Grillað um helgar, mótmælt á virkum dögum

Lítið er að frétta af mótmælum á Austurvelli síðustu misserin. Ekki er langt síðan fólk mótmælti, ,,svona  af því bara". Stjórnarandstaðan veðjar á að tortóluumræðan veki lyst til mótmæla og boðar fund á Austurvelli eftir helgi.

Landsmenn munu, samkvæmt viðtengdri frétt, grilla dýrar og betur en síðan fyrir hrun. Fræg ummæli Hannesar Hólmsteins ,,grætt á daginn, grillað á kvöldin" lýstu ríkjandi viðhorfum á tímum útrásar.

Endurreisnin eftir hrun kallar á aðra manngerð. Mótmælafólkið grillar um helgar en mótmælir á virkum dögum eftir vinnu. Fer þó eftir veðri.

 

 

Dýr grill seljast grimmt

Víkingarnir færast nær Bandaríkjunum

Nýr fornleifafundur í Kanada gefur til kynna að norrænir víkingar gerðu sér bústað sunnar og vestar á meginlandi Ameríku, en áður er vitað. Fornleifarnar fundust með rannsóknum á gervitunglamyndum í hárri upplausn.

Samkvæmt frétt Telegraph eru fornleifarnar á suðurodda Nýfundnalands, á Rósuhöfða. Á sjöunda áratug síðustu aldar fundu norskir fornleifafræðingar víkingabústaði í Engjavík, L’Anse aux Meadows, í norðurhluta Nýfundnalands.

Íslenskar fornsögur, Grænlendingasaga og Eiríks saga rauða, segja frá landkönnuðum, Bjarna Herjólfssyni og Leifi heppna, sem fundu lönd vestur af Grænlandi og nefndu Helluland, Markland og Vínland. Þá er frásögn af tilraun Þorfinns karlefnis og Guðríðar Þorbjarnardóttur að setjast að í vesturheimi. Átök við innfædda, sem nefndir eru skrælingjar, gerði þau hjón afturreka til Skagafjarðar, heimahaga Þorfinns.

Vínland er syðsta landssvæðið sem Íslendingarnir kynntu sér á meginlandi Ameríku. Giskað er á að Vínland sé svæðið þar sem nú er New York í Bandaríkjunum.. Fornleifafundurinn á Rósuhöfða færir víkingana nær Bandaríkjunum.