Ásatrú og víkjandi kristni

Kristni er innfluttur siður og fylgir okkur í árþúsund en er víkjandi síðustu hundrað árin, eins og skriðjöklarnir sem þola ekki veraldarloftslagið.

Ásatrú er upphafssiður feðranna frægu sem komu austan um hyldýpishaf, eins og Jónas orti.

Ásatrú var aflögð með málamiðlun á alþingi árið 1000. Í málamiðluninni var kveðið á um að heiðnir siðir eins og fóstureyðingar með útburði, hrossakjötsát og launhelganir mættu haldast.

Mannasiðir eru hverju samfélagi nauðsynlegir og ásatrú stendur á gömlum merg. Endurreisn hennar þarf ekki að sýta. 

Ásatrú á Íslandi í mikilli sókn

Tepruleg kvenremba

Valdefling kvenna er orðin slík að fulltrúar þeirra á alþingi tala niður til karla og segja þá ,,al­mennt ein­fald­ari og ódýr­ari gerð af homo sapiens en kon­ur."

Tilefnið er talnaleikfimi um að sérfræðilæknisþjónusta, þar sem konur eru meirihluti skjólstæðinga, séu dýrari en lækningar sem karlar nota í meira mæli en konur. Þingkonan sem tekur málið upp er of mikil tepra til að nefna hverskyns læknisverk það eru sem konur sækja í og er dýrari en almennt gengur og gerist.

En það er önnur hlið á málinu. Ef konur eru svo illa af guði gerðar að rándýrar læknisaðgerðir þarf til að halda þeim gangandi hlýtur að vera spurning hvort þær eigi ekki að greiða hærri skatta en karlar.

Karlar greiða 33% minna

Frjálslynd kreppa leyst með stríði við Rússa

Frjálslyndir demókratar í Bandaríkjunum er orðnir helstu Rússahatarar á vesturlöndum. Demókratar eru í hlutverki kommúnistaveiðarans McCarty á tíma kalda stríðsins, skrifar Robert Parry.

Þingmaður Demókrataflokksins, Bonnie Watson Coleman, segir opinberlega að Rússar stundi stríðsaðgerðir gegn bandarísku lýðræði með tölvuárásum.

Stríðslyst frjálslyndra nær út fyrir Bandaríkin. Fyrrum framkvæmdastjóri Nató, Daninn Anders Fogh Rasmussen, segir vesturlönd ekki nógu ,,ákveðin" gegn Rússum og vill stórauknar vopnasendingar til stjórnarinnar í Kiev sem berst við uppreisnarmenn í austurhluta Úkraínu. Rússar styðja uppreisnarmenn og vilja ekki að Úkraína renni heil og óskipt til ESB og Nató.

Frjálslyndir á vesturlöndum eru í kreppu. Brexit var þeim þungbært og sigur Trump á Hillary Clinton kom við kaunin.

Stríð við Rússa, sem höfuðóvin lýðræðisins, kæmi þeim frjálslyndu fjarska vel. Eftir sigur á Pútín og fylgifé hans væru frjálslyndum vesturlöndum allir vegir færi að skapa ný lýðræðisríki í miðausturlöndum, með Sýrland og Írak sem sniðmát. Og heimurinn yrði til muna friðsælli.

Kushner býður sig fram til yfirheyrslu

Bankasvindlið í einkavæðingu og hruni

Íslenskir fjárglæframenn komust yfir alla þrjá stóru bankana og mestan hluta sparisjóðskerfisins á tímum útrásar. Það er rauður þráður frá málamyndakaupum á Búnaðarbankanum 2003 og Al-Thani málsins rétt fyrir hrun. 

Fléttan frá 2003 var endurtekin með Al-Thani sem var skáldskapur um að arabískur auðmaður vildi kaupa stóran hlut í Kaupþingi.

Hörmungarsaga bankanna í útrás og hruni er vonandi lexía sem kunna þegar til stendur að hleypa einkafjárfestum inn í bankakerfið á ný.

Kaup þýska bankans til „málamynda“

Hagfræði lýðhyggju

Lýðhyggja, stundum kölluð popúlismi, er afleiðing af misheppnaðri hagpólitík síðustu áratuga á vesturlöndum, skrifar dálkahöfundur Guardian.

Sigrar lýðhyggju, t.d. Trump og Brexit, eru andsvar við hagfræðikenningum sem gera allan almenning að launaþrælum á meðan þeir ríku fleyta rjómann.

