfstæðisflokksins, voru kolröng. Í stað þess að kannast við að EES-samningurinn var redding á sínum tíma vegna útþenslu Evrópusambandsins láta stjórnvöld eins og samningurinn sé meitlaður í stein og skuli gilda til eilífðarnóns. ESB er ekki lengur í útþenslu, Brexit er skýrasta dæmið. Ísland hafnaði að ganga í ESB um áramótin 2012/2013. Hvorttveggja átti að leiða til þess að stjórnmálakerfið á Íslandi tæki EES-samninginn til gagnrýnnar meðferðar. Það brást.

Orkupakkinn er þannig afleiðing af tvennum mistökum. Í fyrsta lagi að EES-samningurinn skuli ekki vera í gagnrýnni endurskoðun - sem myndi sjálfkrafa setja fyrirvara á innleiðingarferli laga og reglugerða ESB. Í öðru lagi er forræði þjóðarinnar yfir raforkumálum eitt og sér slíkt stórnál að orkupakkann hefði átt að ræða í þaula fyrir kosningar.

Enn er orkupakkinn ekki afgreiddur frá alþingi. Enn er tími að bæta fyrir ofangreind mistök. En menn þurfa að sjá að sér og viðurkenna að tilgangi stjórnmála hafi ekki verið sinnt sem skyldi. Og þar ber stærsti stjórnmálaflokkurinn mesta ábyrgð. Nema hvað.


mbl.is Gjá milli þingflokks og grasrótar
Tilkynna um óviðeigandi tengingu við frétt

Eftir ósigur kemur ákall um nýja forystu

Umræðan um orkupakkann er komin á það stig í Sjálfstæðisflokknum að ekki er lengur hægt að berja í brestina, láta eins og ekkert hafi í skorist. Miðflokkurinn sækir fast á sem forystuafl borgaralegra stjórnmála.

Hætta er á að Sjálfstæðisflokkurinn koðni niður fremur en að hann klofni. Eins og Elliði bendir á er samfylkingarstefna orðin ráðandi í forystu og þingflokki sjálfstæðismanna. Miðflokkurinn er skýr valkostur óánægðra. Fyrst fer fylgið, þá fótgönguliðið og loks frambjóðendur.

Orkupakkaumræðan er svo gjörtöpuð forystu Sjálfstæðisflokksins að yfirborðssigur í atkvæðagreiðslu á alþingi síðsumars gerði ekki annað en að festa í sessi þá ímynd að ESB-sinnar ráði ferðinni. Icesave og ESB-umsóknin leiddu í ljós að fullveldispólitík býr bæði til flokka og brýtur þá.

Fullveldispólitík finnur sér ávallt farveg. Orkupakkaumræðan verður farvegurinn fram að kosningum. Sjálfstæðisflokkur með samfylkingarforystu er ekki líklegur til stórræðanna.


mbl.is Skorað á sjálfstæðismenn að kjósa annað
Tilkynna um óviðeigandi tengingu við frétt

Töpuð umræða veit á tapað fylgi

Sjálfstæðisstefnan á sér traustari bandamann í Miðflokknum en þeim flokki sem kennir sig við sjálfstæði. Orkupakkinn er eitrað peð í refskák við ESB um fullveldi þjóðarinnar. Allir sjá það nema forysta Sjálfstæðisflokksins sem er bandingi djúpríkis embættismanna og hagsmunasamtaka er vill Ísland inn í Evrópusambandið.

Orkupakkinn gagnast íslenskum almenningi nákvæmlega ekkert. Þvert á móti eru allar líkur að almannahagur versni þegar auðmenn eignast raforkuna til að selja úr landi og hækka í leiðinni raforkuverð til Jóns og Gunnu. 

Forysta Sjálfstæðisflokksins er ekki í neinum tengslum við stjórnmálastrauma samfélagsins. Orkupakkamálið bregður afar neikvæðu ljósi á EES-samninginn sem forysta Sjálfstæðisflokks ver með kjafti og klóm og af meiri trúarahita en yfirlýstir ESB-sinnar.

Sjálfstæðisflokkurinn er kominn niður í 19 prósent fylgi og botninum er ekki náð. Enda hægara sagt en gert að lagfæra raðbilun í dómgreind forystu og þingflokks fyrrum móðurflokks íslenskra stjórnmála.


mbl.is Miðflokkurinn tekur af Sjálfstæðisflokki
Tilkynna um óviðeigandi tengingu við frétt

Gulli græðir á Bjarni-að-hætta-tali

Þegar sögur fara á flot um að foringi sé að hætta er fyrsta spurningin: hver græðir?

Ekki Þórdís, hún er óreynd; ekki Áslaug sem er bæði ung og óreynd.

Gulli utanríkis græðir.

En auðvitað myndi Gulli ekki bera út söguburð. Prinsippmaður sem hann er.


mbl.is Segist ekki vera á leið úr formannsstól
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband