Þrjú smáríki standa ekki undir EES

Evrópusambandið er með tvíhliða samning við Sviss og vinnur að samningi við Bretland. Þá er ESB með samninga við Tyrkland. En flóknasti samningurinn er við þrjú smáríki, Ísland, Noreg og Liechtenstein, - EES-samningurinn.

ESB er ekki kappsmál að halda í EES sem upphaflega var gerður fyrir ríki á leið inn i sambandið. Þvert á móti sýnir ESB málefninu lítinn skilning, fer fram með ítrustu kröfur um aðlögun og teygir samninginn yfir á ný svið, núna síðast orkumál.

Það er eins og  Evrópusambandið sé að reyna á þolmörk Íslendinga og Norðmanna. I Osló hittir ESB fyrir ríkisstjórn og embættismenn sem eru jákvæðir gagnvart ESB-aðild þótt norska þjóðin sé andvíg. Það kemur í hlut íslensku ríkisstjórnarinnar að leiða EES-samninginn til rökréttrar niðurstöðu: sem er að segja samningnum upp.

Álíta sjálfstæðið vera vesen

Sýniþörf lögfræðings og þigmanna

Lögmaður með sýniþörf spilar á skoðanabræður sína og systur í þingliði Samfylkingar og Pírata. Lögmaðurinn leggur fram bókun í réttarsal í von um að þingmenn geri pólitík úr bókuninni.

Bókunin er réttafarsleg steypa en hún kallast við pólitíska tortryggni sem Samfylking og Píratar ólu á vegna skipunar dómara í landsrétti.

Sniðugt hliðarmál í uppákomunni er lögmaðurinn og Píratar eiga sameiginlegt að fara frjálslega með prófgráður. Og það er auðvita slíkt fólk sem við viljum að eigi síðasta orðið um rétta skipan dómsmála.

 

Mun krefjast skaðabóta

Kerfi sem lifa á vandamálum

Ef tekst að fá hljómgrunn fyrir manngerðan vanda, t.d. losun gróðurhúsaloftegunda, spretta óðara fram hagsmunir sem nýta sér vandann til ábata, bæði á vettvangi stjórnmála og viðskipta.

Þessir hagsmunir mynda kerfi sem þrífst á að viðhalda og styrkja þá sannfæringu almennings að vá sé yfirvofandi. Til að leysa meintan vanda þarf að setja peninga í rannsóknir og varnir en þó fyrst og fremst allskonar kynningu og markaðsstarf sem viðheldur athyglinni á meintum vanda.

Kerfin sem lifa á vandamálum eru síðust til að viðurkenna að meint vandamál voru e.t.v. úr lausu lofti gripin eða stórlega ýkt.

Kynnti nýja aðferð í stjórnmálunum

Líf án sársauka, líf á dópi

Sársauki sem verður til við stórfelld inngrip í líkamann, t.d. skurðaðgerð, ber að deyfa með lyfjum. Sársauki sem myndast án sýnilegra líkamlegra ástæðna er ekki ástæða til að meðhöndla með deyfilyfjum.

Óþol gagnvart sársauka er ríkjandi viðhorf. Ef einhver segist finna til er óðara leitað ráða til að deyfa þá tilfinningu.

Við fæðumst við sársauka og fæstir fara í gegnum lífið án þess að finna til. Lyf við sársauka ætti að vera neyðarúrræði en ekki sjálfsagður flótti frá mannlegu ástandi.

Umdeild notkun ópíóðalyfja

Einbreiðir vegir í Reykjavík

Á Birkimel, spottanum á milli Hagatorgs og Hringbrautar, er verið að innleiða miðaldir í samgöngum. Þar sem áður var tvíbreiður vegur er vegna útskota orðinn að einbreiðum.

Raðir myndast af bílum í lausagangi til að komast inn á einbreiðu kaflana. Þessar manngerðu tafir á umferðinni sóa bæði orku og tíma. Ef ætlunin er að hægja á umferð er nærtækara að leggja hraðahindranir fremur en að gera götur einbreiðar.

Herferð vinstrimeirihlutans í borginni gegn fjölskyldubílnum virðast engin takmörk sett.

Vanmenntun karla er vandamál

Háskólapróf veitir aðgang að sérfræðistörfum, bæði á almenna vinnumarkaðnum og hjá hinu opinbera. Sérfræðingar verða millistjórnendur og úr þeim hópi koma forstjórar og æðstu yfirmenn fyrirtækja og stofnana.

Hlutfall kynjanna í háskólanámi er óðfluga að nálgast 70/30, þar sem sjö konur eru í háskólanámi á móti hverjum þrem körlum. Þetta er langtímaþróun. Konur urðu fleiri nýstúdentar en karlar í kringum 1980. Enginn fer í háskólanám án stúdentsprófs eða ígildi þess.