Sterk verkalýðsfélög, mannsæmandi lágmarkslaun, full atvinna og andóf gegn alþjóðahyggju eru ráðleggingar Guardian. Þessa uppskrift má kalla íslensku leiðina. Enda er lýðhyggja rauður þráður íslenskra stjórnmála þótt hún sé kölluð öfgar í kapítalískum ríkjum.

 

Frjálslyndi og sporin til alræðis

Vestrænt frjálslyndi opnaði landamærin fyrir milljónum múslíma sem lögðu undir sig heilu hverfin í evrópskum stórborgum til að stunda and-vestrænan lífsstíl.

Þekkt stef múslímskra hryðjuverkamanna er að þeir herja á þau samfélög sem ólu þá.

Lögregluyfirvöld á vesturlöndum gera kröfu um aukið eftirlit með mögulegum hryðjuverkamönnum. Víðtækar heimildir lögregluyfirvalda að fylgjast með borgurum, til að kæfa hryðjuverk í fæðingu, bitnar á öllum almenningi sem verður að fórna einkalífi sínu.

Vestræna frjálslyndið býr þannig í haginn fyrir alræðisríkið sem fylgist með hverju fótmáli þegnanna. Grundvallarmistök þeirra frjálslyndu er að trúa bábiljunni um að hægt sé að samrýma vestræn lífsgildi trúarmenningu múslíma.

Geta ekki lesið síðustu skilaboðin

Pólitísk umræða og deyjandi flokkar

Fram undir 1990 gáfu stjórnmálaflokkar út dagblöð, allir nema Sjálfstæðisflokkur sem bjó að Morgunblaðinu. Umræða um sameiningu stjórnmálaflokka, einkum Alþýðuflokk og Alþýðubandalag, hverfðist oft um sameiningu málgagnanna.

Tíminn túlkaði heimsmynd framsóknarmanna, Þjóðviljinn Alþýðubandalagsins og kratatilveran átti heima í Alþýðublaðinu. Hægrikratísk sjónarmið voru kynnt í ,,frjálsu og óháðu" síðdegisblaði, DV. Allar útgáfurnar fluttu fréttir og pólitík, vitanlega söng þar hver með sínu nefi.

Flokksblöðin voru alltaf rekin með tapi en þóttu nauðsynleg fyrir pólitíska umræðu. Pólitísku umbrotin um aldamót, þegar vinstrimenn hagræddu flokkakerfinu, voru gerð samhliða uppstokkun á blaðaútgáfu, samanber Dag-Tímann sem síðar rann inn í Fréttablaðið.

Í dag er hræódýrt að stunda útgáfu á netinu. Og skyldi ætla að stjórnmálaflokkar myndu standa þar vaktina og gefa út sína greiningu á pólitík. En eins og Styrmir Gunnarsson bendir á er lesmál stjórnmálaflokka ekki til.

Hvað veldur málleysi stjórnmálaflokka? Er það svo að flokkarnir þurfa enga umræðu á sínum vettvangi? Og hvert skyldi samhengið vera á milli færri málgagna stjórnmálaflokka og fjölgunar flokka?

Drög að svari gæti verið þetta: stjórnmálaflokkar eru ekki lengur verkfæri til að breyta samfélaginu í anda þeirra gilda sem þeir standa fyrir. Stjórnmálaflokkar eru laustengt bandalag einstaklinga sem hafa áhuga að komast á þing og/eða eignast aðild að þeim gæðum stjórnmálaflokkar veita. Flokkarnir fá peninga frá hinu opinbera og útdeila bitlingum í nefndum og ráðum. Svo er alltaf möguleiki á ríkisstjórnaraðild sem opnar á fleiri tækifæri.

Pólitísk umræða er aukaariði í stjórnmálaflokkum. Þingmenn hengja sig í umræðu utan flokka og skilgreina sig út frá dægurflugum en ekki flokksmenningu. Líftími heilla stjórnmálaflokka er líka orðinn giska stuttur. Spyrjið bara þessar fáeinu hræður sem enn kenna sig við Samfylkinguna.

Endalok kratisma á Íslandi

Kratar hétu á síðustu öld Alþýðuflokkur en Samfylking frá aldamótum. Eftir útreið ríkisstjórnar undir forystu Samfylkingar 2009 til 2013 voru reynd tilbrigði eins og Viðreisn og Björt framtíð, sem eru í kreppu.

Kratar á Íslandi taka rangan pól í hæðina í stærstu málum. Alþýðuflokkurinn vildi ekki stofna lýðveldi 1944 og Samfylkingin reyndi að leggja það niður með inngöngu í Evrópusambandið.

Kratar voru alltaf veikir hér á landi. Þjóðlegir vinstrimenn í Sósíalistaflokknum og Alþýðubandalagi voru sterkari en Alþýðuflokkurinn.

