Lögreglan leitar transhatara, finnur sálfræðing

Arnar Sverrisson sálfræðingur skrifaði grein í Vísi fyrir tveim árum um kynröskun stúlkna og sagði m.a.

Fram að þessu hafa drengir og karlar aðallega þjáðst af kynröskun – jafnvel sex til níu sinnum oftar. En nú virðist hafa brotist út faraldur meðal unglingsstúlkna – jafnvel snemma á gelgjuskeiði - sem eru ónógar sjálfum sér, angistarfullar og daprar í bragði. Faraldurinn er í eðli sínu svipaður öðrum sálsýkisfaraldri, t.d. sjálfsmeiðingum og lystarstoli. Þróunin er uggvænleg.

Arnar skrifar yfirvegaðan texta og vísar í heimildir. Hann vekur máls á lýðheilsuvanda. Hægt er að vera sammála eða ósammála. Kynna sér efnið og hafa skoðun. Eða leiða málið hjá sér. En hvað gerist?

Jú, Fréttin segir frá því að Arnar sé boðaður í skýrslutöku hjá lögreglu fyrir hatursorðræðu gegn transfólki. Einhver móðgast og kærir hatur. Einhver þolir ekki umræðu og sigar lögreglunni á mann með skoðun.

Frumrannsókn sýndi engan glæp og málinu var vísað frá. En þá kom pólitíkin til skjalanna. Lögreglunni var skipað að endurvekja málið; það vantar að fylla upp í ákærukvótann fyrir hatursorðræðu.

Pólitískur rétttrúnaður er kominn á það stig að skotleyfi er á menn með rangar skoðanir. Búið er að ákveða fyrirfram að hatur sé þarna úti í samfélaginu. Finna þarf blóraböggul til að rannsaka og ákæra. Sálfræðingur vekur athygli á lýðheilsuvanda og er boðaður í yfirheyrslu lögreglunnar. Rétttrúnaðurinn þarf sinn bikar af blóði.

Menningarmarxismi, eins og efnishyggjuútgáfan, þarf sitt KGB. Sovét-Ísland 2022.

Finnland og Níkaragva, Bandaríkin og Rússland

Finnland ætlar að ganga í Nató ásamt Svíþjóð. Vestræn afstaða er að fullvalda ríki eigi rétt að ganga í hernaðarbandalag og vista í sínu landi erlenda heri, kjarnorkuvopn ef því er að skipta.

Daníel Ortega forseti Níkaragva tekur fagnandi vestrænum boðskap og rétt fullvalda ríkja. Samkvæmt Washington Post býður Ortega Rússum að senda til sín herlið og vopn.

Síðast þegar þjóðríki í Suður-Ameríku bauð til sín rússnesku herliði lá við kjarnorkustyrjöld. Í sögubókum heitir atvikið Kúbúdeilan og er sextug í ár.

Bandaríkin telja Suður-Ameríku bakgarð sinn og leyfa engu erlendu stórveldi afskipti þar um slóðir. Stefnan er kölluð Monroe-yfirlýsingin og er 200 ára gömul.

Ef Suður-Ameríka er bakgarður Bandaríkjanna er Finnland kálgarður Rússa. Og verður nú spurningin sérlega athyglisverð um rétt fullvalda ríkja til að velja sér hernaðarbandalag.

Finnar ganga ekki í NATO án Svía

Biden: Selenskí tapaði Úkraínustríðinu

Vesturlönd vita að Úkraína tapar stríðinu við Rússa. Biden Bandaríkjaforseti leggur grunn að frásögninni að tapið sé Selenskí forseta Úkraínu að kenna.

Selenskí er í raun leiksoppur tveggja aðila, vesturlanda annars vegar og hins vegar úkraínskra olígarka. Hann lék forseta í sápuóperu. Þótt leika af innlifun og var gerður að forseta. 

Eftir innrás Rússa 24. febrúar varð Selenskí alþjóðleg stórstjarna. Hann var á beinu streymi á ráðstefnum og þjóðþingum um víða veröld, einnig á alþingi Íslendinga. Þetta var á fyrstu vikum stríðsins þegar Úkraína átti að sigra Rússa með vestrænum vopnum. Selenskí var Davíð sem sigraði pútínískan Golíat.

