Árni Páll kveður stjórnmálin

Árni Páll Árnason er of ungur til að vera fyrrverandi formaður í nýjum flokki vinstrimanna sem verður settur saman úr rústum Samfylkingar og Vg undir formennsku Katrínar Jakobsdóttur. Með haustinu rennur upp fyrir Árna Páli að hans kraftar nýtast ekki lengur.

Í Samfylkingunni er stöðug umræða um að losna við Árna Pál. Fréttablaðið dró tjöldin frá með frétt í gær og DV fylgir í kjölfarið. Skoðanakönnun sem sýnir fylgi Samfylkingar 11,4% undirstrikar að Árni Páll er svo víðs fjarri að ná vopnum sínum að fáum dettur í hug að formaðurinn sé á vetur setjandi.

Samfylkingin endurnýjaðist ekki við síðustu kosningar og enginn innanbúðar er líklegur að taka við keflinu. Málefnastaða Samfylkingar er líka með þeim hætti að flokkurinn er ónýtt vörumerki á pólitískum markaði.

Frá því fyrir hrun er Samfylkingin búin að boða ESB-aðild sem lausn á öllum vanda Íslands. Evrópusambandið er fast í kviksyndi atvinnuleysis og samdráttar og glímir við uppdráttarsýki sem kennd er við Grexit og Brexit. Engin stjórnmálahreyfing með fullu viti gerir ESB-aðild að baráttumáli. Samfylkingin getur ekki slitið sig frá ESB-málinu enda flokkurinn ekki búinn að tala um annað í þrjú kjörtímabil.

Næsti vetur er liðssafnaður fyrir kosningaveturinn 2016/2017. Þeir vinstrimenn sem enn kunna pólitík vita að síðasti sjens til að stilla upp sigurliði er á komandi vetri. Árni Páll Árnason verður tæplega í liðinu og alls ekki fyrirliði.

Athugasemdir

[Tómas Ibsen Halldórsson, 2.7.2015 kl. 11:47]

Samfylking er öfugnefni á þessum flokki.  Það sést best á frétt sem birtist í Fréttablaðinu í gær, en þar segir frá því að kallað er eftir nýjum aðalfundi í þeim tilgangi að skipta um forustu, þó fáir mánuðir séu liðnir frá því slíkur fundur var haldinn. 

Flokkurinn er klofinn í herðar niður og ætti með réttu að heita Sundurþykkjuflokkurinn.

[Snorri Hansson, 3.7.2015 kl. 03:24]

Vinstri  flokkur er í öllum samfélögum  og hinn eðlilegasti hlutur.

Jafnaðarmannaflokkur ætti  að vera til ,en  ekki verið á íslandi lengi.

  Þeir sem hafa kallað sig jafnaðarmenn undanfarið hafa verið  hópur andþjóðernissinnaðra , með drauma um að leggja Ísland inn í ESB   afþíbara , gaman saman og svoleiðis.

Það vantar raunverulegan jafnaðarmanna flokk á Íslandi sem er hugsaður fyrir sjálfstætt Ísland.

Að ætla  að stofna eina „breiðfylkinguna“ í safnið er eingöngu til þess að breiða yfir eigin skít síðustu ríkisstjórnar sem  geymdur er á safni í kössum sem ekki má opna í 90 ár :  Skipta um kennitölu  !!?