Stærsta verkefni krata í Þýskalandi, Bretlandi og á Norðurlöndum, uppbygging velferðarsamfélags, var unnið á Íslandi undir forystu Sjálfstæðisflokksins með kennimarkinu ,,stétt með stétt."

Kratisminn er orðinn að neðanmálsgrein í íslenskum stjórnmálum.

Vilja þróun á velferðartækni

ESB og fall alþjóðahyggjunnar

Alþjóðahyggju var hafnað í Bretlandi og Bandaríkjunum, með Brexit og Trump. Evrópusambandið var helsta verkfæri alþjóðahyggjunnar ásamt Bandaríkjunum - áður en Trump kom til sögunnar.

Alþjóðahyggja stefnir að regluverki og stofnanaveldi sem stýrir samskiptum á milli þjóða. Innifalið er að þjóðríki framselji fullveldið til yfirþjóðlegs valds. Á móti áttu að koma efnahagslegar framfarir alls almennings. Hornsteinninn þar er frjáls viðskipti.

Hugmyndinni óx fylgi eftir tvær heimsstyrjaldir á síðustu öld. Eftir lok kalda stríðsins fyrir aldarfjórðungi varð alþjóðahyggja ráðandi hugmyndafræði Evrópusambandsins og Bandaríkjanna.

Hrun Sovétríkjanna virtist sigur vesturlanda. En annað kom á daginn. Frjáls viðskipti eftir fall Sovétríkjanna gerðu Rússland að gjaldþrota spillingarbæli. Pútín reisti við efnahagskerfi Rússlands um síðustu aldamót en gerði það á kostnað frjálsra viðskipta.  Eftir að Pútín komst til valda í Rússlandi varð hann óvinur vesturlanda, þ.e. Bandaríkjanna og ESB.

Það var þó ekki Pútín sem felldi alþjóðahyggjuna, enda Rússland ekki heimsveldi eins og Sovétríkin voru. Pútín stendur fyrir sérrússneska þjóðernishyggju sem ekki er hugmyndafræðileg útflutningsvara líkt og kommúnisminn var í kalda stríðinu.

Tvær meginástæður eru fyrir falli alþjóðahyggjunnar. Í fyrsta lagi skilaði hún ekki öllum almenningi velmegun. Stórir hópar á vesturlöndum urðu útundan á meðan stórfyrirtæki og sívaxandi sérfræðistétt mökuðu krókinn.

Í öðru lagi strandaði alþjóðahyggjan í miðausturlöndum. Innrás Bandaríkjanna í Írak 2003 var tilraun til að alþjóðavæða þennan heimshluta. Markmiðið var að stofna til þjóðríkis alþjóðahyggjunnar, sem væri hlynnt vestrænni hugmyndafræði um hvernig þjóðríki ættu að haga sér - gefa frá sér fullveldið og njóta ávaxta frjálsra viðskipta. Írak skyldi vera fyrirmyndarríkið í menningarheimi araba og múslíma. En það fór á sama veg og með Rússland eftir fall Sovétríkjanna: upplausn, spilling og átök.

Svokölluð lýðræðisvæðing í Norður-Afríku og arabaríkjum um 2010, arabíska vorið, fór einnig út um þúfur. Menningarheimur múslíma er ekki tilbúinn í vestræna alþjóðahyggju.

Project Syndicate er efnisveita helstu talsmanna alþjóðavæðingar. Efnisveitan tekur saman stöðuna undir fyrirsögninni ,,Problems from hell". Nafngiftin er við hæfi og lýsir stöðu alþjóðahyggjunnar.

Þegar ráðandi hugmyndakerfi verður gjaldþrota er tímabil óvissu og átaka áður en nýtt kerfi festir sig í sessi. Umskiptin taka áratugi og eru ekki friðsöm. Eins og við blasir.

 

Margoft reynt að sameina Evrópu

Trump og guð í samfélaginu

Enginn skilur hvers vegna Trump varð forseti Bandaríkjanna. Margir reyna en allar tilraunir til útskýringa eru drög, ekki svarið sjálft.

Blaðamaður Guardian hitti kristna þeldökka Bandaríkjamenn sem sögðu Trump verkfæri guðs. Í eingyðistrú eru vegir guðs órannsakanlegir.

Fyrir daga eingyðistrúar voru guðirnir í fleirtölu. Niðurstaðan er hin sama: í Menón segir Sókrates guðlegan innblástur skýra leiðtogahæfileika.

Við notum guð til að útskýra atburði sem eru skilningi okkar ofvaxnir.

Trump setur þingmönnum afarkosti