Heimspekingur Hitlers, borgarskæruliðinn og ameríkuandstyggðin

Heidegger var þýskur heimspekingur og jafnaldri Hitlers. Fyrir valdatöku nasista 1933 var Heidegger búinn að skila af sér stórvirkinu Stund og vitund (Sein und Zeit) sem skilgreindi hann sem heimspeking.

Heidegger þáði rektorsstöðu við háskólann í Freiburg við valdatöku nasista og freistaði þess að flétta nasisma inn í akademíska hugsun - jafn langsótt og það er. Brátt kólnaði þó á milli milli heimspekingsins og valdhafa. Heidegger lagðist í híði á meðan styrjöldin gekk yfir.

Eftir stríð var Heidegger bannað í fáein ár að kenna en naut brátt heimspeki sinnar þrátt fyrir nasíska fortíð. 

Svörtu dagbækur Heideggers, kallaðar svo sökum þess að kápan er svört, koma út þessi misserin og vekja áhuga, ekki síst vegna gruns um gyðingahatur. Michael Inwood ræðir dagbækurnar í Telegraph og dregur ekki fjöður yfir fordóma Heideggers gagnvart gyðingum og einfeldningslega trú á gyðingleg alheimssamsæri sem nasistar héldu á lofti.

Inwood nefnir í framhjáhlaupi að Heidegger var með horn í síðu nútímans með sinni vélhyggju og ,,ameríkanisma". Andúð á nútímanum, einkum amerísku útgáfuna, var rauður þráður í borgarskæruliðahópnum Baader-Meinhof sem gerði sig gildandi á sjöunda og áttunda áratug síðustu aldar.

Blaðamaðurinn og rithöfundurinn Joachim Fest, sem lifði nasismann og skrifaði um tímabilið, segir í bókarkafla um Úlriku Meinhof að eini munurinn andstyggðinni á nútímanum hjá nasistum annars vegar og hins vegar Baader-Meinhof-kynslóðinni er að svartnætti þeirra síðarnefndu var vinstripólitík en nasistar voru öfgahægrimenn.

Heidegger og Meinhof dóu sama árið, 1976, hún fyrir eigin hendi en hann saddur lífdaga.

Eftirminnileg mynd af Heidegger er af baksvipnum á honum og Rúdólf Augstein, stofnanda og ritstjóra Spiegel, þegar þeir voru á leiðinni í kofa heimspekingsins. Myndin er tekin tíu árum fyrir andlát Heideggers.

 

 

 

Nýr hægriflokkur úr 40% í 20% á tíu dögum

Fyrir tíu dögum mældist flokkur Benedikts, Þorsteins P. og Sveins Andra með 40% fylgi. Að tapa tveim prósentustigum á dag er nokkuð vel af sér vikið, einkum þegar haft er í huga að eina pólitíska markmið nýja flokksins er að koma Íslandi í Evrópusambandið.

Ekki er líklegt að almenningur skipti hratt um skoðun á því hvort Ísland skuli inn í ESB eða ekki.

Eina skýringin á stórkostlegu liðhlaupi í stuðningi við hægriflokkinn nýja er að fólk sá framan í smettið á þeim sem standa að flokksbröltinu.

Nýr flokkur nyti 20% stuðnings