Stöðugar fréttir vestrænna fjölmiðla um stórsigra Úkraínuhers á innrásarliðinu, ásamt breiðsíðum um fjöldamorð Pútínhersins á saklausum borgurum sannfærðu marga um að réttlátur Davíð hefði betur gegn ranglátum Pútín.

Leiktjöldin voru trúverðug en á bakvið þau var Úkraínuher á undanhaldi. Rússar sóttu fram og lögðu undir sig lönd. Vesturlönd áttuðu sig á ekki síðar en í apríl að Úkraína myndi tapa stríðinu. Það þurfti að hanna frásögn til að útskýra fyrir alþjóð niðurlæginguna. Finna blóraböggul. 

Drög að nýju handriti eru að Selenskí sé ekki Davíð gegn Golíat heldur breysk hetja, er glímir við veruleikafirringu. Á næstum dögum fáum við fréttir um að Selenskí beri ábyrgð á slæmri herstjórn og gífurlegu mannfalli. 

Samhliða nýrri frásögn lætur vestrið eins og það vilji bjarga Úkraínu. Úrsúla von der Leyen forseti framkvæmdastjórnar heimsótti Kænugarð. Úkraínuforseti sagði að á sléttum Garðaríkis réðist framtíð hins vestræna heims. Úrsúla klappaði forsetanum á bakið og sagði Úkraínu bráðum í ESB. En Úkraína fer aldrei inn í ESB án þess að hafa viðurkennd landamæri. Stórir hlutar landsins eru undir hernámi Rússa.

Fréttir herma að forseti Frakklands, forsætisráðherra Ítalíu og kanslari Þýskalands heimsæki Kænugarð innan skamms. Stórfrétt, ef satt reynist. Mögulega ætlar þríeykið að bjóða Selenskí afarkosti. Að hann semji strax við Rússa, gefi frá sér það land sem þarf til að kaupa frið. Eða að vestrið yfirgefi Úkraínu og kenni Selenskí um að tapa stríðinu.

Vesturlönd hafa ekki lengur efni á stríðinu í Garðaríki. Efnahagskerfi þeirra eru í uppnámi, hrávöruskortur vegna viðskiptaþvingana gerir illt verra.  

Segir Selenskí hafa hundsað viðvaranir

Elko, N1, Krónan og skilaboð eigenda

Eggert Þór Kristófersson forstjóra Festar, sem á Elko, N1 og Krónuna, var rekinn fyrir að hlusta á unga konu, Vítalíu Lazarevu, sem sagði farir sínar ekki sléttar í samskiptum við Þórð Má Jóhannesson stjórnarformann Festar. Eggert Þór hefur að öllum líndum kynnt stjórn Festar sjónarmið sem ekki sýndu sparihliðina á Þórði Má stjórnarformanni.

Vítalía lagði fram kæru vegna framkomu Þórðar Más og tveggja annarra frammámanna í viðskiptalífinu, Ara Edwald og Hreggvið Jónsson. Þórður Már sagði af sér stjórnarformennsku í kjölfar ásakana ungu konunnar. Hinir tveir fóru sömu leið, undir þrýstingi eigenda og almenningsálits. 

Þótt kurlin séu ekki öll komin til grafar um samskipti Vitalíu og þremenningana virðist augljóst að þau uppfylltu ekki eðlileg viðmið í siðuðu samfélagi.

Mótsagnakenndar yfirlýsingar eigenda Festar um ástæður uppsagnar Eggerts eru ótrúverðugar. Engar líkur eru að fimm manna stjórn Festar hafi nokkrum vikum eftir skyndilegt brotthvarf stjórnarformanns komist að málefnalegri niðurstöðu um að félagið þyrfti nýjan forstjóra. Annað býr að baki. Nærtækasta skýringin er að Þórður Már sé skuggastjórnandi Festar og ráði ferðinni á bakvið tjöldin.

Vitalía segir að Eggert hafi reynst sér vel. Það er líklegasta skýringin á óvæntri uppsögn forstjórans. Hefnd fyrir að taka ekki þátt í yfirhylmingu.