Það gefur auga leið að það er ekki hollt jafnrétti kynjanna að annað kynið verði ráðandi í háskólum. Það veit á verulega kynjaskekkju úti í þjóðfélaginu.

En umræða um vanmenntun karla er nánast engin. Hvað veldur?

Helmingur kvenna með háskólapróf

Konur múta körlum í hjúkrun

Stéttarfélag hjúkrunarfræðinga borgar skólagjöld karla í hjúkrunarnámi. Stéttarfélagið er 98% kvenkyns. Markmiðið segir formaður félagsins er að hærra hlutfall karla í starfsstéttinni skili sér í betri launum.

Hjúkrunarfræðinemar, flestar konur, vekja athygli á siðferði mútugjafa til veikara kynsins og spyrja um jafnréttið.

Kynjað atvinnulíf verður til í frjálsu vali. Það þarf sterkari rök en launaumslagið þegar beita skal mútugjöfum til að ,,leiðrétta" kynjahalla í einhverri starfsgrein.

Vilja ekki borga skólagjöld karla

ESB þarf her fyrir samrunaþróun

Evrópskur her, sem ESB-sinnar vilja stofna til, þjónar tvíþættu hlutverki. Í fyrsta lagi að herja á ríki utan Evrópu, jafnvel innan álfunnar, t.d. Ungverja og Pólverja, sem óhlýðnast Brussel-valdinu.

Í öðru lagi yrði Evrópuher sterkt samrunaafl. Allt frá dögum Rómverja, í gegnum Napóleon, Prússa og Hitler þjónar hermennska hlutverki að bræða saman ólíka samfélagshópa í eitt stórveldi.

Brussel kann sína sögu. Stór-Evrópa þarf her. 

Vill Evrópuher sem geti gert loftárásir

Ísland, Katar og góða fólkið

Góða fólkið hittist til að ræða ,,þjóðernispopúlisma". Helsta niðurstaðan, samkvæmt frásögn mbl.is, er að Ísland líkist Katar. Okkur er sama um útlendingana enda eru þeir flestir farandverkamenn.

En við gætum alveg eins verið Þjóðverjar. Í Þýskalandi búa meira en milljón Rússar og Þjóðverjum er nákvæmlega saman. Enginn gerir heldur veður út af Pólverjum, sem  manna þýskan byggingariðnað líkt og þann íslenska.

Það sem góða fólkið kallar ,,þjóðernispopúlisma" er í raun menningarvitund. Þjóðverjar óttast ekki fjölda Rússa og Pólverja í sínu landi enda vita þeir af reynslu að austurevrópuþjóðir aðlagast þýsku samfélagi.

Aftur eru Þjóðverjar meðvitaðir um að múslímar frá Norður-Afríku, miðausturlöndum og Afganistan eru ekki líklegir að aðlagast þýsku samfélagi. Reynslan segir þeim það.

Góða fólkið ætti að sækja sér endurmenntun áður en það hittist næst til að skiptast á fordómum.

Nær að bera saman Ísland og Katar

Stjórnlynt lýðræði andspænis frjálslyndi

Erdogan í Tyrklandi er aðeins eitt dæmi um vaxandi stjórnlyndi á alþjóðavettvangi. Orban í Ungverjalandi er annað. Trump er stjórnlyndur og Pútín svo sannarlega. Jafnvel þeir sem gefa sig út fyrir að vera ekki í þessum flokki, Macron í Frakklandi, eru sakaðir um hneigð í þá átt.

Lýðræði sem valdefling ólíkra og æ sundurlausari hópa er í kreppu. Þessi útgáfa lýðræðis er iðulega kennd við frjálslyndi. Stjórnlyndi er andsvar við upplausn og glataðri samheldni sem frjálslynda útgáfan er ábyrg fyrir.

Stjórnlyndið sækir afl sitt til íhaldssamra gilda, hvort heldur í múslímsku Tyrklandi eða frjálslyndum Bandaríkjum eða gamalgrónu Frakkalandi. Um Rússland þarf ekki að fjölyrða; stjórnlyndi er þar rauður þráður frá keisurum til kommúnista.

Lýðræði er sagt skásta fyrirkomulag stjórnmála. Besta skipanin er ekki enn fundin upp, og verður sennilega aldrei. Sérhver samtími kallar á sína útgáfu af hvernig málefnum samfélagsins skuli skipað. Yfirstandandi þróun bendir til að stjórnlynt lýðræði skáki frjálslyndu lýðræði út í horn.

 

Erdogan boðar óvænt til kosninga