Gyðingaandúð góða fólksins

Verkfræðinemi sótti um skólavist í Kanada við virtan tækniskóla á sviði trésmíði og hönnunar. Hann fékk í fyrstu góðar viðtökur og undirbjó sig m.a. með því að kaupa sér námsgögn. En þegar ganga átti frá námsvistinni komu þessi skilaboð

vegna deilna og ólöglegra landnemabyggða á þessu landssvæði tekur skólinn ekki við umsóknum frá Ísraelum.

Verkfræðineminn er sem sagt gyðingur. Ríkisstjórn Ísraels deilir við samtök Palestínumanna um yfirráð yfir tilteknu landssvæði en verkfræðineminn á enga aðild að málinu.

Jerusalem Post segir frá samskiptum Stav Daron, verkfræðinemans, við kanadíska skólann. Góða fólkið í Kanada sagðist í tölvupósti verða að standa með siðferðilegri afstöðu sinni.

Siðferðileg afstaða góða fólksins í kanadíska skólanum er eftirfarandi: gyðingar með ísraelskt ríkisfangs eru óvelkomnir vegna deilna ísraelsku ríkisstjórnarinnar við nágranna sína.

Ef við skiptum út gyðingi fyrir múslíma og Ísrael fyrir Sýrland/Írak/Íran/Sómalíu/Líbýu/Jemen eða Súdan myndi málið vitanlega horfa allt öðru vísi við góða fólkinu.

 

Jafngildi „stríðsyfirlýsingu“

Trump-múrinn byrjaði í Evrópu

Byrjað var að reisa girðingar í Evrópu til að hamla för flóttamanna frá Norður-Afríku, miðausturlöndum og Asíu. Sumir flóttamenn flúðu heimkynni sín vegna stríðsátaka en aðrir í von um betri lífskjör á vesturlöndum.

Evrópa var í fyrstu jákvæð gagnvart flóttamönnum en varð síðar óttasleginn yfir fjölda flóttamanna annars vegar og hins vegar vantrú á að flóttamenn myndu aðlagast vestrænum lífsháttum.

Girðingar voru reistar á Balkanskaga og Ungverjalandi. Einstök ESB-ríki ákváðu í framhaldi að auka landamæragæslu til að takmarka straum flóttamanna. Trump forseti kemur í kjölfarið og takmarkar möguleika flóttafólks að koma til Bandaríkjanna - eins og hann lofaði að gera í kosningabaráttunni.

 

ESB hefur ekki efni á að gagnrýna Trump

Hatur, fegurð og sjálfstæð hugsun

Hatur og fegurð eiga það sameiginlegt að hvorug tilfinningin verður lögð á mælistiku. Hatur og fegurð eru hugarástand. Hugtakið hatursorðræða vísar í haturshugarfar sem tjáð er í orðum.

Tvær afleiðingar verða af því að gera hugsanir og tilfinningar refsiverðar. Í fyrsta lagi leiðir bannið til bældra tilfinninga. En almennt er talið að einstaklingar með bældar tilfinningar séu verr á sig komnir en hinir sem tjá tilfinningar sínar.

Í öðru lagi eru refsingar á tilfinningum viðurkenning á rétti hins opinbera, ríkisvaldsins, til að grípa inn í hugarástand fólks. Ríkisvald sem fær rétt til að stýra hugarfari einstaklinga finnur leiðir til að koma böndum á sjálfstæða hugsun. Enda augljóst að sjálfstæð hugsun er miklu hættulegri en allt heimsins hatur. Sjálfstæð hugsun afhjúpaði nekt valdsins, eins og sagði í ævintýrinu.

 

Tvö sakfelld fyrir hatursorðræðu

Píratar tapa RÚV til Vinstri grænna

Píratar bera sig aumlega eftir að fjölmiðill sem töldu sig eiga skuldlausan, RÚV, virðist halla sér að Vinstri grænum. Eyjan tekur saman umkvartanir Pírata gagnvart RÚV.

Katrín Jakobsdóttir formaður Vinstri grænna var liðna helgi fastagestur í fréttum RÚV að fordæma Trump og hafna einkarekstri í heilbrigðiskerfinu. Lítið sást til Pírata, aldrei þessu vant.

Píratar eru komnir á lista yfir lýðskrumsflokka og ekki hjálpar það upp á sakirnar. En útslagið fyrir fréttastofuna á Efstaleiti gerir þó sú staðreynd að Píratar skora lítið í skoðanakönnunum. RÚV veðjar alltaf á stærsta vinstriflokkinn. Einu sinni var það Samfylkingin, fyrir síðustu kosningar Píratar en núna Vinstri grænir.

Píratar fordæma tilskipanir Trumps

Ríkissaksóknari í herferð gegn mannréttindum

Ríkissaksóknari stendur fyrir atlögu að tjáningarfrelsinu. Frávísun héraðsdóms á máli ákæruvaldsins gegn Pétri Gunnlaugssyni og Útvarpi Sögu er sigur yfir ríkisvæddu ofbeldi.

Stóralvarlegt mál er þegar ríkisvaldið gerir atlögu að mannréttindum. Ríkisvaldinu er ætlað að verja mannréttindi en ekki hnekkja þeim.

Ríkissaksóknari hlýtur að segja starfi sínu lausu í kjölfar frávísunarinnar. 