Festi er almenningshlutafélag og lífeyrissjóðir eiga þar stóran hlut. Þórður Már er hluthafi og fékk stuðning annarra hluthafa til stjórnarformennsku. Hann brást trausti, sýndi af sér framkomu sem er óboðleg stjórnarformanni almenningshlutafélags. 

Í stað þess að vinna í sínum málum og bíða niðurstöðu kærunnar gengur Þórður fram undir formerkjunum ,,ég á þetta, ég má þetta."

Þetta 2007-viðhorf auðmanna á ekki að líðast. Rík skylda hvílir á meðeigendum Þórðar Más, ekki síst lífeyrissjóðum, að skera upp herör gegn ósómanum.

Gangi það fram að skuggastjórnandi með stórskaðað orðspor komist upp með að reka þá sem ekki hylma yfir siðleysið, að ekki sé talað um meint afbrot, eru kolröng skilaboð send til atvinnulífsins og út í samfélagið.

Stjórn Festi staðfestir brottrekstur Eggerts

Reynir Trausta, fréttaslúður og RSK-miðlar

Fréttir eru eitt en slúður annað. Fréttir byggja á heimildum en slúður orðasveimur, undir hælinn lagt hvort flugufótur sé fyrir eða hreinn skáldskapur. Reynir Traustason vinnur með fréttaslúður, gerir ekki greinarmun á því sem er og ímyndun.

Reynir á að baki langa sögu í fréttaslúðri. Fyrir 19 árum skrifaði hann alræmda frétt um að Davíð Oddsson hafi sigað lögreglunni á Baug. Sigurgeir B. Kristgeirsson framkvæmastjóri Vinnslustöðvarinnar skrifar grein þar sem rekur nýleg afrek Reynis í fréttaslúðri.

Til að fréttaslúðrið nái flugi, fái útbreiðslu, þarf að koma því sem víðast á framfæri. Ásamt Mannlífi rekur Reynir Kvennablaðið þar sem hann endurbirtir valið slúður. Lesendur halda að um tvo sjálfstæða miðla sé að ræða, þannig fær slúðrið trúverðugleika. Þá skipta vina- og fjölskyldutengsl máli. Það eru til fjölmiðlafjölskyldur, eins og Sigurgeir vekur athygli á. 

RúV, Stundin og Kjarninn, RSK-miðlar, stunda skipulega sama leikinn og Reynir. Einn ríður á vaðið með fréttaslúður og hinir fylgja í humátt á eftir með sinn vinkil á sama efni. Fjölskyldu- og vinatengsl ákveða hvaða slúðri skuli gert hátt undir höfði. 

Þegar mikið liggur við eru tveir miðlar látnir birta samtímis fréttaslúðrið. Aðalsteinn Kjartansson á Stundinni og Þórður Snær á Kjarnanum störfuðu eftir nákvæmri tímaáætlun við undirbúning umfjöllunar um ,,skæruliðadeild" Samherja. Þeir t.a.m. hringdu í Pál skipstjóra með tíu mínútna millibili daginn fyrir birtingu.

Hvorki Reynir né RSK-miðlar láta sig nokkru varða almannahagsmuni, sem eru að fá fréttir byggðar á heimildum. Það eru ýmist hagsmunir auðmanna, pólitískir hagsmunir eða persónulegir dyntir sem ráða ferðinni. Tök RSK-miðla á blaðamannastéttinni eru slík að þeir fá verðlaun fyrir fréttaslúður sem fengið er með glæpum.

Samræmdar aðgerðir fjölmiðla gera slúður að sannleika. 

 

Reynir braut siðareglur með umfjöllun um Róbert

Helgi Seljan namibískur blaðamaður

Dagblaðið Namibian, gefið út í samnefndu landi, er komið með íslenska blaðamenn í sína þjónustu, þá Helga Seljan og Inga Frey Vilhjálmsson.

Helgi og Ingi Freyr eru blaðamenn á Stundinni. En þeir eru jafnframt skráðir fyrir frétt i Namibian um ... haldið ykkur ... Namibíumálið.

