Árás sem forvörn: Kim spilar upp í hendurnar á Trump

Yfirvofandi stríð við Norður-Kóreu þjónar hagsmunum Trump Bandaríkjaforseta ágætlega. Forsetinn fær á sig kastljós sem leiðtogi lýðræðisríkja gegn hráu valdaskaki kommúnista.

Haldi Kim Jong-un leiðtogi Norður-Kóreu áfram að hrella nágranna sína með eldflaugaskotum og tilraunum með kjarnorkusprengjur kemur að því að árás á Norður-Kóreu verði nauðsynleg forvörn.

Norður-Kórea getur ekki hótað slíkri árás enda vitað fyrirfram að landið tapar stríðinu, hefjist það á annað borð.

Bandaríkin og nágrannar Norður-Kóreu hafa lengi búið við Kim Jong-un og félaga og geta eflaust lengi enn þreytt þorra og góu. Óvíst er með úthald Norður-Kóreu þegar harkalegri viðskiptaþvinganir taka að bíta.

Komi til stríðs á Kóreuskaga þurfa Bandaríkin ekki að hafa áhyggjur af langvinnum átökum í eftirleiknum. Auk Bandaríkjanna og Norður-Kóreu eru þrír aðilar sem eiga beinan hlut að átökunum, allt nágrannar: Rússland, Kína og Suður-Kórea.

Ef og þegar þolinmæðina þrýtur verða nánast tilbúnir samningar um hvað eigi að gera við hræið af kommúnistaríkinu.

En, vel að merkja, stríð á Kóreuskaga myndi kosta ógrynni mannslífa. Vonandi vinnur þolinmæðin þrautir allar, Kim haldi aftur af sér og að gikkfingur Trump sé ekki snöggur.

Fáir góðir möguleikar í stöðunni

Athugasemdir

[Jón Þórhallsson, 4.9.2017 kl. 10:47]

Allt kastljós heimsins á að beinast að framkv.stj.SAMEINUÐUÞJÓÐANNA.

Það er hann sem að þiggur full laun fyrir að vera í hlutverki "bangsa-pabbans í Hálsaskóginum".

Það er hans hlutverk að höggva á allskyns óvissuhnúta þessu tengdu og

hugsa allt í lausnum.

[Einar Sveinn Hálfdánarson, 4.9.2017 kl. 14:28]

Það er þetta með mannslífin. Þau eru ekki hátt metin í Norður Kóreu.

Sagt er að Kínverjar hafi kvartað við Sovétmenn í Kóreustríðinu yfir litlum stuðnigi. Þá svaraði Stalín Mao, að sagt er, með þeim rökum að Sovétríkin hefðu allt of miklu að tapa á beinum afskiptum; Kínverjar hin vegar engu - nema mannslífum.