Góð tilraun - takk

Ísland átti möguleika að komast áfram fram á 90 mínútu síðasta leiks riðlakeppninnar. Það er harla gott. 

Leikurinn gegn Króatíu var mun betri en gegn Nígeríu. Meira hugsað um að flytja liðið upp völlinn þó að langspyrnur og löng innköst væru staðalvopn eins og fyrri daginn.

Setja má taktískar spurningar við sum atriði. Birkir var orðinn lúinn á 65 mín. og Albert hefði mátt koma inn á fyrr. Og svo reynir maður ekki að sóla 15 metra frá eigin teig. En taktísk atriði falla með manni og stundum á móti.

Á heildina litið stóð landsliðið okkar sig með sóma. 

Takk fyrir mig.


mbl.is Ísland úr leik á HM
Tilkynna um óviðeigandi tengingu við frétt

Guð, trú og menn

Maðurinn er trúarvera. Öll heimsins trúarbrögð eru handverk mannsins. Tilgangur trúarbragða er að útskýra tilvist mannsins og réttlæta siðaboðskap.

Vísindi geta útskýrt tilvist mannsins en með engu móti réttlætt tiltekinn siðaboðskap. 

Trú verður áfram miðlæg meðal manna. Trúarbrögð í hefðbundnum skilningi, og guð þar með, nokkuð víkjandi.  


mbl.is Kallar Guð „heimskan“
Tilkynna um óviðeigandi tengingu við frétt

Fótbolti og frumsyndin

Íslenska knattspyrnulandsliðið er þegar búið að sanna sig. Það spilaði sig inn á stærsta knattspyrnumót Evrópu fyrir tveim árum og eru núna á heimsmeistaramótinu. Stórþjóðir í íþróttinni, Evrópumeistarar Hollendinga og heimsmeistarar Ítala, sitja heima. En Ísland er í Rússlandi.

Jafntefli gegn Argentínu í upphafsleiknum lofaði góðu en tap gegn Nígeríu gerði horfurnar á framhaldslífi eftir riðlakeppnina heldur dökkar - en hvergi nærri útilokaðar.

Englendingar gera gott mót það sem af er. Dálkahöfundur í bresku útgáfunni Telegraph segir það vandræðalegt ef England yrði heimsmeistari. Enska þjóðarstoltið yrði svo yfirþyrmandi. En, segir dálkahöfundurinn, þjóðarstolt er ekki frumsyndin. Það má finna til þjóðarstolts án þess að skammast sín.

Íslendingar eru stoltir að vera meðal þeirra bestu í vinsælustu íþróttagrein veraldar. Og frumsyndin er ekki þjóðarstolt heldur drambið að gera uppreisn gegn lögmálinu. Í fótbolta er lögmálið þetta: sigur gefur þrjú stig. Við þurfum þau í dag og helst umframmörk. Svo sjáum við hvað setur með stóískri ró og hógværð. 


mbl.is Án sigurs í síðustu sex leikjum
Tilkynna um óviðeigandi tengingu við frétt

Sterkir leiðtogar, lýðræði og fjölmenningaralræði

Lýðræði er á fallandi fæti, samkvæmt álitsgjöfum austan hafs og vestan. Trump og Pútín eru dæmi um það, sem og Erdogan í Tyrklandi og Orban í Ungverjalandi. Ekki er allt upp talið.

William Hague, fyrrum formaður Íhaldsflokksins breska, er einn af mörgum sem vara við vexti og viðgangi sterkra leiðtoga. Þeir taka frá okkur frelsið, segir Hague.

Hague skrifar í Telegraph, sem er hófsöm hægriútgáfa í Bretalandi. Mest lesna greinin í Telegraph á talandi stundu er eftir dálkahöfundinn Zoe Strimpel. Fyrirsögnin, í lauslegri þýðingu, er ,,Það er engin vafi, við búum við fjölmenningaralræði". Þar er sagt frá kvenkyns háskólakennara sem neitar að kenna við háskóladeild í Cambridge sökum þess að dyraverðir ávarpa hana sem konu - madam - en ekki ,,doktor" eins og konan krefst. Þetta kallar kennarinn rasisma og yfirgang.

Það er samhengi á milli þess að á vesturlöndum hallast kjósendur æ meir að sterkum leiðtogum og hinu að fjölmenningaralræðið tekur út yfir allan þjófabálk.

Vænisýkin stafar einkum frá frjálslyndum og vinstrimönnum sem sjá órétti í hverju horni og eru í akkorði að finna tilefni til að móðgast. Alræði fjölmenningar kæfir bæði vitsmunaumræðu og í auknum mæli samskipti fólks. Hvað er þá betra en að senda eins og einn Trump til æðstu valda og láta þá vænisjúku vita hvar Davíð keypti ölið?


Evrópuherinn, taka tvö

Viljayfirlýsing níu Evrópuríkja verður undirrituð í dag um stofnun Evrópuhers. Frá árinu 2007 er rekinn vísir að Evrópuher af Evrópusambandinu. Nýja frumkvæðið að Evrópuher verður með aðild Bretlands, sem er á leið úr Evrópusambandinu.

Samkvæmt Guardian standa níu þjóðríki að viljayfirlýsingunni, Frakkland, Þýskaland, Belgía, Bretland, Danmörk, Holland, Eistland, Spánn og Portúgal.