Málið verður enn kostulegra þegar fréttin er lesin. Helsta heimildin fyrir fréttinni í Namibian er ... haldið ykkur ... Stundin.

Nú vantar bara að hinir tveir hlutar RSK-miðla, RÚV og Kjarninn, birti fréttir sem byrja svona: ,,samkvæmt namibísku dagblaði...".

Endurnýting frétta verður vart skilvirkari.

Fréttin í Namibían gætir þess vandlega að nefna ekki höfuðpaurinn í málinu og stjörnuvitni, Jóhannes Stefánsson sem neitar að mæta í yfirheyrslu í Namibíu - líkt og fjórmenningar á RSK-miðlum á Íslandi.

Hvernig væri nú, fyrst blaðamenn eru sjálfir aðalheimildir frétta, að Helgi Seljan tæki viðtal við Þóru á RÚV og Þórð Snæ á Kjarnanum um stöðu þeirra sem sakborninga í sakamáli þar sem byrlun og gagnastuldur koma við sögu? 

 

Fundað með namibískum rannsakendum

Helgi S. og RÚV taka Namibíusnúning

Helgi Seljan, sem hraktist af RÚV vegna rannsóknar lögreglu á byrlun og stuldi, freistar þess að blása lífi í Namibíumálið svokallaða með frétt á Stundinni. Félagarnir á RÚV endurbirta. 

Namibíumálið gengur út á ásakanir eins manns, Jóhannesar Stefánssonar, um að Samherji hafi stundað stórfelldar mútugreiðslur og framið önnur afbrot á meðan útgerðin stundaði veiðar þar syðra. Jóhannes var Samherji í Namibíu, æðstráðandi til sjós og lands í útgerðinni þar.

Snúningur Helga og RÚV að þessu sinni er að láta að því liggja að íslensk stjórnvöld komi í veg fyrir að réttað verði yfir þremur íslenskum mönnum í Namibíu.

En það er einfaldlega ekki rétt.

Aðalástæðan fyrir því að saksóknari í Namibíu kemst hvorki lönd né strönd er að stjörnuvitnið, Jóhannes Stefánsson, harðneitar að mæta í skýrslutöku hjá lögreglunni í Namibíu og í framhaldi koma fyrir dómstóla.

Færi Jóhannes til Namibíu yrði sennilega aðeins einn Íslendingar ákærður fyrir misferli og glæpi.

Það lá fyrir í október sl. að engir Samherjamenn yrðu ákærðir í Namibíu. Meint gögn i málinu eru öll því marki brennd að hafa farið um hendur Jóhannesar Stefánssonar. Hann er ekki trúverðug heimild, frómt frá sagt.

Hvorki Helgi né RÚV vekja athygli á að málið stendur og fellur með Jóhannesi. Í lok fréttar RÚV kemur neyðarleg játning:

Dómsmálaráðuneyti Namibíu hefur að sama skapi ekki enn sent formlega beiðni til Íslands um framsal mannanna.

,,Mennirnir" sem vísað er til eru þrír starfsmenn Samherja. Ástæðan fyrir því að dómsmálaráðuneyti Namibíu fer ekki fram á framsal þeirra er að namibískur dómstóll telur engar forsendur fyrir ákæru.

Og hvers vegna er það?

Jú, ástæðan er að Jóhannes Stefánsson neitar að fara til Namibíu.

Síðasti Namibíusnúningur Helga Seljan og RÚV er eins og þeir fyrri: bara reykur. Það er enginn eldur. En þess meira af lygum og þvættingi sem dómgreindar- og samviskulausir RSK-miðlar lepja upp. 

Í stað þess að taka enn einn snúninginn á Namibíumálinu ættu Helgi og RÚV að segja fréttir af sakamálarannsókn á Íslandi. Almenningi þyrstir í fréttir af fjórum sakborningum sem eiga aðild að byrlun og gagnastuldi. Fjórmenningarnir eru blaðamenn á RSK-miðlum. En það ríkir dauðaþögn um fréttamál sem á brýnt erindi við alþjóð.