„Stórskaðað okkur og mig persónulega“

Guðlaugur, gyðingar og múslímar

Gyðingum er bannað að ferðast til 16 arabalanda. Sum arabalönd leyfa gyðingum að koma til landsins en ekki handhöfum ísraelskra vegabréfa.

Þegar Guðlaugur utanríkisráherra fer í þá vinnu að liðka fyrir vegabréfsáritun íslenskra múslíma til Bandaríkjanna ætti hann að kíkja í leiðinni á stöðu íslenskra gyðinga gagnvart áritun til arabalanda.

Við viljum jú ekki mismuna fólki eftir trúarbrögðum. Er það nokkuð?

Tilskipunin veldur usla

Starfsþjálfun í stað ofmenntunar

Einhver hluti háskólanema ætti fremur heima í starfsþjálfun hjá fyrirtækjum. Esther Hallsdóttir talar fyrir þessum hópi nemenda, sem leiðast fræðin og óska eftir þjálfun á vinnumarkaði.

Með lögum sem hvetja fyrirtæki til að ráða ungt fólk í vinnu á námslaunum væri hægt að koma til móts við háskólanema sem ekki finna sig í fræðilegu námi.

Tvær flugur væru slegnar í einu höggi. Álag á háskóla minnkar og vinnumarkaðurinn fær aukinn starfskraft á raunhæfum kjörum.

Glæpamenn og vælandi siðleysingjar

Glæpamenn taka lögin í sínar hendur. Sumir, til dæmis Hrói höttur, gera það í þágu virðingarverðs málsstaðar. Aðrir, svo sem Madoff, stunda glæpi til að skara eld að eigin köku.

Útrásarglæpamenn Íslands sköruðu eld að eigin köku. Starfsemi þeirra var hvorki virðingarverð né í þágu almannahags.

Í stað þess að una dómsniðurstöðu eru íslensku útrásarglæpamennirnir sívælandi í fjölmiðlum um að þeir hafi ekki hlotið makleg málagjöld. Síðasta hálmstrá þeirra er að dómarar í hæstarétti hafi verið vanhæfir.

Ef maður hittir dæmdan bankaglæpamann á förnum vegi horfir hann á mann rannsakandi augum sem spyrja; ,,gæti ég átt von á vandræðum frá honum þessum." Bankaglæpamennirnir vilja eflaust ekki búa við tortryggni sem mætir þeim á götum og torgum. En siðblinda þeirra torveldar fyrirgefningu. Þeir neita sök en eru sekir eins og syndin. Svoleiðis fólk fær ekki fyrirgefningu synda sinna - jafnvel þótt dómar yrðu ógiltir af tæknilegum ástæðum.

Hagsmunir dómara til Mannréttindadómstólsins

Múslímar í Bandaríkjunum og Rússlandi

Forsetar Rússlands og Bandaríkjanna eru sammála um að herskáir múslímar séu ógn við þjóðaröryggi.

Múslímar í Bandaríkjunum eru um 3,3 milljónir eða eitt prósent mannfjöldans. Í Rússlandi eru múslímar 16,5 milljónir og nær 12 prósent mannfjöldans.

Af þessum tölum mætti ráða að múslímar í Rússlandi væru til meiri vandræða en múslímar í Bandaríkjunum. En því er þveröfugt farið. Hryðjuverk herskárra múslíma eru framin í Bandaríkjunum en lítið fer fyrir þeim í Rússlandi.

Nærtæk ályktun er að opið og frjálslynt bandarískt þjóðfélag henti múslímum verr sem heimkynni en lokað og íhaldssamt Rússland. Og hvers vegna er það? Líklegasta skýringin er að trúarmenning múslíma, sem er bæði lokuð og íhaldssöm, lendir í tilvistarkreppu í frjálsu og opnu samfélagi. Tilvistarkreppan brýst út í ofbeldi.

Múslímar eru heima hjá sér í lokuðu og íhaldssömu samfélagi, hvort sem það er í Rússlandi eða Íran. Í frjálslum og opnum samfélögum, t.d. Bandaríkjunum, Frakklandi og Þýskalandi rata múslímar í ógöngur. Þeir taka upp ósiði eins og að drepa saklaust fólk í nafni trúarinnar sem afneitar vestrænum lífsháttum.

 

 

 

Trump: „Gengur ljómandi vel“

Austfirski kommúnisminn er rauðklædd fjallkona

Sósíalistaflokkurinn og síðar Alþýðubandalagið réðu ferðinni á Norðfirði. Neskaupstaður var  rauði bærinn. Stærsta fyrirtækið í bænum, Síldarvinnslan, er stofnuð af bæjarbúum fyrir meira en hálfri öld og samvinnufélagi útgerðarmanna.

Mesti leiðtoginn sem rauði bærinn ól af sér var Lúðvík Jósepsson er varð formaður Alþýðubandalagsins. Lúðvík var einarður þjóðernissinni og baráttumaður bættra lífskjara alþýðunnar. Hann var sjávarútvegsráðherrann sem hóf þorskastríðin við heimsveldið Bretland á síðustu öld þegar hann færði einhliða út landhelgina í 12 mílur árið 1958.

Austfirski kommúnisminn er lókalútfærsla á rétti alþýðu manna til kosta og gæða landsins og fiskimiðanna. Rauðklædd fjallkona væri tákn við hæfi. Þangað til að hún kemur fram er sovétfáni Einars Más vel brúklegur.

Kommablótið haldið í 51. sinn