Tvö einkenni fullveldis - orkupakki og ESB-umsókn

Fullveldi glatast í bútum. Á þjóðveldisöld gáfu íslenskir höfðingjar Noregskonungi goðorð sín sem smátt og smátt varð yfirvald í landinu með tilstyrk evrópskrar hugmyndafræði, kaþólsku kirkjunnar. Gamli sáttmáli var endanleg niðurstaða stykkjasölu fullveldisins til útlanda.

Annað einkenni fullveldis er að standi fólk frammi fyrir tveim valkostum, að gefa frá sér fullveldið eða halda því, tekur það ávallt seinni kostinn nema í slíkt óefni sé komið að fólk treysti sér ekki til að vera sjálfráða. Eftir hrun var ,,Ónýta Ísland" óopinbert slagorð Samfylkingar gagngert til að þjóðin glataði sjálfstraustinu og segði sig til sveitar hjá ESB.

Ef orkupakkinn verður samþykktur á alþingi flyst einn þáttur fullveldisins úr landi, þ.e. yfirráðin í raforkumálum. Talsmenn orkupakka nota lævísari áróður en Samfylkingin eftir hrun. Nú heitir það að yfirvofandi sé orkuskortur ef ESB sjái ekki um þessi mál fyrir okkur. Þá er sagt að orkupakkinn sé neytendavernd - eins og Íslendingar séu of miklir sauðir til að neytendaverja sjálfa sig.

Sömu viðhorfin eru að baki ESB-umsókn Samfylkingar 2009 og orkupakkans 2019. Í báðum tilfellum er fullveldið  í húfi. Víglínan var skýrari 2009 enda var barist um fullveldið í heilu lagi. Núna er einn veigamikill þáttur fullveldisins í hættu. Þeir sem vilja þóknast ESB, og samþykkja orkupakkann, leggja sig fram um að gera lítið úr fullveldi þjóðarinnar. Það er sama aðferðin og Samfylkingin notaði þegar ESB-umsóknin var send til Brussel fyrir áratug. Af ávöxtunum þekkist tréð.

Orkupakkinn takmörkun á fullveldi

Sýnir Borgarleikhúsið Aftöku Birgittu?

Upptaka af félagsfundi Pírata þar sem Birgitta Jónsdóttir stofnandi hreyfingarinnar er tekin af lífi hlýtur að verða að sýningu Borgarleikhússins, líkt og fyrri pólitískar upptökur.

Skopleikur eða harmleikur? 

,,Skopleikur er, eins og við höfum sagt, eftirlíking fólks af lakara tagi, en ekki vonds að öllu leyti, heldur er hið spaugilega tegund ljótleika," skrifaði Aristóteles fyrir margt löngu. 

Valið ætti að vera einfalt.

„Ég upplifi ákveðið mannorðsmorð“

Lögmaðurinn og orkupakkinn

Evrópusambandið skrifar pólitíska stefnu í lög, tilskipanir og reglugerðir. Stefna ESB í orkumálum er að samtengja orkukerfi þjóðríkja. Um þetta ætti ekki að þurfa að deila, gögn frá ESB segja þetta svart á hvítu.

Ef Ísland innleiðir 3. orkupakkann verðum við hluti af orkusambandi ESB, í gegnum EES-samninginn. Fyrsta markmið af fimm er að tengja saman orkunet aðildarríkja.

Skúli Magnússon lögfræðingur skrifar grein um orkupakkann sem hann reynir að selja íslenskum almenningi með þeim rökum að öllu sé óhætt; orkupakkinn þýði ekki sæstrengur. Skúli nefnir ekki einu orði hver tilgangur ESB er með orkusambandi. Ef og þegar kæmi til ágreinings milli íslenskra stjórnvalda og ESB um lagningu sæstrengs yrði tilgangur orkusambandsins miðlægur í túlkun. ESB myndi einfaldlega segja: það stendur svart á hvítu að samtenging orkukerfa er höfuðmarkmið orkusambandsins sem þið eruð hluti af. Séríslensk lögskýring Skúla mætti sín lítils.

Besta leiðin til að koma í veg fyrir að ESB nái tangarhaldi á raforkumálum Íslands er að hafna þriðja orkupakkanum. 

Trump, rasismi og vondar hugmyndir

Ef Norðmaður segði Íslendingi að fara heim til sín ef hann væri ekki ánægður með vistina í Noregi yrði það trauðla kallað rasismi. En þegar Trump segir 4 ónefndum þingmönnum, sem gagnrýna Bandaríkin í tíma og ótíma, að drífa sig heim er hann óðara uppnefndur rasisti.

Rasismi er þægilegt slagorð til að nota í pólitísku hanaati. Sá sem fær stimpilinn á sig er sjálfkrafa vondur maður.

Góða fólkið slengir fram rasista-ásökun þegar það kemst í rökþrot í vörn fyrir vondar hugmyndir, eins og opin landamæri. Lýðræði og siðferði þurfa landamæri. Þeir sem ekki finna sig í siðagildum samfélaga ættu að ,,fara heim" - ekkert rasískt við það.  

