Sagan hefnir sín á Evrópu

Evrópusambandið freistar loka landamærum sínum fyrir óæskilegum áhrifum, einkum  frá Miðausturlöndum og Afríku.

Ótti ESB við herskáa múslíma frá arabaheiminum magnast með því að margir sem berjast fyrir kalífadæmi í Sýrlandi og Írak undir merkjum Ríkis íslam eru túristamálaliðar frá Vestur-Evrópuríkjum.

Frá Afríku óttast Evrópusambandið ebólu-faraldurinn.

Trú og farsóttir voru einmitt helstu vopn Evrópumanna þegar þeir lögðu undir sig nýja heiminn fyrir hálfu árþúsundi.

Með kristni og hlaupabólu lögðu Spánverjar og Portúgalar undir sig Suður-Ameríku. Englendingar og Frakkar hirtu Norður-Ameríku með sambærilegum hætti.

Íslam og ebóla láta Evrópu núna finna til tevatnsins.

 

 

Vilja auka landamæragæslu ESB

Frjálshyggja í þágu fákeppni; áfengi og vopn

Bókstafur frjálshyggjunnar segir að frelsi einstaklingsins til orðs og æðis sé æðra rétti samfélagsins til öryggis og heilbrigðis. Á þessum frjálshyggjugrunni beita nokkrir þingmenn sér fyrir því að auka aðgengi að áfengi með því að afnema ríkiseinkasölu og færa áfengisverslunina í matvörubúðir.

Með því að máta frjálshyggjurökin til afnáms ríkiseinkasölu á áfengi við vopnalögin sést hversu frámunalega heimskuleg rökin eru.

Bókstafur frjálshyggjurnnar segir að opinberar takmarkanir á vopnaeign þrengi að rétti einstaklingsins til að ákveða sjálfur hvort hann eigi byssu, eina eða fleiri, og hvar hann kaupir vopnin. Rétt eins og áfengi eitt og sér er byssa sem slík saklaus hlutur sem ekki gerir neinum mein.

Á hinn bóginn er deginum ljósara að með betra aðgengi að skotvopnum aukast líkurnar á misnotkun þeirra. Nákvæmlega sama gildir um áfengi.

Reynslurökin sýna og sanna að samfélagið gerir rétt með því að setja sérstakar reglur um sölu og meðferð skotvopna og áfengis.

Frjálshyggjumenn láta það yfir sig ganga þegjandi og hljóðalaust að vopnalög skuli þrengd um leið og þeir berjast fyrir rýmri áfengissölu og auglýsa þar með hentistefnu sína. Frjálshyggjan er ekki prinsipp heldur verkfæri til að þóknast viðskiptahagsmunum fákeppnisverslunarinnar sem rekur Bónus, Hagkaup og Krónuna.

Frjálshyggja í þágu fákeppni þar sem almannahagsmunum er fórnað fyrir hagnað stórfyrirtækja er varla það sem meirihluti alþingis Íslendinga stendur fyrir.

Vopnalög þrengd í þágu almannahags