Árni Páll: launafólk verr sett í dag en fyrir 94 árum

Formaður Samfylkingar segir íslenskt launafólk verr sett í dag en fyrir 94 árum þegar krónan var aftengd dönsku móðurmyntinni, sem Ísland bjó við sem hjálenda smáríkis á meginlandi Evrópu.

Árni Páll er ekki beittasti hnífurinn í skúffunni en fyrr má rota en dauðrota.

Íslendingar bjuggu margir í torfbæjum 1920, vöruskipti voru algeng og kúgildi var verðmæling. Ísland var þriðja heims ríki í atvinnulífi og efnahagsmálum.

Getur ekki einhver í Samfylkingunni bankað upp á hjá Árna Páli og sagt honum frá veruleikanum? Eða er enginn heima?

Misskilningur og hálfkæringur Jóns Ásgeirs

Fyrir misskilning lenti milljarður króna inn á einkareikning Jóns Ásgeirs Jóhannessonar í einni af mörgum viðskiptafléttum mannsins sem kenndur er við baug - þó ekki með geisla að forskeyti.

Auk misskilnings er hálfkæringur þekkt breyta á viðskiptaferli Jóns Ásgeirs, t.d. þegar stjórnarformaður Baugs bauð forsætisráðherra 300 milljónir kr. mútur - í hálfkæringi.

Við ígrundun væri kannski hægt að komast að þeirri niðurstöður að hrunið væri vegna misskilnings og hálfkærings. Í beinu framhaldi eru réttarhöldin yfir hrunkvöðlum misskilningur og hálfkæringur.

Sé nánar að gætt er líklega lífið sjálft misskilningur og hálfkæringur.

 

Milljarður millifærður fyrir mistök

Valfrelsi, einkagróði og blekking

Valfrelsi er nýja orðið sem einkaaðilar í heilbrigðisþjónustu nota til að telja okkur trú um að einkarekstur í heilbrigðismálum sé til hagsbóta fyrir almenning.

Í heilbrigðisþjónustu er almenningur bæði neytandi og greiðir fyrir þjónustuna - með skattfé. Ásdís Halla Bragadóttir reynir að telja okkur trú um að með einkaaðilar geti einir boðið upp á valfrelsi.

Opinberir aðilar geta vitanlega staðið fyrir valfrelsi. Það sést best á skólakerfinu. Nemendur geta valið sér framhaldsskóla, sem nær allir eru reknir af hinu opinbera.

Valfrelsið sem Ásdís Halla talar um er ekki í þágu almennings heldur orð til að dulbúa einkahagnað á
kostnað almannahags.