Ummælin „algjörlega óviðunandi“

Gulli og gildra hugsjónafólks

Hugsjónir geta verið fallegar og bætt mannlíf. Samspil hugsjóna og samfélags eru snúið mál sem ekki er á meðfæri allra. Innrás Bandaríkjanna í Írak 2003 var í nafni hugsjóna um vestrænt lýðræði og mannréttindi andspænis harðstjórn.

Ályktun Gulla utanríkis um mannréttindi á Filippseyjum, sem samþykkt var á vettvangi Sameinuðu þjóðanna, er ekki hernaðaraðgerð en engu að síður innrás í innanríkismál fullvalda ríkis.

Ef Gulli eða Sameinuðu þjóðirnar ættu uppskrift að fyrirmyndarríki þar sem flest væri ágætt en fátt miður væri hægt að tefla sniðmátinu fram og bera saman við þjóðríki jarðkringlunnar. En fyrirmyndarríkið er ekki til. Reynsla og raunsæi segja okkur að þegar hugsjónafólk fær tækifæri til að smíða fyrirmyndarríki endar það í hörmungum.

Hugsjónir, sum sé, þurfa nálægð við samfélagslegan veruleika. Þegar þær koma eins og skrattinn úr sauðaleggnum eru þær meira til tjóns en gagns.

Það grátbroslega í þessu máli er að Gulli utanríkis er alls enginn hugsjónamaður. Hann er tækifærissinni sem notar hugsjónir þegar hentar en stingur þeim ofan í skúffu þess á milli. 

Filippseyjar slíti tengslin við Ísland

Þórdís dansar með Helga; XD og Viðreisn í 3op-rómantík

Þórdís varaformaður Sjálfstæðisflokksins fær drottningarviðtal í Fréttablaðinu, sem Helgi Magnússon fjárhagslegur bakhjarl Viðreisnar keypti hlut í nýverið. Fyrirsögnin á viðtalinu, Fleiri smáflokkar eru ekki svarið, er koddahjal forystu Sjálfstæðisflokksins við helstu samherja sína í orkupakkamálinu, Viðreisn.

Fyrr á árinu mærði Þorgerður Katrín formaður Viðreisnar Guðlaug Þór utanríkisráðherra fyrir að tengja Ísland ESB nánari böndum með því að færa orkumál þjóðarinnar undir Brussel-valdið.

Með orkupakka þrjú opnast tækifæri fyrir fjárfesta eins og Helga að kaupa upp orkumannvirki þjóðarinnar. Brussel tryggir að neytendur muni borga stórhækkað raforkuverð, eins og rekið er í pistli á heimasíðu Ögmundar Jónassonar.

Viðreisn er klofningshópur ESB-sinna í Sjálfstæðisflokknum. Nú þegar forysta Sjálfstæðisflokksins er orðin jafn ESB-sinnuð og orkumálin sýna svart á hvítu er óþarfi að reka tvo flokka í sama tilgangi.

Helgi fjárfestir er sér hagkvæmni í að sameina flokkana tvo og býður þeim málgagn, Fréttablaðið. Opin spurning er aftur hvort almennir sjálfstæðismenn og kjósendur flokksins séu ginnkeyptir yfirtöku ESB-sinna.

Þingmenn XD viðurkenna mistök í orkupakkamáli

,,Yfirráð yfir orkunni eru okkur heilög," skrifar Haraldur Benediktsson þingmaður Sjálfstæðisflokksins í Morgunblaðsgrein 7. júlí. Haraldur varar við því að ,,framselja yfirráð og eignarhald á orkuauðlindum landsins." Aðrir þingmenn Sjálfstæðisflokksins, t.d. Óli Björn Kárason, taka undir með Haraldi.

Játning á mistökum er manndómsmerki ef - og það er stórt EF - menn sýna vilja til að bæta úr mistökunum.

3. orkupakki ESB færir yfirráð yfir orkumálum Íslands til Brussel. Texti ESB segir það skýrt: 24. desember 2018 tóku gildi reglur um yfirumsjón framkvæmdastjórnar ESB á áætlanagerð aðildarþjóða orkusambands ESB. Norðmenn, sem selja ESB olíu og gas, eru með yfirþjóðalegt vald ESB á hreinu. Aðild að orkusambandi ESB í gegnum EES-samninginn setur Ísland í sömu stöðu og aðrar ESB-þjóðir í orkumálum - völdin eru flutt til Brussel.  

Haraldur og aðrir þingmenn Sjálfstæðisflokksins sem viðurkenna nú mistökin í orkupakkamálinu geta bætt fyrir þau og gefið yfirlýsingu um að þeir ætli ekki að samþykkja 3. orkupakkann þegar hann kemur til umræðu á ný eftir sumarhlé alþingis.

Elliði Vignisson bendir réttilega á að umræður eigi að ,,leiðrétta kúrsinn". Umræðan hefur farið fram, þingmenn hafa játað mistök og nú er að leiðrétta þau - með því að hafna 3. orkupakkanum.

