Flugnahöfðinginn með stelpum

Sagan Flugnahöfðinginn, Lord of the flies, greinir frá skólastrákum sem einangrast á eyðieyju og smíða samfélag sem byrjar vel en endar með blóðsúthellingum. Höfundurinn, William Golding, notar strákamenninguna sem spegil karlasamfélagsins.

Mínus kynhvötina. Strákarnir hans Golding eru undir kynþroskaaldri, nóg er ofbeldið samt.

Guardian segir frá fyrirhugaðri endurgerð kvikmyndaútgáfu á Flugnahöfðingjanum. En nýja útgáfan verður með stelpum í stað stráka.

Trúlega þarf að færa aldurinn niður, þar sem stúlkur verða fyrr kynþroska en karlar. Gagnrýnendur á fyrirhugaða kvikmynd telja að meginþema sögunnar, um grimmd karlkynsins, hljóti að fara fyrir ofan garð og neðan í kvenkynsuppfærslu.

Sumir femínistar eru raunar giska herskáir. Kannski er endurgerðin tímanna tákn.


Umræða um flóttamenn breytir stjórnmálum í Noregi

Sylvi Listhaug ráðherra innflytjendamála í Noregi og þingmaður Framfaraflokksins er talsmaður hóflegrar viðtöku flóttamanna. Hún gerði sér ferð til Svíþjóðar að varpa ljósi á afleiðingar óhefts flóttamannastraums.

Í Svíþjóð er vitað að sum hverfi flóttamanna eru nánast búin að segja sig úr lögum við sænskt samfélag. Lögreglumenn vitna um afleiðingarnar.

Heimsókn Listhaug skilaði sér í auknu fylgi Framfaraflokksins, segir í Aftenposten.


mbl.is Norskur ráðherra veldur usla í Svíþjóð
Tilkynna um óviðeigandi tengingu við frétt

Verkefnið geðveika Ísland

Skipuleg herferð stendur yfir að telja þjóðinni trú um að hún sé geðveikari en hún veit af. Almannatenglar er keyptir til að matreiða ofan í auðtrúa blaðamenn að faraldur geðveiki geisi í landinu.

Forsíða Fréttablaðsins í dag segir að þriðja hver heimsókn á heilsugæslu stafi af geðveiki. Aðrir fjölmiðlar spila með. Almannatenglar vinna eftir snjóboltaaðferðinni. Fréttafárið um geðveikina hleður á sig fleiri sögum um geðveika þjóð eftir því sem oftar er hoggið í sama knérunn.

Almannatenglar fá borgað fyrir vinnu sína af hagsmunasamtökum sem leita eftir auknu fé í málaflokkinn. Hagsmunasamtökin eru líklega að stærstum hluta þegar fjármögnuð með opinberum fjármunum.

Í fréttafárinu er ekki greint frá því hverjir standa að baki verkefninu um geðveika Ísland. Sannleikurinn um herferðina spillir fyrir tilgangi verkefnisins, að þjóðin trúi að hún sé geðveikari en hún áður vissi.

Ekki heldur er grafist fyrir um orsakir faraldursins. Enginn spyr hvers vegna við séum geðveikari í dag en fyrir tíu eða tuttugu árum. Sannleikurinn og fjölmiðlaherferð er eins og olía og vatn, blandast illa.

Verkefnið geðveika Ísland er með göfugan tilgang, að vekja umræðu um illvígan sjúkdóm og bæta úrræði sjúklinga. En það orkar tvímælis, svo ekki sé meira sagt, að efna til herferðar um að hér búi snargalin þjóð. Blessuð þjóðarbörnin gætu haft það eftir sem þeim er kennt. Og orðið geðveikari fyrir bragðið.


mbl.is Vilja bæta geðheilbrigðismál
Tilkynna um óviðeigandi tengingu við frétt

Uppreisn æru og glötuð virðing alþingis

Umræðan um uppreisn æru dæmdra manna er í eðli sínu ekki pólitísk og alls ekki flokkspólitísk. Kjarni umræðunnar er hvort og þá hvernig dæmdir menn fái á ný réttindi sem þeir glötuðu vegna dóms.

Þótt umræðan sé ekki pólitísk í venjulegum skilningi orðsins eru á henni margir fletir, sem sjálfsagt er að ræða og meta. Eins og gert er með fjölda frétta og færslna á bloggi og samfélagsmiðlum.

Það er alþingis að setja lög um þetta málefni eins og önnur. Hér var prýðisgott tækifæri fyrir þingmenn að sýna þjóðinni að löggjafasamkoman gæti unnið samhent að úrlausnarefni sem varðar meginreglur, prinsipp.

En þegar þingmenn og þingflokkar æða fram með sína flokkspólitísku útgáfu af lagabreytingum um uppreisn æru vinna þeir málinu tjón. Ekki síður staðfesta þeir orðsporið, sem loðir við þingið, að þingheimur er í varanlegum skotgrafahernaði.

Öllum ætti að vera augljóst að flokkspólitísk niðurstaða í þessu máli getur aldrei orðið almenn niðurstaða, sem byggir á sanngirni og réttsýni. 