Nató er sameiginlegt hernaðarbandalag Evrópuríkja og Bandaríkjanna, auk Kanada. Evrópuherinn mun standa utan Nató og stofnana Evrópusambandsins.

Ákefð Evrópuríkja að vígvæðast og stofna til hernaðarsamvinnu þvers og kruss var undanfari fyrri heimsstyrjaldar fyrir rúmum hundrað árum.  


Bandaríkin gefast upp á Sýrlandi

Uppreisnarmenn í Suðvestur-Sýrlandi fá þau skilaboð frá Bandaríkjunum að ekki sé aðstoðar að vænta vegna yfirvofandi árásar stjórnarhersins, skrifar Guardian. 

Borgarastríðið í Sýrlandi er átta ára og hefur kostað um hálfa milljón mannslífa. Vesturveldin, Bandaríkin sérstaklega, studdu aðskiljanlega uppreisnarhópa hvers markmið var að fella ríkisstjórn Assad. Rússar styðja Assad og það sneri stríðsgæfunni honum í vil.

Vesturveldin með Bandaríkin í fararbroddi steyptu Hussein í Írak 2003 og Gaddafi í Líbíu 2011. Til stóð að Assad fær sömu leið. Markmiðið var að setja á fót lýðræðisríki miðausturlöndum. Það fór á annan veg. Afskipti vesturveldanna, innrás í tilfelli Íraks, leystu úr læðingi hjaðningavíg sem ekki sér fyrir endann á.

Uppgjöf Bandaríkjanna í Sýrlandi eru þáttaskil.  


Tony Blair: Trump bjargi ESB

Trump verður að koma Evrópusambandinu til bjargar, segir Tony Blair fyrrum forsætisráðherra Bretlands.

Athyglisverð orð. Hvers vegna ætti Bandaríkjaforseti að bjarga Evrópusambandinu? Og frá hverjum? Jú, frá Rússum er viðkvæðið.

En Rússar hafa ekki ógnað Evrópusambandinu frá því Sovétríkin voru og hétu fyrir bráðum 30 árum.

Hvað er málið? Jú, eftirfarandi er málið.

Evrópusambandið glímir við uppdráttarsýki vegna innbyrðis deilna. Til að halda sambandinu gangandi þarf ytri óvin. Rússland undir Pútin var gerður að óvini. Herskáir frjálslyndir í Bandaríkjunum, Obama og Clinton, tóku þátt í þeim leik, sem og kaldastríðshaukar eins og John McCain.

En Trump hefur ekki áhuga að eiga Pútin sem óvin. Hann sér enga hættu af honum, líst frekar á forseta Rússlands sem samherja. En vegna Evrópusambandsins og herskárra frjálslyndra í Bandaríkjunum á Trump erfitt um vik að ná fundi með Pútín, samanber viðtengda frétt.

ESB og herskáir frjálslyndir vilja framlengja kalda stríðið þar sem Sovétríkin/Rússland voru óvinurinn en Bandaríkin fjármögnuðu varnir Evrópu.

En þessi heimsmynd er löngu liðin, kommúnisminn féll fyrir 30 árum. Vinstrimenn og frjálslyndir eru fangar fortíðarinnar.


mbl.is Trump og Pútín gætu brátt fundað
Tilkynna um óviðeigandi tengingu við frétt

Pólitískur fótbolti

Shaqiri og Xhaka eru Albanir að uppruna en spila með landsliði Sviss. Það kallast fjölmenning. Báðir skoruðu þeir gegn Serbum, sem sitja yfir hlut Albana í Kosovo, og fögnuðu með handartákni er túlkað var sem tvíhöfða örn albanska þjóðarfánans.

Alþjóða knattspyrnusambandið, FIFA, stundar áróður fyrir fjölmenningu í kynningarstarfi sínu. En sambandið skipuleggur knattspyrnumót þjóðríkja.

Ef Shaqiri og Xhaka verður refsað fyrir táknmálið er FIFA að mótmæla afleiðingum eigin áróðurs um ágæti fjölmenningar. Snúið mál, sem sagt. 


mbl.is Shaqiri og Xhaka í tveggja leikja bann?
Tilkynna um óviðeigandi tengingu við frétt

ESB ómerkir lýðræðið

Í orði kveðnu segist Evrópusambandið standa vörð um lýðræðið. En þegar lýðræðislegar kosningar gefa ,,ranga" niðurstöðu krefjast ESB-sinnar iðulega nýrra kosninga.

Þetta er gömul saga og ný. Írar urðu að kjósa tvisvar. Þegar Frakkar og Hollendingar höfnuðu stjórnarskrá ESB var henni breytt í samning - sem þjóðirnar fengu ekki að kjósa um.

Og nú skal endurskoða Brexit-kosningarnar þar sem Bretar kusu að ganga úr Evrópusambandinu.

ESB ómerkir lýðræðið enda fjarska ólýðræðislegt samband.


mbl.is Vilja kjósa á ný um Brexit
Tilkynna um óviðeigandi tengingu við frétt

Fara Píratar á sjó?

Ásmundur Friðriksson þingmaður Sjálfstæðisflokksins er iðulega skotspónn Pírata og annarra vinstrimanna.

Nú er Ásmundur farinn á sjó í afleysingu í frumatvinnuvegi þjóðarinnar.

Skyldu Píratar fara á sjó?


mbl.is Ásmundur Friðriks á sjó í viku
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband