Trump eignast stjórnmálaflokk

Donald Trump var frambjóðandi á eigin vegum þegar hann hóf kosningabaráttu sína. Hann sigraði aðra frambjóðendur í forvali Repúblíkanaflokksins en flokkurinn stóð hvergi nærri sameinaður að baki honum.

Nú er öldin önnur, segir BBC. Repúblíkanar fylkja sér um Trump og ætla að styðja hann til endurkjörs 2020.

Á meðan dunda demókratar sér við Rússahatur, sem ekki skilar mörgum atkvæðum.

Trump ræður kosningastjóra fyrir 2020

Sjálfstæðisflokkurinn sigrar borgina

Endurnýjaður Sjálfstæðisflokkur er í stórsókn í Reykjavík. Borgarstjóraefni flokksins, Eyþór Arnalds, er líklegur að láta til sín taka og borgarbúum líkar það vel eftir vinstrimoðsuðu úrræðaleysis síðustu ára.

Spurningin er hverjir stjórnar með Sjálfstæðisflokkum, ef til þess kemur.

Samfylkingin vill gjarnan komast inn úr kuldanum í landsmálum og mun gera hosur sínar grænar fyrir móðurflokknum. Aftur er Sjálfstæðisflokkurinn með vænt grænt í Vg og ætti ekki endilega að skipta því út fyrir samfóisma.

Áfram í meirihluta

Brexit eða ekki Brexit

Annað hvort ganga Bretar úr Evrópusambandinu með Brexit, og framfylgja þar með niðurstöðu þjóðaratkvæðagreiðslunnar frá 2016, eða þeir hætta við útgöngu og gerast fullgild ESB-þjóð á ný. Það er enginn millivegur.

Á þessa leið skrifar Vernon Bogdanor stjórnmálafræðingur í Guardian.

Bogdanor ræðir hvorttveggja EES-lausnina, sem Ísland er aðili að, og tollabandalag ESB við Tyrki og hafnar þeim leiðum fyrir Breta. Bogdanor segir ekki til neitt sem heitir ,,mjúkt" Brexit.

Rökin eru eflaust rétt hjá Bogdanor. En reynslan sýnir að rök eru ekki ráðandi í Evrópusambandinu, ef þeim hefði verið fylgt væri evran ekki til í núverandi mynd. Ær og kýr Brussel er pólitík. Af því leiðir verður fundin lausn á Brexit, sem skilur báða aðila eftir ósátta og málefnin í nokkurri óreiðu. Það er eðli ESB-samstarfsins.

RÚV nefnir snöru í hengds manns húsi

RÚV segir þá frétt að systurstofnunin í Austurríki höfði mál á hendur varakanslara landsins vegna ásakana um falsfréttir.

RÚV stefndi bloggara hér á landi fyrir sömu sakir.

Og tapaði.

Costco skálkaskjól fyrir aukna fákeppni

Fákeppni er íslensku versluninni blóð borin. Í skjóli fákeppni verður til ,,skilningur" á milli aðila um verð - ef ekki beint verðsamráð með samsærisfundum í Öskjuhlíð.

Eftir að Costco kom inn á markaðinn sjá stórfyrirtæki sér leik á borði og treysta fákeppnina. Rökin eru fánýt, Costco rekur eina verslun og eina bensínstöð, og er ekki að leggja undir sig markaðinn.

Samkeppniseftirlitið hlýtur að stöðva samruna eldsneytisfyrirtækja og matvöruverslana.

Telur sjóðina of stóra

Frjálslyndir vinstriflokkar hrynja í Evrópu - yfirlit

Frjálslyndir vinstriflokkar, kenndir við sósíaldemókrataisma, eru í kreppu um alla Evrópu. Þýskir sósíaldemókratar fengu sl. haust sína verstu kosningu frá 1949, franskir og hollenskir systurflokkar þeirra þurrkuðust nærri út. Á Spáni og Ítalíu er staðan ekki hótinu skárri.

Í Guardian er yfirlit yfir stöðu frjálslyndra vinstriflokka. Meginástæða fyrir hruninu er að frjálslyndir vinstriflokkar eiga ekkert svar við knýjandi úrlausnarefni samtímans, alþjóðavæðingunni og áhrifum hennar á efnahag almennings og lífsskilyrði.

Tvær kennisetningar frjálslyndra vinstrimanna, frjáls alþjóðaviðskipi og fjölmenning, standast ekki dóm reynslunnar. Frjáls alþjóðaviðskipti leiða til ójafnaðar og fjölmenning til samfélagslegrar upplausnar.

Hér á Fróni er Samfylkingin boðberi frjálslyndrar vinstristefnu. Meira þarf ekki að segja.

Segir Katrín Jakobsdóttir af sér sem forsætisráðherra?

Ef einhver keypti spurninguna hjá könnunarfyrirtæki: ,,á Katrín Jakobsdóttir að segja af sér sem forsætisráðherra?" myndu án efa einhverjir segja já. Til dæmis þeir sem vilja fella ríkisstjórnina.

Til að auka líkurnar á já-i gætu fjölmiðlafyrirtæki, t.d. Stundin og RÚV, dundað sér við í nokkrar vikur að draga upp neikvæða mynd af Katrínu. Hægt væri að bera saman kosningastefnuskrá Vinstri grænna við málefnaskrá ríkisstjórnarinnar og fá viðmælendur úr röðum andstæðinga Katrínar og Vinstri grænna til að vitna um svik.

Einmitt þetta gerði Stundin við Sigríði Andersen og fékk stuðning RÚV. Pólitískir andstæðingar Sigríðar voru leiddir fram í fjölmiðlum til að gagnrýna hana. Fjölmiðlar og hagsmunaöfl lögðust á eitt að gera dómsmálaráðherra tortryggilegan. Og svo keypti Stundin spurningu hjá Maskínu: á Sigríður að segja af sér?

Stundin/RÚV einbeita sér að hanna pólitíska atburðarás. Þessir fjölmiðlar segja ekki fréttir, nema í framhjáhlaupi. Aðalatriðið er að koma höggi á pólitíska andstæðinga annars vegar og hins vegar hygla samherjum.

Meirihluti telur Sigríði eiga að segja af sér

Sterkir leiðtogar á óvissutímum

Xi Jin­ping, for­seti Kína og aðal­rit­ari kommúnistaflokks­ins, sver sig í pólitíska ætt Pútín í Rússlandi, Erdogan í Tyrklandi, Trump í Bandaríkjunum, Macron í Frakklandi og Merkel í Þýskalandi.

Allt eru þetta sterkir leiðtogar sem gera sig gildandi óvissutímum eftir kalda stríðið.

Þeir veikustu í hópnum; Trump, Macron og Merkel eiga það sameiginlegt að búa í ríkjum með trausta lýðræðishefð. Xi Jin­ping, Pútín og Erdogan eru fastari í sessi en leiðtogar lýðræðisríkja. Nokkurt áhyggjuefni það. Einkum fyrir lýðræðið.

Vilja afnema tímamörk á setu forseta

Fjölmenningin í fangelsi

Í nafni fjölmenningar búa sum svæði í Danmörku við lögleysu, þar sem dönsk lög eru virt að vettugi. Nú skal gert átak að færa svæðin undir dönsk lög, t.a.m. með því að gera afbrot á fjölmenningarsvæðum að bera þyngri refsingu en sambærileg brot annars staðar í Danmörku.

Hvað segja talsmenn fjölmenningarinnar? Jú, þetta samkvæmt fréttinni:

Muhammed Aslam, formaður hverf­is­sam­taka Mjølnerp­ar­ken á Nør­re­bro í Kaup­manna­höfn, seg­ir til­lög­una gefa í skyn að ekki séu all­ir jafn­ir gagn­vart lög­un­um. „Það á greini­lega að vera A-deild og B- deild í okk­ar þjóðfé­lagi,“ seg­ir Aslam en að hans mati sé um árás í garð hverf­anna að ræða.

Fjölmenningarsinnar vilja einstefnu þar sem fjölmenningin ræðst á lögin og yfirvöld en þegar ríkisstjórnir vilja taka í taumana er það kallað árás á jafnrétti.

Vilja þyngja refsingu fyrir brot í „gettóum“

Rússar stjórna Ameríku - hversu líklegt?

Rússar stóðu fyrir forsetakjöri Donald Trump eru pólitísku skilaboðin sem demókratar halda á lofti. Nýleg ákæra á hendur 13 Rússum er liður í að gera kenninguna trúverðuga.

En það er ekkert á bakvið ákæru sérstaks saksóknara, eins og Jackson Lears rekur í London Review of Books. Rússarnir munu aldrei koma fyrir rétt, það er ekki einu sinni ljóst hvort þeir verði ásakaðir um lögbrot.

Á meðan malar samsæriskvörnin sem gerir ekki annað en að grafa undan forsetaembættinu og tiltrú Bandaríkjamanna á stjórnkerfinu, segir Stephen F. Cohen.

Kenningin um að vald Rússar yfir bandarískum stjórnmálum sé slíkt að þeir ákveði hver hlýtur forsetaembættið þar í landi þjónar þeim eina tilgangi að demókratar þurfi ekki að takast á við þá niðurstöðu að frambjóðandi þeirra tapaði fyrir Trump.

Ásökunum repúblikana hafnað í nýju minnisblaði