Tækifæri til að „leiðrétta kúrsinn“

Óafturkræf heimska um manngert veður

Vísindamaðurinn John Christy er af gamla skólanum. Tilgátur eru settar fram og þær prófaðar með mælanlegum veruleika. Ef tilgátan stóðst ekki prófið var henni hafnað. John Christy og félagar tóku spálíkön IPCC (háborg þeirra sem trúa á manngert veður) og báru saman við raunmælingar á hitastigi jarðar.

Niðurstaða Christy og félaga er að spálíkön IPCC spáðu þrisvar sinnum meiri hlýnun en raunmælingar sýndu. Spárnar gáfu sér einfaldlega ranga forsendu, að brennsla mannsins á jarðefnaeldsneyti ylli hækkun hitastigs á jörðinni. Þegar rusl er sett inn í reiknilíkan kemur rusl út.

Munu þeir sem trúa á manngert veður þakka Christy og félögum og biðja okkur hin afsökunar að boða í áratugi heimsendi vegna manngerðs veðurfars? Nei, þeir uppnefna vísindamenn eins og Christy ,,afneitara" og halda áfram ljúga að almenningi að veðurfar sé manngert. Börn og unglingar eru síðustu fórnarlömbin.

Þeir sem halda fram kennisetningunni um manngert veður valda óafturkræfum skaða á tiltrú fólks á vísindum. Vísindi verða sett í flokk með hindurvitnum og bábiljum fyrri tíðar.

Bráðnun suðurskauts að verða óafturkræf

Gulli skilur ekki utanríkismál

Þjóðríki sem vill gera sig gildandi á alþjóðavettvangi þarf að eiga tvennt, herafla og peninga. Bandaríkin eru stórveldi enda eiga þau hvorutveggja. Noregur á peninga og skipti máli um tíma í deilum múslíma og Ísrael fyrir botni Miðjarðarhafs.

Gulli utanríkis skilur ekki málaflokkinn sem hann fer með í nafni íslenska lýðveldisins þegar hann telur Ísland skipta máli í óöld á Filippseyjum þar sem eiturlyf eru aflvakinn. Utanríkismál fara illa með dómgreind stjórnmálamanna. Ingibjörg Sólrún ætlaði Íslandi sæti í öryggisráði Sameinuðu þjóðanna. Það endaði í tárum.

Ísland á hvorki her né peninga til að þumlunga heimsmálum hingað eða þangað. Þjóðríki eiga sér ekki hugsjónir, aðeins hagsmuni. Íslenskir hagsmunir eru að fullvalda þjóðin búi í lýðfrjálsu landi. Gulli utanríkis þarf að skilja á milli eiturlyfjastríðs í Asíu og krafna ESB um ítök í orkumálum Íslands. Að reyna að hafa áhrif á annað er tilgangslaust föndur en hitt er alvörumál sem (enn) er í íslenskum höndum.

Ef Gulli vill breyta heiminum ætti hann að fara að fordæmi Sollu forvera og ráða sig í þjónustu erlendra ríkjasamtaka. Hann er liðtækur þar, eins og dæmin sanna.

„Við munum ekkert hvika“

ESB eyðileggur samheldni þjóða

Bretar standa ekki saman í Evrópumálum líkt og þeir gerðu í Napoleónsstríðum á 19. öld og í þýsk-evrópsku stríðunum tveim á síðustu öld. Elítan í Bretlandi gekk ESB á hönd að stórum hluta og berst fyrir hagsmunum sambandsins þrátt fyrir niðurstöðu þjóðaratkvæðagreiðslunnar 2016 þar sem Bretar kusu að yfirgefa ESB.

Vinnulag ESB er að eyðileggja samheldni þjóða með því að kljúfa þær í andstæðar fylkingar. Aðferðina notuðu Rómverjar á sínum tíma með árangri og kallast hún að deila og drottna.

Evrópuþjóðir á nýlendutímanum hygluðu völdum ættbálkum meðal Afríkuþjóða til að stjórna almenningi. Sárin frá nýlendutímanum eru ekki enn gróin í Afríku.

Bretar, líkt og í fyrra og seinna stríði, treysta á Bandaríkin að leysa sig úr viðjum Meginlands-Evrópu. Væntanlegur forsætisráðherra Bretlands, Boris Johnson, mun biðja Trump forseta ásjár vegna Brexit.

Íslensk augu, sem lesa niðurlægingu Breta, hljóta að horfa með hryllingi til þess að ESB er um það bil að gera Ísland að orkunýlendu. Elítan í Sjálfstæðisflokknum gekk fyrir ESB-björg og reynir að telja þjóðinni trú um að sjálfstæði sé ósjálfstæði. Hvorki Boris né Farage er að finna í Sjálfstæðisflokknum. Leiguþýin eru sviplaus eins og embættismennirnir í Brussel. Við eigum þó leiðtoga sem áður hefur bjargað þjóðinn úr ógöngum. Sá fer fyrir Miðflokknum.

Styðja flokkinn fari Bretland úr ESB