Ég er ópólitískur, kýs Framsókn

Fyrir skemmstu var óhugsandi að framsóknarmaður yrði borgarstjóri. Flokkurinn var í útrýmingarhættu á höfuðborgarsvæðinu. En nú verður frammari borgarstjóri, að vísu eftir tvö ár.

Einu sinni var Sjálfstæðisflokkurinn í þeirri stöðu að ópólitískir kusu flokkinn. Framsókn er óðum að nálgast það þægilega fylgispólitíska umhverfi. Þingkosningar, kosningar til sveitarstjóra og kannanir segja þá sögu. Framsókn er við 17 prósent fylgi. XD hefur enn 3-5 prósentustiga forskot sem fer minnkandi.

Framsókn er ekki hugmyndaflokkur, var það síðast á dögum Jónasar frá Hriflu fyrir miðja síðustu öld. (Valdatíð Sigmundar Davíðs undantekning). Flokkurinn er samkvæmt hefð tilbúinn að vinna til hægri og vinstri. Ópólitíska miðjan.

,,Er ekki best að kjósa Framsókn?" er risminna en ,,stétt með stétt". En við lifum ekki rismikla tíma. Velmegun og óánægja haldast í hendur. Almenningur er feitur þjónn í leit að þægilegum húsbónda.  

Sjálfstæðisflokkurinn hefur ekki fundið fjölina sína frá hruni. Víst er hann enn stærstur flokka, en nú má ekki miklu muna. Framsókn nartar í hælana.

Sjálfstæðisflokkurinn var síðast hugmyndaflokkur þegar Davíð Oddsson var í forsvari. Hægriflokkur með víða skírskotun. Á seinni árum eru tilburðir flokksins að koma til móts við andstæðinga sína og apa eftir frjálslyndri vinstritísku. Ekki hefur dregið úr þeirri viðleitni í ríkisstjórnarsamstarfi með Vinstri grænum.

Á þeim tíma þegar ópólitískir kusu Sjálfstæðisflokkinn mátti ganga að vísri borgaralegri hugmyndafræði, bæði í efnahagsmálum og menningu. Í dag er allt heldur ógreinilegra.

Flokknum til afsökunar voru skýrari línur á milli hægri og vinstri um aldamótin, að ekki sé talað um tímabilið kennt við kalda stríðið. Evrópskir hægriflokkar eru ekki í mikið betri stöðu. Breski Íhaldsflokkurinn, til dæmis, tók upp Grétufræði í loftslagsmálum til að þóknast vinstritísku. Hugsunin virðist vera að betra sé að veifa röngu tré en öngvu.

Framsókn iðkar hagnýt stjórnmál, stendur á gömlum merg, elstur starfandi flokka. Kjósendur telja sig ekki taka áhættu að greiða Framsókn atkvæði sitt.

Aukið vægi Framsóknar má túlka þannig að í hugmyndabaráttunni sé runninn upp úrvinnslutími. Hvað virkar? er spurt. Kannski virkar Framsókn. Kannski ekki.  

 

Dagur og Einar skipta með sér borgarstjórastólnum

Rússneskt jafntefli

Efnahagslegur stormur er i aðsigi, segir Jamie Dimon forstjóri JP Morgan. Stormurinn er þríþættur: óhófleg peningaprentun frá 2008, verðbólga/vaxtahækkun/lánsfjárþurrð - og Úkraínustríðið.

Sameiginlegt þáttunum þremur er að engin söguleg fordæmi eru fyrir þeim. Á tæknimáli heitir peningaprentun QE. Andstæðan, QT, sem Dimon segir blasa við, er peningalegt aðhald, minna fjármagn í umferð. Stórstríð í Evrópu er fordæmalaust frá lokum seinni heimsstyrjaldar.

Vesturlönd eru háðari skilvirkum fjármálamörkuðum en aðrir heimshlutar. Stríðið í Úkraínu eykur verðbólguþrýsting, einkum á hrávöru eins og olíu og korni, og gerir illt verra efnahagslega. Að ekki sé talað um mannlegar hörmungar og hættu á stigmögnun, jafnvel upp í kjarnorkustríð. Samstaða er um að sumarið skilji á milli feigs og ófeigs. Í haust er um seinan að redda sér fyrir horn.

Úkraínustríðið er óvissuþáttur sem hægt er að ná tökum á með tiltölulega skömmum fyrirvara. Hinir tveir þættirnir eru óáþreifanlegri en ekki mannskæðir. Hætta á stigmögnun er bundin við félagslega og pólitíska ókyrrð - en ekki manndráp í stórum stíl.

Þrenn úrslit eru hugsanleg í Úkraínustríðinu. Jafntefli með friðarsamningum, úkraínskur sigur og rússneskur sigur. Á skrifandi stundu er rússneskur sigur líklegastur.

Sigur Rússa þýðir vestræn niðurlæging. Rússar hefðu öll ráð Evrópu í hendi sér. Sigursælasti herinn væri þeirra og í kaupbæti sitja Rússar á gasi, olíu og korni sem Evrópu sárvantar. Ekki svo að skilja að Rússar séu líklegir að ásælast aukna landvinninga eftir Úkraínu. En þeir munu ekki leggja sig fram um að bjarga Vestur-Evrópu frá efnahagskreppu og fyrirsjáanlegum félagslegum og pólitískum óstöðugleika.

Óstaðfestar fréttir á jaðarmiðlum segja að í stórum Evrópuríkjum s.s. Frakklandi, Ítalíu, Þýskalandi og Bretlandi séu valkostir við rússneskan sigur ítarlega greindir og metnir. Úkraínskur sigur er nær óhugsandi. Útfærsla á jafntefli er eini raunhæfi möguleikinn.

Í fáum orðum: Vestur-Evrópa, með samþykki Bandaríkjanna, skipar stjórninni í Kænugarði að semja við Rússa og láta af hendi það land sem þarf til að kaupa frið. Selenskí forseti og stjórn hans er fjármögnuð af vesturlöndum. Kænugarður verður að hlýða ákveði Vestur-Evrópa að komið sé nóg af stríðsbrölti. Einu rökin sem ráðandi öfl í vestrinu myndu hlusta á eru sigrar Úkraínuhers á vígvellinum. Þar er fátt um fína drætti upp á síðkastið.

Það mætti kalla slíka friðarsamningana jafntefli. Rússneskt jafntefli.

 

„Ekki niðurlægja Rússland“

Fúkyrði, sjálfsálit og sannfæring

Þjóðmálaumræðan einkennist af æsingi, upphrópunum og fúkyrða­flaumi, skrifar Kolbrún Bergþórsdóttir í Fréttablaðið.

Peter Hitchens, sem einu sinni var vinstrimaður, segir ástæðuna fyrir heift vinstrimanna þá að þeir séu sannfærðir um eigið ágæti annars vegar og hins vegar réttmæti málstaðarins.

Vinstristefna, hvort heldur kratismi eða sósíalismi, taldi sig kunna uppskriftina að framtíðinni. Þaðan kemur sannfæringin, að vita hvernig heimurinn á að vera. Ef uppskriftinni verður ekki fylgt, segja vinstrimenn, blasir við heimsendir. Ragnarök kapítalismans hét það fyrrum. Þegar sá heimsendir lét bíða á eftir sér fundu vinstrimenn nýja ógn, manngert veðurfar.

Vinstrimenn eru löngum flinkir í orðræðunni. Þeir setja saman tákn og texta með boðskapnum. Lítið dæmi er nýtt meint listaverk í fjörukantinum vestur í bæ, skammt frá JL-húsinu. í texta með verkinu er fjasað um súrnun sjávar. Dómsdagur er í nánd. Grétufræði gerð listræn. Á kostnað skattborgaranna, auðvitað.

Vinstrimenn eru gjarnan sérfræðingar á sviðum þar sem þekking er af skornum skammt. Þróun efnahagskerfa þóttust þeir sjá fyrir á 19. öld og á 21. öld hvernig veðrið verður eftir 50 ár. Samt þora ekki einu sinni veðurfræðingar að spá veðri nema nokkra daga fram í tímann. Litla þekkingu bæta vinstrimenn upp með sjálfsáliti og sannfæringu. Sé þeim andmælt er stutt í fúkyrðaflauminn.

Eins og dæmin sýna.