Lagabreytingarnar, sem verða samþykktir, munu ekki á nokkurn hátt breyta högum þeirra sem þegar hafa fengið uppreisn æru. Lögin verða ekki afturvirk. Þingmenn ættu að koma sér upp úr skotgröfunum, horfa til framtíðar og setja almannahagsmuni ofar flokkspólitískum stundarhag.


mbl.is Vilja breyta lögum strax
Tilkynna um óviðeigandi tengingu við frétt

Kristið barn í fóstri múslímafjölskyldu: fjölmenning eða ofbeldi?

Krafist er rannsóknar á tildrögum þess að hvít stúlka, 5 ára gömul, var sett í fóstur hjá múslímafjölskyldu sem talar ekki móðurmál stúlkunnar, bannar henni að borða svínakjöt og að bera krosshálsmen.

Atvikið gerðist í Englandi og Telegraph fjallar um málið. Þar segir m.a. að múslímafjölskyldurnar tvær, sem barnið var vistað hjá, tala ekki ensku, telja jólahald ,,heimskulegt" og að vestrænar konur séu af lakari sortinni.

Dálkahöfundur Telegraph segir atvikið til marks um tilfinningakulda. Aðrir myndu jafnvel tala um ofbeldi og enn aðrir að hér sé fjölmenning í framkvæmd.


Hægribylgja í Evrópu og á Íslandi

Hægriflokkurinn í Noregi mælist stærstur flokka. Gangi það eftir í kosningunum í næsta mánuði yrði brotið í blað. 100 ár eru síðan Hægriflokkurinn var stærri en Verkamannaflokkurinn. Annar hægriflokkur, Framfaraflokkurinn, stefnir í gott mót í landi forfeðranna.

Kristilegir demókratar ætla að rúlla upp þýsku kosningunum, sem eru á næsta leiti. Nýr hægriflokkur, AfD, gæti orðið þriðji stærsti flokkurinn og það yrðu söguleg tíðindi.

Á Íslandi er Sjálfstæðisflokkurinn í sókn í höfuðborginni. Flokkur fólksins styrkir sig sem stjórnmálaafl en vinstriflokkar eru í lægð. Framsóknarflokkurinn hrapar.


mbl.is Sjálfstæðisflokkurinn langstærstur
Tilkynna um óviðeigandi tengingu við frétt

Frá nasisma til íslamista

Öfgarnar standa hver annarri nærri. Maður sem gengur öfgastefnu á hönd, hvort heldur nasisma, kommúnisma eða íslam, stýrist sjaldnast af pólitískri eða trúarlegri sannfæringu.

Öfgahyggja, sú hneigð að brjóta og bramla samfélagið, er pólitík og trú yfirsterkari. Sumar manngerðir þrífast best í átökum og upplausn.

Öfgamönnum vex ásmegni þegar grunngildi eru á floti. Eins og nú um stundir.


mbl.is Frá Ósló til öfga-íslam
Tilkynna um óviðeigandi tengingu við frétt

ESB-salat og magakveisa

ESB-salatið frá Ítalíu uppfyllti eflaust allar heilbrigðiskröfur Evrópusambandsins. Innflytjendur hrárra matvæla frá ESB eru duglegir að koma fram í fjölmiðlum og básúna öflugt regluverk Brussel.

Núna hljóta sömu innflytjendur að stökkva fram og brýna fyrir neytendum að lesa vel smáa letrið.

Innflutt hrávara frá ESB þarf sérstaka meðhöndlun til að valda ekki heilsutjóni.


mbl.is Salatið ekki selt í smásölu
Tilkynna um óviðeigandi tengingu við frétt

Múslímar milli nútíma og miðalda

Tyrkland var vestrænt múslímaríki áður en Erdogan forseti tók til við að farga mannréttindum í þágu trúarsetninga. Tyrkland er allt frá sjöunda áratug síðustu aldar í biðsal Evrópusambandsins að komast inn í félagsskapinn. Núna stefnir í að þeir hverfi til trúarinnar á kostnað mannréttinda.

Tyrkland er á jaðri ófriðarsvæðis miðausturlanda þar sem ónýt ríki, Sýrland og Írak, reyna að lappa upp á veraldlega stjórnmálamenningu í stríði við herskáa öfgamenn úr röðum múslíma. Trúarríkin Sádí-Arabía, þar sem súnní-múslímar ráða ferðinni, og Íran, höfuðríki shíta-múslíma, blása í glæður stríðsátaka.

Múslímar ætla að taka sér langan tíma að gera upp á milli miðalda og nútíma.

 


mbl.is Segir Tyrki fjarlægjast Evrópu hratt
Tilkynna um óviðeigandi tengingu við frétt

Minni hagvöxtur, meiri hamingja

Hagvöxtur yfir 5 prósent á ári er ekki við hæfi í nokkru þjóðfélagi, nema það sé að ná sér eftir hrun eða umbreytast úr vanþróuðu hagkerfi í þróað.

Ísland er hvorki að jafna sig eftir hrun né er það vanþróað. Hóflegur hagvöxtur upp á tvö prósent eða þar um bil er hæfilegur.

Óhóflegur hagvöxtur veldur innanmeinum. Innviðir gefa eftir, spákaupmennska eykst og bólumyndun býr til ímyndaðan auð, til dæmis í fasteignum.

Hamingjan liggur í meðalhófinu, eins og Aristótels kenndi okkur fyrir 2500 árum.


mbl.is Drifkraftar gefa eftir
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband